“KfW” banki (Germaniya Federativ Respublikasi) ishtirokidagi “Orolboʻyi mintaqasida tibbiy xizmat sifatini oshirish” loyihasini amalga oshirish chora-tadbirlari toʻgʻrisida (PQ-18-son)
22.01.2025
Oʻzbekiston Respublikasi Prezidentining
qarori
Sogʻliqni saqlash sohasida Germaniya Federativ Respublikasi Hukumati bilan moliyaviy hamkorlikni yanada kengaytirish, hududiy koʻp tarmoqli tibbiyot markazlarini zamonaviy tibbiy uskunalar bilan jihozlash va ulardan samarali foydalanishni taʼminlash, Sogʻliqni saqlash vazirligi tomonidan “KfW” bankining (Germaniya Federativ Respublikasi) mablagʻlarini jalb qilgan holda Orolboʻyi mintaqasi, xususan, Qoraqalpogʻiston Respublikasi hamda Xorazm viloyatida sogʻliqni saqlash tizimidagi islohotlarni qoʻllab-quvvatlash maqsadida:
1. Quyidagilar:
Oʻzbekiston Respublikasi Hukumati hamda Germaniya Federativ Respublikasi Hukumati oʻrtasida 2019-yil 21-22-may kunlari ikki tomonlama hamkorlikni rivojlantirish boʻyicha oʻtkazilgan hukumatlararo muzokaralar natijalariga koʻra “Orolboʻyi mintaqasida tibbiy xizmat sifatini oshirish” loyihasini (keyingi oʻrinlarda — Loyiha) amalga oshirish uchun qarz va grant ajratish boʻyicha kelishuvga erishilgani;
Oʻzbekiston Respublikasi va “KfW” banki oʻrtasida 2023-yil 19-may kuni Loyihani moliyalashtirish uchun 5,5 yillik imtiyozli davr bilan 12,5 yil muddatga jami 30 million yevro miqdorida qarz bitimi hamda 2 million yevro miqdorida grant bitimi imzolangani maʼlumot uchun qabul qilinsin.
2. Quyidagilar:
“Orolboʻyi mintaqasida tibbiy xizmat sifatini oshirish” loyihasining asosiy texnik-iqtisodiy koʻrsatkichlari 1-ilovaga muvofiq;
“Orolboʻyi mintaqasida tibbiy xizmat sifatini oshirish” loyihasini amalga oshirish doirasida “KfW” bankining qarzlarini qaytarish, shu jumladan, qoʻshimcha haq va foizlar toʻlashning prognoz jadvali 2-ilovaga muvofiq;
“Orolboʻyi mintaqasida tibbiy xizmat sifatini oshirish” loyihasi doirasida Qoraqalpogʻiston Respublikasi tibbiyot muassasalari uchun xarid qilinadigan tibbiy jihozlar taqsimoti 3-ilovaga muvofiq;
“Orolboʻyi mintaqasida tibbiy xizmat sifatini oshirish” loyihasi doirasida Xorazm viloyati tibbiyot muassasalari uchun xarid qilinadigan tibbiy jihozlar taqsimoti 4-ilovaga muvofiq;
“Orolboʻyi mintaqasida tibbiy xizmat sifatini oshirish” loyihasi doirasida xarid qilinadigan maxsus avtotransport vositalarining hududlar boʻyicha taqsimoti 5-ilovaga muvofiq tasdiqlansin.
3. Belgilansinki:
Sogʻliqni saqlash vazirligi Loyihani oʻz vaqtida amalga oshirish hamda muvofiqlashtirish, shuningdek, “KfW” bankining qarz va grantlaridan maqsadli va samarali foydalanish boʻyicha masʼul ijro etuvchi organ hisoblanadi;
Sogʻliqni saqlash vazirligi huzuridagi “Xaridlar markazi” davlat muassasasi Loyihani amalga oshirish doirasida tuzilgan shartnomalar boʻyicha yuk qabul qiluvchi kontragent hisoblanadi;
Loyiha doirasida xarid qilinadigan tibbiy asbob-uskuna, jihoz va vositalar tanlov savdolari eʼlon qilingunga qadar mustaqil ekspertlarni jalb qilgan holda tibbiyot muassasalarini jihozlash meʼyorlari asosida har bir muassasa kesimida tahlil qilinadi.
