Xiva shahrida Markaziy Osiyo davlatlarining ikkinchi parlamentlararo forumini oʻtkazish toʻgʻrisida (4772-IV-son)
23.08.2024
Oʻzbekiston Respublikasi Oliy Majlisi Qonunchilik palatasi Kengashining Oʻzbekicton Respublikasi Oliy Majlisi Senati Kengashining
qarori
Markaziy Osiyo mamlakatlari oʻrtasidagi parlamentlararo aloqalarni yanada rivojlantirish, mintaqani ijtimoiy-iqtisodiy rivojlantirishda parlamentlararo komissiyalar, doʻstlik guruhlari, davlat hokimiyati vakillik organlari, yoshlar parlamentlari hamda xotin-qizlarning ishtirokini kengaytirish maqsadida Oʻzbekiston Respublikasi Oliy Majlisi Qonunchilik palatasining Kengashi va Oʻzbekiston Respublikasi Oliy Majlisi Senatining Kengashi qaror qiladilar:
1. 2024-yilning 12-13-sentabr kunlari Xiva shahridagi “Farovon” mehmonxonasida Markaziy Osiyo davlatlarining ikkinchi parlamentlararo forumi oʻtkazilsin.
2. Quyidagilar:
Markaziy Osiyo davlatlarining ikkinchi parlamentlararo forumini oʻtkazish boʻyicha tashkiliy qoʻmita (bundan buyon matnda Tashkiliy qoʻmita deb yuritiladi) tarkibi 1-ilovaga*;
Markaziy Osiyo davlatlarining ikkinchi parlamentlararo forumini oʻtkazish boʻyicha chora-tadbirlar dasturi 2-ilovaga*;
Markaziy Osiyo davlatlarining ikkinchi parlamentlararo forumini yoritish boʻyicha media-reja 3-ilovaga*;
Markaziy Osiyo davlatlarining ikkinchi parlamentlararo forumi konsepsiyasi 4-ilovaga*;
Markaziy Osiyo davlatlarining ikkinchi parlamentlararo forumining dasturi loyihasi 5-ilovaga* muvofiq tasdiqlansin.
3. Ushbu Qarorning 2* va 3-ilovalarida* belgilangan vazifalarning oʻz vaqtida bajarilishini muvofiqlashtirib borish Oʻzbekiston Respublikasi Oliy Majlisi Senatining Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qoʻmitasi hamda Qonunchilik palatasining Xalqaro ishlar va parlamentlararo aloqalar qoʻmitasiga, shuningdek, Oliy Majlis palatalari devonlari Axborot xizmatlariga yuklatilsin.
4. Tashkiliy qoʻmita:
ushbu Qarorning 2-ilovasi* bilan tasdiqlangan Markaziy Osiyo davlatlarining ikkinchi parlamentlararo forumini oʻtkazish boʻyicha chora-tadbirlar dasturida belgilangan vazifalarning oʻz vaqtida amalga oshirilishini taʼminlasin;
* 1 — 5-ilovalar berilmaydi.
Markaziy Osiyo davlatlarining ikkinchi parlamentlararo forumi (bundan buyon matnda Forum deb yuritiladi) ishtirokchilarining kelib-ketishi, transport bilan taʼminlanishi va ularga tibbiy xizmatlar koʻrsatish masalalarini muvofiqlashtirsin;
Forum oʻtkaziladigan joylarning texnika va telekommunikatsiyalar bilan jihozlanishini, obodonlashtirish va yoʻl taʼmirlash ishlari olib borilishini tashkil etish, shuningdek Toshkent va Xiva shaharlarida zarur mehmonxonalarning tayyor boʻlishi va band qilinishini taʼminlasin;
Forumni oʻtkazish bilan bogʻliq axborot-tahliliy va boshqa hujjatlarning oʻz vaqtida hamda sifatli tayyorlanishini taʼminlasin.
5. “Uzbekistan airways”, “Uzbekistan airports” va “Oʻzbekiston temir yoʻllari” aksiyadorlik jamiyatlari tegishincha Islom Karimov nomidagi “Toshkent” va Urganch xalqaro aeroportlarini, Toshkent va Xorazm temir yoʻl vokzallarini, ulardagi VIP zallarini Forum ishtirokchilarini kutib olish, kuzatish va ularga xizmat koʻrsatish uchun tayyorlash choralarini koʻrsin hamda VIP zallaridan yigʻim va bojlar, shuningdek, zal xizmati uchun toʻlovlar undirilmay foydalanilishini taʼminlasin.
6. Oʻzbekiston Respublikasi Ichki ishlar vazirligi, Oʻzbekiston Respublikasi Milliy gvardiyasi Toshkent, Urganch va Xiva shaharlarida, tadbir oʻtkaziladigan joylarda Forum ishtirokchilari xavfsizligini, shuningdek ular uchun ajratilgan avtobuslarning harakatlanishi xavfsizligini taʼminlasin.
7. Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi huzuridagi Turizm qoʻmitasi:
ikki hafta muddatda Markaziy Osiyo davlatlari delegatsiyalari aʼzolari uchun mamlakatimizning boy turistik salohiyatini, xususan, uning tarixi va madaniy merosini aks ettiruvchi tarqatma materiallarni tayyorlash va tarqatish choralarini koʻrsin;
Oʻzbekiston Respublikasi Madaniyat vazirligi, Oʻzbekiston Respublikasi Vazirlar Mahkamasi huzuridagi Din ishlari boʻyicha qoʻmita hamda Xorazm viloyati hokimligi bilan birgalikda anjuman ishtirokchilarini barcha tarixiy-madaniy meros obyektlariga kirish chiptalari bilan bepul taʼminlasin, tashrif mobaynida foto va videolavhalarni suratga olish imkoniyatini yaratsin.
