Nogironligi boʻlgan shaxslarni sportga jalb etish orqali jismoniy reabilitatsiya qilish tizimini takomillashtirish boʻyicha qoʻshimcha chora-tadbirlar toʻgʻrisida (PQ-389-son)
08.11.2024
Oʻzbekiston Respublikasi Prezidentining
qarori
Nogironligi boʻlgan shaxslarning sport bilan muntazam shugʻullanishini yoʻlga qoʻyish, sport inshootlarini nogironligi boʻlgan shaxslarga moslashtirish va ularga zarur shart-sharoitlarni yaratish orqali jismoniy reabilitatsiya qilish tizimini takomillashtirish maqsadida:
1. Belgilansinki:
a) 2024-yil 15-dekabrdan boshlab:
sport bilan shugʻullanish istagidagi nogironligi boʻlgan shaxslarning murojaatiga koʻra ularga “Inson” ijtimoiy xizmatlar markazlari (keyingi oʻrinlarda — “Inson” markazlari) tomonidan davlat mulkida boʻlgan jismoniy tarbiya-sogʻlomlashtirish va sport inshootlarida sport bilan bepul shugʻullanish uchun yoʻllanmalar beriladi;
sport bilan bepul shugʻullanish imkoni yaratilgan jismoniy tarbiya-sogʻlomlashtirish va sport inshootlari roʻyxati tegishincha Sport vazirligi, Oliy taʼlim, fan va innovatsiyalar vazirligi, Maktabgacha va maktab taʼlimi vazirligi tomonidan Oʻzbekiston Respublikasi Prezidenti huzuridagi Ijtimoiy himoya milliy agentligi (keyingi oʻrinlarda — Agentlik) bilan birgalikda tasdiqlanadi hamda doimiy yangilab boriladi;
b) 2025-yil 15-yanvardan boshlab nogironligi boʻlgan shaxslarning davlat mulkida boʻlgan jismoniy tarbiya-sogʻlomlashtirish va sport inshootlarida tashkil etilgan sport toʻgaraklaridagi ishtiroki “Inson” markazi tomonidan yoʻllanma berilgan kundan boshlab har olti oyda bir marotaba joyiga chiqqan holda yoki “ERP-sport” yagona elektron boshqaruv tizimi orqali monitoring qilib boriladi.
2. Agentlik 2025-yil yakuniga qadar koʻz va tayanch harakat aʼzolari kasalliklariga chalingan nogironligi boʻlgan shaxslar, shu jumladan, bolalarga jismoniy tarbiya-sogʻlomlashtirish va sport inshootlariga borib-kelishiga koʻmaklashish maqsadida sport bilan shugʻullanish istagidagi nogironligi boʻlgan shaxslar soni yuqori boʻlgan hududlarda davlat ijtimoiy buyurtmasi orqali nodavlat notijorat tashkilotlar yoki koʻngillilarni jalb etgan holda hamrohlik xizmatini bosqichma-bosqich joriy etish choralarini koʻrsin. Bunda belgilansinki:
davlat ijtimoiy buyurtmasi orqali nodavlat notijorat tashkilotlar yoki koʻngillilar Agentlik yoki uning hududiy boshqarmalari tomonidan toʻgʻridan-toʻgʻri jalb etiladi;
“Inson” markazlari huzurida koʻngillilar guruhlarini tashkil etishga ruxsat etiladi;
davlat ijtimoiy buyurtmasi orqali nodavlat notijorat tashkilotlar yoki koʻngillilarni jalb etish Ijtimoiy himoya davlat jamgʻarmasi mablagʻlari hisobidan moliyalashtiriladi.
3. Agentlikning 2025-2026-yillarda alohida taʼlim ehtiyojlari boʻlgan bolalar uchun ixtisoslashtirilgan taʼlim muassasalari va “Gʻamxoʻrlik” markazlarida Ijtimoiy himoya davlat jamgʻarmasi mablagʻlari hisobidan sport obyektlarini qurish, taʼmirlash, jihozlash va ularda sport toʻgaraklarini tashkil qilish taklifiga rozilik berilsin. Bunda:
alohida taʼlim ehtiyojlari boʻlgan bolalar uchun ixtisoslashtirilgan taʼlim muassasalari va “Gʻamxoʻrlik” markazlarida sport toʻgaraklari tashkil qilinishi hamda ushbu toʻgaraklarda kunduzgi qatnov xizmati yoʻlga qoʻyilishi;
alohida taʼlim ehtiyojlari boʻlgan bolalar uchun ixtisoslashtirilgan taʼlim muassasalari va “Gʻamxoʻrlik” markazlarining davolash jismoniy tarbiyasi boʻyicha yoʻriqchilari adaptiv (nogironligi boʻlgan shaxslar uchun moslashtirilgan) sport turlari boʻyicha qayta tayyorlov va malaka oshirish kurslariga jalb qilinishi nazarda tutilsin.
4. Oʻzbekiston milliy paralimpiya va Olimpiya qoʻmitalari taʼsischiligida Oʻzbekiston adaptiv sport turlari assotsiatsiyasi (keyingi oʻrinlarda — Assotsiatsiya) tashkil etilganligi maʼlumot uchun qabul qilinsin.
5. Oʻzbekiston milliy paralimpiya qoʻmitasining quyidagi takliflari maʼqullansin:
Oʻzbekiston milliy paralimpiya qoʻmitasining Qoraqalpogʻiston Respublikasi, viloyatlar va Toshkent shahri boʻlinmalari negizida har yili Davlat budjetidan Assotsiatsiya faoliyatini qoʻllab-quvvatlash uchun ajratilgan mablagʻlar doirasida Assotsiatsiyaning hududiy boʻlinmalarini tashkil etish hamda ularni Olimpiya va Paralimpiya sport turlariga tayyorlash markazlari binolariga tekin foydalanish huquqi asosida joylashtirish;
Oʻzbekiston milliy paralimpiya qoʻmitasi huzuridagi Paralimpiya sport turlari boʻyicha mutaxassislarni tayyorlash instituti negizida Adaptiv jismoniy tarbiya va sport mutaxassislarini qayta tayyorlash va malakasini oshirish institutini tashkil etish hamda mol-mulki va moliyalashtirish manbalari bilan birga Assotsiatsiya tuzilmasiga oʻtkazish.
