Maxsus elektron tizim orqali ruxsat etish xususiyatiga ega ayrim hujjatlarni berish sohasidagi qonunchilik hujjatlari tizimlashtirilishi munosabati bilan Vazirlar Mahkamasining “Xalqaro yoʻllarda tashish daftarchasini qoʻllagan holda yuklarni xalqaro tashish sohasidagi ayrim normativ-huquqiy hujjatlarni tasdiqlash toʻgʻrisida” 2021-yil 2-dekabrdagi 727-son qaroriga oʻzgartirish va qoʻshimchalar kiritish toʻgʻrisida (787-son)

26.11.2024

Oʻzbekiston Respublikasi Vazirlar Mahkamasining

qarori

Bojxona organlarida ruxsat berish tartib-taomillari isloh qilinib, avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnomani olish jarayonlarini raqamlashtirish orqali byurokratik toʻsiqlarni qisqartish borasida tizimli chora-tadbirlar amalga oshirilmoqda.

Shu bilan birga, avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnomani olish, amal qilishini tugatish, bekor qilish yoki amal qilish muddatini uzaytirish boʻyicha murojaat qilgan Oʻzbekiston Respublikasi jismoniy va yuridik shaxslari bojxona organlariga tegishli hujjatlarni qogʻoz nusxada taqdim etishi dolzarb muammo boʻlib qolmoqda.

Oʻzbekiston Respublikasi Prezidentining “Bojxona maʼmuriyatchiligini yanada takomillashtirishga doir qoʻshimcha chora-tadbirlar toʻgʻrisida” 2022-yil 27-apreldagi PF-122-son Farmoniga muvofiq, shuningdek, avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnomani olish, amal qilishini tugatish, bekor qilish yoki amal qilish muddatini uzaytirish jarayonlarini raqamlashtirish orqali soddalashtirish maqsadida Oʻzbekiston Respublikasi Vazirlar Mahkamasi qaror qiladi:

1. Vazirlar Mahkamasining “Xalqaro yoʻllarda tashish daftarchasini qoʻllagan holda yuklarni xalqaro tashish sohasidagi ayrim normativ-huquqiy hujjatlarni tasdiqlash toʻgʻrisida” 2021-yil 2-dekabrdagi 727-son qaroriga ilovaga muvofiq quyidagilarni nazarda tutuvchi oʻzgartirish va qoʻshimchalar kiritilsin:

avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnomani (keyingi oʻrinlarda — guvohnoma) olish, amal qilishini tugatish, bekor qilish yoki amal qilish muddatini uzaytirish boʻyicha axborot tizimini joriy etish yoʻli bilan hujjatlarni qogʻoz nusxada talab qilishdan voz kechish;

guvohnoma olish boʻyicha murojaatlarni Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) va “Litsenziya” axborot tizimi (keyingi oʻrinlarda — “Litsenziya” AT) orqali koʻrib chiqish mexanizmini joriy etish.

2. Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi YIDXP va “Litsenziya” AT orqali guvohnoma olish boʻyicha texnik hujjatni bir oy muddatda ishlab chiqsin hamda belgilangan tartibda kelishish uchun Raqamli texnologiyalar vazirligiga kiritsin.

3. Oʻzbekiston Respublikasi Raqamli texnologiyalar vazirligi Adliya vazirligi hamda Iqtisodiyot va moliya vazirligi huzuridagi Bojxona qoʻmitasi bilan birgalikda uch oy muddatda:

guvohnoma olish boʻyicha davlat xizmatlarini koʻrsatishning maʼmuriy reglamenti boʻyicha davlat xizmatlari koʻrsatishni YIDXP va “Litsenziya” AT orqali joriy etish choralarini koʻrsin;

guvohnoma olish boʻyicha davlat xizmatlarini koʻrsatishda ishtirok etuvchi davlat organlari va tashkilotlarning YIDXP va “Litsenziya” ATga ulanishini taʼminlasin.

4. Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi Raqamli texnologiyalar vazirligi, Adliya vazirligi hamda manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

5. Ushbu qaror rasmiy eʼlon qilingan kundan eʼtiboran uch oy oʻtgach kuchga kiradi.

6. Mazkur qarorning bajarilishini nazorat qilish Oʻzbekiston Respublikasi Bosh vaziri oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2024-yil 26-noyabr,

787-son

Vazirlar Mahkamasining 2024-yil 26-noyabrdagi 787-son qaroriga ILOVA

Vazirlar Mahkamasining “Xalqaro yoʻllarda tashish daftarchasini qoʻllagan holda yuklarni xalqaro tashish sohasidagi ayrim normativ-huquqiy hujjatlarni tasdiqlash toʻgʻrisida” 2021-yil 2-dekabrdagi 727-son qaroriga kiritilayotgan oʻzgartirish va qoʻshimchalar

1. 2-bandda:

toʻrtinchi xatboshidan “tasdiqlansin” soʻzi chiqarib tashlansin;

quyidagi mazmundagi beshinchi xatboshi bilan toʻldirilsin:

“avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnomani olish, amal qilishini tugatish, bekor qilish yoki amal qilish muddatini uzaytirish boʻyicha davlat xizmatlarini koʻrsatish tartibini belgilashni nazarda tutuvchi Avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma olish boʻyicha davlat xizmatlarini koʻrsatishning maʼmuriy reglamenti 3a-ilovaga muvofiq tasdiqlansin”.

2. 6-bandning ikkinchi xatboshisi “YIDXP” soʻzidan keyin “va “Litsenziya” axborot tizimi” soʻzlari bilan toʻldirilsin.

3. 1-ilovada:

6-banddagi “Davlat bojxona qoʻmitasi” soʻzlari “Iqtisodiyot va moliya vazirligi huzuridagi Bojxona qoʻmitasi” soʻzlari bilan almashtirilsin;

18-bandning uchinchi xatboshisi quyidagi tahrirda bayon etilsin:

“Konvensiya talablari asosida avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma”;

20-bandning uchinchi xatboshisi quyidagi tahrirda bayon etilsin:

“avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnomani yoki konteynerlarda tashishga ruxsat berish toʻgʻrisidagi lavhaning mavjudligini nazoratdan oʻtkazadi”;

23-bandning sakkizinchi xatboshisi quyidagi tahrirda bayon etilsin:

“XYT daftarchasi Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi Yagona avtomatlashtirilgan axborot tizimida (keyingi oʻrinlarda — Bojxona qoʻmitasi YAAAT) roʻyxatga olinadi va manzil bojxona organiga nazoratga qoʻyiladi”;