8. Oʻzbekiston Respublikasi Madaniyat vazirligi:
Forumining ochilish marosimida, tanaffus va tushlik, shuningdek, Oʻzbekiston Respublikasi Oliy Majlisi Senati nomidan Forum ishtirokchilari uchun tashkil etiladigan rasmiy kechki qabul davomida konsert dasturi taqdimotini tashkil etish;
Xiva shahridagi Ichan qalʼa majmuasiga Markaziy Osiyo davlatlari delegatsiyalari aʼzolarining tashrifi doirasida Xiva tarixi va uning fan rivojiga qoʻshgan hissasi, shuningdek, hududning boy madaniyati va sanʼati haqidagi hikoyalar taqdim etish choralarini koʻrsin.
9. Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi hamda Oʻzbekiston Respublikasi Raqamli texnologiyalar vazirligiga Oʻzbekiston Respublikasi Oliy Majlisi Senati devonining Axborot xizmati bilan birgalikda 2024-yil 1-sentabrga qadar Forumini keng yoritish boʻyicha davlat organlarining axborot xizmatlari rahbarlari, faol jurnalist va blogerlardan iborat Matbuot-shtabini tashkil etish tavsiya etilsin.
10. Matbuot-shtabining asosiy vazifasi etib quyidagilar belgilansin:
Forumdan oldi, Forum vaqti va undan keyingi jarayonlarni keng yoritib borish choralarini koʻrish;
Forumning mazmun-mohiyati va ahamiyatini milliy va xorijiy ommaviy axborot vositalari va Internet jahon axborot tarmogʻida oʻzbek va xorijiy tillarda keng yoritish maqsadida forum boʻlib oʻtadigan joyda Matbuot markazini tashkil etish;
Forumning ochilishi marosimini ommaviy axborot vositalari orqali jonli namoyish etish va ish jarayonini yoritib borishni tashkil etish;
Forum ishtirokchilari, jumladan, Markaziy Osiyo davlatlari delegatsiyalari aʼzolari bilan intervyular, maxsus reportajlar, brifing, press-klub koʻrsatuvlarini tashkil etish;
Markaziy Osiyo mamlakatlari oʻrtasidagi parlamentlararo aloqalar, mintaqani ijtimoiy-iqtisodiy rivojlantirishda parlamentlararo komissiyalar, doʻstlik guruhlari, davlat hokimiyati vakillik organlari, yoshlar parlamentlari hamda xotin-qizlarning ishtirokini kengaytirish borasida amalga oshirilayotgan islohotlar toʻgʻrisida xolis va toʻliq maʼlumotlarning keng jamoatchilikka tezkor yetkazilishini taʼminlash.
11. Oʻzbekiston milliy teleradiokompaniyasi va Oʻzbekiston milliy media assotsiatsiyasi Oliy Majlis palatalari devonlarining Axborot xizmatlari bilan birgalikda 2024-yil 1-sentabrga qadar Markaziy Osiyo mamlakatlari oʻrtasidagi parlamentlararo aloqalarni, jumladan mintaqani ijtimoiy-iqtisodiy rivojlantirishda parlamentlararo komissiyalar, doʻstlik guruhlari, davlat hokimiyati vakillik organlari, yoshlar parlamentlari hamda xotin-qizlarning ishtirokini aks ettiruvchi 2-3 daqiqali videorolikni tayyorlasin.
12. Oʻzbekiston Respublikasi Oliy Majlisi Senatining Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qoʻmitasi hamda Qonunchilik palatasining Xalqaro ishlar va parlamentlararo aloqalar qoʻmitasi 2024-yil 5-sentabrga qadar Forum yakuni boʻyicha qabul qilinadigan Xiva kommyunikesi loyihasini ishlab chiqib, Markaziy Osiyo davlatlari parlamentlari bilan kelishsin.
13. Oʻzbekiston Respublikasi Oliy Majlisi Senati binolaridan foydalanish va xoʻjalik faoliyati boshqarmasi 2024-yil 30-avgustga qadar Forumining xarajatlar smetasini ishlab chiqsin va belgilangan tartibda Oʻzbekiston Respublikasi Vazirlar Mahkamasiga kiritsin.
14. Mazkur Qoʻshma qarorning ijrosini nazorat qilish Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev hamda Oʻzbekiston Respublikasi Oliy Majlisi Qonunchilik palatasin Spikerining birinchi oʻrinbosari A. Saidov zimmasiga yuklatilsin.
15. Ushbu Qoʻshma qaror qabul qilingan kundan eʼtiboran kuchga kiradi.
Oʻzbekiston Respublikasi Oliy Majlisi Qonunchilik palatasining Spikeri N. ISMOILOV
Toshkent sh.,
2024-yil 23-avgust,
4772-IV-son
Oʻzbekiston Respublikasi Oliy Majlisi Senatining Raisi T. NARBAYEVA
Toshkent sh.,
2024-yil 23-avgust,
KQ-805-IV-son