6. Oʻzbekiston adaptiv sport turlari assotsiatsiyasining tashkiliy tuzilmasi 1-ilovaga muvofiq maʼqullansin.
7. Quyidagilar Assotsiatsiyaning asosiy vazifalari ekanligi inobatga olinsin:
adaptiv sport turlarini ommalashtirish va rivojlantirish boʻyicha davlat siyosatini amalga oshirishda koʻmaklashish;
adaptiv sport turlari boʻyicha nodavlat notijorat tashkilotlar va davlat organlari oʻrtasida hamkorlikni taʼminlash;
adaptiv sport turlari boʻyicha iqtidorli sportchilarni aniqlash, tanlash va saralash (seleksiya) hamda ularni professional sportchilar sifatida tayyorlash tizimini muvofiqlashtirish;
davlat sport-taʼlim muassasalarining moddiy-texnik bazasini shakllantirishda hamda sport infratuzilmasi obyektlarining konsepsiyalari va boshqa loyiha hujjatlarini ishlab chiqishda ishtirok etish;
adaptiv sport turlari boʻyicha trener, yoʻriqchi-uslubchilar hamda boshqa mutaxassislarni qayta tayyorlash, malakasini oshirish va kasbiy rivojlantirishning zamonaviy va samarali tizimini joriy etish;
davlat sport, taʼlim, ixtisoslashtirilgan muassasalarida bosqichma-bosqich adaptiv sport turlari boʻyicha toʻgaraklar tashkil etishda ishtirok etish;
adaptiv sport turlari boʻyicha musobaqalar va tadbirlarni tashkil qilish va oʻtkazish;
adaptiv sport turlari boʻyicha terma jamoalar sportchilarini sport inventarlari, sport kiyimlari, tibbiy va farmakologiya, maxsus sport protez vositalari bilan taʼminlash hamda tibbiy koʻrikdan oʻtkazish;
adaptiv sport turlari boʻyicha yuqori mahoratli sportchilarni tayyorlash yuzasidan oʻquv-mashq jarayonini tashkil etish;
Assotsiatsiya va uning hududiy boʻlinmalarini, Assotsiatsiyaga aʼzo adaptiv sport turlari boʻyicha nodavlat notijorat tashkilotlarni saqlash, ularning moddiy-texnik bazasini mustahkamlash;
adaptiv sport turlarini rivojlantirish boʻyicha klublar va musobaqalarni tashkil etish hamda Assotsiatsiyaga aʼzo adaptiv sport turlari boʻyicha nodavlat notijorat tashkilotlar bilan birgalikda xalqaro hamkorlikni rivojlantirish.
8. Quyidagilar Assotsiatsiya faoliyatini moliyalashtirish manbalari etib belgilansin:
Oʻzbekiston Respublikasi Davlat budjeti mablagʻlari;
davlat ijtimoiy buyurtmasi doirasida Agentlik va Ijtimoiy himoya davlat jamgʻarmasi, shuningdek, boshqa davlat organlari va tashkilotlari tomonidan shartnoma asosida Assotsiatsiyaga toʻgʻridan-toʻgʻri ajratiladigan mablagʻlar;
Sport vazirligi mablagʻlari, shuningdek Sport va ommaviy jismoniy tarbiya tadbirlarining kalendar rejasiga kiritilgan tadbirlar uchun koʻzda tutilgan mablagʻlar;
jismoniy imkoniyati cheklangan va nogironligi boʻlgan shaxslarni jismoniy tarbiya va sport bilan shugʻullanishga jalb qilishga qaratilgan dasturlarni moliyalashtirish uchun Davlat budjetidan ajratiladigan mablagʻlar;
jismoniy va yuridik shaxslarning homiylik xayriyalari;
xalqaro moliya institutlari, xorijiy hukumat moliya tashkilotlari va boshqa xalqaro tashkilotlar grantlari;
qonunchilik hujjatlari bilan taqiqlanmagan boshqa manbalar.
9. Belgilab qoʻyilsinki, 2025-yil 1-fevraldan boshlab:
a) Adaptiv jismoniy tarbiya va sport mutaxassislarini qayta tayyorlash va malakasini oshirish institutida paralimpiya, karlar, koʻzi ojizlar hamda maxsus olimpiya va nogironligi boʻlgan shaxslar shugʻullanadigan boshqa sport turlari boʻyicha mutaxassislarni qayta tayyorlash va malakasini oshirish kurslari yoʻlga qoʻyiladi va kurs yakuni boʻyicha 4 yil muddatga amal qiladigan malaka sertifikati beriladi;
b) Davlat budjetidan moliyalashtiriladigan sport maktablarida (keyingi oʻrinlarda — sport maktablari) tegishli moliya yili uchun ajratilgan mablagʻlar doirasida malaka sertifikatiga ega trenerlarga adaptiv sport turlari boʻyicha qoʻshimcha guruhlar tashkil etishga hamda nogironligi boʻlgan shaxslarni qabul qilishga ruxsat etiladi.
Bunda oliy taʼlim muassasalarining adaptiv jismoniy tarbiya va sport, parasport taʼlimi yoʻnalishlari bitiruvchilaridan oliy taʼlim muassasasini tamomlagan vaqtdan boshlab 4 yil davomida adaptiv sport turi boʻyicha trener lavozimiga ishga kirish yoki sport guruhlarini tashkil etish uchun malaka sertifikati talab etilmaydi;
v) nogironligi boʻlgan shaxslarga jismoniy tarbiya-sogʻlomlashtirish va sport inshootlari hamda adaptiv sport turlari boʻyicha guruhlar tashkil etilgan sport maktablarini Yagona interaktiv davlat xizmatlari portalining mobil ilovasi orqali tanlash imkoniyati yaratiladi;
g) sport maktablarida adaptiv sport turlari boʻyicha (paralimpiya sport turlari bundan mustasno) guruhlarni tashkil qilgan trenerlarning lavozim maoshini hisoblashda bazaviy tarif stavkalariga nisbatan 50 foiz miqdorda ustama hisoblanadi. Bunda:
trenerlarga qoʻshimcha haq va ustamalar miqdori, ushbu oshirilishni hisobga olmasdan, bazaviy tarif stavkasidan kelib chiqqan holda belgilanadi;
sport maktablarida adaptiv sport turlari boʻyicha guruhlarning tashkil etilganligi “Inson” markazi tomonidan monitoring qilinadi;
nogironligi boʻlgan shaxslarning sport muassasalarida adaptiv sport turlari boʻyicha guruhlardagi davomati va jismoniy tarbiya-sogʻlomlashtirish va sport tashkilotlariga kelib-ketishi “ERP-sport” yagona elektron boshqaruv tizimining mobil ilovasi yordamida shaxsni biometrik identifikatsiya qilish texnologiyasi orqali monitoring qilib boriladi.
10. Jismoniy tarbiya va sport sohasida kadrlar salohiyatini oshirish hamda ilmiy faoliyatni rivojlantirish boʻyicha kuzatuv kengashi (A. Ikramov):
Oliy taʼlim, fan va innovatsiyalar vazirligi hamda Maktabgacha va maktab taʼlimi vazirligi bilan birgalikda 2025-yil 1-yanvarga qadar adaptiv sport turlari boʻyicha taʼlim standartlari, malaka talablari, oʻquv dasturlari hamda oʻquv rejalari ishlab chiqilishini;
2024 — 2026-yillarda adaptiv sport turlari boʻyicha oʻquv-uslubiy adabiyotlar ishlab chiqilishi va chop etilishini taʼminlasin.
