17-modda. Psixologik yordam koʻrsatish natijasida maʼlum boʻlgan maʼlumotlar bilan ishlash

Shaxsning psixologik yordam koʻrsatilishini soʻrab murojaat qilganligi fakti, psixologik yordam natijalari toʻgʻrisidagi maʼlumotlar va psixologik yordam koʻrsatish chogʻida olingan boshqa maʼlumotlar psixologning kasbiy sirini tashkil etadi hamda shifokor siriga tenglashtiriladi.

Psixologning kasbiy sirini psixologik yordam koʻrsatilishini soʻrab murojaat qilgan shaxsning yoki uning qonuniy vakilining roziligisiz oshkor etish taqiqlanadi, bundan ushbu moddaning uchinchi qismida nazarda tutilgan hollar mustasno.

Psixologning kasbiy sirini psixologik yordam koʻrsatilishini soʻrab murojaat qilgan shaxsning yoki uning qonuniy vakilining roziligisiz oshkor etishga quyidagi hollarda yoʻl qoʻyiladi:

tergovga qadar tekshiruvni amalga oshiruvchi organlarning, surishtiruv, tergov organlarining, prokuraturaning va sudning ishni sudga qadar yuritish yoki sud muhokamasi oʻtkazilishi munosabati bilan yozma soʻrovi boʻyicha;

voyaga yetmaganlarning huquqlari, erkinliklari va qonuniy manfaatlarini himoya qilish maqsadida fuqarolik ishlari boʻyicha sudning soʻroviga koʻra;

psixologik yordam sifatini oshirish, ushbu sohada malakali kadrlar tayyorlash maqsadida maʼlumotlarni egasizlantirib, ularning muayyan shaxsga tegishliligini aniqlash imkonini bermaydigan holda ulardan foydalanish.

Psixologning kasbiy siri boʻlgan maʼlumotlarni qonunda belgilangan tartibda olgan shaxs bu maʼlumotlarni oshkor qilishga va uchinchi shaxslarga taqdim etishga haqli emas.