Oʻzbekiston Respublikasi hududida joylashgan daryo floti boʻlinmalarini boshqarish tuzilmasini qayta tashkil etish toʻgʻrisida (245-son)

11.05.1994

Oʻzbekiston Respublikasi Vazirlar Mahkamasining

qarori

“Davlat mustaqilligi asoslari toʻgʻrisida” Oʻzbekiston Respublikasining Qonuniga va Vazirlar Mahkamasining “Ittifoq tasarrufida boʻlgan birlashmalar, korxonalar va tashkilotlarni Oʻzbekiston Respublikasi yurisdiksiyasiga va mulkiga oʻtkazishga doir ishlarni tashkil etish toʻgʻrisida” 1992-yil 22-yanvardagi 25-son qaroriga muvofiq, shuningdek, Amudaryoda yuk tashishni tashkil etish, daryo floti boʻlinmalari faoliyatini operativ boshqaruvni amalga oshirish maqsadida Vazirlar Mahkamasi qaror qiladi:

1. Oʻzbekiston Respublikasi akvatoriysi hamda hududida joylashgan daryo flotining quyidagi boʻlinmalari “Oʻzavtotrans” davlat korporatsiyasi ixtiyoriga oʻtkazilsin:

Termiz daryo porti;

Termiz agentligi;

yoʻlning Termiz uchastkasi;

Sharlauk pristani hamda unga qarashli Beruniy va Toʻrtkoʻl pristanlari Toʻrtkoʻl — Xonqa, Chalish — Beruniy kemalar toʻxtash joyidagi koʻpriklar bilan;

yoʻlning Chalish uchastkasi;

Xoʻjayli kema tuzatish zavodi;

Xoʻjayli pristani hamda unga qarashli Qoratogʻ, Moʻynoq prichallari Xoʻjayli — Nukus kemalar toʻxtash joyidagi koʻprik bilan;

yoʻlning Xoʻjayli uchastkasi.

2. “Oʻzavtotrans” davlat korporatsiyasi:

Turkmaniston paroxodchiligi hamda Turkmaniston paroxodchiligi Havza yoʻl boshqarmasi balansidan suzish vositalarini 1, 2-ilovalarga* muvofiq qabul qilib olsin. “Oʻzavtotrans” davlat korporatsiyasi tarkibiga kiritilayotgan daryo floti korxonalari Ustavlarini tasdiqlasin;

* Ilovalar berilmaydi.

ikki oy muddatda “Oʻzavtotrans” davlat korporatsiyasi huzurida kemachilik registrini tashkil etish boʻyicha takliflar kiritsin;

daryo floti korxonalari rahbarlari bilan birgalikda 1994-yilning 1-iyunigacha daryo qatnovi vositalari, asbob-uskunalar va materiallarni roʻyxatga hamda hisobga olishni amalga oshirishni, shuningdek, amaldagi qoidaga muvofiq asosiy fondlarni qayta baholashni taʼminlasin;

uch oy muddatda “Oʻzistiqbolstat” davlat qoʻmitasiga daryo paroxodchiligi korxonalari hamda “Oʻzavtotrans” davlat korporatsiyasi faoliyati toʻgʻrisida statistik hisobot boʻyicha takliflar kiritsin;

Davlat mulki qoʻmitasi va daryo floti korxonalari mehnat jamoalari bilan kelishgan holda 1994-yilning 1-iyunigacha ularning mulkini davlat tasarrufidan chiqarish boʻyicha takliflar kiritsin;

“Oʻzavtotrans” davlat korporatsiyasi boshqaruvi markaziy apparati tuzilmasiga va uning ustaviga oʻzgartirishlar va qoʻshimchalar kiritsin hamda tasdiqlash uchun Vazirlar Mahkamasiga taqdim etsin.

3. Oʻzbekiston Respublikasi Moliya vazirligi “Oʻzavtotrans” davlat korporatsiyasi bilan birgalikda bir oy muddatda daryo yoʻlining Termiz, Chalish va Xoʻjayli texnik uchastkalarini mablagʻ bilan taʼminlash boʻyicha takliflar kiritsin.

4. “Oʻzdavneftmahsulot” davlat-aksionerlik birlashmasi “Oʻzavtotrans” davlat korporatsiyasi tarkibiga kiritilayotgan daryo floti boʻlinmalarini 1994 va undan keyingi yillarda korporatsiyaning hisob-kitoblari boʻyicha yonilgʻi-moylash materiallari va yonilgʻi bilan taʼminlash choralarini koʻrsin.

5. “Oʻzulgurjibirjasavdo” uyushmasi “Oʻzavtotrans” davlat korporatsiyasining daryo floti boʻlinmalarining bir maromda ishlashlarini taʼminlash uchun 1994-yilda zarur boʻlgan asbob-uskunalar, ehtiyot qismlar, butlovchi va boshqa materiallarni yetkazib berish yuzasidan talabnomalarini qabul qilsin.

6. “Oʻzavtotrans” davlat korporatsiyasi Turkmaniston paroxodchiligi bilan birgalikda Amudaryo akvatoriysida kemalar qatnovini taʼminlash, Oʻzbekiston Respublikasi va Turkmaniston kema tuzatish zavodlarida kemalarni tuzatishni tashkil etish hamda ahdlashuvchi tomonlarning hududlaridan kemachilik vositalarining qatnovi toʻgʻrisidagi bitimni ishlab chiqsin va koʻrib chiqish uchun Vazirlar Mahkamasiga kiritsin.

7. “Oʻzavtotrans” davlat korporatsiyasiga Oʻzbekiston Respublikasi Moliya vazirligi bilan birgalikda amaldagi xarajatlardan kelib chiqqan holda daryo flotida yuk tashish tariflarini tasdiqlash huquqi berilsin.

8. “Oʻzavtotrans” davlat korporatsiyasi Milliy xavfsizlik xizmati bilan birgalikda daryo floti kemalarining Oʻzbekiston Respublikasi davlat chegaralaridan oʻtishi va qatnovi, shuningdek, ularning respublika hududida boʻlishi tartibini ishlab chiqsin.

9. Qoraqalpogʻiston Respublikasi Vazirlar Kengashi, Surxondaryo va Xorazm viloyatlari hokimliklari daryo floti boʻlinmalarini Termiz, Xoʻjayli va Urganch ishchilar taʼminoti boʻlimlari orqali oziq-ovqat bilan taʼminlashning amaldagi tuzilmasini saqlab qolsinlar.

Vazirlar Mahkamasining Raisi I. KARIMOV

Toshkent sh.,

1994-yil 11-may,

245-son