11. Sport vazirligi:
a) Agentlik huzuridagi Ijtimoiy inspeksiya bilan birgalikda uch oy muddatda sport maktablarini ularning nogironligi boʻlgan shaxslarga toʻsiqsiz muhit talablariga muvofiqligi yuzasidan xatlovdan oʻtkazsin hamda xatlov natijalariga koʻra toʻsiqsiz muhit talablariga moslashtirish zarur boʻlgan sport maktablarini rekonstruksiya qilishning 2025-2026-yillarga moʻljallangan dasturi loyihasini Vazirlar Mahkamasiga kiritsin;
b) Iqtisodiyot va moliya vazirligi hamda Sogʻliqni saqlash vazirligi bilan birgalikda 2025-yil 1-yanvarga qadar sport maktablaridagi guruhlarning va ularda shugʻullanadigan shaxslarning eng kam sonini belgilaydigan normativlarni qayta koʻrib chiqib, mazkur qaror talablariga muvofiqlashtirsin;
v) 2025-yil 1-yanvardan boshlab Agentlik bilan birgalikda sport bilan shugʻullanish istagi mavjud nogironligi boʻlgan shaxslar toʻgʻrisidagi maʼlumotlarni shakllantirish va yuritish maqsadida “Yagona milliy ijtimoiy himoya”, “Tibbiy ijtimoiy ekspertiza”, “ERP-sport” axborot tizimlari oʻrtasida “Elektron hukumat” axborot tizimining idoralararo integratsiyalashuv platformasi orqali axborot almashinuvini yoʻlga qoʻysin.
Bunda “ERP-sport” yagona elektron boshqaruv tizimida nogironligi boʻlgan shaxslarning kasalliklarning xalqaro tasnifi (KXT-10) boʻyicha tashxisi, yoshi, organizmning funksional buzilish darajasi haqidagi maʼlumotlar asosida nogironligi boʻlgan shaxslarning jismoniy imkoniyatiga mos sport turlari roʻyxati bosqichma-bosqich avtomatik tarzda shakllantirilishi nazarda tutilsin;
g) 2025-yil 1-mayga qadar:
Agentlik va Assotsiatsiya bilan birgalikda “ERP-sport” yagona elektron boshqaruv tizimidagi sport muassasalari joylashuvi hamda sport guruhlari toʻgʻrisidagi maʼlumotlar global interaktiv kartalar (“GoogleMaps”, “YandexKarta”, “MapsMe”, boshqa elektron navigator va kartalar)ga kiritilishini va doimiy ravishda yangilanib borilishini taʼminlasin;
“ERP-sport” yagona elektron boshqaruv tizimida adaptiv sport turlarini shakllantirish tizimini takomillashtirish choralarini koʻrsin.
12. Agentlik 2026-yil 1-dekabrga qadar Nogironligi boʻlgan shaxslarni reabilitatsiya qilish va protezlash milliy markazi va uning hududiy markazlari hamda Ijtimoiy qoʻllab-quvvatlash markazlarida:
davolovchi jismoniy tarbiya xonalari (yopiq turdagi) va maydonchalari (ochiq turdagi) rekonstruksiya qilinishini hamda qurilishini;
davolovchi jismoniy tarbiya xonalari va maydonchalari zamonaviy jismoniy tarbiya, mexanoterapiya, fizioterapiya va boshqa reabilitatsiya uskunalari bilan jihozlanishini taʼminlasin.
Bunda Nogironligi boʻlgan shaxslarni reabilitatsiya qilish va protezlash milliy markazi hamda uning hududiy markazlarida ajratilgan mablagʻlar va Agentlik tizimidagi tashkilotlarning mavjud shtatlari doirasida zamonaviy jismoniy tarbiya, mexanoterapiya, fizioterapiya va boshqa reabilitatsiya tadbirlarini amalga oshirish uchun bitta shtat birligida davolovchi jismoniy tarbiya yoʻriqchisi lavozimi kiritilsin.
13. Agentlik, Sport vazirligi va Assotsiatsiyaning quyidagi takliflariga rozilik berilsin:
uch bosqichli “Besh tashabbus paralimpiadasi” doirasidagi musobaqalar dasturiga karlar, koʻzi ojizlar va maxsus olimpiya sport turlarini kiritish;
“Besh tashabbus paralimpiadasi” doirasida oʻtkaziladigan ommaviy sport musobaqalari gʻolib va sovrindorlari orasidan nogironligi boʻlgan iqtidorli shaxslarni saralab olish hamda ularni professional sportga yoʻnaltirish tizimini yoʻlga qoʻyish;
2025-yildan boshlab har yili anʼanaviy tarzda may oyining birinchi yakshanbasida respublikaning barcha hududlarida “Inson uchun” shiori ostida adaptiv sport turlari boʻyicha festival oʻtkazish va uning doirasida xayriya marafonlarini tashkil etish.
Belgilansinki, mazkur bandda nazarda tutilgan sport tadbirlari va musobaqalarini oʻtkazish bilan bogʻliq xarajatlar Sport vazirligiga rivojlantirish dasturlari uchun ajratilgan hamda Agentlik mablagʻlari hisobidan moliyalashtiriladi.
14. Sport vazirligi Agentlik huzuridagi Ijtimoiy inspeksiya va Ichki ishlar vazirligi bilan birgalikda “Besh tashabbus olimpiadasi” doirasida oʻtkaziladigan ommaviy sport musobaqalari gʻolib va sovrindorlari hamda hududda sport infratuzilmasi mavjud boʻlmagan mahalla terma jamoalari uchun 5 mingta universal, stritbol va vorkaut sport maydonchalarini 2030-yilga qadar tashkil qilishning umumiy parametrlari doirasida 2025-yil I choragi yakuniga qadar yangi quriladigan obyektlarning loyiha hujjatlariga nogironligi boʻlgan shaxslarga moslashtirish yuzasidan oʻzgartirishlar kiritilishini taʼminlasin.
15. Assotsiatsiya Toshkent shahri Yashnobod tumani Olimpiya shaharchasiga tekin foydalanish huquqi asosida joylashtirilsin.
16. Oʻzbekiston Respublikasi Prezidentining 2021-yil 18-maydagi “Paralimpiya harakatini rivojlantirishga doir qoʻshimcha chora-tadbirlar toʻgʻrisida”gi PQ-5114-son qarorida “Chorvoq” erkin turistik zonasida kamida 50 gektarga teng boʻlgan yer uchastkasi jismoniy imkoniyati cheklangan va nogironligi boʻlgan shaxslar paralimpiya sport turlari bilan shugʻullanishi uchun sport obyektlari va inshootlarini barpo etish uchun ajratilganligi maʼlumot uchun qabul qilinsin.
Toshkent viloyati hokimligi Turizm qoʻmitasi va Agentlik bilan birgalikda ikki oy muddatda “Chorvoq” erkin turistik zonasi hududidagi 50 gektar yer uchastkasi Boʻstonliq tumani hokimligi zaxirasiga qaytarilishini hamda Agentlikka doimiy foydalanish huquqi bilan ajratilishini taʼminlasin.
Agentlik 2027-yil 1-dekabrga qadar adaptiv sport turlari bilan professional shugʻullanuvchi nogironligi boʻlgan shaxslar uchun mashgʻulot bazasi barpo etilishini va foydalanishga tayyor holatda Assotsiatsiyaga tekin foydalanish huquqi asosida ajratilishini taʼminlasin.
Belgilansinki, mashgʻulot bazasining qurilishini moliyalashtirish Oʻzbekiston Respublikasi respublika budjetidan Agentlikka ajratilgan mablagʻlar va Ijtimoiy himoya davlat jamgʻarmasi mablagʻlari hisobidan amalga oshiriladi.
