Insonning konstitutsiyaviy huquqlari va erkinliklariga rioya etilishi boʻyicha komissiyani tuzish toʻgʻrisida (402-V-son)

29.01.2025

Oʻzbekiston Respublikasi Oliy Majlisi Qonunchilik palatasi Kengashining va Oʻzbekicton Respublikasi Oliy Majlisi Senati Kengashining

Qoʻshma qarori

Insonning konstitutsiyaviy huquqlari va erkinliklariga rioya etilishi kafolatlarini kuchaytirish maqsadida “Oʻzbekiston Respublikasi Oliy Majlisining Inson huquqlari boʻyicha vakili (ombudsman) toʻgʻrisida”gi Oʻzbekiston Respublikasi Qonunining 41-moddasiga muvofiq Oʻzbekiston Respublikasi Oliy Majlisi Qonunchilik palatasining Kengashi va Oʻzbekiston Respublikasi Oliy Majlisi Senatining Kengashi qaror qiladilar:

1. Insonning konstitutsiyaviy huquqlari va erkinliklariga rioya etilishi boʻyicha komissiya 1-ilovaga muvofiq tarkibda tuzilsin.

2. Insonning konstitutsiyaviy huquqlari va erkinliklariga rioya etilishi boʻyicha komissiya toʻgʻrisidagi nizom 2-ilovaga muvofiq tasdiqlansin.

3. Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining ayrim qoʻshma qarorlari 3-ilovaga muvofiq oʻz kuchini yoʻqotgan deb topilsin.

4. Ushbu Qoʻshma qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri N. ISMOILOV

Toshkent sh.,

2025-yil 29-yanvar,

402-V-son

Oʻzbekiston Respublikasi Oliy Majlisi Senatining Raisi T. NARBAYEVA

Toshkent sh.,

2025-yil 29-yanvar,

KQ-56-V-son

Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2025-yil 29-yanvardagi 402-V/KQ-56-V-sonli Qoʻshma qaroriga 1-ILOVA

Insonning konstitutsiyaviy huquqlari va erkinliklariga rioya etilishi boʻyicha komissiyaning