Bunda tahlillar natijasiga koʻra Sogʻliqni saqlash vazirligi tomonidan xarid qilinadigan tibbiy asbob-uskuna, jihoz va vositalarning roʻyxati, miqdori va texnik tavsiflariga oʻzgartirishlar kiritilishi mumkin;
“KfW” bankining qarz mablagʻlarini qaytarish, shu jumladan, qoʻshimcha haq va foizlar toʻlash, boshqa toʻlovlar bilan bogʻliq xarajatlar Oʻzbekiston Respublikasining respublika budjeti mablagʻlari hisobidan qoplanadi.
4. Adliya vazirligi Oʻzbekiston Respublikasi va “KfW” banki oʻrtasida imzolangan qarz va grant bitimlari boʻyicha yuridik xulosa bersin.
5. Sogʻliqni saqlash vazirligi Qoraqalpogʻiston Respublikasi Vazirlar Kengashi va Xorazm viloyati hokimligi bilan birgalikda Loyiha doirasida:
xarid qilinadigan tovarlar yetkazib berilgunga qadar tibbiy uskunalarni oʻrnatish va montaj qilish uchun tegishli bino va xonalar tayyorlanishini;
manfaatdor vazirlik va idoralarga zarur hisobot va hujjatlar “KfW” bankining talablari hamda Oʻzbekiston Respublikasi qonunchilik hujjatlariga muvofiq oʻz vaqtida tayyorlanishi va taqdim etilishini;
belgilangan tadbirlarni amalga oshirish uchun zarur sharoitlarning yaratilishini taʼminlasin.
6. Sogʻliqni saqlash vazirligi Loyihani amalga oshirish davrida tovar va uskunalarni sotib olish, belgilangan manzilga yetkazib berish boʻyicha xizmatlarni, shuningdek, Loyihani moliyalashtirish boʻyicha boshqa xarajatlarni amalga oshirish uchun Davlat budjetidan sogʻliqni saqlash sohasiga ajratilgan mablagʻlar doirasida zarur mablagʻlar ajratsin.
7. Tashqi ishlar vazirligi Sogʻliqni saqlash vazirligining viza talabnomalariga binoan Loyihani amalga oshirish doirasida jalb qilinadigan xorijiy mutaxassislar uchun kirish vizalari konsullik yigʻimlari va haqiqiy xarajatlarning oʻrnini qoplash hisobidan yigʻimlar undirilmasdan rasmiylashtirilishini taʼminlasin.
8. Ichki ishlar vazirligi Sogʻliqni saqlash vazirligining talabnomalariga koʻra Loyihani amalga oshirish uchun jalb qilinadigan xorijiy mutaxassislarga koʻp martalik viza rasmiylashtirilishi va uning muddati uzaytirilishini, shuningdek, turgan joyi boʻyicha roʻyxatdan oʻtkazilishi va uning muddati uzaytirilishini taʼminlasin.
9. Oʻzbekiston Respublikasi Prezidentining 2022-yil 16-iyundagi “Aholiga tez tibbiy yordam koʻrsatish tizimini takomillashtirish toʻgʻrisida”gi PQ-283-son qaroriga 6-ilovaga muvofiq oʻzgartirish kiritilsin.
10. Mazkur qarorning ijrosini samarali tashkil qilishga masʼul va shaxsiy javobgar etib sogʻliqni saqlash vaziri A.A. Xudayarov belgilansin.
Qaror ijrosini nazorat qilish va ijro uchun masʼul tashkilotlar faoliyatini muvofiqlashtirish Oʻzbekiston Respublikasi Bosh vaziri A.N. Aripov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2025-yil 22-yanvar,
PQ-18-son
Oʻzbekiston Respublikasi Prezidentining 2025-yil 22-yanvardagi PQ-18-son qaroriga 1-ILOVA
“Orolboʻyi mintaqasida tibbiy xizmat sifatini oshirish” loyihasining
ASOSIY TEXNIK-IQTISODIY KOʻRSATKICHLARI
Izohlar:
* Soʻnggi qiymat koʻrsatkichlari tovarlar va xizmatlarni yetkazib berish boʻyicha oʻtkaziladigan tender savdolari natijalariga asosan aniqlanadi.