17. Iqtisodiyot va moliya vazirligi 2025-yildan boshlab Davlat budjeti parametrlarida Agentlik va Sport vazirligi tomonidan taqdim etilgan hisob-kitoblarga muvofiq mazkur qarorda belgilangan tadbirlarni moliyalashtirish uchun zarur mablagʻlarni nazarda tutib borsin.
18. Quyidagilar:
a) Sport vazirligi:
Assotsiatsiya bilan birgalikda ikki oy muddatda adaptiv sport turlari roʻyxatini tasdiqlasin va adaptiv sport turlarini Sport turlarining reyestriga kiritish choralarini koʻrsin;
manfaatdor vazirlik va idoralar bilan birgalikda uch oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisidagi takliflarni Vazirlar Mahkamasiga kiritsin;
2025-yil 1-martga qadar sport maktablarida adaptiv sport turlari boʻyicha oʻquvchi-sportchilarni tayyorlashning barcha bosqichlarida sport-oʻquv guruhlarini shakllantirish va ularning sonidan kelib chiqib, oʻquv-mashq ishlari rejimining yillik soatlariga mazkur muassasalar uchun oʻzgartirish kiritish boʻyicha takliflarni Vazirlar Mahkamasiga kiritsin;
Assotsiatsiya, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan birgalikda respublika, hududiy va tuman (shahar) sport va ommaviy jismoniy tarbiya tadbirlarining kalendar rejalarini tasdiqlashda adaptiv sport turlari boʻyicha musobaqalar oʻtkazib borilishini nazarda tutsin;
b) Sogʻliqni saqlash vazirligi Agentlik bilan birgalikda 2025-yil 1-dekabrga qadar jismoniy reabilitatsiya xizmatlari roʻyxati tasdiqlanishini hamda jismoniy reabilitatsiya xizmatlarining milliy standartlari ishlab chiqilishini taʼminlasin.
19. Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari mahalliy budjetning qoʻshimcha manbalari va homiylik xayriya mablagʻlari hisobidan:
hududiy va tuman (shahar) sport va ommaviy jismoniy tarbiya tadbirlarining kalendar rejalaridagi adaptiv sport turlari boʻyicha musobaqalar uchun mablagʻlar ajratib borilishini;
Sport va ommaviy jismoniy tarbiya tadbirlarining kalendar rejasida nazarda tutilgan barcha adaptiv sport turlari boʻyicha Oʻzbekiston chempionati va kubogi musobaqalarida hududiy terma jamoalar ishtirokini taʼminlasin.
Bunda adaptiv sport turlari boʻyicha Oʻzbekiston chempionati va kubogi musobaqalarida hududiy terma jamoalar ishtirokini taʼminlash bilan bogʻliq xarajatlar Assotsiatsiyaga Davlat budjetidan ajratilgan mablagʻlar hamda qonunchilikda taqiqlanmagan boshqa manbalar hisobidan moliyalashtirilishi mumkin.
20. Quyidagilar:
Adaptiv sport turlarini rivojlantirish va jismoniy reabilitatsiya qilish tizimini takomillashtirish boʻyicha chora-tadbirlar dasturi 2-ilovaga muvofiq;
Surdlimpiya, Maxsus olimpiya, IBSA jahon oʻyinlari, Surdosiyo va Okeaniya, Maxsus olimpiya Yevropa yozgi oʻyinlari, shuningdek, Surdlimpiya, Maxsus olimpiya, IBSA jahon oʻyinlari dasturiga kiritilgan sport turlari hamda Amputantlar futboli boʻyicha jahon chempionati gʻolib va sovrindor sportchilari, ularni tayyorlagan trenerlarni Davlat budjeti mablagʻlari hisobidan ragʻbatlantirish miqdorlari 3-ilovaga muvofiq tasdiqlansin.
21. Paralimpiyachilarning matonat maktabi faoliyatini samarali yoʻlga qoʻyish va paralimpiya sport turlarini yanada rivojlantirish boʻyicha respublika kengashi Adaptiv sport turlarini yanada rivojlantirish boʻyicha respublika kengashi sifatida qayta nomlansin hamda quyidagilar uning qoʻshimcha vazifalari etib belgilansin:
nogironligi boʻlgan shaxslarni sportga jalb qilish boʻyicha normativ-huquqiy hujjatlar ijrosini nazorat qilishda ishtirok etish;
davlat organlarining nogironligi boʻlgan shaxslarni sportga jalb qilish boʻyicha oʻziga yuklatilgan vazifalarni oʻz vaqtida va samarali bajarishini taʼminlash;
davlat organlari va tashkilotlariga nogironligi boʻlgan shaxslarni sportga jalb qilish boʻyicha funksiyalarini bajarishda tashkiliy jihatdan koʻmaklashish.
22. Oʻzbekiston Respublikasi Prezidentining ayrim qarorlariga 4-ilovaga muvofiq oʻzgartirishlar kiritilsin.
23. Mazkur qarorning ijrosini samarali tashkil qilishga masʼul va shaxsiy javobgar etib Oʻzbekiston Respublikasi Prezidenti maslahatchisi — Ijtimoiy himoya milliy agentligi direktori M.P. Olloyorov hamda sport vaziri A.I. Ikramov belgilansin.
Qaror ijrosini muhokama qilib borish, masʼul tashkilotlar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2024-yil 8-noyabr,
PQ-389-son
Oʻzbekiston Respublikasi Prezidentining 2024-yil 8-noyabrdagi PQ-389-son qaroriga 1-ILOVA
Oʻzbekiston adaptiv sport turlari assotsiatsiyasining
TASHKILIY TUZILMASI
Izoh:
*Oʻzbekiston adaptiv sport turlari assotsiasiyasi ijroiya qoʻmitasi (markaziy apparati)ning Davlat budjetidan moliyalashtiriladigan boshqaruv xodimlarining umumiy cheklangan soni — 12 ta.
** Oʻzbekiston adaptiv sport turlari assotsiasiyasiga aʼzo nodavlat notijorat tashkilotlarning Davlat budjetidan moliyalashtiriladigan va taqsimoti Oʻzbekiston adaptiv sport turlari assotsiasiyasi tomonidan belgilanadigan xodimlarining umumiy cheklangan soni — 12 ta.
Texnik va xizmat koʻrsatuvchi xodimlar soni oʻrnatilgan meʼyorlarga muvofiq belgilanadi.
