Qoraqalpogʻiston Respublikasi Nukus tumanida Galofit oʻsimliklari botanika bogʻini tashkil etish chora-tadbirlari toʻgʻrisida (90-son)

13.02.2025

Oʻzbekiston Respublikasi Vazirlar Mahkamasining

qarori

Respublika hududlarida oʻsimlik dunyosini muhofaza qilish, bioxilma-xillikni saqlash, tuproq-iqlim sharoitini yaxshilash, ekologik tadqiqotlarni qoʻllab-quvvatlash, shuningdek, “Yashil makon” umummilliy loyihasi doirasida amalga oshirilayotgan tadbirlarni izchil davom ettirish maqsadida Vazirlar Mahkamasi qaror qiladi:

1. Qoraqalpogʻiston Respublikasi Vazirlar Kengashi, Oʻzbekiston Respublikasi Qishloq xoʻjaligi vazirligi, Ekologiya, atrof-muhitni muhofaza qilish va iqlim oʻzgarishi vazirligi hamda Fanlar akademiyasining:

Qoraqalpogʻiston Respublikasi Nukus tumani “Samanboy” ovul fuqarolar yigʻinidagi, “Katti agar” massivi hududida Galofit oʻsimliklari botanika bogʻini (keyingi oʻrinlarda — botanika bogʻi) tashkil etish;

botanika bogʻini tashkil etish uchun Nukus tumani hokimligi zaxirasidagi qishloq xoʻjaligiga moʻljallangan 56,29 gektar yer uchastkasini Markaziy Osiyo atrof-muhit va iqlim oʻzgarishini oʻrganish universiteti tizimidagi Oʻrmon xoʻjaligi ilmiy-tadqiqot institutiga (keyingi oʻrinlarda — ilmiy-tadqiqot instituti) oʻttiz yil muddatga ijara huquqi asosida berish toʻgʻrisidagi takliflari maʼqullansin.

2. Quyidagilar botanika bogʻini tashkil etishning asosiy maqsadlari etib belgilansin:

tuproq ekotizimini tiklash va iqlim oʻzgarishiga moslashish boʻyicha ilmiy tadqiqotlar oʻtkazish;

shoʻrlanish va choʻllanishga moslashgan oʻsimliklarni tadqiq qilish, ularning turlarini koʻpaytirish va tajriba-sinovdan oʻtkazish;

hududda bioxilma-xillikni saqlash, tuproq-iqlim sharoitini yaxshilash boʻyicha yangi texnologiyalarni joriy etish;

galofit oʻsimliklarini botanika bogʻida yetishtirish va ulardan foydalanish orqali qishloq xoʻjaligi sohasida hosildorlikni oshirish, shoʻr botqoqli hududlarni qayta tiklash hamda ulardan barqaror foydalanishga erishish;

ekologik taʼlim va tadqiqot dasturlari orqali aholini atrof-muhitni muhofaza qilishga jalb qilish;

ekoturizmni yoʻlga qoʻyish va ilmiy tadqiqotlar oʻtkazish uchun imkoniyatlar yaratish, noyob oʻsimlik turlariga qiziqadigan tashrif buyuruvchilarni jalb etish va boshqalar.

3. Qoraqalpogʻiston Respublikasi Nukus tumanida Galofit oʻsimliklari botanika bogʻini tashkil etish uchun ijaraga beriladigan yer uchastkalari roʻyxati ilovaga muvofiq tasdiqlansin.

Qoraqalpogʻiston Respublikasi Nukus tumani hokimligi bir oy muddatda ilmiy-tadqiqot instituti bilan ilovaga muvofiq yer uchastkalarini belgilangan tartibda ijaraga berish toʻgʻrisidagi shartnoma imzolanishini taʼminlasin.

4. Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligining botanika bogʻini tashkil etish bilan bogʻliq quyidagi xarajatlarni Ekologiya jamgʻarmasi mablagʻlari hisobidan moliyalashtirish toʻgʻrisidagi takliflariga rozilik berilsin:

tashkil etilayotgan botanika bogʻi hududini toʻsiq bilan oʻrash;

botanika bogʻi uchun berilgan yer uchastkasini tekislash, shudgorlash, koʻchat ekish va boshqa agrotexnik tadbirlarni amalga oshirish;

galofit va boshqa oʻsimliklar urugʻlari hamda novdalarini xarid qilish;

botanika bogʻini tashkil etish uchun olimlar, ekspert va mutaxassislarni jalb etish.

5. Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi Iqtisodiyot va moliya vazirligi hamda Qoraqalpogʻiston Respublikasi Vazirlar Kengashi bilan birgalikda bir oy muddatda botanika bogʻini saqlash bilan bogʻliq doimiy xarajatlarni moliyalashtirish manbalariga aniqlik kiritgan holda Vazirlar Mahkamasiga taklif kiritsin.

6. Mazkur qarorning bajarilishini nazorat qilish Oʻzbekiston Respublikasi ekologiya, atrof-muhitni muhofaza qilish va iqlim oʻzgarishi vaziri A.A. Abduxakimov hamda Qoraqalpogʻiston Respublikasi Vazirlar Kengashi Raisi F.U. Ermanov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 13-fevral,

90-son

Vazirlar Mahkamasining 2025-yil 13-fevraldagi 90-son qaroriga ILOVA

Qoraqalpogʻiston Respublikasi Nukus tumanida Galofit oʻsimliklari botanika bogʻini tashkil etish uchun ijaraga beriladigan yer uchastkalari

ROʻYXATI