Oʻzbekiston Respublikasi Oliy Majlisi Qonunchilik palatasi Innovatsion rivojlanish, axborot siyosati va axborot texnologiyalari masalalari qoʻmitasining 2024-yil toʻqqiz oyidagi faoliyati toʻgʻrisida (4932-IV-son)

14.10.2024

Oʻzbekiston Respublikasi Oliy Majlisi Qonunchilik palatasi Kengashining

qarori

Oʻzbekiston Respublikasi Oliy Majlisi Qonunchilik palatasi Innovatsion rivojlanish, axborot siyosati va axborot texnologiyalari masalalari qoʻmitasining (bundan buyon matnda Qoʻmita deb yuritiladi) 2024-yil toʻqqiz oyidagi faoliyati toʻgʻrisidagi axborotini koʻrib chiqib, Oʻzbekiston Respublikasi Oliy Majlisi Qonunchilik palatasining Kengashi taʼkidlaydiki, hisobot davrida Qoʻmita tomonidan qonun ijodkorligi faoliyati samaradorligini oshirishga, qonun loyihalarini tayyorlashda xalqaro tajribadan unumli foydalangan holda mamlakatimizda raqamlashtirish yoʻnalishidagi islohotlarni davom ettirishga hamda sohaga oid qonun hujjatlari ijrosi ustidan taʼsirchan parlament nazoratini olib borishga alohida eʼtibor qaratilgan.

Hisobot davrida Qoʻmita tomonidan mamlakatimizda raqamli iqtisodiyotni faol rivojlantirish, barcha tarmoqlar va sohalarda, eng avvalo, davlat boshqaruvi, taʼlim, sogʻliqni saqlash va qishloq xoʻjaligida zamonaviy axborot-kommunikatsiya texnologiyalarini keng joriy etish, shuningdek sohani bugungi kun talablari darajasida taraqqiy ettirishga qaratilgan tadbirlarni huquqiy jihatdan taʼminlash boʻyicha tizimli ishlar amalga oshirilgan.

Oʻtgan davrda Qoʻmita 8 ta qonun loyihasiga masʼul boʻlib, ushbu qonun loyihalarini koʻrib chiqish hamda maromiga yetkazish maqsadida ishchi guruhning 28 ta hamda Qoʻmita huzuridagi ekspert guruhining 4 ta yigʻilishi oʻtkazilgan. Qonun loyihalarini takomillashtirish hamda xorijiy mamlakatlar tajribasini oʻrganishda innovatsiyalar, raqamli texnologiyalar sohasi va fuqarolik jamiyatining boshqa instituti vakillaridan iborat boʻlgan ekspert guruhi imkoniyatlaridan samarali foydalanilgan.

Davlat organlari rahbarlarining axborotini eshitish hamda qonun hujjatlarining ijrosi hamda huquqni qoʻllash amaliyotini oʻrganish boʻyicha Qoʻmita tomonidan 8 ta parlament nazorati tadbirlari oʻtkazilgan. Ulardan 6 tasi davlat organlari rahbarlarining axborotini eshitishga, 2 tasi qonun hujjatlarining ijrosi holatini oʻrganishga qaratildi.

Jumladan, Qoʻmita tomonidan “Litsenziyalash, ruxsat berish va xabardor qilish tartib-taomillari toʻgʻrisida”gi Oʻzbekiston Respublikasi Qonunida belgilangan barcha litsenziya, ruxsat berish va xabardor qilish tartib-taomillarining “Litsenziya” axborot tizimiga toʻliq kiritilish holati yuzasidan amalga oshirilayotgan ishlarni oʻrganish yuzasidan nazorat-tahlil tadbiri oʻtkazilgan. Tadbirda davlat organlarining ushbu sohadagi vakolatlari va majburiyatlari, shuningdek litsenziyalash, ruxsat berish va xabardor qilish tartib-taomillarini oʻrganishga eʼtibor qaratilgan. “Litsenziya” axborot tizimida barcha turdagi litsenziyalash, ruxsat berish va xabardor qilishga doir xizmatlarni ishga tushirish boʻyicha amalga oshirilayotgan ishlarni yakuniga yetkazish yuzasidan Oʻzbekiston Respublikasi Adliya vazirligiga tegishli tavsiyalar berilgan. Oʻrganish yakunlari Qoʻmitaning kengaytirilgan yigʻilishida soha mutasaddilari ishtirokida koʻrib chiqilib, Qoʻmitaning tegishli qarori qabul qilingan.

