Respublika va mahalliy ijro etuvchi hokimiyat organlari hamda davlat tashkilotlarining aloqa markazlari faoliyatini yanada samarali tashkil etish chora-tadbirlari toʻgʻrisida (790-son)

27.11.2024

Oʻzbekiston Respublikasi Vazirlar Mahkamasining

qarori

Mamlakatimizda “Raqamli Oʻzbekiston — 2030” strategiyasiga muvofiq raqamli texnologiyalar sohasida, shu jumladan, ishonch telefonlari, Call-markazlar, dispetcherlik aloqa xizmatlari (keyingi oʻrinlarda — aloqa markazlari) faoliyatini yoʻlga qoʻyish, ularni nazorat qilish orqali aholi va tadbirkorlik subyektlariga koʻrsatilayotgan xizmatlarning sifatini oshirish boʻyicha keng koʻlamli ishlar amalga oshirildi.

Xususan, respublika va mahalliy ijro etuvchi hokimiyat organlari hamda davlat tashkilotlarining aloqa markazlari tashkil etildi. Biroq, keyingi yillarda ushbu aloqa markazlari sonining yanada oshishi bu borada tizimli nazorat faoliyatining yoʻlga qoʻyilishi va koʻrsatilayotgan xizmatlar sifatini yanada yaxshilash zarurligini taqozo qilmoqda.

Respublika va mahalliy ijro etuvchi hokimiyat organlari hamda davlat tashkilotlarining aloqa markazlari faoliyatini nazorat qilish tizimini yanada takomillashtirish, shu jumladan, ushbu markazlar faoliyati raqamli nazorat qilinishini taʼminlash maqsadida Vazirlar Mahkamasi qaror qiladi:

1. Raqamli texnologiyalar vazirligi huzuridagi Axborotlashtirish va telekommunikatsiyalar sohasida nazorat inspeksiyasi (keyingi oʻrinlarda — “Oʻzkomnazorat” inspeksiyasi) tomonidan raqamli texnologiyalarni joriy etishda haqqoniy raqamlar, maʼlumotlar va koʻrsatkichlarga erishish hamda telekommunikatsiya tarmoqlarining holati, operator va provayderlar tomonidan koʻrsatilayotgan xizmatlar sifatini real vaqt rejimida tizimli monitoring qilib borish imkonini beruvchi “Raqamli nazorat” kompleks axborot tizimi joriy etilganligi maʼlumot uchun qabul qilinsin.

2. Belgilansinki:

respublika va mahalliy ijro etuvchi hokimiyat organlari hamda davlat tashkilotlari aloqa markazlarining texnik faoliyati “Oʻzkomnazorat” inspeksiyasi tomonidan “Raqamli nazorat” kompleks axborot tizimi orqali nazorat qilinadi hamda baholanadi;

respublika va mahalliy ijro etuvchi hokimiyat organlari hamda davlat tashkilotlari aloqa markazlarining axborot tizimlari “Raqamli nazorat” kompleks axborot tizimi bilan bosqichma-bosqich oʻzaro integratsiya qilinadi;

“Oʻzkomnazorat” inspeksiyasi respublika va mahalliy ijro etuvchi hokimiyat organlari hamda davlat tashkilotlarining aloqa markazlari reyestrini yuritadi.

3. Quyidagilarni nazarda tutuvchi Respublika va mahalliy ijro etuvchi hokimiyat organlari hamda davlat tashkilotlari aloqa markazlarining texnik faoliyatini nazorat qilish hamda baholash tartibi toʻgʻrisidagi nizom ilovaga muvofiq tasdiqlansin:

aloqa markazlarining texnik faoliyatini “Oʻzkomnazorat” inspeksiyasi tomonidan “Raqamli nazorat” kompleks axborot tizimi orqali nazorat qilish va baholash tartibi;

aloqa markazlarining texnik faoliyatini baholash koʻrsatkichlari;

respublika va mahalliy ijro etuvchi hokimiyat organlari hamda davlat tashkilotlarining aloqa markazlari reyestrini yuritish tartibi.