Oʻzbekiston Respublikasi Prezidentining 2024-yil 8-noyabrdagi PQ-389-son qaroriga 2-ILOVA
Adaptiv sport turlarini rivojlantirish va jismoniy reabilitatsiya qilish tizimini takomillashtirish boʻyicha
CHORA-TADBIRLAR DASTURI
T/rChora-tadbirlar nomiAmalga oshirish mexanizmiIjro muddatiMoliyalashtirish manbalariMasʼul ijrochilarAdaptiv sport turlari bilan shugʻullanish uchun moddiy-texnik bazani shakllantirish yoʻnalishida1.Adaptiv sport turlari assotsiatsiyasi va uning hududiy boʻlinmalari faoliyatining tashkiliy masalalarini hal etish.1. Adaptiv sport turlari assotsiatsiyasini zarur jihozlar, mebel, sport inventarlari hamda samarali ish olib borishi uchun boshqa kerakli moddiy-texnika vositalar, metodik materiallar bilan taʼminlash.2. Adaptiv sport turlari assotsiatsiyasini malakali mutaxassislar bilan toʻldirish.2024-yil noyabr-dekabrOʻzbekiston Respublikasi Davlat budjetidan ajratilgan ijrochilar mablagʻlari,Ijtimoiy himoya davlat jamgʻarmasi mablagʻlari,qonunchilik hujjatlari bilan taqiqlanmagan boshqa manbalarAdaptiv sport turlari assotsiatsiyasi,Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari,Sport vazirligi3. Assotsiatsiya hududiy boʻlinmalarining moliyaviy hamda moddiy-texnik bazasini mustahkamlash, tegishli hududda adaptiv sport turlarini rivojlantirish uchun homiylar biriktirilishini, shuningdek, ularni joylashtirish uchun bino va inshootlar ajratilishini taʼminlash.2025-yil yanvar2.Adaptiv sport turlari assotsiatsiyasi tomonidan hududlarda mavjud sport, taʼlim hamda ixtisoslashgan muassasalarda adaptiv sport turlari seksiyalarini tashkil qilish.1. Davlat sport, taʼlim, ixtisoslashtirilgan muassasalarda nogironligi boʻlgan shaxslar uchun adaptiv sport boʻlimlarini mavjud guruhlar va shtat birliklari doirasida bosqichma-bosqich tashkil etish. Bunda har bir yoʻnalish boʻyicha ehtiyojga qarab trener shtatlarini joriy etish.2024-yil dekabrOʻzbekiston Respublikasi Davlat budjetidan ajratilgan ijrochilar mablagʻlari hamda qonunchilik hujjatlari bilan taqiqlanmagan boshqa manbalarAdaptiv sport turlari assotsiatsiyasi,Sport vazirligi,Ijtimoiy himoya milliy agentligi,Maktabgacha va maktab taʼlimi vazirligi,Iqtisodiyot va moliya vazirligi2. 2025/2026 oʻquv yilidan boshlab davlat sport-taʼlim muassasalarida adaptiv sport turlari boʻyicha tayyorgarlik bosqichlari va sport turlariga koʻra sport-oʻquv guruhlarini shakllantirish hamda ushbu yoʻnalishda zaruratga koʻra qoʻshimcha shtat birliklarini ajratish. Bunda amaldagi normativ-huquqiy hujjatlarga oʻzgartirish kiritish.2025-yil avgust3.Nogironligi boʻlgan shaxslarga davlat mulkida boʻlgan jismoniy tarbiya-sogʻlomlashtirish va sport inshootlarida bepul shugʻullanish imkoniyatini yaratish.Nogironligi boʻlgan shaxslarga bepul shugʻullanish imkoni yaratilgan jismoniy tarbiya-sogʻlomlashtirish va sport inshootlari roʻyxatini tasdiqlash.2024-yil 10-dekabr-Sport vazirligi,Oliy taʼlim, fan va innovatsiyalar vazirligi,Maktabgachava maktab taʼlimi vazirligi,Ijtimoiy himoya milliy agentligi4.Nogironligi boʻlgan shaxslarni individual reabilitatsiya qilish dasturida jismoniy reabilitatsiya xizmatini taklif qilish.1. “ERP-sport” yagona elektron boshqaruv tizimida nogironligi boʻlgan shaxslarning toifa va yoshidan kelib chiqib, kasalliklarning xalqaro tasnifi (KXT-10) boʻyicha ularning jismoniy imkoniyatiga mos sport turlarining roʻyxatini avtomatik tarzda shakllantirish imkonini yaratish.2025-yil yanvar-fevralIjtimoiy himoya davlat jamgʻarmasi mablagʻlariIjtimoiy himoya milliy agentligi,Sogʻliqni saqlash vazirligi,nogironligi boʻlgan shaxslar sport tashkilotlari2. Nogironligi boʻlgan shaxslarning funksionalligini baholash natijalariga muvofiq jismoniy reabilitatsiya xizmatlarini koʻrsatishni tashkil etish.2026-yil mart5.Nogironligi boʻlgan shaxslarni reabilitatsiya qilish va protezlash milliy markazi va uning hududiy markazlari, Ijtimoiy qoʻllab-quvvatlash markazlariga yaqin hududda yashovchi nogironligi boʻlgan shaxslar ushbu muassasalardagi sport zallarida “Inson” ijtimoiy xizmatlar markazi yoʻllanmasi asosida bepul shugʻullanishini tashkil qilish.1. Nogironligi boʻlgan shaxslarni reabilitatsiya qilish va protezlash milliy markazi, uning hududiy markazlari hamda Ijtimoiy qoʻllab-quvvatlash markazlarida davolovchi jismoniy tarbiya xonalari mavjudligi va belgilangan talablarga muvofiqligini xatlovdan oʻtkazish.2025-yil iyunOʻzbekiston Respublikasi Davlat budjetidan ajratilgan ijrochilar mablagʻlari,Ijtimoiy himoya davlat jamgʻarmasi mablagʻlari,qonunchilik hujjatlari bilan taqiqlanmagan boshqa manbalarIjtimoiy himoya milliy agentligi,Sogʻliqni saqlash vazirligi2. Davolovchi jismoniy tarbiya xonalari (yopiq turdagi) va maydonchalarini (ochiq turdagi) rekonstruksiya qilish va qurish.2026-yil dekabr3. Nogironligi boʻlgan shaxslarni reabilitatsiya qilish va protezlash milliy markazi va uning hududiy markazlarida xodimlarning umumiy cheklangan soni hamda ajratilgan mablagʻlar doirasida zamonaviy jismoniy tarbiya, mexanoterapiya, fizioterapiya va boshqa zamonaviy robotlashtirilgan reabilitatsiya qilish uchun bir shtat birligida davolovchi jismoniy tarbiya yoʻriqchisi lavozimini joriy etish.2025-yil aprel4. Reabilitatsiya xizmatlarini koʻrsatishning muddatlari, davomiyligi hamda boshqa shartlarni nazarda tutuvchi tartibni ishlab chiqish. Bunda “Inson” ijtimoiy xizmatlar markazi yoʻllanmasi asosida bepul shugʻullanish nazarda tutiladi hamda jismoniy reabilitatsiya xizmatlarini koʻrsatish nogironligi boʻlgan shaxslar funksionalligini baholash natijalariga muvofiq tashkil etiladi.2026-yil mart6.Respublikadagi barcha alohida taʼlim ehtiyojlari