Bundan tashqari Qoʻmita tomonidan Oʻzbekiston Respublikasi Raqamli texnologiyalar vazirligining “Raqamli infratuzilmani rivojlantirish borasida amalga oshirilayotgan ishlar holati” yuzasidan axboroti eshitilgan. Eshituv yakunida Qoʻmitaning tegishli qarori qabul qilingan.

Qoʻmita tomonidan, shuningdek Oʻzbekiston Respublikasi Sogʻliqni saqlash vazirligining “Tibbiyot sohasida raqamli texnologiyalarni keng joriy qilish boʻyicha amalga oshirilayotgan ishlar” yuzasidan axboroti eshitilgan. Eshituvda sogʻliqni saqlash sohasini raqamlashtirish va axborot tizimlari yagona kompleksini joriy etish, elektron retsept tizimini takomillashtirish va keng joriy etish hamda narxlarga rioya etilishini onlayn kuzatishning axborot tizimini yaratish boʻyicha amalga oshirilgan ishlar muhokama qilingan. Shuningdek, markazlashgan korporativ tarmoq tashkil etish va statsionar tibbiyot muassasalarida lokal tarmoq qurish ishlarini yakuniga yetkazish, axborot tizimlarini oʻzaro integratsiya qilish hamda foydalanish uchun qulay boʻlgan dasturlarni joriy etish va tibbiyot tizimini yagona integratsiyalashgan platformaga oʻtkazish kabi takliflar koʻrib chiqilgan.

Hisobot davrida Oʻzbekiston Respublikasi raqamli texnologiyalar vaziri Sh. Shermatovga “Elektron hukumat” tizimining yangi bosqichiga — “Raqamli hukumat” tizimiga oʻtish boʻyicha amalga oshirilayotgan ishlar toʻgʻrisida” Oʻzbekiston Respublikasi Oliy Majlisi Qonunchilik palatasining parlament soʻrovi yuborilgan. Ushbu parlament soʻrovi yuzasidan yuborilgan javob qoʻmitada hamda Oʻzbekiston Respublikasi Oliy Majlisi Qonunchilik palatasidagi siyosiy partiyalar fraksiyalar majlislarida atroflicha muhokama qilingan va tegishli Qaror qabul qilingan.

Qoʻmita tomonidan Oʻzbekiston Respublikasi Oliy Majlisi Qonunchilik palatasining majlisida Oʻzbekiston Respublikasi raqamli texnologiyalar vazirining “Elektron hukumat tizimini takomillashtirish, davlat organlari ish faoliyatini raqamli formatga oʻtkazish, ijtimoiy soha obyektlarini Internet tarmogʻiga ulash holati” yuzasidan deputatlarning savollariga javoblarni eshitish tashkil etilgan. Unda davlat organlarida raqamlashtirish ishlarini tizimli tashkil etish, davlat xizmatchilari tomonidan davlat organlariga tegishli axborot tizimlaridan foydalanishda shaxsga doir maʼlumotlarning himoyalanishini taʼminlash, uzoq muddatga xizmat qiladigan axborot tizimlarini joriy qilish, barcha umumtaʼlim maktablarida Internet jahon axborot tarmogʻidan foydalanishni yoʻlga qoʻyish yuzasidan qator taklif va tavsiyalar berilgan.