26-banddagi, 27-bandning beshinchi xatboshisidagi, 32-bandning oʻn birinchi xatboshisidagi, 36-bandning uchinchi xatboshidagi, 54-bandning birinchi va ikkinchi xatboshilaridagi, 58-bandning uchinchi xatboshisidagi, 59-bandning birinchi xatboshisidagi va 63-banddagi “DBQ” soʻzi “Bojxona qoʻmitasi” soʻzlari bilan almashtirilsin;

29-bandning uchinchi xatboshisi quyidagi tahrirda bayon etilsin:

“Konvensiya talablari asosida avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma yoki konteynerlarda tegishli lavhalar”;

30-bandning oltinchi xatboshisi quyidagi tahrirda bayon etilsin:

“avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma yoki konteynerlarda tegishli lavhalar mavjudligini”;

41-bandning birinchi xatboshisidagi “toʻrttadan” soʻzi “sakkiztadan” soʻzi bilan almashtirilsin;

45-bandning oʻn birinchi xatboshisidagi “DBQga” soʻzi “bojxona organlariga” soʻzlari bilan almashtirilsin;

46-bandning uchinchi xatboshisi quyidagi tahrirda bayon etilsin:

“avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma yoki konteynerlarda lavha mavjud boʻlmaganda yoki ularning muddati tugaganda”;

62-band quyidagi mazmundagi beshinchi xatboshi bilan toʻldirilsin:

“Konvensiya talablari asosida kafolat uyushmasidan undirilgan bojxona toʻlovlari va kechiktirish uchun foizlar summasi besh yil muddatga qadar Iqtisodiyot va moliya vazirligi huzuridagi Bojxona qoʻmitasining budjetdan tashqari hisob raqamlarida saqlanadi”;

1-ilovaning matni quyidagi tahrirda bayon etilsin:

“

”.

2-ilovada:

1-bobning yigirma va yigirma birinchi xatboshilari quyidagi tahrirda bayon etilsin:

“9-grafa. “Avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma”.

Avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnomaning raqami va amal qilish muddati koʻrsatiladi”;

7-bobning yigirma beshinchi xatboshisi quyidagi tahrirda bayon etilsin:

“a) avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnomaning mavjudligi”.

4. 2-ilovada:

3-band quyidagi tahrirda bayon etilsin:

“3. XYT daftarchasidan foydalanish uchun ruxsatnoma Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi (keyingi oʻrinlarda — Bojxona qoʻmitasi) Qoraqalpogʻiston Respublikasi, viloyatlar, Toshkent shahar boshqarmalari va “Toshkent-AERO” ixtisoslashtirilgan bojxona kompleksi (keyingi oʻrinlarda — Bojxona qoʻmitasi hududiy boshqarmalari) tomonidan ushbu Reglamentga 1 va 2-ilovalarga muvofiq sxema va ruxsatnoma boʻyicha beriladi”;

quyidagi mazmundagi 41-band bilan toʻldirilsin:

“41. Ruxsatnoma olinayotgan avtotransport vositasining bojxona koʻzdan kechiruvi oʻtkazilganda bojxona koʻrigi dalolatnomasi rasmiylashtiriladi”;

6-band “Yagona interaktiv davlat xizmatlari portali (keyingi oʻrinlarda — YIDXP)” soʻzlaridan keyin “yoki “Litsenziya” axborot tizimi (keyingi oʻrinlarda — “Litsenziya” AT)” soʻzlari bilan toʻldirilsin;

10-banddagi “Davlat bojxona qoʻmitasi, Davlat soliq qoʻmitasining” soʻzlari “Bojxona qoʻmitasi, Soliq qoʻmitasining” soʻzlari bilan almashtirilsin;

12-band quyidagi tahrirda bayon etilsin:

“12. Ariza YIDXP yoki “Litsenziya” AT orqali Bojxona qoʻmitasining Yagona avtomatlashtirilgan axborot tizimiga (keyingi oʻrinlarda — Bojxona qoʻmitasi YAAAT) kelib tushadi. Ushbu ariza shu vaqtning oʻzida avtomatik tarzda Soliq qoʻmitasiga va kafolat uyushmasiga yuboriladi”;

13-bandda:

ikkinchi xatboshidagi “DBQ” soʻzi “Bojxona qoʻmitasi” soʻzlari bilan almashtirilsin;

uchinchi xatboshidagi “Davlat soliq qoʻmitasining hududiy boshqarmalari uch ish kuni mobaynida DBQ” soʻzlari “Soliq qoʻmitasining hududiy boshqarmalari uch ish kuni mobaynida Bojxona qoʻmitasi” soʻzlari bilan almashtirilsin;

toʻrtinchi xatboshidagi “Davlat bojxona qoʻmitasining hududiy boshqarmalari uch ish kuni mobaynida DBQ” soʻzlari “Bojxona qoʻmitasining hududiy boshqarmalari uch ish kuni mobaynida Bojxona qoʻmitasi” soʻzlari bilan almashtirilsin;

beshinchi xatboshidagi “DBQ, Davlat soliq qoʻmitasi” soʻzlari “Bojxona qoʻmitasi, Soliq qoʻmitasi” soʻzlari bilan almashtirilsin;

14-banddagi “Davlat soliq qoʻmitasining hududiy boshqarmalari tomonidan ariza koʻrib chiqilgandan soʻng Davlat bojxona qoʻmitasining” soʻzlari “Soliq qoʻmitasining hududiy boshqarmalari tomonidan ariza koʻrib chiqilgandan soʻng Bojxona qoʻmitasining” soʻzlari bilan almashtirilsin;

15-bandda:

birinchi xatboshidagi “Davlat bojxona qoʻmitasining” soʻzlari “Bojxona qoʻmitasi” soʻzlari bilan almashtirilsin;

ikkinchi xatboshi “YIDXP” soʻzidan keyin “yoki “Litsenziya” AT” soʻzlari bilan toʻldirilsin;

16-band va 25-bandning birinchi va ikkinchi xatboshilari “YIDXP” soʻzidan keyin “yoki “Litsenziya” AT” soʻzlari bilan toʻldirilsin;

17-banddagi “Davlat bojxona qoʻmitasiga ushbu Reglamentga 5-ilovaga muvofiq DBQ” soʻzlari “Bojxona qoʻmitasiga ushbu Reglamentga 5-ilovaga muvofiq Bojxona qoʻmitasi” soʻzlari bilan almashtirilsin;

18-bandning birinchi xatboshisi, 19-bandning birinchi xatboshisi hamda 23-banddagi “Davlat bojxona qoʻmitasi” soʻzlari “Bojxona qoʻmitasi” soʻzlari bilan almashtirilsin;

26 va 27-bandlar quyidagi tahrirda bayon etilsin:

“26. Qayta roʻyxatdan oʻtkazish va (yoki) oʻzgarishlar toʻgʻrisida murojaat (tegishli hujjatlar ilova qilingan holda) kelib tushganda, Bojxona qoʻmitasi hududiy boshqarmasi tomonidan tekshiriladi, murojaat YIDXP yoki “Litsenziya” ATga kelib tushgan kundan boshlab uch ish kuni ichida tasdiqlanadi yoki rad etiladi.

