Tovarlarning kelib chiqishini sertifikatlashtirishning elektron tizimlarini oʻzaro qoʻllash toʻgʻrisida
08.02.2024
Oʻzbekiston Respublikasi Hukumati bilan Belarus Respublikasi Hukumati oʻrtasida
Bitim
Oʻzbekiston Respublikasi Hukumati va Belarus Respublikasi Hukumati, keyingi oʻrinlarda “Tomonlar” deb ataluvchilar,
2009-yil 20-noyabrdagi Mustaqil Davlatlar Hamdoʻstligida tovarlarning kelib chiqish mamlakatini aniqlash Qoidalari toʻgʻrisidagi Bitimiga oʻzgartirishlar kiritish haqida 2013-yil 20-noyabrdagi Bayonnoma qoidalarini inobatga olib,
1993-yil 24-sentabrdagi Mustaqil Davlatlar Hamdoʻstligi Hukumat rahbarlari kengashi qarori bilan tasdiqlangan Tovarlarning kelib chiqish mamlakatini aniqlash qoidalariga (keyingi oʻrinlarda — Qoidalar) amal qilgan holda,
Tomonlar davlatlari hududlariga tovarlarni olib kirishda bojxona nazorati tartibotlarini soddalashtirish va muddatlarini qisqartirishga intilgan holda,
quyidagilar toʻgʻrisida kelishuvga erishdilar:
1-modda. Atamalar
Mazkur Bitimning maqsadlari uchun quyidagi tushunchalar qoʻllanadi:
“sertifikat” — vakolatli organ tomonidan berilgan va tovarlarning kelib chiqishini tasdiqlovchi hujjat hisoblanadigan ST-1 shaklidagi tovarlarning kelib chiqishi toʻgʻrisidagi sertifikat;
“tovarlarning kelib chiqishini sertifikatlashtirishning elektron tizimi” (keyingi oʻrinlarda — TKCHSET) — Tomonlar davlatlarining vakolatli organlari tomonidan berilgan sertifikatlar toʻgʻrisidagi maʼlumotlarni oʻz ichiga oluvchi markaziy vakolatli organning axborot tizimi;
“markaziy vakolatli organ”:
Oʻzbekiston Respublikasida — Investitsiyalar, sanoat va savdo vazirligi;
Belarus Respublikasida — Belarus Savdo-sanoat palatasi;
“vakolatli organlar”:
Oʻzbekiston Respublikasida — Oʻzbekiston Respublikasi Investitsiyalar, sanoat va savdo vazirligi;
Belarus Respublikasida — Belarus Savdo-sanoat palatasining unitar korxonalari;
“markaziy bojxona organi”:
Oʻzbekiston Respublikasida — Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi;
Belarus Respublikasida — Belarus Respublikasi Davlat bojxona qoʻmitasi;
“bojxona organlari” — Tomonlar davlatlarining hududiy bojxona organlari.
2-modda. Umumiy qoidalar
1. Mazkur Bitimning predmeti tovarlarni olib kirishda bojxona nazorati tartibotlarini soddalashtirish va muddatlarini qisqartirish maqsadida olib kiruvchi mamlakatning markaziy bojxona organlari va olib chiquvchi mamlakatning markaziy bojxona organlari oʻrtasida tovarlarning kelib chiqishini tasdiqlash uchun TKCHSETni qoʻllagan holda oʻzaro axborot hamkorligini tashkil etish hisoblanadi.
2. Olib chiquvchi mamlakatning markaziy vakolatli organlari mazkur Bitimning 3-moddasida belgilangan tamoyillarga muvofiq TKCHSETni tashkil etish va uning faoliyat yuritishini hamda berilgan sertifikatlar, shu jumladan olib kiruvchi mamlakatning markaziy bojxona organlarining soʻrovlari boʻyicha maʼlumotlarni olib kiruvchi mamlakatining markaziy bojxona organlariga taqdim etilishini taʼminlaydilar.
