Mahbuslar yoki hibsga olingan shaxslarni qiynoq hamda jazolashning boshqa shafqatsiz, gʻayriinsoniy yoki qadr-qimmatni kamsituvchi turlaridan himoya qilishda sogʻliqni saqlash xodimlarining, ayniqsa, shifokorlarning roliga taalluqli tibbiyot etikasi prinsiplari

18.12.1982

1-prinsip

Mahbuslar yoki hibsga olingan shaxslarga tibbiy xizmat koʻrsatilishini taʼminlovchi sogʻliqni saqlash xodimlari, ayniqsa, shifokorlar ularning jismoniy va ruhiy sogʻligʻini muhofaza qilishlari hamda ularni xuddi mahbus boʻlmagan yoki hibsga olinmagan shaxslarga nisbatan boʻlgani kabi sifat va saviyada davolashlari shart.

2-prinsip

Sogʻliqni saqlash xodimlari, ayniqsa, shifokorlar, basharti, qiynoqlar hamda muomala va jazolashning qattiq shafqatsiz, insoniylikka zid yoki qadr-qimmatni kamsituvchi turlarida ishtirok etish yoki ishtirokchilik qilish yoxud bunday kamsitishlar sodir etilishiga dalolatchilik qilish yoki sodir etishga urinish tarzidagi xatti-harakatlar bilan faol yoki passiv shugʻullansalar, amaldagi xalqaro hujjatlarga muvofiq tibbiyot etikasini qoʻpol ravishda buzgan, shuningdek jinoyat sodir etgan boʻladilar.

3-prinsip

Sogʻliqni saqlash xodimlari, ayniqsa, shifokorlar, basharti mahbuslar yoki hibsga olingan shaxslarga nisbatan faqatgina ularni tibbiy koʻrikdan oʻtkazish, muhofaza qilish yoki ularning sogʻligʻini jismoniy yoki ruhiy jihatdan yaxshilash maqsadini koʻzlab emas, balki har qanday boshqa professional munosabatlarga kirishsalar, tibbiyot etikasini buzgan boʻladilar.

4-prinsip

Sogʻliqni saqlash xodimlari, ayniqsa, shifokorlar, basharti:

a) mahbuslar va hibsga olingan shaxslarni soʻroq qilishga koʻmaklashish uchun oʻz bilim va tajribalaridan ana shunday mahbuslar va hibsga olingan shaxslarning jismoniy yoki ruhiy jihatdan sogʻligʻiga yoxud holatiga salbiy taʼsir etishi mumkin boʻlgan va xalqaro hujjatlarga mos boʻlmagan tarzda foydalansalar;

b) mahbuslar yoki hibsga olingan shaxslarning sogʻligʻi ularga nisbatan muomala yoki jazolashning har qanday turini qoʻllash imkonini beradi, deb tasdiqlasalar yoki tasdiqlashda ishtirok etsalar, ammo qoʻllanilgan muomala yoki jazo turi ularning sogʻligʻiga jismoniy yoki ruhiy jihatdan salbiy taʼsir koʻrsatsa va tegishli xalqaro hujjatlarga mos kelmaydigan muomala yoki jazoning har qanday turini qoʻllashda istalgan bir shaklda ishtirok etsalar, tibbiyot etikasini buzgan boʻladilar.

5-prinsip

Sogʻliqni saqlash xodimlarining, ayniqsa, shifokorlarning mahbus yoki hibsga olingan shaxsga nisbatan qoʻllaniladigan tinchlantirish mazmunidagi har qanday tartib-taomilda ishtirok etishi, basharti bunday harakat mahbus yoki hibsga olingan shaxsning boshqa mahbuslar yoki ushlangan shaxslarning yoki qoʻriqlash xodimlarining jismoniy yoxud ruhiy jihatdan sogʻligʻini yoki xavfsizligini saqlash uchun zarur tibbiy mezonlar taqozosi boʻlmasa va sogʻliqqa jismoniy yoki ruhiy jihatdan tahdid solmasa, tibbiyot etikasini buzganlik hisoblanadi.

6-prinsip

Qanday boʻlishidan qatʼi nazar, biror-bir asosni, shu jumladan favqulodda holatni asos qilib, yuqorida bayon etilgan prinsiplardan chetga chiqish mumkin emas.

(Imzolar)