27. Oʻzgartirilgan maʼlumotlar tasdiqlangan taqdirda, Bojxona qoʻmitasining tegishli hududiy boshqarmasi ruxsatnoma maʼlumotlarini Bojxona qoʻmitasi YAAATda yangilaydi va Bojxona qoʻmitasiga kiritilgan tuzatishlar boʻyicha axborot beradi. Bojxona qoʻmitasi masʼul xodimi tegishli oʻzgartirishlarni XYT Xalqaro bank maʼlumotlari bazasiga kiritadi”;

28-banddagi “Davlat bojxona qoʻmitasining” soʻzlari “Bojxona qoʻmitasining” soʻzlari bilan almashtirilsin;

29-bandda:

birinchi xatboshi quyidagi tahrirda bayon etilsin:

“29. XYT daftarchasidan foydalanish uchun ruxsatnoma quyidagi hollarda YIDXP yoki “Litsenziya” AT orqali ikki kun ichida Bojxona qoʻmitasi hududiy boshqarmalari tomonidan bekor qilinadi:”;

ikkinchi xatboshi “YIDXP” soʻzidan keyin “yoki “Litsenziya” AT” soʻzlari bilan toʻldirilsin;

30-band quyidagi tahrirda bayon etilsin:

“30. XYT daftarchasidan foydalanish uchun ruxsatnomani bekor qilish haqidagi qaror Bojxona qoʻmitasi, ruxsatnoma egasi va kafolat uyushmasiga YIDXP yoki “Litsenziya” AT orqali yuboriladi”;

31-banddagi “Davlat bojxona qoʻmitasining” soʻzlari “Bojxona qoʻmitasining” soʻzlari bilan almashtirilsin;

33-band quyidagi tahrirda bayon etilsin:

“33. XYT daftarchasidan foydalanish uchun berilgan ruxsatnomalar reyestri (keyingi oʻrinlarda — reyestr) ushbu Reglamentga 6-ilovaga muvofiq shaklda avtomatik ravishda Bojxona qoʻmitasi YAAAT tomonidan yaratiladi. Reyestr maʼlumotlarining shakllanishi Bojxona qoʻmitasi tomonidan nazorat qilinadi.”

1-ilovaning matni quyidagi tahrirda bayon etilsin:

“XYT daftarchasidan foydalanish uchun ruxsatnoma olish

SXEMASI

Izoh. Mazkur sxemada koʻrsatilgan 4 — 9-bosqichlar vakolatli organlar tomonidan avtomatlashtirilishi mumkin”;

2-ilovada:

5 va 12-pozitsiyalardagi “Davlat bojxona qoʻmitasi” soʻzlari “Bojxona qoʻmitasi” soʻzlari bilan almashtirilsin;

6 va 7-pozitsiyalar “Yagona interaktiv davlat xizmatlari portali” soʻzlaridan keyin “yoki “Litsenziya” axborot tizimi” soʻzlari bilan toʻldirilsin;

13-pozitsiyadagi “Davlat soliq qoʻmitasi” soʻzlari “Soliq qoʻmitasi” soʻzlari bilan almashtirilsin;

3-ilovaning 4.1.4-bandidagi “tasarrufida boʻlish muddati” soʻzlari “tasarrufiga oʻtgan sanasi” soʻzlari bilan almashtirilsin;

5-ilova matnidagi “Davlat bojxona qoʻmitasi” soʻzlari “Iqtisodiyot va moliya vazirligi huzuridagi Bojxona qoʻmitasi” soʻzlari bilan almashtirilsin.

5. 3-ilovada:

2-band quyidagi tahrirda bayon etilsin:

“2. Iqtisodiyot va moliya vazirligi huzuridagi Bojxona qoʻmitasi (keyingi oʻrinlarda — Bojxona qoʻmitasi) Oʻzbekiston Respublikasi hududida Konvensiya qoidalaridan foydalanish huquqidan mahrum qilingan va bunday huquqi tiklangan tashuvchilarning ushbu Nizomga ilovada belgilangan shaklda reyestrini yuritadi;

3-bandning birinchi xatboshisi, 6-bandning birinchi xatboshisi hamda 8-banddagi “Davlat bojxona qoʻmitasi” soʻzlari “Bojxona qoʻmitasi” soʻzlari bilan almashtirilsin;

4-bandning birinchi xatboshisidagi “Davlat bojxona qoʻmitasiga” soʻzlari “Bojxona qoʻmitasiga” soʻzlari bilan almashtirilsin;

5-band quyidagi tahrirda bayon etilsin:

“5. Tashuvchini Oʻzbekiston Respublikasi hududida Konvensiya qoidalaridan foydalanish huquqidan mahrum qilish boʻyicha qaror (keyingi oʻrinlarda — huquqdan mahrum qilish boʻyicha qaror) ushbu Nizomning 3-bandida belgilangan holatlarda hududiy bojxona boshqarmalari Bojxona qoʻmitasiga kiritgan takliflar asosida Bojxona qoʻmitasi xatlariga muvofiq rasmiylashtirilib, hududiy bojxona boshqarmalari, tashuvchi, Xalqaro yoʻllarda tashish Ijroiya kengashi, Kafolat uyushmasi va tashuvchi tashkil etilgan yoki doimiy manzilgohi joylashgan davlatning vakolatli organi manzillariga yuboriladi”;

7-bandda:

uchinchi xatboshidagi “Davlat bojxona qoʻmitasiga” soʻzlari “Bojxona qoʻmitasiga” soʻzlari bilan almashtirilsin;

toʻrtinchi va beshinchi xatboshilardagi “Davlat bojxona qoʻmitasi” soʻzlari “Bojxona qoʻmitasi” soʻzlari bilan almashtirilsin;

ilova matnidagi “Davlat bojxona qoʻmitasining” soʻzlari “Bojxona qoʻmitasining” soʻzlari bilan almashtirilsin.