boʻlgan bolalar uchun ixtisoslashtirilgan taʼlim muassasalari va “Gʻamxoʻrlik” markazlarida sport toʻgaraklarini tashkil qilish.1. Ixtisoslashtirilgan taʼlim muassasalari hamda “Gʻamxoʻrlik” markazlarida sport toʻgaraklarini tashkil qilish hamda ushbu toʻgaraklarda kunduzgi qatnov xizmatini yoʻlga qoʻyish.2. Muassasalarning davolovchi jismoniy tarbiya yoʻriqchilarini adaptiv sport turlari boʻyicha qayta tayyorlov va malaka oshirish kurslarida oʻqitish.2025-2026-yillarSohaga ajratilgan mablagʻlar doirasida,Ijtimoiy himoya davlat jamgʻarmasi mablagʻlariIjtimoiy himoya milliy agentligi,Iqtisodiyot va moliya vazirligi,Adaptiv sport turlari assotsiatsiyasi7.Nogironligi boʻlgan shaxslarni sportga jalb qilish jarayoni monitoring tizimini yaratish.1. “Yagona milliy ijtimoiy himoya”, “Tibbiy ijtimoiy ekspertiza” elektron axborot tizimlari hamda “ERP-sport” yagona elektron boshqaruv tizimlarini “Elektron hukumat” tizimining idoralararo integratsiyalashuv platformasi orqali nogironligi boʻlgan shaxslarning sport toʻgaraklaridagi ishtirokini monitoring qilish tizimini joriy qilish.2025-yil martIjrochilar mablagʻlari,Ijtimoiy himoya davlat jamgʻarmasi mablagʻlariSport vazirligi,Adaptiv sport turlari assotsiatsiyasi,Ijtimoiy himoya milliy agentligi,Sogʻliqni saqlash vazirligi,Raqamli texnologiyalar vazirligi,nogironligi boʻlgan shaxslar sport tashkilotlari2. “ERP-sport” yagona elektron boshqaruv tizimida adaptiv sport turlarini shakllantirish tizimini takomillashtirish.2025-yil aprel3. “ERP-sport” yagona elektron boshqaruv tizimida nogironligi boʻlgan shaxslarning toifa va yoshidan kelib chiqib, kasalliklarning xalqaro tasnifi (KXT-10) boʻyicha ularning jismoniy imkoniyatiga mos sport turlarining roʻyxatini avtomatik tarzda shakllantirish imkoniyatini yaratish.2025-yil may8.Nogironligi boʻlgan shaxslarga sport bilan shugʻullanishlari uchun qulay sharoitlar yaratish va mavjud infratuzilmani moslashtirish.1. 2025-yildan boshlab yangi quriladigan sport obyektlarining loyiha hujjatlarini ishlab chiqishda ulardan nogironligi boʻlgan shaxslar ham foydalanishini ham nazarda tutish.Doimiy-Qurilish va uy-joy kommunal xoʻjaligi vazirligi,Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklariSport vazirligi,Ichki ishlar vazirligi2. Qurilishi rejalashtirilgan Workout, Universal, Streetball maydonchalari loyihalarini nogironligi boʻlgan shaxslarga moslashtirish.2025-yildan boshlab doimiyIjrochilar mablagʻlari3. Respublikadagi sport maktablarini ularning nogironligi boʻlgan shaxslarga toʻsiqsiz muhit talablariga muvofiqligi yuzasidan xatlovdan oʻtkazish hamda xatlov natijalariga koʻra toʻsiqsiz muhit talablariga moslashtirish zarur boʻlgan sport maktablarini rekonstruksiya qilishning 2024 — 2026-yillarga moʻljallangan dasturini tasdiqlash uchun Vazirlar Mahkamasiga kiritish. 2025-yil yanvar — fevralIjtimoiy va ishlab chiqarish infratuzilmasini rivojlantirish dasturlari mablagʻlariSport vazirligi,Ijtimoiy inspeksiya4. Sport, taʼlim, ixtisoslashgan muassasalarni rekonstruksiya qilish, yangi sport zallarni qurishda Oʻzbekiston Respublikasi Prezidenti huzuridagi Ijtimoiy himoya milliy agentligining Qoraqalpogʻiston Respublikasi, viloyatlar va Toshkent shahar boshqarmalari bilan kelishish va ushbu hududda istiqomat qiluvchi nogironligi boʻlgan shaxslar soni va ularning nogironlik turlaridan kelib chiqib loyiha hujjatlarini ishlab chiqish.2025-yil yanvar — mart-Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari,Sport vazirligi, Qurilish va uy-joy kommunal xoʻjaligi vazirligi,Iqtisodiyot va moliya vazirligi,Adaptiv sport turlari assotsiatsiyasi,Ichki ishlar vazirligi9.Oʻzbekiston adaptiv sport turlari assotsiatsiyasi tizimidagi nodavlat notijorat tashkilotlarning moddiy-texnik bazasini mustahkamlash.Oʻzbekiston adaptiv sport turlari assotsiatsiyasi tizimidagi nodavlat notijorat tashkilotlarni binolari mavjudligi yuzasidan xatlovdan oʻtkazish va xatlov yakunlari boʻyicha ularni tekin foydalanish asosida bino bilan taʼminlash.2024-yil dekabr — 2025-yil fevral-Davlat aktivlarini boshqarish agentligi,Sport vazirligi,Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklariAdaptiv sport turlari boʻyicha trener va sportchilarni tayyorlash va qoʻllab-quvvatlash yoʻnalishida10.Adaptiv sport turlari boʻyicha oʻquv-meʼyoriy hujjatlar va oʻquv-uslubiy adabiyotlar bazasini yaratish.1. Adaptiv sport turlari boʻyicha taʼlim standartlari, malaka talablari, oʻquv dasturlari, oʻquv rejalari ishlab chiqilishini taʼminlash.2024-yil dekabrOʻzbekiston Respublikasi Davlat budjetidan ajratilgan ijrochilar mablagʻlari,Ijtimoiy himoya davlat jamgʻarmasi mablagʻlari,Sportni qoʻllab-quvvatlash jamgʻarmasi mablagʻlariJismoniy tarbiya va sport sohasida kadrlar salohiyatini oshirish hamda ilmiy faoliyatni rivojlantirish boʻyicha kuzatuv kengashi,Oliy taʼlim, fan va innovatsiyalar vazirligi,Sport vazirligi,Ijtimoiy himoya milliy agentligi2. Oʻquv-uslubiy adabiyotlarni ishlab chiqish va ularning chop etilishini taʼminlash.2024 — 2026-yillar11.Sport, taʼlim, ixtisoslashtirilgan muassasalar moddiy-texnik bazasini mustahkamlash.1. Respublikadagi barcha sport maktablari hamda sport turiga ixtisoslashgan sport maktablarining adaptiv sport turlari boʻyicha sport jihozlari bilan jihozlanganligini xatlovdan oʻtkazish.2025-yil yanvar-Sport vazirligi2. Respublikadagi barcha umumtaʼlim maktablarini adaptiv sport turlari boʻyicha sport jihozlari bilan jihozlanganligini xatlovdan oʻtkazish.Maktabgacha va maktab taʼlim vazirligi3. Respublikadagi barcha alohida taʼlim ehtiyojlari boʻlgan bolalar uchun ixtisoslashtirilgan davlat taʼlim muassasalari