4. “Oʻzkomnazorat” inspeksiyasi:

2024-yil 10-dekabrga qadar respublika va mahalliy ijro etuvchi hokimiyat organlari hamda davlat tashkilotlarining aloqa markazlari reyestrini shakllantirsin hamda uning muntazam ravishda yuritilishini taʼminlab borsin;

2025-yildan boshlab har yili ikki marotaba (15-fevralga va 15-avgustga qadar) manfaatdor vazirlik va idoralar bilan birgalikda respublika va mahalliy ijro etuvchi hokimiyat organlari hamda davlat tashkilotlarining aloqa markazlarini xatlovdan oʻtkazish choralarini koʻrib borsin.

5. Raqamli texnologiyalar vazirligi Oʻzbekiston texnik jihatdan tartibga solish agentligi hamda manfaatdor vazirlik va idoralar bilan birgalikda 2025-yil 1-martga qadar respublika va mahalliy ijro etuvchi hokimiyat organlari hamda davlat tashkilotlarining aloqa markazlari faoliyatini xalqaro standartlarga muvofiq yanada samarali tashkil qilish maqsadida aloqa markazlari faoliyatini texnik jihatdan tartibga solish sohasidagi tegishli normativ hujjatni ishlab chiqib, tasdiqlasin.

6. Respublika va mahalliy ijro etuvchi hokimiyat organlari hamda davlat tashkilotlari:

2025-yil 1-oktabrga qadar aloqa markazlari faoliyatini texnik jihatdan tartibga solish sohasidagi normativ hujjatga muvofiq oʻzlarining (shu jumladan, autsorsing asosida tashkil etilgan) aloqa markazlari faoliyatiga tegishli dasturiy va texnik qurilmalarni joriy qilgan holda, aloqa markazlari axborot tizimlari “Raqamli nazorat” kompleks axborot tizimi bilan toʻliq integratsiya qilinishini taʼminlasin;

aloqa markazlarining texnik faoliyatini baholash uchun integratsiya jarayonida zarur boʻlgan texnik koʻrsatkichlarni olish imkoniyatini yaratsin;

aloqa markazlarini zarur miqdorda operatorlar bilan taʼminlash yoki autsorsing xizmatini yoʻlga qoʻyish choralarini koʻrsin.

Belgilansinki, mazkur bandda nazarda tutilgan vazifalarni amalga oshirish bilan bogʻliq xarajatlar respublika va mahalliy ijro etuvchi hokimiyat organlarining budjetdan tashqari mablagʻlari hamda qonunchilik hujjatlarida taqiqlanmagan boshqa manbalar hisobidan moliyalashtiriladi.

7. Raqamli texnologiyalar vazirligi manfaatdor vazirlik va idoralar bilan birgalikda bir oy muddatda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.

8. Mazkur qarorning bajarilishini nazorat qilish Oʻzbekiston Respublikasi raqamli texnologiyalar vaziri Sh.X. Shermatov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2024-yil 27-noyabr,

790-son

Vazirlar Mahkamasining 2024-yil 27-noyabrdagi 790-son qaroriga ILOVA

Respublika va mahalliy ijro etuvchi hokimiyat organlari hamda davlat tashkilotlari aloqa markazlarining texnik faoliyatini nazorat qilish hamda baholash tartibi toʻgʻrisida

NIZOM

1-bob. Umumiy qoidalar

1. Mazkur Nizom respublika va mahalliy ijro etuvchi hokimiyat organlari hamda davlat tashkilotlarida aloqa markazlarining texnik faoliyatini nazorat qilish va baholash tartibini belgilaydi.

2. Ushbu Nizomda quyidagi asosiy tushunchalardan foydalaniladi:

aloqa markazi — jismoniy va yuridik shaxslarning telefon orqali murojaatlarini qabul qilish va ularga javob berish xizmatlarini koʻrsatuvchi hamda buning uchun zarur tashkiliy, texnik va boshqa resurslarga ega boʻlgan tashkilot yoki boʻlinma (ishonch telefonlari, Call-markazlar, dispetcherlik aloqa markazlari);

aloqa markaziga kelib tushgan chaqiruv — aloqa markaziga kelib tushgan va navbatga qayd etilgan yoki aloqa markazi operatori bilan darhol bogʻlana olgan chaqiruv, interaktiv ovozli menyu orqali javob olingan chaqiruv bundan mustasno;