6. Quyidagi mazmundagi 3a-ilova bilan toʻldirilsin:

“Vazirlar Mahkamasining 2021-yil 2-dekabrdagi 727-son qaroriga 3a-ILOVA

Avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma olish boʻyicha davlat xizmatlarini koʻrsatishning

MAʼMURIY REGLAMENTI

1-bob. Umumiy qoidalar

1. Ushbu Reglament avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma olish, amal qilishini tugatish, bekor qilish yoki amal qilish muddatini uzaytirish boʻyicha davlat xizmatlarini koʻrsatish tartibini belgilaydi.

2. Ushbu Reglamentda quyidagi tushunchalardan foydalaniladi:

arizachi — guvohnoma olish, amal qilishini tugatish, bekor qilish yoki amal qilish muddatini uzaytirish boʻyicha murojaat qilgan yuridik yoki jismoniy shaxs;

guvohnoma — avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma;

ogʻir vaznli yoki katta hajmli yuklar — har qanday ogʻir va katta hajmli, ogʻirligi, oʻlchami va xususiyatidan kelib chiqib, yopiladigan yoʻl avtotransport vositasida tashish imkoni boʻlmagan yuklar;

avtotransport vositasi — bojxona nazorati ostidagi tovarlarni bojxona plombalari va muhrlari ostida tashish uchun moʻljallangan avtotransport vositasi (tirkama, yarim tirkama, konteyner) yoki avtotransport vositasining qismi (yuk boʻlimi);

konteyner — yuklarni joylashtirishga moʻljallangan yopiq yoki qisman yopiq idish, doimiy va yetarli darajada mustahkam, shuningdek, koʻp marotaba ishlatishga moʻljallangan, yuklarni oraliq masofada qayta yuklamasdan, bitta yoki bir nechta transport turlarida tashishga moʻljallangan, bir transport turidan ikkinchi transport turiga yuklashni yengillashtirish uchun jihozlangan, yuklarni yengil ortish va tushirish uchun tayyorlangan, kamida bir kub metr ichki hajmiga ega boʻlgan transport vositasi (sisterna yoki boshqa shunga oʻxshash moslama);

YIDXP — Oʻzbekiston Respublikasi Yagona interaktiv davlat xizmatlari portali;

“Litsenziya” axborot tizimi (keyingi oʻrinlarda — “Litsenziya” AT) — litsenziyalash, ruxsat berish va xabardor qilish tartib-taomillari bilan bogʻliq barcha jarayonlarni qamrab olgan, idoralararo elektron oʻzaro hamkorlik qilish imkoniyatiga ega boʻlgan tizim.

3. Guvohnoma Yuklarni xalqaro yoʻllarda tashish daftarchasini qoʻllagan holda yuklarni xalqaro tashish toʻgʻrisidagi bojxona konvensiyasi (1975-yil, Jeneva) (keyingi oʻrinlarda — Konvensiya) hamda Oʻzbekiston Respublikasi Bojxona kodeksi (keyingi oʻrinlarda — Kodeks) talablari va shartlari asosida beriladi.

4. Guvohnoma har bir avtotransport vositasiga alohida beriladi, guvohnomani konstruksiyaning turi boʻyicha berish bundan mustasno.

5. Guvohnoma olish uchun avtotransport vositasi Kodeks va Konvensiyada nazarda tutilgan shartlarga muvofiq boʻlishi lozim.

6. Avtotransport vositasiga guvohnoma:

arizachi avtotransport vositasidan foydalanuvchi yuridik yoki jismoniy shaxs boʻlganda — yakka tartibda;

arizachi ayni bir turdagi konstruksiyaga ega boʻlgan avtotransport vositalarini seriyali ishlab chiqaruvchi zavod boʻlganda — konstruksiyaning turi boʻyicha berilishi mumkin.

7. Guvohnoma Konvensiya talablari asosida xalqaro yoʻllarda tashish (keyingi oʻrinlarda — XYT) daftarchasidan foydalangan holda tovarlarni xalqaro tashish hamda boshqa qonunchilik bilan belgilangan maqsadlarda beriladi.

Guvohnoma bojxona organlari talablariga koʻra tovarning kuzatuv hujjatlari bilan birga taqdim etiladi.

8. Guvohnoma mavjud boʻlmagan avtotransport vositalarida XYT daftarchalari asosida tovarlarni tashish taqiqlanadi, ogʻir vaznli yoki katta hajmli yuklar tashilishi bundan mustasno.

Ogʻir vaznli yoki katta hajmli yuklarni XYT daftarchasi asosida tashish tartibi qonunchilikda belgilangan tartibda amalga oshiriladi.

9. Avtotransport vositasi keyinchalik guvohnoma berish jarayonidagi texnik talablarga javob bermasa, XYT daftarchasidan foydalangan holda tashuvni amalga oshirish uchun ushbu avtotransport vositasi belgilangan texnik talablariga javob beradigan holga keltirilishi lozim.

10. Guvohnoma amal qilish muddati ikki yilni tashkil etadi.

11. Guvohnoma mazkur Reglamentga 1-ilovada keltirilgan sxema hamda 2-ilovada keltirilgan guvohnoma pasporti asosida beriladi.

2-bob. Davlat xizmatlarini koʻrsatish tartibi

12. Arizachi guvohnomani olish uchun YIDXP yoki “Litsenziya” AT orqali quyidagi hujjatlarni elektron raqamli imzo (keyingi oʻrinlarida — ERI) bilan tasdiqlagan holda bojxona organlariga joʻnatish yoʻli bilan murojaat qiladi:

a) yakka tartibda guvohnoma olish uchun:

mazkur Reglamentga 3-ilovada keltirilgan elektron ariza;

avtotransport vositasiga nisbatan mulk huquqini yoki undan foydalanish huquqini tasdiqlovchi hujjatning koʻchirma nusxasi;

ushbu Reglamentga 4-ilovada koʻrsatilgan namunaga muvofiq avtotransport vositasining oldidan, orqadan, chapdan, oʻngdan koʻrinishi, shuningdek plombalar va muhrlar qoʻyiladigan joyning tasviri mavjud boʻlgan, arizachi tomonidan tasdiqlangan rangli fotosuratlar (bitta fotosuratda bitta avtotransport vositasining koʻpi bilan ikki tomonini bir vaqtning oʻzida tasvirlashga yoʻl qoʻyiladi). Bunda fotosuratlar kunning yorugʻ vaqtida olingan JPEG formatda, har birining hajmi 5 Mbdan oshmagan boʻlishi lozim;

b) konstruksiyaning turi boʻyicha guvohnoma olish uchun:

mazkur Reglamentga 5-ilovada keltirilgan elektron ariza;

avtotransport vositasi konstruksiyasining chizmalarini va batafsil tavsifi;

ushbu Reglamentga 4-ilovada koʻrsatilgan namunaga muvofiq avtotransport vositasining oldidan, orqadan, chapdan, oʻngdan koʻrinishi, shuningdek, plombalar va muhrlar qoʻyiladigan joyning tasviri mavjud boʻlgan rangli fotosuratlar. Bunda fotosuratlar kunning yorugʻ vaqtida olingan JPEG formatda, har birining hajmi 5 Mbdan oshmagan boʻlishi lozim.

