Oʻzbekiston Respublikasi Oliy Majlisi Qonunchilik palatasining faoliyatini ommaviy axborot vositalarida va ijtimoiy tarmoqlarda yoritish ishlari samaradorligini oshirish boʻyicha 2025-yilga moʻljallangan “yoʻl xaritasi” toʻgʻrisida (256-V-son)

07.01.2025

Oʻzbekiston Respublikasi Oliy Majlisi Qonunchilik palatasi Kengashining

qarori

Oʻzbekiston Respublikasi Oliy Majlisi Qonunchilik palatasining faoliyatida ochiqlik va oshkoralikni taʼminlash, deputatlar korpusining qonun ijodkorligi, parlament nazoratini amalga oshirish boʻyicha jamoatchilikka ishonchli va tezkor axborot yetkazish borasidagi ishlar natijadorligini taʼminlash maqsadida Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasining faoliyatini ommaviy axborot vositalarida va ijtimoiy tarmoqlarda yoritish ishlari samaradorligini oshirish boʻyicha 2025-yilga moʻljallangan “yoʻl xaritasi” (bundan buyon matnda “Yoʻl xaritasi” deb yuritiladi) ilovaga muvofiq tasdiqlansin.

2. “Yoʻl xaritasi”da nazarda tutilgan vazifalar va tadbirlarning bajarilishi uchun Oʻzbekiston Respublikasi Oliy Majlisi Qonunchilik palatasining Spikeri oʻrinbosarlari, qoʻmitalari raislari va Devoni rahbari masʼul ekanligi belgilab qoʻyilsin.

3. Oʻzbekiston Respublikasi Oliy Majlisining Qonunchilik palatasidagi siyosiy partiyalar fraksiyalariga “Yoʻl xaritasi”da belgilangan tegishli tadbirlarni oʻz vaqtida va sifatli amalga oshirish choralarini koʻrish tavsiya etilsin.

4. Ushbu Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosarlari zimmasiga yuklatilsin.

5. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasi Spikerining oʻrinbosari R. XAKIMOV

Toshkent sh.,

2025-yil 7-yanvar,

256-V-son