TARKIBI

EshmatovaFeruza Farxadovna–Oʻzbekiston Respublikasi Oliy Majlisining Inson huquqlari boʻyicha vakili (ombudsman), komissiya raisiNarimanov Bekzod Abduvaliyevich–Oʻzbekiston Respublikasi Oliy Majlisining Inson huquqlari boʻyicha vakili (ombudsman) oʻrinbosari, komissiya raisi oʻrinbosariRaxmonova Surayyo Maxmudovna–Oʻzbekiston Respublikasi Oliy Majlisining Bola huquqlari boʻyicha vakili (Bolalar ombudsmani)RashidovaSayyora Sharafovna–Oʻzbekiston Respublikasi Fanlar akademiyasining akademigiMuxammadiyev Ulugʻbek Nasriddinovich–“Tashkent Perfect University” universiteti prorektoriTulyakovEldor Sobirjonovich–“Taraqqiyot strategiyasi” markazi ijrochi direktoriMamatxanovAskar Maxmutovich–“Yuksalish” harakati raisi oʻrinbosari – ijrochi direktoriXodjayevaSayyora Ataxanovna–Demokratiya va inson huquqlari instituti direktoriKarimovaNodira Erkinovna–Respublika “Istiqbolli avlod” ijtimoiy axborot markazi raisiSharipovBexzod Shuxratovich–“Mintaqaviy muloqot” xalqaro nodavlat notijorat tashkilotining Oʻzbekistondagi boʻlimi boshligʻi oʻrinbosariGaniyevShuxrat Abduraimovich–“Gumanitar huquqiy markaz” direktoriFarmonov Aʼzam Turgʻunovich–“Huquqiy tayanch” nodavlat notijorat tashkiloti raisiTursunmurodovRustambek Permatovich–Kasaba uyushmalari tashkilotlari birlashmasi Sirdaryo viloyati Kengashi raisiTuxtasinovIlxom Madaminovich–Oʻzbekiston jahon tillari universiteti rektoriBektemirovXamro Solayevich–Xorazm viloyati maktabgacha va maktab taʼlimi boshqarmasi boshligʻiShlimbetov Jenisbay Kurbanbayevich–Oʻzbekiston Respublikasi Oliy Majlisi Inson huquqlari boʻyicha vakilining (ombudsmanning) Qoraqalpogʻiston Respublikasidagi mintaqaviy vakiliLavozimi boʻyicha–Oʻzbekiston Respublikasi Oliy Majlisi Inson huquqlari boʻyicha vakilining (ombudsmanning) Andijon viloyatidagi mintaqaviy vakiliXuseynova Abira Amanovna–Oʻzbekiston Respublikasi Oliy Majlisi Inson huquqlari boʻyicha vakilining (ombudsmanning) Buxoro viloyatidagi mintaqaviy vakiliJoʻrayev Oʻtkir Kamilovich–Oʻzbekiston Respublikasi Oliy Majlisi Inson huquqlari boʻyicha vakilining (ombudsmanning) Jizzax viloyatidagi mintaqaviy vakiliSaodatova Lola Musurmonovna–Oʻzbekiston Respublikasi Oliy Majlisi Inson huquqlari boʻyicha vakilining (ombudsmanning) Qashqadaryo viloyatidagi mintaqaviy vakiliDjurayev Shuxrat Nizamovich–Oʻzbekiston Respublikasi Oliy Majlisi Inson huquqlari boʻyicha vakilining (ombudsmanning) Navoiy viloyatidagi mintaqaviy vakiliValiyev Jaxongir Mamadaliyevich–Oʻzbekiston Respublikasi Oliy Majlisi Inson huquqlari boʻyicha vakilining (ombudsmanning) Namangan viloyatidagi mintaqaviy vakiliLavozimi boʻyicha–Oʻzbekiston Respublikasi Oliy Majlisi Inson huquqlari boʻyicha vakilining (ombudsmanning) Samarqand viloyatidagi mintaqaviy vakiliAlimovShuxrat Ashrabovich–Oʻzbekiston Respublikasi Oliy Majlisi Inson huquqlari boʻyicha vakilining (ombudsmanning) Sirdaryo viloyatidagi mintaqaviy vakiliArtikov Abdurashid Zairovich–Oʻzbekiston Respublikasi Oliy Majlisi Inson huquqlari boʻyicha vakilining (ombudsmanning) Surxondaryo viloyatidagi mintaqaviy vakiliKamalov Rustam Jamalovich–Oʻzbekiston Respublikasi Oliy Majlisi Inson huquqlari boʻyicha vakilining (ombudsmanning) Toshkent viloyatidagi mintaqaviy vakiliKamilov Alisher Odilovich–Oʻzbekiston Respublikasi Oliy Majlisi Inson huquqlari boʻyicha vakilining (ombudsmanning) Fargʻona viloyatidagi mintaqaviy vakiliOllayorov Odilbek Davlatovich–Oʻzbekiston Respublikasi Oliy Majlisi Inson huquqlari boʻyicha vakilining (ombudsmanning) Xorazm viloyatidagi mintaqaviy vakiliMasharipovBaxtiyar Raimbergenovich–Oʻzbekiston Respublikasi Oliy Majlisi Inson huquqlari boʻyicha vakilining (ombudsmanning) Toshkent shahridagi mintaqaviy vakiliXayitovTemurbek Raxmataliyevich–Oʻzbekiston Respublikasi Oliy Majlisi Inson huquqlari boʻyicha vakili (ombudsman) Kotibiyatining mudiri, komissiya kotibi.

Izoh: Komissiya aʼzolari boshqa ishga oʻtgan taqdirda ushbu lavozimlarga yangidan tayinlangan shaxslar yoki tegishli majburiyatlarni bajarish zimmasiga yuklatilgan masʼul shaxslar komissiya tarkibiga kiradi.

