Oʻzbekiston Respublikasida transport vositalari va boshqa oʻziyurar mashina hamda mexanizmlar egalari fuqarolik javobgarligining majburiy sugʻurtasi toʻgʻrisida (632-son)

30.12.1994

Oʻzbekiston Respublikasi Vazirlar Mahkamasining

qarori

Oʻzbekiston Respublikasida transport vositalaridan foydalanish natijasida zarar yetkazilgan jismoniy va yuridik shaxslarning mulkiy manfaatlarini himoya qilish maqsadida Vazirlar Mahkamasi qaror qiladi:

1. 1995-yil 1-yanvardan boshlab transport vositalari egalari fuqarolik javobgarligining majburiy sugʻurtasi joriy etilsin.

Belgilab qoʻyilsinki, Oʻzbekiston Respublikasi hududida faoliyat koʻrsatayotgan mulkchilikning barcha shakllaridagi transport vositalari egalari fuqarolik javobgarligining majburiy sugʻurtasiga jalb qilinadilar.

2. Transport vositalari egalari fuqarolik javobgarligining majburiy sugʻurtasi boʻyicha sugʻurta puli va bitta transport vositasi uchun bir yilda bir marta olinadigan sugʻurta tariflari stavkalari miqdori ilovaga muvofiq tasdiqlansin.

3. Har yili sugʻurta mukofotlari toʻlash uchun quyidagi muddatlar belgilansin:

yuridik shaxslar uchun — 1-iyulgacha;

jismoniy shaxslar uchun — 1-sentabrgacha.

Sugʻurta mukofotlarini toʻlash uchun belgilangan muddat tamom boʻlgach, toʻlanmagan pul qarz deb hisoblansin va toʻlash muddati oʻtib ketgan har bir kun uchun qarzning 0,1 foizi miqdorida jarima (penya) hisoblangan holda undirib olinsin.

4. Sugʻurtaning ushbu turi boʻyicha sugʻurta mukofotlari toʻlanishi ustidan nazorat qilish Yoʻl harakati xavfsizligi davlat xizmati, Davlat qishloq xoʻjaligi texnik nazorati organlariga, shuningdek qonun hujjatlariga muvofiq sugʻurtaning mazkur turini amalga oshiruvchi sugʻurtalovchilarga yuklansin.

5. Tushgan sugʻurta mukofotlaridan fuqarolar halok boʻlishining va ularning mol-mulki nobud boʻlishining oldini olish tadbirkorlariga ajratmalar summasi 5 foiz miqdorida belgilansin.

6. Oʻzbekiston Respublikasi Moliya vazirligi bir oy muddatda transport vositalari egalari fuqarolik javobgarligining majburiy sugʻurtasini amalga oshirish toʻgʻrisidagi yoʻriqnomani hamda fuqarolar halok boʻlishining va ularning mol-mulkini nobud boʻlishining oldini olish tadbirlarini ishlab chiqsin va tasdiqlasin.

7. Mazkur qarorning bajarilishini nazorat qilish Bosh vazirning oʻrinbosari B. S. Hamidov zimmasiga yuklansin.

Oʻzbekiston Respublikasining Bosh vaziri A. MUTALOV

Toshkent sh.,

1994-yil 30-dekabr,

632-son

Vazirlar Mahkamasining 1994-yil 30-dekabrdagi 632-son qaroriga ILOVA

Transport vositalari egalarining fuqarolik javobgarligini majburiy sugʻurta qilish boʻyicha transport vositasi birligidan bir yilda bir marta undiriladigan sugʻurta summasi hajmidan sugʻurta mukofotlari tariflari miqdorlari

Yuridik va jismoniy shaxslarga yetkazilgan zararni undirish uchun sugʻurta summalarining cheklangan miqdorlari:

mol-mulkka yetkazilgan zararni qoplash uchun (har bir zarar yetkazilishi holati boʻyicha) — Oʻzbekiston Respublikasida belgilangan eng kam oylik ish haqining 20 baravari miqdorida;

oʻlimga olib kelgan zararni qoplash uchun (har bir jabrlangan boʻyicha) — eng kam oylik ish haqining 30 baravari miqdorida.