Qoʻmitaga hisobot davrida jami 136 ta murojaat kelib tushgan. Ushbu murojaatlar belgilangan tartibda Qoʻmita aʼzolari tomonidan koʻrib chiqilgan hamda fuqarolar tomonidan koʻtarilgan muammolarni mutasaddi vazirlik va idoralar bilan hamkorlikda hal etish choralari koʻrilgan.

Qoʻmita faoliyatida ochiqlik va shaffoflikni taʼminlash, qabul qilinayotgan qonunlarning mazmun-mohiyati, nazorat-tahlil tadbirlarining natijalari, parlament faoliyati toʻgʻrisidagi maʼlumotlarni keng jamoatchilikka yetkazish maqsadida ommaviy axborot vositalari bilan samarali xamkorlik yoʻlga qoʻyilgan. Jumladan, hisobot davrida Qoʻmita aʼzolari tomonidan televideniye orqali 85 marotaba, radio orqali 16 marotaba, gazeta, jurnallarda 59 marotaba va Internet jahon axborot tarmogʻidagi veb-saytlarda 111 marotaba hamda ijtimoiy tarmoqlarda 898 marotaba chiqishlar qilingan.

Shu bilan birga Qoʻmitaning oʻtgan davrdagi faoliyati tahlili bu borada hali oʻz yechimini kutayotgan ayrim masalalar ham mavjudligini koʻrsatmoqda.

Xususan, qonunchilik tashabbusi huquqidan foydalanish samaradorligini yanada oshirish, qonunchilik tashabbusi huquqi subyektlari bilan amaliy hamkorlikni yanada kuchaytirish, Qoʻmita tashabbusi bilan oʻtkazilgan parlament nazorati tadbirlari yakunlari boʻyicha qabul qilingan qarorlarning ijrosi ustidan doimiy ravishda monitoring olib borish, Qoʻmita huzuridagi ekspert guruhi aʼzolarini qonun loyihalarini ishlab chiqish va nazorat-tahlil tadbirlariga yanada kengroq jalb etish lozim.

Yuqoridagi bayon etilganlardan kelib chiqib, Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasi Innovatsion rivojlanish, axborot siyosati va axborot texnologiyalari masalalari qoʻmitasining 2024-yil toʻqqiz oyidagi faoliyati toʻgʻrisidagi axboroti maʼlumot uchun qabul qilinsin.

2. Oʻzbekiston Respublikasi Oliy Majlisi Qonunchilik palatasi Innovatsion rivojlanish, axborot siyosati va axborot texnologiyalari masalalari qoʻmitasi:

Qoʻmita aʼzolarining qonunchilik tashabbusi huquqidan foydalanish samaradorligini yanada oshirish;

Qoʻmita tomonidan koʻrib chiqilayotgan qonun loyihalari muhokamalariga va oʻtkazilayotgan nazorat-tahlil tadbirlariga Qoʻmita huzuridagi ekspert guruhi aʼzolarini jalb etib borish;

Qoʻmita faoliyatini ommaviy axborot vositalarida keng yoritib borish, shuningdek jismoniy va yuridik shaxslarning Qoʻmitaga yuborilgan murojaatlarida koʻtarilgan masalalarni mutasaddi vazirlik va idoralar tomonidan koʻrib chiqilishi ustidan nazoratni amalga oshirish;

Oʻzbekiston Respublikasi Prezidentining 2024-yil 21-fevraldagi “Oʻzbekiston — 2030” strategiyasini “Yoshlar va biznesni qoʻllab-quvvatlash yili”da amalga oshirishga oid davlat dasturi toʻgʻrisida”gi PF-37-sonli Farmonining Qoʻmita faoliyatiga taalluqli boʻlgan bandlari ijro etilishi ustidan taʼsirchan parlament nazoratini amalga oshirish choralarini koʻrsin.

3. Ushbu Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosari A. Qodirov zimmasiga yuklatilsin.

4. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasi Spikerining oʻrinbosari U. INOYATOV

Toshkent sh.,

2024-yil 14-oktabr,

4932-IV-son