Insonning konstitutsiyaviy huquqlari va erkinliklariga rioya etilishi boʻyicha komissiya toʻgʻrisida

NIZOM

1-bob. Umumiy qoidalar

1. Ushbu Nizom “Oʻzbekiston Respublikasi Oliy Majlisining Inson huquqlari boʻyicha vakili (ombudsman) toʻgʻrisida”gi Oʻzbekiston Respublikasi Qonuniga muvofiq Insonning konstitutsiyaviy huquqlari va erkinliklariga rioya etilishi boʻyicha komissiyaning (bundan buyon matnda Komissiya deb yuritiladi) asosiy vazifalari, huquqlari, majburiyatlari va faoliyatining tashkiliy-huquqiy asoslarini belgilaydi.

2. Komissiya maslahat organi boʻlib, Oʻzbekiston Respublikasi Oliy Majlisining Inson huquqlari boʻyicha vakili (ombudsman) (bundan buyon matnda Ombudsman deb yuritiladi) huzurida jamoatchilik asosida faoliyat yuritadi.

3. Komissiya oʻz faoliyatida Oʻzbekiston Respublikasining Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, boshqa qonunchilik hujjatlariga va Oʻzbekiston Respublikasining xalqaro shartnomalariga, mazkur Nizomga, shuningdek Ombudsmanning farmoyish va topshiriqlariga amal qiladi.

4. Komissiya faoliyatining asosiy prinsiplari qonuniylik, mustaqillik, adolatlilik, insonparvarlik, kamsitishga yoʻl qoʻymaslik, xolislik, ochiqlik iboratdir.

5. Komissiya faoliyatining tashkiliy va moddiy-texnik taʼminoti Ombudsman Devoni tomonidan amalga oshiriladi.

2-bob. Komissiyaning asosiy vazifalari

6. Komissiyaning asosiy vazifalari quyidagilardan iborat:

Ombudsmanga inson huquqlari, erkinliklari va qonuniy manfaatlariga oid davlat siyosatini amalga oshirishda ishtirok etishiga koʻmaklashish;

inson huquqlari va erkinliklari toʻgʻrisidagi qonunchilik hujjatlari hamda mazkur sohadagi davlat dasturlarining bajarilishi, shuningdek tegishli davlat organlari, shu jumladan huquqni muhofaza qiluvchi va nazorat qiluvchi organlar, korxonalar, muassasalar, tashkilotlar (bundan buyon matnda tashkilotlar deb yuritiladi) hamda mansabdor shaxslarning huquqni qoʻllash amaliyotida qonuniylikka rioya qilishi ustidan jamoatchilik nazoratini tashkil etish;

Oʻzbekiston Respublikasining qonun hujjatlarini yanada takomillashtirish, xalqaro huquq normalarini implementatsiya qilish hamda inson huquqlari va erkinliklari sohasidagi xalqaro shartnomalarga Oʻzbekiston Respublikasining qoʻshilishi boʻyicha takliflar ishlab chiqish;

jamiyatda aholining huquqiy ongi va huquqiy madaniyati darajasini tahlil qilish hamda yuksaltirish, aholi oʻrtasida inson huquqlari va erkinliklariga hurmat bilan munosabatda boʻlish, qonunga itoatkorlik koʻnikmalarini shakllantirish boʻyicha chora-tadbirlarni amalga oshirish;

inson huquqlari va erkinliklari himoya qilinishini taʼminlashda nodavlat notijorat tashkilotlari, fuqarolarning oʻzini oʻzi boshqarish organlari, ommaviy axborot vositalari va fuqarolik jamiyatining boshqa institutlari rolini oshirishga, bu sohada jamoatchilik nazoratini amalga oshirishga, fuqarolik jamiyati institutlari hamda tegishli davlat organlari oʻrtasida ijtimoiy hamkorlikni mustahkamlashga qaratilgan chora-tadbirlarni tashkil qilish;

rivojlangan demokratik davlatlarning inson huquqlari va erkinliklarini himoya qilish sohasidagi tajribasini, ushbu jaryonlarni taʼminlash va monitoring qilish boʻyicha maxsus milliy institutlar faoliyatini chuqur oʻrganish va umumlashtirish, ilgʻor xorijiy tajribadan Oʻzbekiston Respublikasi sharoitida foydalanish imkoniyati haqida takliflar tayyorlash;

Ombudsmanning inson huquqlarini himoya qilish boʻyicha xalqaro tashkilotlar va xorijiy institutlar bilan hamkorligini mustahkamlashga, ularni inson huquqlari va erkinliklari sohasidagi xalqaro shartnomalarning Oʻzbekiston Respublikasi tomonidan bajarilishi toʻgʻrisida xabardorligini oshirishga qaratilgan faoliyatiga koʻmaklashish.