adaptiv sport turlari boʻyicha sport jihozlari bilan jihozlanganligini xatlovdan oʻtkazish. Ijtimoiy himoya milliy agentligi4. Adaptiv sport turlari boʻyicha tegishli sport jihozlariga boʻlgan ehtiyojlarni aniqlash hamda ularni xarid qilish manbalari boʻyicha Vazirlar Mahkamasiga taklif kiritish.2025-yil martIjrochilar mablagʻlariSport vazirligi,Maktabgacha va maktab taʼlim vazirligi,Ijtimoiy himoya milliy agentligi,Adaptiv sport turlari assotsiatsiyasiNogironligi boʻlgan shaxslarning professional sport bilan shugʻullanishini qoʻllab-quvvatlash yoʻnalishida12.Nogironligi boʻlgan shaxslar sporti sohasida malakali kadrlar tayyorlash tizimini takomillashtirish.Adaptiv jismoniy tarbiya va sport sohasida mutaxassislarni tayyorlash institutida karlar sporti, koʻzi ojizlar sporti va Maxsus olimpiya hamda nogironligi boʻlgan shaxslar shugʻullanadigan boshqa sport turlari yoʻnalishlarida malaka oshirish kurslarini tizimli yoʻlga qoʻyish.2025-yil yanvar — fevralIjtimoiy himoya davlat jamgʻarmasi va Sportni qoʻllab-quvvatlash jamgʻarmasi mablagʻlariAdaptiv sport turlari assotsiatsiyasi,Ijtimoiy himoya milliy agentligi,Sport vazirligi,nogironligi boʻlgan shaxslar sport tashkilotlari,Adaptiv jismoniy tarbiya va sport sohasida mutaxassislarni tayyorlash instituti13.Mahalla va respublika miqyosida ommaviy sport musobaqalarini tashkil etish tizimini takomillashtirish.1. Uch bosqichli “Besh tashabbus paralimpiadasi” doirasidagi musobaqalar dasturiga karlar sporti, Maxsus olimpiya, koʻzi ojizlar, nogironligi boʻlgan shaxslar shugʻullanadigan boshqa sport turlarini ham kiritish.2. 2025-yildan boshlab har yili anʼanaviy tarzda may oyining birinchi yakshanbasida respublikaning barcha hududlarida “Inson uchun” shiori ostida adaptiv sport turlari boʻyicha festival oʻtkazish va uning doirasida xayriya marafonlarini tashkil etish.2025-yil mayIjrochilar mablagʻlari, Ijtimoiy himoya davlat jamgʻarmasi mablagʻlariAdaptiv sport turlari assotsiatsiyasi,Sport vazirligi,Ijtimoiy himoya milliy agentligi,Ichki ishlar vazirligi,Yoshlar ishlari agentligi,Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari3. “Besh tashabbus paralimpiadasi” va “Adaptiv sport kunlari” doirasida oʻtkaziladigan ommaviy sport musobaqalari gʻolib va sovrindorlari orasidan nogironligi boʻlgan iqtidorli shaxslarni saralab olish hamda ularni professional sportga yoʻnaltirish tizimini yoʻlga qoʻyish.2025-yil yanvar — fevralIjtimoiy himoya davlat jamgʻarmasi mablagʻlari14.Nogironligi boʻlgan shaxslarni sportga jalb qilishda targʻibot ishlarini tashkil etish.1. Ijtimoiy himoya milliy agentligining Paralimpiyachilar matonat maktabi hamda OAV bilan hamkorlikda nogironligi boʻlgan shaxslar sporti sohasida xalqaro musobaqalar gʻolib va sovrindorlari hayot yoʻli toʻgʻrisida qisqa metrajli filmlar hamda motivatsion videoroliklar suratga olish.2024-yil dekabr — 2025-yil yanvarIjrochilar mablagʻlariOʻzbekiston Milliy teleradiokompaniyasi,Kinematografiya agentligi,Adaptiv sport turlari assotsiatsiyasi2. Adaptiv sport turlari boʻyicha xalqaro musobaqalar gʻolib va sovrindorlari bilan mahallalardagi nogironligi boʻlgan shaxslar ishtirokida uchrashuvlar, davra suhbatlari, mahorat darslarini tashkil etish.3. Nogironligi boʻlgan shaxslarga sport orqali jismoniy reabilitatsiyaga erishish mumkinligini tushuntirish, adaptiv sport turlari boʻyicha maʼlumotlar hamda professional sport bilan shugʻullanish orqali moddiy ragʻbatlantirishga erishish imkoniyati mavjudligini uyma-uy yurib targʻib qilish, shuningdek, adaptiv sport turlariga oid maʼlumotlarni yetkazishga qaratilgan flayer, buklet va boshqa targʻibot materiallarini oilalarga bepul tarqatish.2024-yil dekabr — 2025-yil fevralIjrochilar mablagʻlariAdaptiv sport turlari assotsiatsiyasi,Ijtimoiy himoya milliy agentligi,Paralimpiyachilar matonat maktabi,Yoshlar ishlari agentligi4. Nogironligi boʻlgan shaxslar uy sharoitida oila aʼzolari bilan jismoniy badantarbiya bilan shugʻullanishi uchun davolovchi jismoniy tarbiya boʻyicha videodarsliklar tayyorlash.2025-yil may
Oʻzbekiston Respublikasi Prezidentining 2024-yil 8-noyabrdagi PQ-389-son qaroriga 3-ILOVA
Surdlimpiya, Maxsus olimpiya, IBSA jahon oʻyinlari, Surdosiyo va Okeaniya, Maxsus olimpiya Yevropa yozgi oʻyinlari, shuningdek, Surdlimpiya, Maxsus olimpiya, IBSA jahon oʻyinlari dasturiga kiritilgan sport turlari hamda Amputantlar futboli boʻyicha jahon chempionati gʻolib va sovrindor sportchilari, ularni tayyorlagan trenerlarni Davlat budjeti mablagʻlari hisobidan ragʻbatlantirish miqdorlari
1. Surdlimpiya, IBSA jahon oʻyinlari gʻolib va sovrindorlari quyidagi miqdorda bir martalik pul mukofoti bilan ragʻbatlantiriladi:
oltin medal uchun — 10 000 AQSH dollari;
kumush medal uchun — 5 000 AQSH dollari;
bronza medal uchun — 2 500 AQSH dollari.
2. Maxsus olimpiya oʻyinlari gʻolib va sovrindorlari quyidagi miqdorda bir martalik pul mukofoti bilan ragʻbatlantiriladi:
oltin medal uchun — 3 000 AQSH dollari;
kumush medal uchun — 2 000 AQSH dollari;
bronza medal uchun — 1 000 AQSH dollari.
3. Surdlimpiya, IBSA jahon oʻyinlari gʻolib va sovrindorlari boʻlgan sportchilarni tayyorlagan trenerlar quyidagi miqdorda bir martalik pul mukofoti bilan ragʻbatlantiriladi:
oltin medal uchun — 5 000 AQSH dollari;
kumush medal uchun — 2 500 AQSH dollari;
bronza medal uchun —1 500 AQSH dollari.
4. Maxsus olimpiya oʻyinlari gʻolib va sovrindorlari boʻlgan sportchilarni tayyorlagan trenerlar quyidagi miqdorda bir martalik pul mukofoti bilan ragʻbatlantiriladi:
oltin medal uchun — 1 500 AQSH dollari;
kumush medal uchun — 1 000 AQSH dollari;
bronza medal uchun — 500 AQSH dollari.
