“Fidokorona xizmatlari uchun” ordenini taʼsis etish toʻgʻrisida (526-II-son)

29.08.2003

Oʻzbekiston Respublikasining qonuni

Oʻzbekiston Respublikasi Oliy Majlisi qaror qiladi:

1. “Fidokorona xizmatlari uchun” ordeni taʼsis etilsin.

2. “Fidokorona xizmatlari uchun” ordeni toʻgʻrisidagi nizom tasdiqlansin (ilova qilinadi).

3. “Fidokorona xizmatlari uchun” ordenining tavsifi tasdiqlansin (ilova qilinadi).

4. 1995-yil 22-dekabrda qabul qilingan “Davlat mukofotlari toʻgʻrisida”gi Oʻzbekiston Respublikasi Qonunining (Oʻzbekiston Respublikasi Oliy Majlisining Axborotnomasi, 1995-yil, № 12, 266-modda; 1996-yil, № 5-6, 63-modda, № 9, 120-modda; 1998-yil, № 9, 163-modda; 2000-yil, № 7-8, 202-modda) 11-moddasi “El-yurt hurmati” ordeni” degan soʻzlardan keyin “Fidokorona xizmatlari uchun” ordeni” degan soʻzlar bilan toʻldirilsin.

Oʻzbekiston Respublikasining Prezidenti I. KARIMOV

Toshkent sh.,

2003-yil 29-avgust,

526-II-son

ILOVA

“Fidokorona xizmatlari uchun” ordeni toʻgʻrisidagi

NIZOM

1. “Fidokorona xizmatlari uchun” ordeni bilan mamlakatning iqtisodiy va madaniy yuksalishiga, mudofaa qudratini kuchaytirish va milliy xavfsizligini taʼminlashga, jamiyatda tinchlik va barqarorlikni, millatlararo hamjihatlikni mustahkamlashga, xalq farovonligini oshirishga katta hissa qoʻshgan, oʻzining isteʼdodi, bilim va tajribasini Vatanimiz ravnaqiga baxsh etib, fidoiylik namunasini koʻrsatib kelayotgan fuqarolar va harbiy xizmatchilar mukofotlanadi.

“Fidokorona xizmatlari uchun” ordeni bilan Oʻzbekiston Respublikasi fuqarosi boʻlmagan shaxslar ham mukofotlanishi mumkin.

2. “Fidokorona xizmatlari uchun” ordeni bilan mukofotlashga taqdim etish, mukofotlash va ordenni topshirish “Davlat mukofotlari toʻgʻrisida”gi Oʻzbekiston Respublikasi Qonunida nazarda tutilgan tartibda amalga oshiriladi.

3. “Fidokorona xizmatlari uchun” ordeni bilan mukofotlangan shaxslar bazaviy hisoblash miqdorining qirq besh karrasi miqdorida bir yoʻla toʻlanadigan pul mukofoti oladilar va qonunchilikda belgilab qoʻyilgan imtiyozlardan foydalanadilar.

4. “Fidokorona xizmatlari uchun” ordeni koʻkrakning chap tomoniga taqiladi.

5. “Fidokorona xizmatlari uchun” ordeni bilan vafotidan keyin mukofotlangan taqdirda orden, mukofotlash toʻgʻrisidagi hujjat va bir yoʻla toʻlanadigan pul mukofoti mukofotlanganning oilasiga topshiriladi.

ILOVA

“Fidokorona xizmatlari uchun” ordenining

TAVSIFI

“Fidokorona xizmatlari uchun” ordeni 1 mikron qalinlikdagi oltin qoplangan 925 probali kumushdan tayyorlanadi hamda sakkiz qirrali yoqut rangli yulduz shaklida boʻladi. Yulduz burchaklari orasida oq emal qoplamasi uzra taralayotgan nurlar aks etgan. Yulduzning qarama-qarshi qirralari oraligʻi — 52 millimetr.

Ordenning markazidagi doirada tilla rangdagi Humo qushi tasvirlangan. Uning ortida — markazdan yuqoriroqdagi moviy manzara bagʻrida Oʻzbekiston Respublikasining oltinrang xaritasi joylashgan.

Tasvir atrofidagi oq emalli hoshiya uzra oltin rangdagi harflar bilan “FIDOKORONA XIZMATLARI UCHUN” soʻzlari yozilgan.

Ordenning quyi qismida oq rangli paxta chanoqlari va tilla rangli bugʻdoy boshoqlari tasvirlangan.

Orqa tomonining pastki qismida Ordenning tartib raqami 1 millimetr kattalikdagi botiq shrift bilan yozigʻliq.

Orden Oʻzbekiston Respublikasining Davlat bayrogʻi ranglaridagi shoyi lenta sirilgan qadagʻichga halqa va ilmoqcha yordamida ulanadi.

“FIDOKORONA XIZMATLARI UChUN” ORDENI

Muallif Karimov I.A.