13. Arizachi davlat xizmatidan foydalanishdan uni koʻrsatishning har qanday bosqichida bosh tortish huquqiga ega.

Arizachi davlat xizmatidan foydalanishdan bosh tortgan taqdirda, uning arizasi koʻrilmasdan qoldiriladi.

14. Arizachining YIDXP yoki “Litsenziya” AT orqali murojaati avtomatik tarzda bojxona organlariga yuboriladi.

Yakka tartibda guvohnoma olish uchun ariza va unga ilova qilingan hujjatlar arizachi tanlagan Oʻzbekiston Respublikasi hududidagi bojxona organiga yuboriladi.

Konstruksiyaning turi boʻyicha guvohnoma olish uchun ariza va unga ilova qilingan hujjatlar arizachi qaysi Bojxona qoʻmitasi hududiy boshqarmasining (keyingi oʻrinlarda — hududiy boshqarma) faoliyat koʻrsatish zonasida avtotransport vositalari ishlab chiqariladigan boʻlsa, oʻsha hududiy boshqarmaga yuboriladi.

15. Davlat xizmatlarini koʻrsatganlik uchun toʻlov undirilmaydi.

3-bob. Yakka tartibda guvohnoma berish yoki uni berishni rad etish

16. Ariza va unga ilova qilingan hujjatlar Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining (keyingi oʻrinlarda — Bojxona qoʻmitasi) Yagona avtomatlashtirilgan axborot tizimi orqali (keyingi oʻrinlarida — Bojxona qoʻmitasi YAAAT) bojxona organiga kelib tushadi.

17. Masʼul xodim ikki ish kuni ichida kelib tushgan hujjatlarni oʻrganib chiqadi va Bojxona qoʻmitasi YAAAT orqali YIDXP yoki “Litsenziya” ATga guvohnoma soʻralayotgan avtotransport vositasini Konvensiya va Kodeks bilan belgilangan texnik talablarga rioya etilganligini oʻrganish uchun ushbu avtotransport vositasini koʻzdan kechirish uchun bojxona organiga taqdim etish boʻyicha arizachiga elektron xabarnoma yuboradi.

18. Avtotransport vositani koʻzdan kechirish uchun bojxona organiga taqdim etishga xabarnoma berilganda arizachi yetti ish kuni ichida avtotransport vositasini arizada belgilagan bojxona organiga koʻzdan kechirish uchun taqdim etishi lozim.

Avtotransport vositasi belgilangan muddatda bojxona organiga taqdim etilmagan taqdirda, joʻnatilgan ariza avtomatik tarzda bekor qilinadi.

19. Avtotransport vositasi arizada belgilangan bojxona organiga taqdim etilganda bojxona organi masʼul xodimi arizachi bilan birga avtotransport vositasini koʻzdan kechiradi hamda Konvensiya va Kodeksda belgilangan talablarga muvofiqligini oʻrganadi.

20. Koʻzdan kechiruv natijasi boʻyicha bojxona organi masʼul xodimi bir ish kunidan kechiktirmasdan Bojxona qoʻmitasi YAAAT orqali YIDXP yoki “Litsenziya” ATdan guvohnoma berilganligi (yuborilganligi) yoki guvohnoma berish rad etilganligi haqida xabarnoma yuboradi.

21. Guvohnoma QR-kod (matrik shtrixli kod) bilan himoyalangan va elektron raqamli imzo bilan tasdiqlanadi hamda YIDXP yoki “Litsenziya” AT orqali ushbu Reglamentga 6-ilovadagi shaklga (konteynerlar uchun 7-ilovadagi shaklga) muvofiq elektron tarzda arizachiga yuboriladi.

Arizachi guvohnomani pdf formatida YIDXP yoki “Litsenziya” ATdan yuklab olishi mumkin.

Arizachi guvohnoma berish toʻgʻrisida xabarnoma olganidan keyin respublikaning istalgan bojxona organiga guvohnomani taqdim etadi. Bojxona organi bir ish kuni ichida guvohnoma maʼlumotlarini YIDXP yoki “Litsenziya” AT orqali tekshiradi va uni muhr bilan tasdiqlaydi.

22. Mazkur Reglamentga:

6-ilovaga muvofiq shakldagi guvohnoma A4 formatidagi qogʻozda chop etiladi;

7-ilovaga muvofiq shakldagi guvohnoma A4 formatidagi bir varaqdan iborat (oldi va orqa tarafiga) qogʻozda chop etiladi.

Guvohnoma holatini tekshirish (guvohnoma egasi toʻgʻrisida maʼlumot, avtotransport vositasi rasmlari, guvohnoma holati va boshqa maʼlumotlar) guvohnomada mavjud QR-kodni skaner qilish yoʻli bilan amalga oshirilishi mumkin.

23. Konteynerga guvohnoma berilgan taqdirda, arizachi tomonidan ushbu Reglamentga 8-ilovada keltirilgan namunaga asosan konteynerning koʻrinadigan qismiga toʻrtburchak temir lavha oʻrnatilgandan soʻng ushbu konteynerda bojxona plombalari va muhrlari ostida tovarlarni tashish mumkin.

Mazkur bandning birinchi xatboshisida nazarda tutilgan lavhaga quyidagi maʼlumotlar oʻyib yoziladi:

“Bojxona plombalari va muhrlari ostida tovarlarni tashishga ruxsat berildi”

kuyidagi tartibda guvohnoma raqami — UZ/00/0000 (“UZ” — Oʻzbekiston Respublikasining ikki xarfli belgisi, “01” — guvohnoma raqami, 2025 — guvohnoma berilgan yili);

ishlab chiqaruvchi zavod tomonidan berilgan konteyner raqami.

24. Guvohnoma berishni rad etish uchun quyidagilar asos boʻladi:

guvohnoma berish uchun zarur boʻlgan hujjatlarning arizachi tomonidan toʻliq hajmda taqdim etilmaganligi;

avtotransport vositasining Kodeksning 227-moddasida belgilangan talablar va shartlarga nomuvofiqligi;

arizachi tomonidan taqdim etilgan hujjatlarda notoʻgʻri yoki buzib koʻrsatilgan maʼlumotlarning mavjudligi.

