Oila instituti huquqiy asoslarini takomillashtirish va oilaviy qadriyatlarni saqlash boʻyicha olib borilayotgan ishlar samaradorligini yanada oshirish chora-tadbirlari toʻgʻrisida (KQ-29-V-son)

27.12.2024

Oʻzbekiston Respublikasi Oliy Majlisi Senati Kengashining

qarori

Oila institutini mustahkamlash, uning huquqiy va institutsional asoslarini takomillashtirish, ajrimlarning oldini olish va oilaviy qadriyatlarni saqlash maqsadida “Oʻzbekiston Respublikasi Oliy Majlisining Senati toʻgʻrisida”gi Oʻzbekiston Respublikasi Qonunining 16-moddasiga, “Oʻzbekiston Respublikasi Oliy Majlisi Senatining Reglamenti toʻgʻrisida”gi Oʻzbekiston Respublikasi Qonunining 6-moddasiga asosan Oʻzbekiston Respublikasi Oliy Majlisi Senatining Kengashi qaror qiladi:

1. Quyidagilar:

Oila munosabatlarini mustahkamlashga qaratilgan chora-tadbirlarni ishlab chiqish boʻyicha respublika ishchi guruhi (keyingi oʻrinlarda respublika ishchi guruh deb yuritiladi) tarkibi 1-ilovaga va koʻmaklashuvchi ishchi guruhlar 2-ilovaga muvofiq;

Oila institutining tashkiliy-huquqiy asoslarini takomillashtirish va oila munosabatlarini mustahkamlash boʻyicha amalga oshiriladigan chora-tadbirlar rejasi (keyingi oʻrinlarda chora-tadbirlar rejasi deb yuritiladi) 3-ilovaga muvofiq;

Oila munosabatlarini mustahkamlashga qaratilgan chora-tadbirlarni ishlab chiqish boʻyicha koʻmaklashuvchi ishchi guruhlarning vazifalar taqsimoti 4-ilovaga muvofiq tasdiqlansin.

2. Respublika ishchi guruhi:

chora-tadbirlar rejasida belgilangan vazifalar ijrosi vaqtida va sifatli tashkil etilishini taʼminlasin;

chora-tadbirlar rejasi ijrosining borishi boʻyicha muhokamalar tashkil etsin hamda vazifalarga masʼuliyatsizlik bilan yondashayotgan mutasaddilarga nisbatan qatʼiy choralar koʻrish yuzasidan takliflar kiritib borsin;

amalga oshirilgan tahlil natijalariga asosan Oʻzbekiston Respublikasi Prezidenti hujjati loyihasini ishlab chiqsin va 2025-yil 25-martga qadar Oʻzbekiston Respublikasi Prezidenti Administratsiyasiga kiritsin.

3. Koʻmaklashuvchi ishchi guruhlar bilan axborot va maʼlumotlar almashinuvini tezkor yoʻlga qoʻyish maqsadida 5-ilovaga muvofiq Adliya vazirligi huzurida Axborot-tahlil guruhi tarkibi tasdiqlansin hamda quyidagilar uning asosiy vazifalari etib belgilansin:

koʻmaklashuvchi ishchi guruhlar faoliyatiga oid maʼlumotlarni jamlash, ular tomonidan amalga oshirilgan ishlar toʻgʻrisidagi maʼlumotlarni shakllantirish va yuritish;

koʻmaklashuvchi ishchi guruhlar tomonidan amalga oshirilgan ishlarni tizimli tahlil qilish hamda natijalarini umumlashtirib, respublika ishchi guruhi majlislari muhokamasiga kiritish uchun tayyorlash.

4. Vazirlik va idoralar Axborot-tahlil guruhi aʼzolari 2025-yil 6-yanvardan asosiy ish joyidan ajralgan holda Axborot-tahlil guruhi faoliyatida ish boshlashini taʼminlasin.

5. Adliya vazirligiga Axborot-tahlil guruhining faoliyatini tashkil etish va muvofiqlashtirib borish hamda vazifasiga masʼuliyatsizlik bilan yondashayotgan guruh aʼzolariga nisbatan qatʼiy choralar koʻrish yuzasidan takliflar kiritib borish vazifasi yuklatilsin.

6. Oliy sud sudlarning nikohdan ajratish yoki nikohdan ajratishni rad qilish toʻgʻrisidagi qarorlari (aliment, mol-mulk, uy-joyga kiritish, nikoh shartnomasi va boshqa nizolar), Plenum qarorlari va sud amaliyotini tahlil qilib, takliflar ishlab chiqilishini hamda 2025-yil 5-fevralga qadar Respublika ishchi guruhiga taqdim etilishini taʼminlasin.

7. Ichki ishlar vazirligi 2020 — 2024-yillarda oilaviy kelishmovchiliklar sababli er yoki xotinga yetkazilgan jismoniy tan jarohatlari (oʻlim holatlari) boʻyicha statistik va tahliliy maʼlumotlarni 2025-yil 20-yanvarga qadar Adliya vazirligiga taqdim etsin.

8. Tashqi mehnat migratsiyasi agentligi 2020 — 2024-yillarda uzoq muddatga chet elga mehnat faoliyatini amalga oshirish uchun chiqib ketgan oilali shaxslar (er-xotin) toʻgʻrisidagi statistik va tahliliy maʼlumotlarni 2025-yil 20-yanvarga qadar Adliya vazirligiga taqdim etsin.