3-bob. Komissiyaning huquq va majburiyatlari

7. Komissiya quyidagi huquqlarga ega:

tashkilotlar va ularning mansabdor shaxslari tomonidan inson huquqlari va erkinliklari toʻgʻrisidagi qonunchilikka hamda Oʻzbekiston Respublikasining xalqaro shartnomalariga rioya etilishini tekshirish va monitoringini oʻtkazish;

Oʻzbekiston Respublikasi fuqarolarining, Oʻzbekiston Respublikasi hududida turgan chet el fuqarolarining va fuqaroligi boʻlmagan shaxslarning, yuridik shaxslarning inson huquqlari va erkinliklarini buzayotgan tashkilotlarning yoki mansabdor shaxslarining harakatlari yoki harakatsizligi ustidan bergan shikoyatlarini koʻrib chiqish, mazkur shikoyatlarni koʻrib chiqish natijalari boʻyicha xulosalar ishlab chiqish;

Ombudsmanning taklifiga muvofiq inson huquqlari va erkinliklarining, shuningdek davlat va jamiyat manfaatlarining buzilishiga sabab boʻlgan holatlar yuzasidan tekshirish va monitoring oʻtkazish haqida qaror qabul qilish;

koʻrib chiqilayotgan masalalar yuzasidan axborot va tushuntirish berish uchun mansabdor shaxslar, mutaxassislar va boshqa shaxslarni oʻz majlislariga taklif etish, tashkilotlardan idoraviy hujjatlar, statistik va boshqa maʼlumotlar, xulosalar hamda boshqa maʼlumotlarni soʻrash, talab qilib olish;

Ombudsmanga uning Oʻzbekiston Respublikasi Oliy Majlisi palatalari qoʻmitalariga davlat organlari rahbarlarining axborotlarini eshitish toʻgʻrisida murojaat etish haqidagi takliflarni kiritish;

Ombudsmanga u tomonidan Oʻzbekiston Respublikasi Konstitutsiyaviy sudiga murojaat qilish huquqidan foydalanish, shuningdek sudlarga davlat bojini toʻlamagan holda fuqarolar manfaatlarini koʻzlab beriladigan arizalar va daʼvolar bilan murojaat qilish toʻgʻrisida takliflarni kiritish;

Ombudsmanga u tomonidan, harakatlarida (harakatsizligida) inson huquqlari va erkinliklari buzilganligi aniqlangan shaxslarni javobgarlikka tortish toʻgʻrisida tashkilotlarga iltimosnoma kiritish, shuningdek inson huquqlari va erkinliklari toʻgʻrisidagi qonunchilikning aniqlangan buzilishlarini, ularga imkon beruvchi sabablar va shart-sharoitlarni bartaraf etish haqida tashkilotlarning rahbarlariga koʻrib chiqilishi majburiy boʻlgan taqdimnomalar kiritish yuzasidan takliflar berish;

Ombudsmanga qonun hujjatlarini va huquqni qoʻllash amaliyotini takomillashtirish, Oʻzbekiston Respublikasining inson huquqlari sohasidagi halqaro shartnomalarga qoʻshilishi masalalari boʻyicha taklif kiritish;

Komissiya oʻz zimmasiga yuklatilgan vazifalarni bajarish uchun belgilangan tartibda vazirliklar, davlat qoʻmitalari, idoralar, ilmiy va taʼlim muassasalari, nodavlat notijorat tashkilotlari, fuqarolarning oʻzini oʻzi boshqarish organlari, ommaviy axborot vositalari va fuqarolik jamiyati boshqa institutlarining vakillarini jalb etish;

inson huquq va erkinliklarini himoya qilish hamda jamoatchilik nazoratini amalga oshirishda fuqarolik jamiyati institutlarining rolini oshirish boʻyicha, shuningdek taʼlim, sogʻliqni saqlash, aholining ijtimoiy ehtiyojmand qatlamlarini qoʻllab-quvvatlash, atrof-muhit muhofazasi va boshqa sohalardagi davlat dasturlarini bajarishda nodavlat notijorat tashkilotlari bilan tegishli davlat organlari oʻrtasida ijtimoiy hamkorlikni mustahkamlash yuzasidan takliflar kiritish;