** Loyihani amalga oshirish doirasida vujudga kelishi mumkin boʻlgan, shu jumladan, soliqlar va boshqa toʻlovlar shaklidagi xarajatlardan tashkil topgan.
*** Sogʻliqni saqlash vazirligiga loyiha doirasida taqsimlanmagan mablagʻlarni ehtiyojdan kelib chiqib, KFW banki bilan kelishilgan holda qayta taqsimlash vakolati beriladi.
Oʻzbekiston Respublikasi Prezidentining 2025-yil 22-yanvardagi PQ-18-son qaroriga 2-ILOVA
“Orolboʻyi mintaqasida tibbiy xizmat sifatini oshirish” loyihasini amalga oshirish doirasida “KfW” bankining qarzlarini qaytarish, shu jumladan, qoʻshimcha haq va foizlar toʻlashning
PROGNOZ JADVALI
Izohlar:
* Majburiyat uchun toʻlov qarz bitimi imzolangandan soʻng uch oydan keyin hisoblanadi.
** Toʻlovlar miqdori qarzlarni amalda oʻzlashtirish sanalariga qarab aniqlashtirib boriladi.
Oʻzbekiston Respublikasi Prezidentining 2025-yil 22-yanvardagi PQ-18-son qaroriga 3-ILOVA
“Orolboʻyi mintaqasida tibbiy xizmat sifatini oshirish” loyihasi doirasida Qoraqalpogʻiston Respublikasi tibbiyot muassasalari uchun xarid qilinadigan tibbiy jihozlar
TAQSIMOTI
Izoh: Sogʻliqni saqlash vazirligi tomonidan tibbiyot muassasalarining ehtiyojlari hamda xatlov natijalari asosida tibbiy asbob-uskunalarning roʻyxati, miqdori va texnik tavsiflariga oʻzgartirishlar kiritilishi mumkin.
Oʻzbekiston Respublikasi Prezidentining 2025-yil 22-yanvardagi PQ-18-son qaroriga 4-ILOVA
“Orolboʻyi mintaqasida tibbiy xizmat sifatini oshirish” loyihasi doirasida Xorazm viloyati tibbiyot muassasalari uchun xarid qilinadigan tibbiy jihozlar
TAQSIMOTI
Izoh: Sogʻliqni saqlash vazirligi tomonidan tibbiyot muassasalarining ehtiyojlari hamda xatlov natijalari asosida tibbiy asbob-uskunalarning roʻyxati, miqdori va texnik tavsiflariga oʻzgartirishlar kiritilishi mumkin.
Oʻzbekiston Respublikasi Prezidentining 2025-yil 22-yanvardagi PQ-18-son qaroriga 5-ILOVA
“Orolboʻyi mintaqasida tibbiy xizmat sifatini oshirish” loyihasi doirasida xarid qilinadigan maxsus avtotransport vositalarining hududlar boʻyicha
TAQSIMOTI
Izoh. Sogʻliqni saqlash vazirligi tomonidan yoʻltanlamas avtotransport vositasiga boʻlgan ehtiyoj asosida mazkur roʻyxatga oʻzgartirishlar kiritilishi mumkin.
Oʻzbekiston Respublikasi Prezidentining 2025-yil 22-yanvardagi PQ-18-son qaroriga 6-ILOVA
Oʻzbekiston Respublikasi Prezidentining 2022-yil 16-iyundagi “Aholiga tez tibbiy yordam koʻrsatish tizimini takomillashtirish toʻgʻrisida”gi PQ-283-son qaroriga kiritilayotgan oʻzgartirish
3-ilovaning matni quyidagi tahrirda bayon etilsin:
“Tez tibbiy yordam tizimida mavjud avtotransport vositalari parkini bosqichma-bosqich yangilash
REJASI
Izoh: Sogʻliqni saqlash vazirligi tomonidan yoʻltanlamas avtotransport vositasiga boʻlgan ehtiyoj asosida mazkur roʻyxatga oʻzgartirishlar kiritilishi mumkin”.