“Visa” debet va kredit kartochkalarini muomalaga chiqarishni jadallashtirish chora-tadbirlari toʻgʻrisida (268-son)

26.05.1994

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Iqtisodiy islohotlarni yanada chuqurlashtirish, xususiy mulk manfaatlarini himoya qilish va tadbirkorlikni rivojlantirish chora-tadbirlari toʻgʻrisida” 1994-yil 21-yanvardagi Farmonining Tashqi iqtisodiy faoliyat Milliy bankining oʻzining “VISA” debet va kredit kartochkalarini muomalaga chiqarishni jadallashtirishga doir qismini bajarish yuzasidan Vazirlar Mahkamasi qaror qiladi:

1. 1994-yilning 25-aprelida respublikada xorijiy banklarning “VISA” kartochkalariga xizmat koʻrsatish dasturi boshlanganligi, 14-iyundan boshlab esa Oʻzbekiston Respublikasi hududida hamda xorijiy mamlakatlarda Tashqi iqtisodiy faoliyat Milliy bankining “VISA” kartochkalarining muomalaga chiqarilishi va ularga xizmat koʻrsatilishi maʼlumot uchun qabul qilinsin.

2. Chet el valyutalarining soxta banknotlari kirib kelishiga yoʻl qoʻymaslik maqsadida belgilab qoʻyilsinki, Oʻzbekistonda “VISA” kartochkalarining muomalaga kiritilishi munosabati bilan mulkchilik shakllaridan qatʼi nazar, respublika korxona va tashkilotlari, shuningdek, jismoniy shaxslar tomonidan chet el valyutasidagi naqd pulli toʻlov-hisob-kitob operatsiyalari asosan “VISA” kartochkalari boʻyicha amalga oshiriladi.

Respublika vazirliklari, davlat qoʻmitalari, konsernlar, uyushmalar, bank muassasalari, korxonalar va tijorat tuzilmalari chet mamlakatlarga doimiy ravishda borib turadigan xodimlar uchun, belgilangan limitlar doirasida, xizmat safarlari xarajatlari mablagʻlaridan foydalanishning Tashqi iqtisodiy faoliyat Milliy banki tomonidan chiqarilgan “VISA” kartochkalari yordamida naqd pulsiz tizimiga oʻtishni taʼminlasinlar.

3. “Oʻzbeksavdo” davlat uyushmasi, Oʻzbekbirlashuv, “Oʻzbekturizm” milliy kompaniyasi, “Oʻzbekiston havo yoʻllari” milliy aviakompaniyasi va erkin muomaladagi valyutada xizmat koʻrsatuvchi boshqa tuzilmalar tasarruflaridagi ilovaga* muvofiq korxona va tashkilotlar bilan Tashqi iqtisodiy faoliyat Milliy banki oʻrtasida Oʻzbekiston Respublikasi Tashqi iqtisodiy faoliyat Milliy banki hamda xorijiy banklar tomonidan chiqarilgan “VISA” kartochkalarini muomalaga kiritish boʻyicha shartnomalar tuzishni 1994-yilning 10-iyunigacha taʼminlasinlar.

* Ilova berilmaydi.

Maʼlumot uchun qabul qilinsinki, xalqaro normalarga muvofiq, tashkilot va korxonalar “VISA” kartochkalari boʻyicha xizmat koʻrsatishni xizmatlar va tovarlar narxlariga operatsiyalarni bajarganlik uchun vositachilik xarajatlarini qoʻshmasdan amalga oshiradilar.

4. Oʻzbekiston Respublikasi Tashqi iqtisodiy faoliyat Milliy banki manfaatdor idoralar bilan birgalikda ilovada koʻrsatilgan tashkilot va korxonalarni hamda “VISA” kartochkalari boʻyicha xizmat koʻrsatishda qatnashuvchilarni zarur asbob-anjomlar, jihozlar bilan taʼminlasin, ularning xodimlarini oʻqitishni tashkil etsin. Natijalari 1994-yilning 1-avgustigacha Vazirlar Mahkamasiga maʼlum qilinsin.

5. Aloqa vazirligi Oʻzbekiston Respublikasi Tashqi iqtisodiy faoliyat Milliy banki talabnomalariga binoan tegishli tur va sifatdagi aloqa kanallari berishni, shuningdek, “VISA” kartochkalari boʻyicha xizmat koʻrsatishni tashkil etish uchun telekommunikatsiya xizmatlari koʻrsatishni taʼminlasin.

6. Oʻzbekiston Respublikasi Tashqi iqtisodiy faoliyat Milliy banki xorijiy mamlakatlardagi savdo va xizmat koʻrsatish shoxobchalariga “VISA” kartochkalari egalariga ular boʻyicha xizmat koʻrsatish qoidalarini tushuntirishga doir zarur chora-tadbirlarni koʻrsin.

7. Mazkur qarorning bajarilishini nazorat qilish Oʻzbekiston Respublikasi Bosh vaziri oʻrinbosari Oʻ. T. Sultonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1994-yil 26-may,

268-son