Taqdim etiladigan maʼlumotlarning tarkibi mazkur Bitimning ilovasida belgilanadi.
Taqdim etiladigan maʼlumotlarning tuzilishi va shakli, xabar almashish tartibi mazkur Bitim kuchga kirgan kundan boshlab 6 oy ichida markaziy bojxona organlar va markaziy vakolatli organlar tomonidan imzolangan texnik shartlar bilan belgilanadi.
Axborot tizimlarini modernizatsiya qilish Texnik shartlar imzolangan kundan boshlab 1 yil ichida amalga oshiriladi.
3. Oʻzaro axborot hamkorligi doirasida olingan maʼlumotlar olib kiruvchi mamlakatning bojxona organlari tomonidan haqiqatdan ham berilganligini va sertifikatlarning asl nusxasini qogʻozda taqdim etish zaruratisiz sertifikatlarda mavjud boʻlgan va tovarlarni bojxona deklaratsiyasida taqdim etilgan maʼlumotlarning muvofiqligini tekshirishda foydalaniladi.
4. Oʻzaro axborot hamkorligi doirasida olingan maʼlumotlar olib kiruvchi mamlakatning bojxona organlari tomonidan har qanday uchinchi tomonga taqdim etilishi olib chiquvchi mamlakat markaziy bojxona organining yozma roziligi bilan amalga oshirilishi mumkin.
5. Tovarlarni bojxona deklaratsiyasida berilgan sertifikatlar toʻgʻrisida taqdim etilgan maʼlumotlar TKCHSETda mavjud emasligi yoki tovarlarni bojxona deklaratsiyasida qayd etilgan maʼlumotlar TKCHSETdagi maʼlumotlarga muvofiq kelmasligi aniqlangan taqdirda, tovarlarni olib kiruvchi mamlakatning bojxona organlari tomonidan Qoidalarda belgilangan tartibda tekshiruv jarayoni boshlanishi mumkin.
6. TKCHSET lozim darajada ishlamagan taqdirda, Qoidalarning tovarlarni kelib chiqishini hujjat asosida tasdiqlash qismi qoʻllaniladi.
7. Mazkur Bitim Tomonlar davlatlari bojxona organlarining tovarlarni deklaratsiyalovchi shaxs tomonidan taqdim etilgan hujjatlarning haqiqiyligini, Qoidalarda va tovarlarni olib kiruvchi mamlakatning bojxona qonunchiligida belgilangan tartibda, tovarlarning kelib chiqqan mamlakatini aniqlash va ulardagi maʼlumotlarning ishonchligini aniqlash maqsadida tekshirish boʻyicha vakolatlarini cheklay olmaydi.
3-modda. TKCHSETni yaratish va qoʻllashning asosiy tamoyillari
1. TKCHSETni yaratish va faoliyat yuritishining asosiy tamoyillari quyidagilar hisoblanadi:
vakolatli organlar tomonidan berilgan sertifikatlar toʻgʻrisidagi maʼlumotlarni toʻplashni markazlashtirish;
TKCHSETda berilgan sertifikatlar boʻyicha maʼlumotlarning dolzarbligi va ishonchliligini taʼminlash;
TKCHSETdagi maʼlumotlarni ruxsatsiz buzish yoki yoʻq qilish imkoniyatini istisno qilish;
TKCHSETda sertifikatlar toʻgʻrisidagi maʼlumotlar berilgan sanadan boshlab uch yildan kam boʻlmagan muddat davomida saqlanishini taʼminlash;
berilgan sertifikatlar toʻgʻrisidagi maʼlumotlarni elektron shaklda almashish;
sertifikatlarni haqiqatdan ham berilganligi va sertifikatlardagi maʼlumotlarning tovarlarni bojxona deklaratsiyasida taqdim etilgan maʼlumotlarga muvofiqligini tekshirish imkoniyatini taʼminlash.
2. TKCHSETga kiritilgan maʼlumotlarning tarkibi dastlabki qogʻoz shaklida asl nusxada berilgan sertifikatlardagi maʼlumotlarning tarkibi bilan bir xil boʻlishi lozim.