Guvohnoma berishni boshqa asoslarga koʻra, shu jumladan maqsadga muvofiq emas degan vaj bilan rad etishga yoʻl qoʻyilmaydi.

25. Mazkur Reglamentning 24-bandi ikkinchi xatboshisida koʻrsatilgan faktlar aniqlanganda, agar arizada bartaraf etilishi mumkin boʻlgan kamchiliklar mavjud boʻlsa, bojxona organi ularni bartaraf etish uchun arizachiga oʻttiz ish kunigacha boʻlgan muddat beradi.

Kamchiliklarni bartaraf etish zarurligi toʻgʻrisidagi xabarnoma bojxona organi tomonidan bir ish kuni ichida YIDXP yoki “Litsenziya” AT orqali elektron shaklda arizachiga yuboriladi.

Kamchiliklarni bartaraf etish zarurligi toʻgʻrisidagi xabarnomada taqdim etilgan hujjatlarda aniqlangan kamchiliklar hamda ularni bartaraf etish usullari, shuningdek, arizachi koʻrsatilgan sabablarni bartaraf qilib, tegishli hujjatlarni koʻrib chiqish uchun takroran taqdim etishi mumkin boʻlgan muddat koʻrsatiladi.

Kamchiliklarni bartaraf etish zarurligi toʻgʻrisidagi xabarnomada koʻrsatilgan muddat kamchiliklarni bartaraf etish uchun zarur boʻladigan vaqtga mutanosib boʻlishi kerak.

Bojxona organi aniqlangan kamchiliklarni bartaraf etish maqsadida arizachiga malakali xodimlarni izlashda, hujjatlarni va dasturlarni maromiga yetkazish uchun mutaxassislarni jalb etishda, shuningdek, guvohnomani olish uchun boshqa zarur shart-sharoitlarni yaratishda koʻmaklashishi va zarur maslahatlar berishi kerak, arizachi taklif etilgan yordamni rad etgan hollar bundan mustasno.

Kamchiliklarni bartaraf etish zarurligi toʻgʻrisidagi xabarnoma yuborilgan kundan boshlab guvohnoma berish toʻgʻrisidagi arizani koʻrib chiqish muddati toʻxtatib turiladi.

Hujjatlar kamchiliklarni bartaraf etish zarurligi toʻgʻrisidagi xabarnomada koʻrsatilgan kamchiliklarni bartaraf etmasdan yoki xabarnomada koʻrsatilgan muddat oʻtganidan keyin takroran taqdim etilgan taqdirda, bojxona organi guvohnoma berishni rad etish haqida qaror qabul qilishga haqli. Bunda guvohnoma berishni bartaraf etish zarurligi toʻgʻrisidagi xabarnomada koʻrsatilmagan yangi asoslar boʻyicha rad etishga yoʻl qoʻyilmaydi.

26. Guvohnoma berishni rad etish toʻgʻrisida qaror qabul qilinganda, bojxona organi bir ish kunidan kechiktirmasdan YIDXP yoki “Litsenziya” AT orqali guvohnoma berish rad etilganligi toʻgʻrisida xabar yuboradi.

Guvohnoma berish rad etilganligi haqida qaror qabul qilingan taqdirda rad etish toʻgʻrisidagi xabarda rad etish sabablari va qonunchilikning normalari koʻrsatilishi lozim.

Arizachi guvohnoma berish rad etilganligi haqidagi xabar olingan sanadan eʼtiboran oʻn ish kuni ichida rad etish sabablarini bartaraf qilishga va hujjatlarni takroran koʻrib chiqish uchun taqdim etishga haqli. Oʻn ish kunida kamchiliklar bartaraf etilmaganda arizachi mazkur Maʼmuriy reglament talablari asosida yangi ariza bilan murojaat qiladi.

27. Guvohnoma berishni rad etish uchun asos boʻlgan sabablar arizachi tomonidan bartaraf qilingan taqdirda, arizachi YIDXP yoki “Litsenziya” AT orqali mazkur Reglamentga 3-ilovada keltirilgan arizani toʻldiradi va avvalgi rad etilgan ariza toʻgʻrisida maʼlumotlarni (ariza raqamini) koʻrsatadi.

28. Bojxona organi masʼul xodimi kelib tushgan hujjatlar va guvohnoma berishni rad etish uchun asos boʻlgan sabablar arizachi tomonidan bartaraf qilinganligini bir ish kuni ichida oʻrganadi.

Bojxona organi masʼul xodimi guvohnoma soʻralayotgan avtotransport vositasining konstruksiyasi (avtotransport vositasining oʻrami, sim-arqon, tirkama va yarim tirkamadagi boshqa oʻzgarishlar) oʻzgartirish kiritish zarur boʻlgan hollarda takroran koʻzdan kechirish uchun bojxona organiga taqdim etishni soʻraydi va arizachi avtotransport vositasini bir ish kunida arizada koʻrsatilgan bojxona organiga taqdim etadi.

Avtotransport vositasi belgilangan muddatda bojxona organiga taqdim etilmagan taqdirda, joʻnatilgan ariza avtomatik tarzda bekor qilinadi.

29. Avtotransport vositasi arizada belgilangan bojxona organiga taqdim etilganda bojxona organi masʼul xodimi arizachi bilan birgalikda avtotransport vositasini koʻzdan kechiradi hamda Konvensiya va Kodeksda belgilangan talablarga muvofiqligini takroran oʻrganadi.

30. Guvohnoma berishni rad etish uchun asos boʻlgan sabablar bartaraf etilganda, bojxona organi bir ish kunidan kechiktirmasdan Bojxona qoʻmitasi YAAAT orqali YIDXPga yoki “Litsenziya” ATdan guvohnomani yuboradi.

Rad etish uchun asos boʻlgan sabablar bartaraf etilmaganda, guvohnoma berish rad etiladi.

Guvohnoma berish toʻgʻrisidagi ariza takroran koʻrib chiqilayotganda guvohnoma berishni rad etish toʻgʻrisidagi xabarda ilgari koʻrsatilmagan asoslarga koʻra guvohnoma berishni rad etishga yoʻl qoʻyilmaydi.

31. Arizachi bojxona organining guvohnoma berishni rad etish toʻgʻrisidagi qarori, shuningdek, bojxona organi mansabdor shaxsining harakati (harakatsizligi) ustidan qonunchilik hujjatlarida belgilangan tartibda shikoyat qilish huquqiga ega.

