Insofsiz ijrochilarning yagona reyestrini shakllantirish tartibi toʻgʻrisidagi nizomni tasdiqlash haqida (3599-son)

17.01.2025

Oʻzbekiston Respublikasi iqtisodiyot va moliya vazirining

buyrugʻi

[Oʻzbekiston Respublikasi Adliya vazirligi tomonidan 2025-yil 17-yanvarda roʻyxatdan oʻtkazildi, roʻyxat raqami 3599]

Oʻzbekiston Respublikasining “Davlat xaridlari toʻgʻrisida”gi Qonuniga muvofiq buyuraman:

1. Insofsiz ijrochilarning yagona reyestrini shakllantirish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Raqobatni rivojlantirish va isteʼmolchilar huquqlarini himoya qilish qoʻmitasi, Korrupsiyaga qarshi kurashish agentligi, Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil hamda Oʻzbekiston Savdo-sanoat palatasi bilan kelishilgan.

3. Mazkur buyruq rasmiy eʼlon qilingan kundan eʼtiboran uch oy oʻtgach kuchga kiradi.

Vazir D. KUCHKAROV

Toshkent sh.,

2024-yil 6-dekabr,

200-son

Kelishildi:

Tadbirkorlik subyektlarining huquqlari va qonuniy manfaatlarini himoya qilish boʻyicha vakil D. KASIMOV

2024-yil 29-noyabr

Raqobatni rivojlantirish va isteʼmolchilar huquqlarini himoya qilish qoʻmitasi raisi H. TURAXUJAYEV

2024-yil 20-noyabr

Korrupsiyaga qarshi kurashish agentligi direktori A. BURXANOV

2024-yil 11-noyabr

Savdo-sanoat palatasi raisi D. VAXABOV

2024-yil 7-noyabr

Oʻzbekiston Respublikasi iqtisodiyot va moliya vazirining 2024-yil 6-dekabrdagi 200-son buyrugʻiga ILOVA

Insofsiz ijrochilarning yagona reyestrini shakllantirish tartibi toʻgʻrisidagi

NIZOM

Ushbu Nizom Insofsiz ijrochilarning yagona reyestrini (bundan buyon matnda Reyestr deb yuritiladi) shakllantirish va yuritish tartibini belgilaydi.

1-bob. Umumiy qoidalar

1. Ushbu Nizomda quyidagi asosiy tushunchalar qoʻllaniladi:

davlat xaridlari sohasidagi vakolatli organ (bundan buyon matnda vakolatli organ deb yuritiladi) — Oʻzbekiston Respublikasi Iqtisodiyot va moliya vazirligi;

insofsiz ijrochi — Reyestrga kiritilgan xarid qilish tartib-taomillari ishtirokchisi (bundan buyon matnda ishtirokchi deb yuritiladi) yoki gʻolibi (bundan buyon matnda gʻolib deb yuritiladi) yoxud davlat xaridlarining ijrochisi (bundan buyon matnda ijrochi deb yuritiladi) hisoblangan Oʻzbekiston Respublikasining rezidenti yoki norezidenti boʻlgan jismoniy yoki yuridik shaxs;

Reyestrga kiritish yuzasidan murojaatlarni koʻrib chiqish boʻyicha ishchi komissiya (bundan buyon matnda ishchi komissiya deb yuritiladi) — ishtirokchi yoki ijrochi toʻgʻrisidagi maʼlumotlarni Reyestrga kiritish yuzasidan murojaatlarni koʻrib chiqish va xulosa berish boʻyicha ishchi organ;

murojaatchi — ishtirokchi yoki ijrochini Reyestrga kiritish yuzasidan yozma yoki elektron shaklda murojaat qiluvchi davlat buyurtmachisi va (yoki) xarid qilish tartib-taomillari ustidan davlat nazoratini amalga oshiruvchi vakolatli davlat organlari, shuningdek jismoniy va yuridik shaxslar.