Ombudsmanning faoliyati toʻgʻrisidagi maʼruzasini, uning inson huquqlari va erkinliklarini taʼminlashga oid alohida masalalar boʻyicha maʼruzalarini, shuningdek Komissiyaning kelgusi hisobot davri uchun ish rejasini tayyorlashda ishtirok etish;

inson huquq va erkinliklariga taalluqli normativ-huquqiy hujjatlarni ishlab chiqish va ekspertizadan oʻtkazish, qonunchilik hujjatlari ijrosi yuzasidan monitoring yuritish, jismoniy va yuridik shaxslarning murojaatlarini koʻrib chiqish, rivojlangan demokratik davlatlarning inson huquqlarini himoya qilish sohasidagi tajribasini oʻrganish va umumlashtirish kabi masalalar boʻyicha ishchi guruhlarini shakllantirish.

Komissiya qonunchilik hujjatlariga muvofiq boshqa huquqlarga ham ega boʻlishi mumkin.

8. Komissiyaning majburiyatlari quyidagilardan iborat:

Oʻzbekiston Respublikasi Oliy Majlisi palatalari, Ombudsman tomonidan qabul qilingan inson huquqlari, erkinliklari va qonuniy manfaatlarini taʼminlashga qaratilgan qarorlar ijrosini taʼminlash;

Oʻzbekiston Respublikasi Oliy Majlisi palatalari, Ombudsman va Komissiya tomonidan qabul qilingan qarorlarning oʻz vaqtida sifatli bajarilishi ustidan nazorat olib borish;

Komissiya zimmasida qonunchilik hujjatlariga muvofiq boshqa majburiyatlar ham boʻlishi mumkin.

4-bob. Komissiyani shakllantirish tartibi

9. Komissiya rais (Ombudsman), rais oʻrinbosari (Ombudsman oʻrinbosari), masʼul kotib (Ombudsman Devonining rahbari) va boshqa aʼzolardan iborat tarkibda tuziladi.

Masʼul kotib Komissiyaning kundalik faoliyatini olib boradi va Komissiya qarorlarining bajarilishini nazorat qiladi.

Komissiya inson huquq va erkinliklari sohasida kasbiy va amaliy koʻnikmalarga ega boʻlgan nodavlat notijorat tashkilotlari, ommaviy axborot vositalarining vakillari hamda olimlardan iborat tarkibda shakllantiriladi.

Komissiya tarkibiga ijro hokimiyati organlarining vakillari ham maslahat ovoziga ega boʻlgan holda kiritilishi mumkin.

10. Komissiya aʼzolari Oʻzbekiston Respublikasi Oliy Majlisi Qonunchilik palatasi Kengashi va Senati Kengashining Qoʻshma qarori bilan Ombudsman taqdimiga asosan uning vakolat muddatiga tasdiqlanadi.

Komissiya aʼzolari oʻz vakolat muddatlari tugagach, yangi Ombudsman saylanguniga qadar oʻz vakolatlarini bajarishni davom ettirib turadi.

5-bob. Komissiya raisi va aʼzolarining vakolatlari

11. Komissiya raisi:

Komissiya faoliyati ustidan rahbarlikni amalga oshiradi va uning aʼzolari funksional vazifalarini belgilaydi;

Komissiya majlislarini chaqiradi, ularda raislik qiladi, kun tartibini va taklif etiladigan ishtirokchilar roʻyxatini shakllantiradi;

Komissiyaning kelgusi hisobot davri uchun moʻljallangan ish rejasini, joriy nazorat, monitoring, tadqiqot va tahliliy ishlari dasturlarini, shuningdek ularni bajarishga masʼul boʻlgan, Komissiya tomonidan tashkil qilingan ishchi guruhlar tarkiblarini tasdiqlaydi;

Komissiyaning qarorlari va boshqa hujjatlarini imzolaydi;

Komissiya raisi qonunchilik hujjatlariga muvofiq boshqa vakolatlarni ham amalga oshirishi mumkin.

