Oʻzbekiston Respublikasi Adliya vazirligi huzuridagi X. Sulaymonova nomidagi Respublika sud ekspertiza markazi faoliyatini yanada takomillashtirish toʻgʻrisida (849-son)
18.12.2024
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Prezidentining “Oʻzbekiston — 2030” strategiyasini “Yoshlar va biznesni koʻllab-quvvatlash yili”da amalga oshirishga oid davlat dasturi toʻgʻrisida” 2024-yil 21-fevraldagi PF-37-son hamda “Oʻzbekiston Respublikasida sud-ekspertlik tizimini takomillashtirish chora-tadbirlari toʻgʻrisida” 2021-yil 5-iyuldagi PF-6256-son farmonlari ijrosini taʼminlash maqsadida Vazirlar Mahkamasi qaror qiladi:
1. Oʻzbekiston Respublikasi Adliya vazirligi, Oliy sudi, Bosh prokuraturasi va Ichki ishlar vazirligining Adliya vazirligi huzuridagi X. Sulaymonova nomidagi Respublika sud ekspertiza markazining (keyingi oʻrinlarda — Sud ekspertiza markazi) Toshkent viloyati hududiy boʻlimini tashkil etish haqidagi taklifi maʼqullansin.
Adliya vazirligi Toshkent viloyat hokimligi bilan birgalikda 2026-yil 1-iyunga qadar Sud ekspertiza markazining budjetdan tashqari mablagʻlari hamda Toshkent viloyatining mahalliy budjeti va budjetdan tashqari mablagʻlari hisobidan Sud ekspertiza markazining Toshkent viloyati boʻlimini xalqaro standartlar bilan uygʻunlashgan OʻzDSt ISO/IEC 17025:2019 davlat standarti talablariga javob beradigan binoga joylashtirish hamda maxsus mebel, kompyuterlar, boshqa zarur texnika va inventarlar, shuningdek, yuqori malakali professional kadrlar bilan taʼminlash choralarini koʻrsin.
2. Isteʼmol mahsulotlari va ichimlik suvi tarkibini aniqlash hamda ushbu mahsulotlarni xorijiy davlatlarga eksport qilishda qulayliklar yaratish maqsadida Sud ekspertiza markazida isteʼmol mahsulotlari tarkibida genetik modifikatsiyalangan organizmlar (GMO) mavjudligi va ichimlik suvining tarkibini aniqlashga qaratilgan tadqiqotlarni amalga oshiruvchi Isteʼmol mahsulotlari va ichimlik suvi tarkibini tahlil qilish laboratoriyasi tashkil qilinsin.
3. Oʻzbekiston Respublikasi Adliya vazirligi:
2025-yil 1-noyabrga qadar Isteʼmol mahsulotlari va ichimlik suvi tarkibini tahlil qilish laboratoriyasini yuqori malakali professional kadrlar, shuningdek, Sud ekspertiza markazining budjetdan tashqari mablagʻlari hisobidan maxsus mebel, kompyuterlar, boshqa zarur texnika va inventarlar bilan taʼminlash;
2025-yil 1-oktabrga qadar Sud ekspertiza markazida genetik modifikatsiyalangan organizmlarni (GMO) aniqlash boʻyicha tadqiqotlarni oʻtkazish uchun zarur boʻlgan uslubiyotlarni ishlab chiqish. Bunda genetik modifikatsiyalangan organizmlarning (GMO) sanitariya qoidalari, normalari va gigiyena normativlariga ruxsat etilgan darajada ekanligiga alohida eʼtibor qaratish;
Sud ekspertiza markazi laboratoriyalari uslublarining Milliy akkreditatsiya tizimida xalqaro ilmiy-texnik talablarga muvofiqligi akkreditatsiyadan oʻtkazib borilishini tashkil etish;
manfaatdor vazirlik va idoralar bilan birgalikda ularning budjetdan tashqari mablagʻlari hisobidan 2024 — 2026-yillarda sud ekspertizasi sohasida faoliyat yurituvchi mutaxassislar malakasini oshirish va ularni xorijiy davlatlarga stajirovkaga yuborish;
2025-yil 1-dekabrga qadar Sud ekspertiza markazida sud-axloqshunoslik ekspertizasini, parfyumeriya sanoati mahsulotlarining kimyoviy tarkibini hamda qurilish materiallari tadqiqotlarini yoʻlga qoʻyish choralarini koʻrsin.
4. Oʻzbekiston Respublikasi Adliya vazirligining Sud ekspertiza markazining hududiy boʻlimlarida quyidagi ekspertiza va tadqiqot turlarini bosqichma-bosqich joriy etish haqidagi taklifi maʼqullansin:
2025-yil 1-oktabrga qadar Sud ekspertiza markazining Navoiy viloyati boʻlimida Materiallar, ashyolar va buyumlar kriminalistik ekspertizasi laboratoriyasi hamda Sud-xatshunoslik va hujjatlarning sud-texnikaviy ekspertizalari;
2026-yil 1-noyabrga qadar Sud ekspertiza markazining Qoraqalpogʻiston Respublikasi boʻlimida Sud-fonografiya, sud-yongʻin texnika va elektrotexnika ekspertizalari;
2026-yil 1-dekabrga qadar Sud ekspertiza markazining Qashqadaryo viloyati hududiy boʻlimida Materiallar, ashyolar va buyumlar kriminalistik ekspertizasi laboratoriyasi hamda Sud-xatshunoslik va hujjatlarning sud-texnikaviy ekspertizalari.