3. Berilgan sertifikatlar toʻgʻrisidagi maʼlumotlar, sertifikatlarning qogʻoz shaklidagi asl nusxasi tasdiqlangan sanadan boshlab bir kundan kechiktirmay TKCHSETga kiritiladi.
4. TKCHSET markaziy vakolatli organ tomonidan oʻz mablagʻlari yoki Tomonlar davlatlarining qonunchiligida nazarda tutilgan boshqa moliyalashtirish manbalari hisobidan yaratiladi va yuritiladi.
5. TKCHSETdagi berilgan sertifikatlar toʻgʻrisidagi maʼlumotlar olib kiruvchi mamlakatning markaziy bojxona organlari tomonidan bepul asosda taqdim etiladi.
6. Vakolatli organlar va bojxona organlari axborot hamkorligi doirasida taqdim etiladigan va olingan maʼlumotlarning saqlanishi, yaxlitligi va himoya qilinishini Tomonlar davlatlarining qonunchiligi talablariga muvofiq taʼminlaydilar.
4-modda. Nizolar va kelishmovchiliklarni hal qilish
Mazkur Bitim qoidalarini qoʻllash yoki talqin qilish bilan bogʻliq Tomonlar oʻrtasidagi nizolar va kelishmovchiliklar markaziy bojxona organlari va (yoki) markaziy vakolatli organlar oʻrtasidagi maslahatlashuvlar va muzokaralar yoʻli bilan hal etiladi.
5-modda. Oʻzgartirishlar va qoʻshimchalar
Mazkur Bitimga Tomonlar kelishuviga asosan, uning ajralmas qismi boʻlgan alohida bayonnomalar bilan rasmiylashtiriladigan oʻzgartirish va qoʻshimchalar kiritilishi mumkin.
6-modda. Yakuniy qoidalar
Mazkur Bitim Tomonlarning har biri uning kuchga kirishi uchun zarur boʻlgan davlat ichki tartib-taomillarini bajarganligi toʻgʻrisidagi oxirgi yozma xabarnoma diplomatik kanallar orqali olingan sanadan boshlab kuchga kiradi.
Mazkur Bitim nomaʼlum muddatga tuziladi va Tomonlardan biri diplomatik kanallar orqali boshqa Tomonning mazkur Bitimni tugatish niyati toʻgʻrisida tegishli yozma xabarnomani olgan sanadan boshlab uch oy oʻtgandan soʻng tugatiladi.
Toshkent shahrida 2024-yil 8-fevralda ikki asl nusxada, har biri oʻzbek va rus tillarida tuzildi, bunda har ikki matn ham bir xil yuridik kuchga ega.
(imzolar)
Oʻzbekiston Respublikasi Hukumati bilan Belarus Respublikasi Hukumati oʻrtasida tovarlarning kelib chiqishini sertifikatlashtirishning elektron tizimlarini oʻzaro qoʻllash toʻgʻrisida Bitimga ILOVA
Sertifikatlashtirishning elektron tizimi doirasida elektron axborot almashinuvini amalga oshirish jarayonida taqdim etiladigan sertifikatdagi maʼlumotlarning tarkibi
“Izoh” ustunidagi 1 — 4-jadvallarda uzatiladigan maʼlumotlarning turliligi, majburiy toʻldirilishi va mumkin boʻlgan takrorlanishlar sonini koʻrsatish uchun quyidagi belgilar qoʻllaniladi:
1 — maʼlumotlarni toʻldirish majburiy, takrorlashga yoʻl qoʻyilmaydi;
1..* — maʼlumotlarni toʻldirish majburiy, cheklovlarsiz takrorlanishi mumkin;
0..1 — maʼlumotlar ixtiyoriy, takrorlanishga yoʻl qoʻyilmaydi;
0..* — maʼlumotlar ixtiyoriy, cheklovlarsiz takrorlanishi mumkin.