9. Koʻmaklashuvchi ishchi guruhlar vazifalar taqsimoti va chora-tadbirlar rejasidan kelib chiqib, amalga oshirilgan har bir oʻrganishlar yakuni yuzasidan tahliliy maʼlumot va asoslantirilgan takliflarni Axborot-tahlil guruhiga kiritib borsin.

10. Chora-tadbirlar rejasi ijrosiga masʼul vazirlik va idoralar:

chora-tadbirlar rejasining ijrosini belgilangan muddatlarda va sifatli ijro etilishini taʼminlasin;

ishlab chiqilgan takliflarni 6 va 7-ilovadagi jadvallarga muvofiq chora-tadbirlar rejasida belgilangan muddatlarda birinchi rahbar imzosi bilan tasdiqlangan holda Adliya vazirligiga taqdim etsin.

11. Oila va xotin-qizlar qoʻmitasi, Oila va gender ilmiy-tadqiqot instituti va “Ijtimoiy fikr” markazi oila institutini takomillashtirish boʻyicha muqaddam ishlab chiqilgan va yuqori turuvchi idoralarga kiritilgan takliflarning 2025-yil 6-yanvarga qadar Adliya vazirligiga taqdim etilishini taʼminlasin.

12. Adliya vazirligi Oila va xotin-qizlar qoʻmitasi, Qonunchilik va huquqiy siyosat instituti hamda boshqa manfaatdor vazirlik va idoralar bilan birgalikda 2025-yil 10-martga qadar Oʻzbekiston Respublikasi Prezidentining hujjat loyihasini tayyorlab, Respublika ishchi guruhi muhokamasiga kiritsin.

13. Mazkur Qaror ijrosini nazorat qilish Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev zimmasiga yuklansin.

14. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Senatining Raisi T. NARBAYEVA

Toshkent sh.,

2024-yil 27-dekabr,

KQ-29-V-son.

Oʻzbekiston Respublikasi Oliy Majlisi Senati Kengashining 2024-yil 27-dekabrdagi KQ-29-V-sonli qaroriga 1-ILOVA

Oila munosabatlarini mustahkamlashga qaratilgan chora-tadbirlarni ishlab chiqish boʻyicha respublika ishchi guruhi

TARKIBI

Oʻzbekiston Respublikasi Oliy Majlisi Senati Kengashining 2024-yil 27-dekabrdagi KQ-29-V-sonli qaroriga 2-ILOVA

Oila institutining huquqiy va institutsional asoslarini takomillashtirishga doir takliflar ishlab chiqishga koʻmaklashuvchi ishchi guruh

TARKIBI

Izoh: Koʻmaklashuvchi ishchi guruh aʼzosi boshqa ishga oʻtgan taqdirda, uning tarkibiga ushbu lavozimga yangi tayinlangan yoki tegishli funksiyalarni bajarish yuklangan shaxslar kiritiladi.

Zaruratga koʻra koʻmaklashuvchi ishchi guruhlar rahbarlari tomonidan oʻziga masʼul ishchi guruh tarkibiga boshqa mutaxassislarni ham jalb etishi mumkin.

Oʻzbekiston Respublikasi Oliy Majlisi Senati Kengashining 2024-yil 27-dekabrdagi KQ-29-V-sonli qaroriga 3-ILOVA

Oila institutining tashkiliy-huquqiy asoslarini takomillashtirish va oila munosabatlarini mustahkamlash boʻyicha amalga oshiriladigan

CHORA-TADBIRLAR REJASI

Izoh: chora-tadbirlarda belgilangan yoʻnalishlar boʻyicha chuqur tahlil qilish, statistik maʼlumotlarni keltirish (2020 — 2024-yillar) va asoslantirilgan takliflarni shakllantirish zarur.

Oʻzbekiston Respublikasi Oliy Majlisi Senati Kengashining 2024-yil 27-dekabrdagi KQ-29-V-sonli qaroriga 4-ILOVA

Oila munosabatlarini mustahkamlashga qaratilgan chora-tadbirlarni ishlab chiqishga koʻmaklashuvchi ishchi guruhlarning

VAZIFALAR TAQSIMOTI

Oʻzbekiston Respublikasi Oliy Majlisi Senati Kengashining 2024-yil 27-dekabrdagi KQ-29-V-sonli qaroriga 5-ILOVA

Koʻmaklashuvchi ishchi guruhlar bilan Axborot va maʼlumotlar almashinuvini tezkor yoʻlga qoʻyish boʻyicha axborot-tahlil guruhi

TARKIBI

Izoh: zaruratga koʻra Axborot-tahlil guruhi tarkibiga Respublika ishchi guruh rahbari bilan kelishilgan holda oʻzgartirishlar kiritilishi mumkin.

Oʻzbekiston Respublikasi Oliy Majlisi Senati Kengashining 2024-yil 27-dekabrdagi KQ-29-V-sonli qaroriga 6-ILOVA

Amaldagi normativ-huquqiy hujjatlarni takomillashtirish yuzasidan

TAKLIFLAR

Oʻzbekiston Respublikasi Oliy Majlisi Senati Kengashining 2024-yil 27-dekabrdagi KQ-29-V-sonli qaroriga 7-ILOVA

Normativ-huquqiy hujjatlar bilan tartibga solinmagan oila institutiga oid amaliyotdagi muammolarni bartaraf etish yuzasidan

TAKLIFLAR