2-bob. Reyestrni shakllantirish asoslari va murojaat qilish tartibi

2. Reyestr vakolatli organ tomonidan shakllantiriladigan roʻyxatdan iborat boʻlib, unga quyidagi maʼlumotlar kiritiladi:

xarid qilish tartib-taomillari yakunlari boʻyicha belgilangan shartlar asosida davlat buyurtmachisi bilan shartnoma tuzishni va davlat xaridlarini amalga oshirishni rad etgan yoki boshqacha usulda boʻyin tovlagan xarid qilish tartib-taomillari gʻoliblari toʻgʻrisidagi;

majburiyatlarni bajarmaganlikda yoxud tegishli tarzda bajarmaganlikda belgilangan tartibda aybdor deb topilgan ijrochilar haqidagi, bundan majburiyatlar bartaraf etib boʻlmaydigan kuchlar oqibatida bajarilmagan yoki tegishli tarzda bajarilmagan hollar mustasno;

davlat xaridlari jarayonida yolgʻon yoki soxta hujjatlarni taqdim etgan, ayni bitta lotda ishtirok etgan affillangan shaxslar yoki manfaatlar toʻqnashuvi toʻgʻrisida maʼlumotlarni ochib bermagan ishtirokchilar toʻgʻrisidagi;

sudning qaroriga koʻra firibgarlik, soxtalashtirish va korrupsiya bilan bogʻliq jinoyatlarni sodir etganlikda aybdor deb topilgan ijrochilar toʻgʻrisidagi.

3. Reyestrga insofsiz ijrochilar toʻgʻrisidagi maʼlumotlar quyidagilar asosida kiritiladi:

vakolatli organning ishtirokchi yoki ijrochi toʻgʻrisidagi maʼlumotlarni Reyestrga kiritish toʻgʻrisidagi qaroriga muvofiq;

Davlat xaridlari sohasidagi shikoyatlarni koʻrib chiqish boʻyicha komissiyaning ijrochi toʻgʻrisidagi maʼlumotlarni Reyestrga kiritish toʻgʻrisidagi qaroriga muvofiq;

xarid qilish tartib-taomillari yakunlari boʻyicha belgilangan shartlar asosida davlat buyurtmachisi bilan shartnoma tuzishni va davlat xaridlarini amalga oshirishni rad etgan yoki boshqacha usulda boʻyin tovlagan gʻolib (zaxiradagi gʻolib bundan mustasno) toʻgʻrisidagi maʼlumotlar avtomatik tarzda Maxsus axborot portali orqali.

4. Murojaatchi vakolatli organga ishtirokchi yoki ijrochini Reyestrga kiritish yuzasidan yozma yoki elektron shaklda ariza bilan murojaat qilishi mumkin.

Murojaatchi arizasiga ishtirokchi yoki ijrochini Reyestrga kiritish uchun asos boʻlgan hujjatlarni, shuningdek sudning tegishli qarorini (agar mavjud boʻlsa) ilova qiladi.

5. Murojaat vakolatli organga kelib tushgan kundan boshlab oʻn besh kun ichida koʻrib chiqiladi va koʻrib chiqish natijasi boʻyicha ushbu muddat ichida murojaatchiga yozma yoki elektron shaklda xabar beriladi.

3-bob. Ishchi komissiya va Reyestrni shakllantirish tartibi

6. Ishtirokchi yoki ijrochi toʻgʻrisidagi maʼlumotlarni Reyestrga kiritish toʻgʻrisidagi qaror vakolatli organning rahbari yoki uning vazifalari yuklangan oʻrinbosari tomonidan qabul qilinadi.

Bunda, Reyestrga kiritish toʻgʻrisidagi qaror qabul qilinishiga ishtirokchi yoki ijrochi toʻgʻrisidagi maʼlumotlarni Reyestrga kiritish haqidagi ishchi komissiyaning xulosasi asos boʻladi. Ishchi komissiya tomonidan tegishli xulosa oʻn kun muddatda tayyorlanadi.

