34-modda. Davlat sirlaridan foydalanuvchi tashkilotlarning mulkchilik shakli yoki faoliyati yoʻnalishlari oʻzgarganda davlat sirlarini himoya qilish
Davlat sirlari toʻgʻrisida (O‘RQ-1016-son) · Sana: 27.12.2024 · Amalda
Davlat sirlaridan foydalanuvchi tashkilotlar oʻz mulkchilik shakli yoki faoliyat yoʻnalishlari oʻzgarganda, shu jumladan davlat sirlaridan foydalanish bilan bogʻliq ishlar toʻxtatib turilganda yoki tugatilganda davlat sirlarini tashkil etuvchi maʼlumotlarni va ularni tashuvchilarni himoya qilish choralarini koʻrishi kerak.
Bunda davlat sirlarini tashkil etuvchi maʼlumotlarni tashuvchilar yoʻq qilinadi, saqlash uchun idoraviy yoki davlat arxivlariga topshiriladi yoxud belgilangan tartibda quyidagilarga beriladi:
davlat sirlaridan foydalanuvchi tashkilotning huquqiy vorisiga, agar ushbu huquqiy voris koʻrsatilgan maʼlumotlardan foydalangan holda ishlarni bajarish vakolatiga ega boʻlsa;
tegishli axborotni tasarruf etuvchi, davlat sirlaridan foydalanuvchi boshqa tashkilotga.
Davlat sirlaridan foydalanuvchi tashkilot davlat sirlarini tashuvchilar yoʻq qilinganligi, davlat sirlarini tashkil etuvchi maʼlumotlar saqlash uchun arxivga topshirilganligi yoxud huquqiy vorisga yoki tegishli axborotni tasarruf etuvchi, davlat sirlaridan foydalanuvchi boshqa tashkilotga topshirilganligi toʻgʻrisida maxsus vakolatli davlat organini yozma ravishda xabardor qilishi kerak.
Davlat sirlaridan foydalanuvchi tashkilotlarning mulkchilik shakli va faoliyati yoʻnalishlari oʻzgarganda davlat sirlarini himoya qilish tartibi Oʻzbekiston Respublikasi Vazirlar Mahkamasi tomonidan belgilanadi.