4-bob. Avtotransport vositasiga konstruksiyaning turi boʻyicha guvohnoma berish yoki uni berishni rad etish

32. Bir turdagi avtotransport vositalari seriyali ishlab chiqarilsa, ishlab chiqaruvchi (yuridik shaxs) tomonidan bir turdagi avtotransport vositalariga guvohnoma olinishi mumkin.

33. Masʼul xodim oʻn ish kunida kelib tushgan hujjatlarni oʻrganib chiqadi va Bojxona qoʻmitasi YAAAT orqali YIDXPga yoki “Litsenziya” ATga guvohnoma soʻralayotgan avtotransport vositalar turini Konvensiya va Kodeks bilan belgilangan texnik talablarga rioya etilganligini oʻrganish maqsadida arizachiga ishlab chiqarish jarayonlarini oʻrganish hamda ushbu turdagi avtotransport vositasi (vositalari)ni koʻzdan kechirish uchun xabarnoma joʻnatadi.

34. Ishlab chiqarish jarayonini oʻrganish va bir turdagi avtotransport vositalarini koʻzdan kechirish boʻyicha xabarnoma kelib tushganda arizachi yetti ish kuni ichida bojxona organi masʼul xodimini ishlab chiqarish jarayonini va soʻralgan avtotransport vositalarini koʻzdan kechirish uchun taqdim etishi lozim.

Arizachi tomonidan belgilangan muddatda mazkur jarayonlar amalga oshirilmagan taqdirda ariza avtomatik tarzda bekor qilinadi.

35. Hududiy boshqarma masʼul xodimi arizachi bilan birgalikda ishlab chiqarish jarayonlari va bir turdagi avtotransport vositasi(lari)ni koʻzdan kechiradi hamda ularning Konvensiya va Kodeksda belgilangan talablarga muvofiqligini oʻrganadi.

36. Oʻrganish natijasi boʻyicha hududiy boshqarma bir ish kunidan kechiktirmasdan Bojxona qoʻmitasi YAAAT orqali YIDXP yoki “Litsenziya” ATdan guvohnoma berilganligi (yuborilganligi) yoki guvohnoma berish rad etilganligi haqida xabarnoma yuboradi.

Guvohnoma QR-kod (matrik shtrixli kod) bilan himoyalangan va elektron raqamli imzo bilan tasdiqlanadi hamda YIDXP yoki “Litsenziya” AT orqali ushbu Reglamentga 9-ilovadagi shaklga (konteynerlar uchun 7-ilovadagi shaklga) muvofiq elektron tarzda arizachiga yuboriladi.

Arizachi guvohnomani pdf formatida YIDXP yoki “Litsenziya” ATdan yuklab olishi mumkin.

Arizachi guvohnoma berish toʻgʻrisida xabarnoma olganidan keyin respublikaning istalgan bojxona organiga guvohnomani taqdim etadi. Bojxona organi bir ish kuni ichida guvohnoma maʼlumotlarini YIDXP yoki “Litsenziya” AT orqali tekshiradi va uni muhr bilan tasdiqlaydi.

37. Mazkur Reglamentga:

7-ilovaga muvofiq shakldagi guvohnoma A4 formatidagi bir varaqdan iborat (oldi va orqa tarafiga) qogʻozda chop etiladi;

9-ilovaga muvofiq shakldagi guvohnoma A4 formatidagi qogʻozda chop etiladi.

38. Konstruksiya turi boʻyicha guvohnoma olgandan soʻng arizachiga Bojxona qoʻmitasi YAAATda guvohnoma shakllantirish imkoniyati beriladi.

YIDXPda yoki “Litsenziya” ATda arizachiga bir turdagi ishlab chiqarilgan avtotransport vositalariga (har biriga alohida) mazkur Reglamentga 9-ilovadagi shaklda (konteynerlar uchun 7-ilovadagi shaklda) pdf formatidagi QR-kodli guvohnomani yuklab olish imkoniyati yaratiladi.

39. Guvohnoma holatini tekshirish (guvohnoma egasi toʻgʻrisida maʼlumot, avtotransport vositasi rasmlari, guvohnoma holati va boshqa maʼlumotlar) guvohnomada mavjud QR-kodni skaner qilish yoʻli bilan amalga oshirilishi mumkin.

40. Konstruksiya turi boʻyicha konteynerga guvohnoma berilgan taqdirda, arizachi tomonidan mazkur Reglamentga 8-ilovada keltirilgan namunaga asosan konteynerning koʻrinadigan qismiga temir toʻrtburchak lavha oʻrnatilgandan soʻng ushbu konteynerda bojxona plombalari va muhrlari ostida tovarlarni tashish mumkin.

Mazkur lavhaga ushbu Reglamentning 23-bandida koʻrsatilgan maʼlumotlar hamda avtotransport vositasi turiga tegishli harf va raqamlar oʻyib yoziladi.

41. Avtotransport vositasini seriyali ishlab chiqaruvchi tashkilotdan xarid qilgan shaxs respublikadagi istalgan bojxona organiga guvohnomani taqdim etadi. Bojxona organi bir ish kuni ichida guvohnoma maʼlumotlarini YIDXP yoki “Litsenziya” AT orqali tekshiradi va uni muhr bilan tasdiqlaydi.

42. Konstruksiya turi boʻyicha guvohnoma berishni rad etish va rad etish asoslarini bartaraf qilgan holda qayta kelib tushgan arizalarni koʻrib chiqish mazkur Reglamentning 24 — 30-bandlarida belgilangan asoslar va tartibga muvofiq amalga oshiriladi.

43. Arizachi bojxona organining guvohnoma berishni rad etish toʻgʻrisidagi qarori, shuningdek, bojxona organi mansabdor shaxsining harakati (harakatsizligi) ustidan qonunchilik hujjatlarida belgilangan tartibda shikoyat qilish huquqiga ega.

5-bob. Guvohnomaning amal qilishini tugatish uchun bojxona organlariga murojaat qilish tartibi

44. Guvohnomaning amal qilishi quyidagi hollarda tugatiladi:

avtotransport vositasi tovarlarni bojxona plombalari va muhrlari ostida tashish uchun yaroqsiz holga kelganda;

avtotransport vositalarining milliy davlat roʻyxatidan oʻtkazish raqamlari almashganda;

guvohnomaning amal qilish muddati tugaganda.

45. Mazkur Reglamentning 44-bandida koʻrsatilgan holatlar yuzaga kelishi bilan guvohnomaning amal qilishi tugatilgan deb hisoblanadi hamda guvohnomaning amal qilishi tugatilganligi toʻgʻrisida bojxona organi tomonidan qaror qabul qilish talab etilmaydi.