12. Komissiya aʼzolari:

Komissiya majlislarida, kun tartibidagi masalalarni muhokama qilishda, Komissiyaning ish rejasida belgilangan tadbirlarni amalga oshirishda, uning qarorlarini ijro etishda ishtirok etadi;

inson huquq va erkinliklarini taʼminlash sohasidagi ishlarni yanada takomillashtirish, Komissiya faoliyatini rejalashtirish boʻyicha takliflar kiritadi.

Komissiya aʼzolari qonunchilik hujjatlariga muvofiq boshqa vakolatlarni ham amalga oshirishi mumkin.

6-bob. Komissiya majlislarini tashkil qilish va oʻtkazish

13. Komissiya ishining tashkiliy shakli uning majlislari boʻlib, yiliga kamida ikki marta oʻtkaziladi. Zarur hollarda Komissiya raisining yoki aʼzolarining uchdan bir qismi tashabbusi bilan navbatdan tashqari majlis oʻtkazilishi mumkin.

Komissiya majlislari Ombudsman Devoni joylashgan yerda oʻtkaziladi. Komissiya sayyor majlis oʻtkazish haqida ham qaror qabul qilishga haqli. Majlisning oʻtkazilish vaqti va joyi haqida Komissiya aʼzolari kamida oʻn kun oldin xabardor qilinadi.

14. Komissiya majlislari ochiq va oshkora tarzda oʻtkaziladi. Majlisga Oʻzbekiston Respublikasi Oliy Majlisi Qonunchilik palatasi deputatlari va Senati aʼzolari, davlat hokimiyati va boshqaruvi organlarining, nodavlat notijorat tashkilotlarining, fuqarolar yigʻinlarining va ommaviy axborot vositalarining vakillari, taʼlim va ilmiy muassasalarning olimlari, shuningdek Ombudsman yoki Komissiya tomonidan tuzilgan ishchi guruhlar aʼzolari taklif etilishi mumkin.

15. Komissiya majlisi unda aʼzolarining kamida yarmi qatnashganda vakolatlidir. Komissiya aʼzosi, agarda Komissiya majlisida qatnasha olmaydigan boʻlsa, koʻrilayotgan masalalar boʻyicha oʻz fikrini yozma ravishda taqdim etishga haqli.

16. Komissiya aʼzolari teng ovozga egadir, ijro hokimiyati organlarining vakillari bundan mustasno.

Komissiyaning qarorlari majlis ishtirokchilarining koʻpchilik ovozi bilan qabul qilinadi. Ovozlar teng boʻlib qolgan taqdirda, raislik qiluvchining ovozi hal qiluvchi boʻladi.

17. Komissiya majlislari davlat tilida oʻtkaziladi. Zarur hollarda majlis ishtirokchilarining chiqishlari boshqa tillarga tarjima qilinishi mumkin.

18. Ombudsman yoki uning topshirigʻiga koʻra Komissiya aʼzolaridan biri:

Komissiya majlisini olib boradi;

Komissiya majlisi kun tartibidagi masalalarning muhokamasini tashkil etadi va ularni ovozga qoʻyadi;

Komissiya aʼzolarining takliflarini ular kiritilgan tartibda ovozga qoʻyadi;

Komissiya aʼzolari va taklif etilgan shaxslar tomonidan ushbu Nizom qoidalariga rioya qilinishini taʼminlaydi.

19. Komissiya aʼzolari Komissiya majlisida soʻzga chiqadi, uning vakolatiga tegishli masalalar yuzasidan ogʻzaki va yozma takliflar kiritadi.

20. Komissiya majlisi bayonnoma bilan rasmiylashtirilib, uni masʼul kotib imzolaydi va rais tasdiqlaydi. Bayonnomada kun tartibiga kiritilgan masalalar, Komissiya aʼzolarining va majlisda qatnashgan taklif etilgan shaxslarning familiyasi, ismi va otasining ismi, koʻrib chiqilgan har bir masala yuzasidan ovoz berish natijalari, qabul qilingan qarorlar koʻrsatiladi. Bayonnomaga kun tartibiga kiritilgan tegishli materiallar ilova qilinadi.