7. Ishchi komissiya tarkibi vakolatli organ rahbarining buyrugʻi bilan vakolatli organ rahbarining oʻrinbosari va xodimlari orasidan kamida 7 kishidan iborat tarkibda shakllantiriladi.

8. Ishchi komissiya faoliyatini tashkil etish, yigʻilishlarini oʻtkazish va ularga rahbarlik qilish ishchi komissiya raisi tomonidan amalga oshiriladi.

Ishchi komissiya yigʻilishi uchun tashkiliy tayyorgarlikni taʼminlash komissiya kotibi zimmasiga yuklanadi.

Ishchi komissiya yigʻilishlari zaruratga koʻra oʻtkaziladi. Yigʻilishlarda kun tartibiga kiritilgan masalalar yuzasidan kollegial tarzda xulosalar qabul qilinadi.

Ishchi komissiya yigʻilishlari aʼzolarning kamida uchdan ikki qismi ishtirok etganda vakolatli hisoblanadi.

Ishchi komissiya xulosalari yigʻilishda ishtirok etayotgan aʼzolarning koʻpchiligi tomonidan maʼqullangan taqdirda, qabul qilingan hisoblanadi. Ovozlar teng boʻlib qolgan taqdirda, ishchi komissiya raisining ovozi hal qiluvchi hisoblanadi.

9. Ishchi komissiya kotibi tomonidan ishtirokchi yoki ijrochiga, shuningdek murojaatchiga yigʻilishdan uch kun oldin ishchi komissiya yigʻilishi haqida xabar qilinadi. Bunda, ishtirokchi yoki ijrochi toʻgʻrisidagi maʼlumotlarni Reyestrga kiritish toʻgʻrisidagi masalani koʻrib chiqishda ishtirokchi yoki ijrochi, shuningdek murojaatchi ishtirok etish huquqiga ega.

10. Ishchi komissiya murojaatchi tomonidan taqdim etilgan hujjatlarda mazkur Nizomning 2-bandida nazarda tutilgan holatlar mavjudligini oʻrganadi.

Bunda, taqdim etilgan hujjatlarning toʻgʻriligi va haqqoniyligi uchun murojaatchi javobgar hisoblanadi.

11. Ishchi komissiya tomonidan mazkur Nizomning 2-bandida nazarda tutilgan holatlardan boshqa holatlar koʻrib chiqilmaydi.

12. Vakolatli organning ishtirokchi yoki ijrochi toʻgʻrisidagi maʼlumotlarni Reyestrga kiritish toʻgʻrisida qaror qabul qilingan kunda vakolatli organ Reyestrga kiritadi.

13. Vakolatli organ tomonidan quyidagi hollarda ishtirokchi yoki ijrochi toʻgʻrisidagi maʼlumotlarni Reyestrga kiritishni rad etish toʻgʻrisida qaror qabul qilinadi:

murojaatchining arizasi va unga ilova qilingan hujjatlarda ishtirokchi va ijrochini Reyestrga kiritish uchun mazkur Nizomning 2-bandida nazarda tutilgan asoslar mavjud boʻlmasa;

murojaatchi tomonidan taqdim etilgan hujjatlarning haqiqiy emasligi yoki ularda notoʻgʻri maʼlumotlar mavjudligi aniqlanganda.

14. Davlat xaridlari sohasidagi shikoyatlarni koʻrib chiqish boʻyicha komissiya tomonidan ijrochini Reyestrga kiritish toʻgʻrisida qaror qabul qilingan taqdirda vakolatli organ qaror qabul qilingan kunning oʻzida mazkur qaror asosida ijrochi toʻgʻrisidagi maʼlumotlarni Reyestrga kiritadi.

15. Davlat xaridlari sohasidagi shikoyatlarni koʻrib chiqish boʻyicha komissiya tomonidan ijrochini Reyestrga kiritish toʻgʻrisidagi qaror Davlat xaridlari sohasidagi shikoyatlarni koʻrib chiqish tartibi toʻgʻrisidagi nizomda (roʻyxat raqami 3013, 2018-yil 14-may) belgilangan tartibda qabul qilinadi.