6-bob. Guvohnomani bekor qilish uchun bojxona organlariga murojaat qilish tartibi

46. Guvohnoma quyidagilar asosida bekor qilinadi:

arizachining guvohnomani bekor qilish toʻgʻrisidagi arizasi;

avtotransport vositasining konstruksiyasi oʻzgartirilganligi fakti (guvohnoma konstruksiyaning turi boʻyicha berilganda);

guvohnoma qalbaki hujjatlardan foydalangan holda olinganligi fakti aniqlanganda;

bojxona organining guvohnoma berish toʻgʻrisidagi qarori qonunga xilof ekanligi aniqlanganda.

47. Guvohnoma mazkur Reglamentning 46-bandi ikkinchi va uchinchi xatboshilarida keltirilgan hollarda bojxona organi tomonidan, mazkur Reglamentning 46-bandi toʻrtinchi va beshinchi xatboshilarida nazarda tutilgan hollarda esa sud tomonidan bekor qilinadi.

48. Guvohnomani bekor qilish boʻyicha arizani joʻnatish guvohnoma egasi tomonidan amalga oshiriladi.

Guvohnomani bekor qilish toʻgʻrisida ariza YIDXP yoki “Litsenziya” AT orqali joʻnatiladi.

49. Bojxona organi guvohnomani bekor qilish toʻgʻrisida YIDXP yoki “Litsenziya” AT orqali kelib tushgan arizani ikki ish kuni ichida koʻrib chiqadi va guvohnomani bekor qilish toʻgʻrisida qaror qabul qiladi.

Guvohnomani bekor qilish toʻgʻrisidagi bojxona organining qarori arizachiga qaror qabul qilingan kundan eʼtiboran bir ish kunidan kechiktirmay YIDXP yoki “Litsenziya” AT orqali yetkaziladi.

Guvohnoma bekor qilingan taqdirda, u ikki ish kuni ichida bojxona organiga qaytarilishi va yoʻq qilinishi lozim.

7-bob. Guvohnoma amal qilish muddatini uzaytirish uchun bojxona organlariga murojaat qilish tartibi

50. Guvohnoma qayta rasmiylashtirilmaydi.

51. Guvohnomaning amal qilish muddati tugagach guvohnomaning amal qilishi arizachining arizasiga koʻra ikki yilga uzaytiriladi.

Guvohnomaning amal qilish muddatini uzaytirish toʻgʻrisidagi ariza bojxona organiga guvohnomaning amal qilish muddati tugaguniga qadar berilishi lozim.

52. Guvohnomaning amal qilish muddatini uzaytirish guvohnoma berish uchun belgilangan tartibda amalga oshiriladi. Bunda, guvohnomaning amal qilish muddatini uzaytirish toʻgʻrisidagi ariza maʼlumotlariga amaldagi guvohnoma raqami toʻgʻrisidagi maʼlumotlar grafasi qoʻshiladi.

53. Guvohnoma yoʻqotilgan yoki unga shikast yetkazilgan taqdirda arizachining murojaatiga asosan guvohnomaning nusxasi beriladi.

8-bob. Yakunlovchi qoida

54. Ushbu Reglament talablarining buzilishida aybdor boʻlgan shaxslar qonunchilik hujjatlariga muvofiq javob beradilar.

Avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma olish boʻyicha davlat xizmatlarini koʻrsatishning maʼmuriy reglamentiga 1-ILOVA

Avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma olish

SXEMASI

Avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma olish boʻyicha davlat xizmatlarini koʻrsatishning maʼmuriy reglamentiga 2-ILOVA

Avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma

PASPORTI

Avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma olish boʻyicha davlat xizmatlarini koʻrsatishning maʼmuriy reglamentiga 3-ILOVA

Avtotransport vositasiga tovarlarni bojxona muhrlari va plombalari ostida tashishga yakka tartibda ruxsat berilganligi toʻgʻrisidagi guvohnoma berish haqida

ARIZA

Izoh:

* Konteyner toʻgʻrisidagi maʼlumotlar faqat konteynerga guvohnoma olishda toʻldiriladi;

** Ushbu band, guvohnoma amal qilish muddatini uzaytirish yoki guvohnoma berishni rad etish uchun asos boʻlgan sabablar arizachi tomonidan bartaraf qilingan taqdirda bojxona organlariga murojaat qilishda toʻldiriladi.

Avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma olish boʻyicha davlat xizmatlarini koʻrsatishning maʼmuriy reglamentiga 4-ILOVA

Avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma olish uchun arizaga ilova qilinadigan fotosuratlarning

NAMUNALARI

1. Avtotransport vositasining oʻng va chap tomonidan koʻrinishining fotosurati

2. Avtotransport vositasining orqa va oldi tomonidan koʻrinishining fotosurati

3. Avtotransport vositasining plombalar va muhrlar qoʻyiladigan joyning fotosurati

Izoh: Avtotransport vositasi turiga qarab bojxona muhrlari va plombalari qoʻyiladigan joyning fotosurati rakursi oʻzgarishi mumkin.

Avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma olish boʻyicha davlat xizmatlarini koʻrsatishning maʼmuriy reglamentiga 5-ILOVA

Avtotransport vositasiga tovarlarni bojxona muhrlari va plombalari ostida tashishga konstruksiyaning turi boʻyicha ruxsat berilganligi toʻgʻrisidagi guvohnoma berish haqida

ARIZA

Izoh:

* Konteyner toʻgʻrisidagi maʼlumotlar faqat konteynerga guvohnoma olishda toʻldiriladi;

** Ushbu band, guvohnoma amal qilish muddatini uzaytirish yoki guvohnoma berishni rad etish uchun asos boʻlgan sabablar arizachi tomonidan bartaraf qilingan taqdirda bojxona organlariga murojaat qilishda toʻldiriladi.

Avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma olish boʻyicha davlat xizmatlarini koʻrsatishning maʼmuriy reglamentiga 6-ILOVA

Avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma olish boʻyicha davlat xizmatlarini koʻrsatishning maʼmuriy reglamentiga 7-ILOVA

Avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma olish boʻyicha davlat xizmatlarini koʻrsatishning maʼmuriy reglamentiga 8-ILOVA

Guvohnoma olgan konteynerga oʻrnatiladigan toʻrtburchak temir lavha namunasi

Avtotransport vositasiga tovarlarni bojxona muhrlari va plombalari ostida tashishga ruxsat berilganligi toʻgʻrisidagi guvohnoma olish boʻyicha davlat xizmatlarini koʻrsatishning maʼmuriy reglamentiga 9-ILOVA