Oʻzbekiston Respublikasi Oliy Majlisi Qonunchilik palatasining qoʻmitalari huzurida Jamoatchilik kengashlari faoliyatini tashkil etish toʻgʻrisida (424-V-son)

03.02.2025

Oʻzbekiston Respublikasi Oliy Majlisi Qonunchilik palatasi Kengashining

qarori

Oʻzbekiston Respublikasi Prezidenti Sh.M. Mirziyoyevning 2024-yil 18-noyabr kuni Oʻzbekiston Respublikasi Oliy Majlisi Qonunchilik palatasining birinchi majlisidagi nutqida quyi palata qoʻmitalari faoliyatida fuqarolik jamiyati institutlari bilan muloqotni kuchaytirish borasida bildirilgan tashabbuslarni oʻz vaqtida hayotga tatbiq qilish, shuningdek qonun ijodkorligi jarayonining sifati va samaradorligini yanada oshirish hamda keng jamoatchilikning qonun loyihalarini ishlab chiqishdagi ishtirokini kengaytirish maqsadida Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasi qoʻmitalari huzuridagi Jamoatchilik kengashlari faoliyatini tashkil etish boʻyicha tavsiyalar ilovaga muvofiq tasdiqlansin.

2. Oʻzbekiston Respublikasi Oliy Majlisi Qonunchilik palatasining qoʻmitalari:

Oʻzbekiston Respublikasi Oliy Majlisi Qonunchilik palatasining qoʻmitalari huzurida ekspertlar, mutaxassislar va fuqarolik jamiyati institutlari vakillaridan iborat Jamoatchilik kengashlarini tuzish choralarini koʻrsin;

qonun loyihalari muhokamasi jarayonlarida, shuningdek davra suhbatlari, konferensiyalar, seminarlar va boshqa tadbirlarni tashkil etishda oʻzlarining huzurida tuziladigan Jamoatchilik kengashlari orqali ekspertlar, mutaxassislar va fuqarolik jamiyati institutlari vakillari bilan hamkorlikni yoʻlga qoʻyishga alohida eʼtibor qaratsin.

3. Ushbu Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosarlari zimmasiga yuklatilsin.

4. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri N. ISMOILOV

Toshkent sh.,

2025-yil 3-fevral,

424-V-son