74-modda. Uglevodorodlarni geologik jihatdan oʻrganish ishlarini amalga oshirishga doir talablar

Yer qaʼridan foydalanuvchi uglevodorodlarni geologik jihatdan oʻrganish boʻyicha ishlar boshlanguniga qadar biror-bir zarur ekologik ekspertizalarni amalga oshiradi, shuningdek xavfsizlik texnikasi sohasidagi barcha zarur maʼqullashlarni, shu jumladan davlat ekologik ekspertizasining hamda Oʻzbekiston Respublikasi Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasining ijobiy xulosasini oladi. Davlat ekologik ekspertizasi hamda Oʻzbekiston Respublikasi Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasi, qoʻllaniladigan holatga qarab, bunday maʼqullashlarni yer qaʼridan foydalanuvchiga beradi, ularning koʻchirma nusxasi esa ushbu maʼqullashlar olingan paytdan eʼtiboran besh kun ichida bevosita Yer qaʼridan foydalanish markaziga yuboriladi.

Yer qaʼridan foydalanuvchi uglevodorodlarni geologik jihatdan oʻrganishga doir ruxsatnoma berilgan paytdan eʼtiboran toʻqson kun ichida Yer qaʼridan foydalanish markaziga ruxsatnomaning butun amal qilish davri uchun uglevodorodlarni geologik jihatdan oʻrganishning yakuniy loyihasini, shu jumladan zarur boʻlgan taqdirda, yer qaʼridan foydalanish oqibatlarini bartaraf etish rejasini taqdim etishi shart.

Agar geologik jihatdan oʻrganish rejasi ruxsatnoma berilgan sanadan eʼtiboran toʻqson kun ichida taqdim etilmagan boʻlsa, auksion yakunlariga koʻra berilgan uglevodorodlarni geologik jihatdan oʻrganishga doir ruxsatnomalar avtomatik ravishda bekor qilinadi.

Uglevodorodlarni geologik jihatdan oʻrganish loyihasi geologik jihatdan oʻrganishni amalga oshirish turlari, usullari va vositalari, ishlarning eng kam hajmlari toʻgʻrisidagi batafsil axborotni hamda ruxsatnomaning amal qiladigan davri uchun ishlar rejasini, shuningdek taklif etilayotgan ishlar dasturini bajarish uchun moliyaviy va texnik imkoniyatlar dalillarini oʻz ichiga oladi. Geologik jihatdan oʻrganish loyihasining shakli va unga doir maxsus talablar qonunchilik hujjatlarida belgilanadi.

Yer qaʼridan foydalanuvchi taqdim etgan uglevodorodlarni geologik jihatdan oʻrganish loyihasi yer qaʼridan foydalanuvchi geologik jihatdan oʻrganishni boshlaguniga qadar Yer qaʼridan foydalanish markazi tomonidan tasdiqlanishi lozim. Yer qaʼridan foydalanish markazi uglevodorodlarni geologik jihatdan oʻrganish loyihasini yigirma ish kuni ichida koʻrib chiqadi. Uglevodorodlarni geologik jihatdan oʻrganish loyihasining tasdiqlanishini rad etish asoslangan boʻlishi kerak. Uglevodorodlarni geologik jihatdan oʻrganish loyihasi faqat ushbu Qonun qoidalariga, tabiatni muhofaza qilish toʻgʻrisidagi qonunchilikka yoki boshqa qoʻllaniladigan qonunchilik hujjatlariga muvofiq boʻlmagan hollarda rad etilishi mumkin.