respublika va mahalliy ijro etuvchi hokimiyat organlari hamda davlat tashkilotlarining aloqa markazlari reyestri (Reyestr) — respublika va mahalliy ijro etuvchi hokimiyat organlari hamda davlat tashkilotlarining aloqa markazlari toʻgʻrisidagi maʼlumotlar muntazam ravishda yuritiladigan tizimlashtirilgan maʼlumotlar bazasi;

nazorat — aloqa markazi texnik faoliyatining samaradorligini qonunchilik hujjatlari va texnik jihatdan tartibga solish sohasidagi normativ-huquqiy hujjatlar talablari asosida qonunchilikka muvofiq oʻrgangan holda monitoring qilib borish;

texnik faoliyatni nazorat qilish va baholash — aloqa markazining axborot tizimini tayyorlik koeffitsiyenti, foydalanuvchining aloqa markazi operatori bilan oʻrtacha ulanish vaqti va bogʻlanish uchun urinishlar soni hamda texnik-tashkiliy holatini monitoring qilish va baholash;

operator tomonidan xizmat koʻrsatilgan chaqiruv — foydalanuvchi tomonidan aloqa markazi operatori yoki tegishli boʻlinma mutaxassisining javobi olingan chaqiruv.

3. Reyestr Oʻzbekiston Respublikasi Raqamli texnologiyalar vazirligi huzuridagi Axborotlashtirish va telekommunikatsiyalar sohasida nazorat inspeksiyasi (keyingi oʻrinlarda — “Oʻzkomnazorat” inspeksiyasi) tomonidan elektron shaklda yuritiladi va har yili 1-martga va 1-sentabrga qadar yangilab boriladi.

4. Reyestr asosida “Oʻzkomnazorat” inspeksiyasi tomonidan respublika va mahalliy ijro etuvchi hokimiyat organlari hamda davlat tashkilotlari aloqa markazlarining texnik faoliyati nazorat qilinadi hamda baholanadi.

2-bob. Aloqa markazining texnik faoliyatini nazorat qilish

5. Reyestrga kiritilgan aloqa markazlarining texnik faoliyati “Oʻzkomnazorat” inspeksiyasi tomonidan “Raqamli nazorat” kompleks axborot tizimi orqali nazorat qilinadi.

6. Aloqa markazlarining texnik faoliyati har chorak davomida oʻtkaziladigan monitoring asosida nazorat qilinadi. Bunda monitoring natijalari “Oʻzkomnazorat” inspeksiyasi tomonidan har chorak yakuni boʻyicha umumlashtirilib, tahlil qilinadi.

7. Tahlil natijasiga koʻra “Oʻzkomnazorat” inspeksiyasi tomonidan har chorak yakunidan keyingi oyning 10-sanasiga qadar aloqa markazlarining texnik faoliyati mazkur Nizomning 3-bobiga muvofiq baholanadi.

8. “Oʻzkomnazorat” inspeksiyasiga jismoniy va yuridik shaxslarning aloqa markazlari texnik faoliyatidan noroziligi boʻyicha murojaatlari kelib tushgan taqdirda, “Oʻzkomnazorat” inspeksiyasi tomonidan tegishli respublika va mahalliy ijro etuvchi hokimiyat organlari hamda davlat tashkilotlariga ularning faoliyatida vujudga kelgan kamchilik yuzasidan “Raqamli nazorat” kompleks axborot tizimi yoki gibrid pochta orqali kamchiliklarni bartaraf etish muddatlarini belgilagan holda yozma xabar yuboriladi.

Respublika va mahalliy ijro etuvchi hokimiyat organlari hamda davlat tashkilotlari kamchiliklarni bartaraf etish choralarini koʻradi va natijasi boʻyicha “Oʻzkomnazorat” inspeksiyasiga maʼlumot taqdim etadi.

9. Kamchiliklar bartaraf etilmagan taqdirda, “Oʻzkomnazorat” inspeksiyasi tegishli respublika va mahalliy ijro etuvchi hokimiyat organlari hamda davlat tashkilotlariga belgilangan tartib buzilishi holatlarini va sabablarini bartaraf etish muddatini koʻrsatgan holda, qonunchilik hujjatlariga muvofiq taqdimnoma kiritadi.