Komissiya oʻz vakolatiga kiradigan masalalar yuzasidan qarorlar qabul qiladi. Komissiya qabul qilgan qarorlar uning aʼzolari tomonidan bajarilishi majburiydir.

21. Komissiya tomonidan muhokama etilgan ijtimoiy ahamiyatga molik masalalar va qabul qilingan qarorlar belgilangan tartibda keng jamoatchilikka ommaviy axborot vositalari va Ombudsmanning rasmiy veb-sayti orqali maʼlum qilinadi.

7-bob. Komissiya majlislariga masalalarni tayyorlash va ularni koʻrib chiqish tartibi

22. Komissiya majlisida koʻrib chiqiladigan masalalar Ombudsman tomonidan kun tartibi loyihasiga kiritiladi, bunda muhokama qilish navbati, har bir masala uchun masʼul boʻlgan Komissiya aʼzolari, Ombudsman Devoni xodimlari, maʼruzachilar (qoʻshimcha maʼruza qiluvchilar) va boshqa maʼlumotlar koʻrsatiladi.

Komissiya aʼzolari majlisdan kamida oʻn besh kun oldin kun tartibiga kiritilgan masalalar haqida xabardor qilinadi, ular kun tartibini toʻldirish haqida taklif kiritishi ham mumkin.

Komissiya aʼzolaridan kelib tushgan takliflarni umumlashtirish natijasida kun tartibi Ombudsman tomonidan tasdiqlanadi.

23. Oʻzbekiston Respublikasi fuqarolarining, Oʻzbekiston Respublikasi hududida turgan chet el fuqarolarining va fuqaroligi boʻlmagan shaxslarning, yuridik shaxslarning organlar, tashkilotlar yoki mansabdor shaxslar tomonidan ularning huquqlari va erkinliklari buzilayotgani haqida yoʻllagan shikoyatlarini Ombudsman amaliy ahamiyatiga qarab hayʼat tartibida koʻrib chiqishi uchun Komissiya muhokamasiga kiritadi.

Komissiya tomonidan koʻrib chiqiladigan barcha shikoyatlar yuzasidan Ombudsman Devoni Ombudsmanning xulosasini tayyorlaydi, unda quyidagi tavsiyalar nazarda tutiladi:

ish tashkilot yoki ularning mansabdor shaxsi tomonidan oxiriga yetkazilgan boʻlishi;

tashkilot yoki ularning mansabdor shaxsi qabul qilgan qaror oʻzgartirilishi yoki bekor qilinishi;

tashkilot yoki ularning mansabdor shaxsi qabul qilgan qaror asoslangan boʻlishi;

tashkilot yoki ularning mansabdor shaxsi qoʻshimcha qaror qabul qilishi;

tashkilot yoki ularning mansabdor shaxsi qabul qilgan qaror inson huquq va erkinliklariga tegishli qonun hujjatlari doirasida boʻlishi lozimligi.

Ombudsmanning xulosasida boshqa tavsiyalar ham boʻlishi mumkin.

Shikoyatlarni koʻrib chiqish natijalari boʻyicha Komissiya qarori rasmiylashtiriladi. Komissiya qarori tashkilotlar va mansabdor shaxslar tomonidan koʻrib chiqilishi uchun majburiydir, ular oʻn kun muddatda Ombudsmanga qarorni koʻrib chiqqanligi haqida xabar berishi shart.

8-bob. Komissiya aʼzolari huquqlarining kafolati

24. Komissiya aʼzolari uning faoliyatida ishtirok etgani, Ombudsman topshirigʻiga koʻra maʼlumot va ekspert xulosalarini yiqqani va tahlil qilgani uchun taʼqib qilinishi yoki boshqacha tarzda huquqlari cheklanishi mumkin emas.