5. Surdlimpiya, IBSA jahon oʻyinlari dasturiga kiritilgan sport turlari boʻyicha jahon chempionati gʻolib va sovrindorlari quyidagi miqdorda bir martalik pul mukofoti bilan ragʻbatlantiriladi:
oltin medal uchun — 5 000 AQSH dollari;
kumush medal uchun — 3 000 AQSH dollari;
bronza medal uchun — 2 000 AQSH dollari.
6. Maxsus olimpiya oʻyinlari dasturiga kiritilgan sport turlari boʻyicha jahon chempionati gʻolib va sovrindorlari quyidagi miqdorda bir martalik pul mukofoti bilan ragʻbatlantiriladi:
oltin medal uchun — 2 000 AQSH dollari;
kumush medal uchun — 1 500 AQSH dollari;
bronza medal uchun — 750 AQSH dollari.
7. Surdlimpiya, IBSA jahon oʻyinlari dasturiga kiritilgan sport turlari boʻyicha jahon chempionati gʻolib va sovrindorlari boʻlgan sportchilarni tayyorlagan trenerlar quyidagi miqdorda bir martalik pul mukofoti bilan ragʻbatlantiriladi:
oltin medal uchun — 2 500 AQSH dollari;
kumush medal uchun — 1 500 AQSH dollari;
bronza medal uchun — 1 000 AQSH dollari.
8. Maxsus olimpiya oʻyinlari dasturiga kiritilgan sport turlari boʻyicha jahon chempionati gʻolib va sovrindorlari boʻlgan sportchilarni tayyorlagan trenerlar quyidagi miqdorda bir martalik pul mukofoti bilan ragʻbatlantiriladi:
oltin medal uchun — 1 000 AQSH dollari;
kumush medal uchun — 750 AQSH dollari;
bronza medal uchun — 500 AQSH dollari.
9. Surdosiyo va Okeaniya oʻyinlari, IBSA Osiyo oʻyinlari gʻolib va sovrindorlari quyidagi miqdorda bir martalik pul mukofoti bilan ragʻbatlantiriladi:
oltin medal uchun — 3 000 AQSH dollari;
kumush medal uchun — 2 000 AQSH dollari;
bronza medal uchun — 1 000 AQSH dollari.
10. Maxsus olimpiya Yevropa yozgi oʻyinlari gʻolib va sovrindorlari quyidagi miqdorda bir martalik pul mukofoti bilan ragʻbatlantiriladi:
oltin medal uchun — 1 000 AQSH dollari;
kumush medal uchun — 750 AQSH dollari;
bronza medal uchun — 500 AQSH dollari.
11. Surdosiyo va Okeaniya oʻyinlari gʻolib va sovrindorlari boʻlgan sportchilarni tayyorlagan trenerlar quyidagi miqdorda bir martalik pul mukofoti bilan ragʻbatlantiriladi:
oltin medal uchun — 1 500 AQSH dollari;
kumush medal uchun — 1 000 AQSH dollari;
bronza medal uchun — 500 AQSH dollari.
12. Maxsus olimpiya Yevropa yozgi oʻyinlari gʻolib va sovrindorlari boʻlgan sportchilarni tayyorlagan trenerlar quyidagi miqdorda bir martalik pul mukofoti bilan ragʻbatlantiriladi:
oltin medal uchun — 500 AQSH dollari;
kumush medal uchun — 400 AQSH dollari;
bronza medal uchun — 300 AQSH dollari.
13. Amputantlar futboli boʻyicha jahon chempionati gʻolib va sovrindorlari quyidagi miqdorda bir martalik pul mukofoti bilan ragʻbatlantiriladi:
oltin medal uchun — 5 000 AQSH dollari;
kumush medal uchun — 3 000 AQSH dollari;
bronza medal uchun — 2 000 AQSH dollari
14. Amputantlar futboli boʻyicha jahon chempionati gʻolib va sovrindorlari boʻlgan sportchilarni tayyorlagan trenerlar quyidagi miqdorda bir martalik pul mukofoti bilan ragʻbatlantiriladi:
oltin medal uchun — 2 500 AQSH dollari;
kumush medal uchun — 1 500 AQSH dollari;
bronza medal uchun — 1 000 AQSH dollari.
15. Trenerlarga nazarda tutilgan ragʻbatlantirish miqdori gʻolib va sovrindorlari boʻlgan sportchilarni oxirgi bir yil davomida tayyorlagan trenerlarga beriladi.
Bunda ushbu mablagʻlar sportchini soʻnggi 4 (toʻrt) yilda tayyorlashda ishtirok etgan trener va boshqa mutaxassislar oʻrtasida tegishli Trenerlar kengashining qaroriga asosan qayta taqsimlanishi mumkin.
16. Alohida hollarda Oʻzbekiston Respublikasi Prezidenti va Vazirlar Mahkamasi qarorlari bilan Surdolimpiya, Maxsus olimpiya, IBSA jahon oʻyinlari hamda nogironligi boʻlgan shaxslar shugʻullanishi mumkin boʻlgan boshqa sport turlari boʻyicha boshqa yirik xalqaro sport musobaqalari gʻolib va sovrindorlari, shuningdek, ularni tayyorlagan trenerlarni ragʻbatlantirishning alohida miqdorlari belgilanishi mumkin.
Oʻzbekiston Respublikasi Prezidentining 2024-yil 8-noyabrdagi PQ-389-son qaroriga 4-ILOVA
Oʻzbekiston Respublikasi Prezidentining ayrim qarorlariga kiritilayotgan oʻzgartirishlar
1. Oʻzbekiston Respublikasi Prezidentining 2021-yil 18-maydagi “Paralimpiya harakatini rivojlantirishga doir qoʻshimcha chora-tadbirlar toʻgʻrisida”gi PQ-5114-son qarorining 141-bandi birinchi xatboshisi quyidagi tahrirda bayon etilsin:
“141. Adaptiv sport turlarini yanada rivojlantirish boʻyicha respublika kengashi (A.N. Aripov)”.
2. Oʻzbekiston Respublikasi Prezidentining 2022-yil 6-iyundagi “Paralimpiyachilarning matonat maktabi faoliyatini tashkil etish chora-tadbirlari toʻgʻrisida”gi PQ-270-son qarorida:
a) 4-bandda “Paralimpiyachilarning matonat maktabi faoliyatini samarali yoʻlga qoʻyish va paralimpiya” soʻzlari “Adaptiv” soʻzi bilan almashtirilsin;
b) 6-bandda:
“a” kichik bandda “Matonat maktabi faoliyatini samarali yoʻlga qoʻyish va paralimpiya” soʻzlari “Adaptiv” soʻzi bilan almashtirilsin;
“g” kichik bandda “Paralimpiyachilarning matonat maktabi faoliyatini samarali yoʻlga qoʻyish va paralimpiya” soʻzlari “Adaptiv” soʻzi bilan almashtirilsin;
v) 7-bandda “Paralimpiyachilarning matonat maktabi faoliyatini samarali yoʻlga qoʻyish va paralimpiya” soʻzlari “Adaptiv” soʻzi bilan almashtirilsin;
g) 1-ilovaning nomida “Paralimpiyachilarning matonat maktabi faoliyatini samarali yoʻlga qoʻyish va paralimpiya” soʻzlari “Adaptiv” soʻzi bilan almashtirilsin.