3-bob. Aloqa markazining texnik faoliyatini baholash koʻrsatkichlari

10. Aloqa markazlarining texnik faoliyati ushbu Nizomga 1-ilovaga muvofiq sxema va 2-ilovaga muvofiq mezonlar asosida “Raqamli nazorat” kompleks axborot tizimi orqali nazorat qilinadi hamda baholanadi.

11. Mezonlar boʻyicha hisoblash natijalarining yigʻindisidan kelib chiqib, aloqa markazlarining texnik faoliyati quyidagicha baholanadi:

71 balldan 100 ballgacha — “aʼlo” baho (“yashil” toifa);

55 balldan 70 ballgacha — “yaxshi” baho (“sariq” toifa);

54 ballgacha — “qoniqarsiz” baho (“qizil” toifa).

12. Respublika va mahalliy ijro etuvchi hokimiyat organlari hamda davlat tashkilotlari aloqa markazlarining texnik faoliyatini baholash natijalariga koʻra quyidagilar amalga oshiriladi:

a) “yashil” toifadagi aloqa markazlari boʻyicha:

“Oʻzkomnazorat” inspeksiyasi tomonidan aloqa markazlarining texnik faoliyatini yanada yaxshilash boʻyicha tavsiyalar ishlab chiqiladi (baholash natijasi maksimal boʻlgan aloqa markazlari bundan mustasno);

respublika va mahalliy ijro etuvchi hokimiyat organlari hamda davlat tashkilotlari “Oʻzkomnazorat” inspeksiyasi tomonidan taqdim etilgan tavsiyalarga muvofiq aloqa markazlarining texnik faoliyatini yanada yaxshilash choralari koʻriladi;

b) “sariq” toifadagi aloqa markazlari boʻyicha:

“Oʻzkomnazorat” inspeksiyasi tomonidan aloqa markazlarining texnik faoliyatini yaxshilash boʻyicha tavsiyalar ishlab chiqiladi;

respublika va mahalliy ijro etuvchi hokimiyat organlari hamda davlat tashkilotlari tomonidan “Oʻzkomnazorat” inspeksiyasi tavsiyalari asosida “Oʻzkomnazorat” inspeksiyasi bilan birgalikda aloqa markazlarining texnik faoliyatini yaxshilash boʻyicha chora-tadbirlar dasturi ishlab chiqiladi va amalga oshirilishi taʼminlanadi;

v) “qizil” toifadagi aloqa markazlari boʻyicha:

“Oʻzkomnazorat” inspeksiyasi tomonidan aloqa markazlari faoliyatida yoʻl qoʻyilayotgan kamchiliklarni oʻrganish ishlari oʻtkaziladi va ularni bartaraf etish boʻyicha tavsiyalar ishlab chiqiladi;

respublika va mahalliy ijro etuvchi hokimiyat organlari hamda davlat tashkilotlari tomonidan “Oʻzkomnazorat” inspeksiyasi tavsiyalari asosida inspeksiya bilan birgalikda aloqa markazlari texnik faoliyatini yaxshilash boʻyicha chora-tadbirlar dasturi ishlab chiqiladi va amalga oshirilishi taʼminlanadi;

respublika va mahalliy ijro etuvchi hokimiyat organlari hamda davlat tashkilotlari aloqa markazlarining texnik faoliyatini yaxshilash boʻyicha chora-tadbirlar dasturining ijrosi ular tomonidan taʼminlanmagan taqdirda, “Oʻzkomnazorat” inspeksiyasi respublika va mahalliy ijro etuvchi hokimiyat organlari hamda davlat tashkilotlariga ularni bartaraf etish muddatlari belgilangan holda qonunchilik hujjatlariga muvofiq koʻrsatma beradi;

“Oʻzkomnazorat” inspeksiyasi tomonidan aniqlangan qoidabuzarliklarni bartaraf etish toʻgʻrisida berilgan koʻrsatma respublika va mahalliy ijro etuvchi hokimiyat organlari hamda davlat tashkilotlari tomonidan ijrosi taʼminlanmagan taqdirda, “Oʻzkomnazorat” inspeksiyasi qonunchilik hujjatlariga muvofiq bajarilishi majburiy boʻlgan taqdimnoma kiritadi;