9-bob. Komissiya aʼzosining muddatidan ilgari oʻz vazifasidan ozod etilishi

25. Komissiya aʼzosi quyidagi hollarda muddatidan ilgari oʻz vazifasidan ozod etilishi mumkin:

u oʻz vakolatlarini zimmasidan soqit qilish haqida ariza bergan taqdirda;

uning sogʻligʻi holati barqaror tarzda buzilgan va bu tibbiyot muassasasi tomonidan berilgan xulosa bilan tasdiqlangan taqdirda;

u sudning qarori bilan bedarak yoʻqolgan deb topilgan yoki vafot etgan deb eʼlon qilingan taqdirda;

u sud tomonidan muomalaga layoqatsiz yoki muomala layoqati cheklangan deb topilgan taqdirda;

unga nisbatan sudning ayblov hukmi qonuniy kuchga kirgan taqdirda;

u Ombudsman toʻgʻrisidagi qonunchilikni buzadigan xatti-harakatlar sodir etgan taqdirda;

u Oʻzbekiston Respublikasi fuqaroligini yoʻqotgan yoki doimiy yashash uchun Oʻzbekiston Respublikasidan tashqariga chiqib ketgan taqdirda;

oʻziga yuklatilgan majburiyatlarni muntazam ravishda bajarmagan taqdirda;

Komissiya aʼzosi sifatida ish olib borish uchun toʻgʻri kelmaydigan lavozimga saylangan yoki tayinlangan taqdirda.

26. Komissiya aʼzosining muddatidan ilgari oʻz vazifasidan ozod etilishi haqidagi qaror Ombudsman tomonidan qabul qilinadi hamda Oʻzbekiston Respublikasi Oliy Majlisi Qonunchilik palatasi Kengashi va Senati Kengashi tomonidan tasdiqlanadi.

10-bob. Yakuniy qoidalar

27. Mazkur Nizomga oʻzgartish va qoʻshimchalar Oʻzbekiston Respublikasi Oliy Majlisi Qonunchilik palatasi Kengashi va Senati Kengashining Qoʻshma qarori bilan kiritiladi.

Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining oʻz kuchini yoʻqotgan deb topilayotgan qoʻshma qarorlari

1. Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2011-yil 15-iyundagi “Insonning konstitutsiyaviy huquqlari va erkinliklariga rioya etilishi boʻyicha komissiya toʻgʻrisida”gi 300-II/191-II-sonli Qoʻshma qarori (Oʻzbekiston Respublikasi Oliy Majlisi palatalarining Axborotnomasi, 2011-yil, № 6, 159-modda).

2. Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2013-yil 25-oktabrdagi “Insonning konstitutsiyaviy huquqlari va erkinliklariga rioya etilishi boʻyicha komissiya tarkibiga oʻzgartish kiritish toʻgʻrisida”gi 751-II/94-II-sonli Qoʻshma qarori (Oʻzbekiston Respublikasi Oliy Majlisi palatalarining Axborotnomasi, 2013-yil, № 10, 294-modda).

3. Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2017-yil 29-dekabrdagi “Oʻzbekiston Respublikasi Oliy Majlisining Inson huquqlari boʻyicha vakili (ombudsman) faoliyatining tashkiliy-huquqiy asoslarini yanada takomillashtirish chora-tadbirlari toʻgʻrisida”gi 1398-III/KQ-282-III-sonli Qoʻshma qarori (Oʻzbekiston Respublikasi Oliy Majlisi palatalarining Axborotnomasi, 2017-yil, № 12, 898-modda).

4. Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2020-yil 26-dekabrdagi “Insonning konstitutsiyaviy huquqlari va erkinliklariga rioya etilishi boʻyicha komissiyaning yangi tarkibini tasdiqlash toʻgʻrisida”gi 678-IV/KQ-169-IV-sonli Qoʻshma qarori (Oʻzbekiston Respublikasi Oliy Majlisi palatalarining Axborotnomasi, 2021-yil, № 1, 136-modda).

5. Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2022-yil 14-noyabrdagi “Insonning konstitutsiyaviy huquqlari va erkinliklariga rioya etilishi boʻyicha komissiya faoliyatini yanada takomillashtirish toʻgʻrisida”gi 2661-IV/KQ-428-IV-sonli Qoʻshma qarori (Oʻzbekiston Respublikasi Oliy Majlisi palatalarining Axborotnomasi, 2022-yil, № 11, 1183-modda).