16. Vakolatli organ tomonidan Reyestrga kiritilgan kunning oʻzida insofsiz ijrochiga bu toʻgʻrisida yozma ravishda yoki davlat xaridlari elektron tizimidagi shaxsiy kabineti orqali (shaxsiy kabineti mavjud boʻlgan taqdirda) elektron tarzda xabar beriladi.

17. Vakolatli organning ishtirokchi yoki ijrochi toʻgʻrisidagi maʼlumotlarni Reyestrga kiritish toʻgʻrisidagi qaroridan norozi boʻlgan ishtirokchi yoki ijrochi, shuningdek gʻolib qonunchilikda belgilangan tartibda sudga murojaat qilish huquqiga ega.

18. Davlat xaridlari elektron tizimi operatori xarid qilish tartib-taomillari yakunlari boʻyicha belgilangan shartlar asosida davlat buyurtmachisi bilan shartnoma tuzishni va davlat xaridlarini amalga oshirishni rad etgan yoki boshqacha usulda boʻyin tovlagan gʻolib toʻgʻrisidagi axborotni elektron maʼlumot almashinuvi orqali avtomatik tarzda Maxsus axborot portaliga (bundan buyon matnda Portal deb yuritiladi) yuboradi.

Davlat xaridlari elektron tizimi operatorlari tomonidan yuborilgan insofsiz ijrochilar toʻgʻrisidagi maʼlumotlar avtomatik tarzda Reyestrga kiritiladi.

4-bob. Reyestrni yuritish hamda insofsiz ijrochini Reyestrdan chiqarish tartibi

19. Reyestr vakolatli organ tomonidan Portalda yuritiladi.

20. Reyestrda insofsiz ijrochilar toʻgʻrisidagi quyidagi maʼlumotlar aks ettiriladi:

yuridik shaxsning nomi, joylashgan joyi (pochta manzili);

yuridik shaxsning rahbarini hamda benefitsiar mulkdorining familiyasi, ismi, otasining ismi, yashash joyi;

jismoniy shaxsning familiyasi, ismi, otasining ismi, yashash joyi (yakka tartibdagi tadbirkor va oʻzini oʻzi band qilgan shaxslar uchun);

STIR (yuridik shaxslar uchun), JSHSHIR (jismoniy shaxslar uchun);

sudning, vakolat organning, Davlat xaridlari sohasidagi shikoyatlarni koʻrib chiqish boʻyicha komissiyasining qarori sanasi va nusxasi (gʻolib reyestrga avtomatik tarzda kiritilgan hollar bundan mustasno);

Reyestrga kiritish va undan chiqarish sanasi va asosi.

Bunda, jismoniy shaxslarning pasport maʼlumotlari hamda yuridik shaxs muassislarining, shuningdek jismoniy shaxslarning yashash joyi haqidagi axborotdan boshqa maʼlumotlar ochiq hisoblanadi hamda foydalanuvchilar ulardan erkin va bepul tanishib chiqishi va foydalanishi mumkin.

21. Insofsiz ijrochi Reyestrga kiritilganidan boshlab ikki yil muddat oʻtgandan soʻng avtomatik tarzda Reyestrdan chiqariladi hamda shu kunning oʻzida vakolatli organ tomonidan ishtirokchi, ijrochiga yoki gʻolibga yozma yoki elektron shaklda xabar beriladi.

22. Insofsiz ijrochi sudning tegishli qaroriga koʻra Reyestrdan chiqarilishi mumkin.

Bunda, sudning tegishli qarori vakolatli organga kelib tushgan kundan eʼtiboran bir ish kunidan kechiktirmagan muddatda vakolatli organ insofsiz ijrochini Reyestrdan chiqaradi.

5-bob. Yakuniy qoida

23. Ushbu Nizom talablarini buzganlikda aybdor boʻlgan shaxslar qonunchilikda belgilangan tartibda javobgar boʻladilar.