“Oʻzkomnazorat” inspeksiyasining koʻrsatmalari hamda bajarilishi majburiy boʻlgan taqdimnomalarini bajarmaslik, shu jumladan, oʻz vaqtida yoki toʻliq yoxud belgilangan muddatlarda bajarmagan respublika va mahalliy ijro etuvchi hokimiyat organlari hamda davlat tashkilotlarining mansabdor shaxslarga nisbatan “Oʻzkomnazorat” inspeksiyasi tomonidan qonunchilikda belgilangan tartibda choralar koʻriladi.

13. Foydalanuvchilarning aloqa markazi operatori bilan ulanish vaqti aloqa markazlarining texnik faoliyatini nazorat qilish va baholash mezonlaridan yuqori boʻlgan taqdirda, “Oʻzkomnazorat” inspeksiyasi tomonidan respublika va mahalliy ijro etuvchi hokimiyat organlari hamda davlat tashkilotlariga mazkur aloqa markazlarida operatorlar sonini oshirish boʻyicha taqdimnoma kiritiladi.

14. Respublika va mahalliy ijro etuvchi hokimiyat organlari hamda davlat tashkilotlari oʻz aloqa markazlarining texnik faoliyatini takomillashtirish yuzasidan rejalashtirilgan profilaktika tadbirlari boʻyicha “Oʻzkomnazorat” inspeksiyasini va jamoatchilikni kamida uch ish kunidan oldin sabablarini koʻrsatgan holda rasman xabardor qiladi.

15. Respublika va mahalliy ijro etuvchi hokimiyat organlari hamda davlat tashkilotlari aloqa markazlarining texnik faoliyatini baholash natijalari har chorak yakunidan keyingi oyning 15-sanasiga qadar “Oʻzkomnazorat” inspeksiyasi tomonidan Internet jahon axborot tarmogʻidagi rasmiy sahifalari hamda “Raqamli nazorat” kompleks axborot tizimi orqali eʼlon qilinadi.

16. Aloqa markazlarining texnik faoliyatini baholash natijalari yuzasidan har chorak yakunidan keyin oyning 20-sanasiga qadar “Oʻzkomnazorat” inspeksiyasi tomonidan Vazirlar Mahkamasiga takliflar kiritish uchun Raqamli texnologiyalar vazirligiga baholash natijalarini kiritadi.

17. Respublika va mahalliy ijro etuvchi hokimiyat organlari hamda davlat tashkilotlari tomonidan aloqa markazlarining texnik-tashkiliy holati boʻyicha “Oʻzkomnazorat” inspeksiyasiga taqdim etiladigan maʼlumotlarning toʻliqligi va toʻgʻriligiga tegishli respublika va mahalliy ijro etuvchi hokimiyat organlari hamda davlat tashkilotlarining rahbarlari javobgar hisoblanadi.

4-bob. Yakunlovchi qoidalar

18. Ushbu Nizomni qoʻllashda kelib chiqadigan nizolar qonunchilik hujjatlarida belgilangan tartibda hal etiladi.

19. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradi.

Respublika va mahalliy ijro etuvchi hokimiyat organlari hamda davlat tashkilotlari aloqa markazlarining texnik faoliyatini nazorat qilish hamda baholash tartibi toʻgʻrisidagi nizomga 1-ILOVA

Respublika va mahalliy ijro etuvchi hokimiyat organlari aloqa markazlarining texnik faoliyatini nazorat qilish hamda baholash

SXEMASI

Respublika va mahalliy ijro etuvchi hokimiyat organlari hamda davlat tashkilotlari aloqa markazlarining texnik faoliyatini nazorat qilish hamda baholash tartibi toʻgʻrisidagi nizomga 2-ILOVA

Respublika va mahalliy ijro etuvchi hokimiyat organlari aloqa markazlarining (ishonch telefonlari, Call-markazlar, dispetcherlik aloqa xizmatlari) texnik faoliyatini nazorat qilish va baholash

MEZONLARI