Adliya vazirligi Qoraqalpogʻiston Respublikasi Vazirlar Kengashi, Navoiy va Qashqadaryo viloyatlari hokimliklari bilan birgalikda tegishlicha yuqoridagi boʻlimlarni xalqaro standartlar bilan uygʻunlashgan OʻzDSt ISO/IEC 17025:2019 davlat standarti talablariga javob beradigan binoga joylashtirish hamda maxsus mebel, kompyuterlar, boshqa zarur texnika va inventarlar bilan taʼminlash choralarini koʻrsin.
5. Quyidagilar:
Oʻzbekiston Respublikasi Adliya vazirligi huzuridagi X. Sulaymonova nomidagi Respublika sud ekspertiza markazining tuzilmasi 1-ilovaga muvofiq tasdiqlansin.
Bunda Respublika sud ekspertiza markazi xodimlarining cheklangan umumiy soni 192 nafar (xizmat koʻrsatuvchi va texnik xodimlarni hisobga olmagan holda), shundan boshqaruv xodimlari 53 nafar, sud ekspertlari 116 nafar va mutaxassislar 23 nafar etib belgilansin.
Oʻzbekiston Respublikasi adliya vaziriga Sud ekspertizasi markazi tuzilmasiga xodimlarning belgilangan umumiy soni va ajratilgan mablagʻlar doirasida oʻzgartirishlar kiritish huquqi berilsin.
6. Belgilab qoʻyilsinki, ushbu qarorga muvofiq budjetdan qoʻshimcha xarajatlar 2024-2025-yillarda Oʻzbekiston Respublikasining respublika budjetidan birinchi darajali budjet mablagʻlarini taqsimlovchi sifatida Adliya vazirligiga ajratiladigan mablagʻlar doirasida moliyalashtiriladi, 2026-yildan boshlab Davlat budjeti parametrlarida nazarda tutiladi.
7. Oʻzbekiston Respublikasi Hukumatining 2-ilovaga muvofiq ayrim qarorlari oʻz kuchini yoʻqotgan deb hisoblansin.
8. Mazkur qarorning bajarilishini nazorat qilish Oʻzbekiston Respublikasi adliya vaziri A.D. Tashkulov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 18-dekabr,
849-son
Vazirlar Mahkamasining 2024-yil 18-dekabrdagi 849-son qaroriga1-ILOVA
Oʻzbekiston Respublikasi Adliya vazirligi huzuridagi X. Sulaymonova nomidagi Respublika sud ekspertiza markazining
TUZILMASI
Izoh: Xodimlarning umumiy cheklangan soni (texnik va xizmat koʻrsatuvchi xodimlardan tashqari) — 192 shtat birligi, ulardan boshqaruv xodimlari — 53 shtat birligi, sud ekspertlari — 116 nafar, mutaxassislar — 23 nafar.
Texnik va xizmat koʻrsatuvchi xodimlar soni normativlar boʻyicha belgilanadi. Ilmiy-texnik loyihalarni amalga oshirish uchun mutaxassis va olimlar hamda Markaz va uning laboratoriyalaridagi asbob-uskunalarga texnik xizmat koʻrsatish uchun mutaxassislar shartnoma asosida qoʻshimcha ravishda jalb qilinishi mumkin.
Markazning Sud-ekspertlik ilmiy-tadqiqot instituti xodimlari mavjud shtatlar doirasida nazarda tutilmagan.
Vazirlar Mahkamasining 2024-yil 18-dekabrdagi 849-son qaroriga2-ILOVA
Oʻzbekiston Respublikasi Hukumatining oʻz kuchini yoʻqotgan deb hisoblanayotgan ayrim qarorlari
ROʻYXATI
1. Vazirlar Mahkamasining “Oʻzbekiston Respublikasi Adliya vazirligi huzuridagi X. Sulaymonova nomidagi Respublika sud ekspertiza markazi faoliyatini yanada takomillashtirish toʻgʻrisida” 2012-yil 14-noyabrdagi 321-son qarorining 1-bandi hamda qarorga 1 va 2-ilovalar.
2. Vazirlar Mahkamasining “Oʻzbekiston Respublikasi sanitariya-epidemiologiya xizmati tizimida ruxsat berish tartib-taomillaridan oʻtish tartibi toʻgʻrisidagi nizomlarni tasdiqlash haqida” 2016-yil 30-apreldagi 131-son qarori.
3. Vazirlar Mahkamasining “Oʻzbekiston Respublikasi Adliya vazirligi huzuridagi X. Sulaymonova nomidagi Respublika sud ekspertizasi markazi faoliyatini takomillashtirish toʻgʻrisida” 2019-yil 20-apreldagi 338-son qarorining 2-bandi hamda qarorga 2-ilova.
4. Vazirlar Mahkamasining “Faoliyatni boshlash yoki tugatish uchun vakolatli organni xabardor qilish tartibi toʻgʻrisidagi yagona nizomni tasdiqlash haqida” 2022-yil 25-fevraldagi 88-son qaroriga 4-ilovaning 44-bandi.