Oʻzbekiston Respublikasida tibbiy va sogʻlomlashtirish turizmini yanada rivojlantirish boʻyicha qoʻshimcha chora-tadbirlar toʻgʻrisida (PQ-335-son)

23.09.2024

Oʻzbekiston Respublikasi Prezidentining

qarori

Mamlakatimizda tibbiy va sogʻlomlashtirish turizmi imkoniyatlaridan toʻliq hamda samarali foydalanish, tibbiy turizm klasterlari va mehmonxona tipidagi zamonaviy sanatoriylar faoliyatini yoʻlga qoʻyish, ushbu faoliyat turlari bilan shugʻullanayotgan tadbirkorlik subyektlarini qoʻshimcha qoʻllab-quvvatlash tizimini yaratish, shuningdek, Oʻzbekiston Respublikasi Prezidentining 2024-yil 12-yanvardagi “Respublikaga xorijiy turistlar oqimini keskin oshirish hamda ichki turizmni yanada jadallashtirish chora-tadbirlari toʻgʻrisida”gi PF-9-son Farmoni ijrosini taʼminlash maqsadida:

1. Turizm qoʻmitasi, Sogʻliqni saqlash vazirligi, Iqtisodiyot va moliya vazirligi hamda Tashqi ishlar vazirligining:

“Tibbiy xizmatlar mehmondoʻstligi” (“Medical service hospitality”) dasturini amalga oshirish;

davlat va xususiy tibbiyot muassasalari hamda sanatoriy va pansionatlar tomonidan koʻrsatilayotgan xizmatlar sifatini monitoring qilish tizimini joriy qilish;

konsalting — diagnostika — davolash — turoperator — transport — tibbiy tarjimon xizmatlarini birgalikda koʻrsatadigan tibbiy turizm klasterlari faoliyatini yoʻlga qoʻyish va ularni ragʻbatlantirish mexanizmlarini joriy qilish;

“Avitsenna” nomi ostida Oʻzbekiston Respublikasining tibbiy va sogʻlomlashtirish turizmi brendini ishlab chiqish va uni doimiy ravishda targʻib qilib borish;

toifali (yulduzli) mehmonxonalar tipidagi sanatoriylar faoliyatini yoʻlga qoʻyish va ularni sertifikatlashtirish tizimini joriy qilish;

togʻli, shifobaxsh balchiq qatlamlari bor hamda shifobaxsh suvlar qatoriga kiritilgan va sanitariya-sogʻlomlashtirish ahamiyatiga molik suv (termal suv) obyektlari mavjud boʻlgan hududlarda sanatoriy-kurort zonalarini tashkil qilish;

2025-yil 1-aprelga qadar internet tarmogʻi orqali yashovchilarni hisobga olishning avtomatlashtirilgan maxsus elektron dasturi (E-mehmon)ga ulangan xususiy tibbiyot va sogʻlomlashtirish muassasalarini dastlabki olti oylik abonent toʻlovini toʻlashdan ozod qilish toʻgʻrisidagi takliflari maʼqullansin.

2. Quyidagilar:

Tibbiy va sogʻlomlashtirish turizmini yanada rivojlantirish chora-tadbirlari dasturi 1-ilovaga muvofiq;

Zamonaviy talablar asosida sanatoriy-kurort zonalarini tashkil qilish rejalashtirilgan tuman va shaharlar roʻyxati 2-ilovaga muvofiq;

2025-2026-yillarda Andijon, Namangan, Jizzax, Surxondaryo, Qashqadaryo, Fargʻona va Toshkent viloyatlarida zamonaviy talablar asosida sanatoriy-kurort zonalarini tashkil qilish boʻyicha chora-tadbirlar dasturlari 2a — 2j-ilovalarga muvofiq;

Tibbiyot va sogʻlomlashtirish muassasalarining shifokorlari tomonidan bepul tibbiy diagnostika xizmatlarini tashkil qilish bilan bogʻliq xarajatlari qoplab beriladigan xorijiy mamlakatlar roʻyxati (keyingi oʻrinlarda — xorijiy mamlakatlar) 3-ilovaga muvofiq;

2024 — 2027-yillarda tibbiy va sogʻlomlashtirish turizmini yanada rivojlantirish boʻyicha maqsadli koʻrsatkichlar 4-ilovaga muvofiq tasdiqlansin.

3. Andijon, Namangan, Jizzax, Surxondaryo, Qashqadaryo, Fargʻona va Toshkent viloyatlari hokimliklari Turizm qoʻmitasi hamda Investitsiyalar, sanoat va savdo vazirligi bilan birgalikda mazkur qarorning 2-ilovasida belgilangan sanatoriy-kurort zonalariga mahalliy va xorijiy investitsiyalarni jalb qilish choralarini koʻrsin.

4. Shunday tartib oʻrnatilsinki, unga muvofiq:

Xalqaro qoʻshma komissiyadan (Joint Commission International) akkreditatsiyadan oʻtgan dastlabki 30 ta xususiy tibbiyot muassasasining akkreditatsiyadan oʻtish xarajatlarining 50 foizi Sogʻliqni saqlash vazirligining budjetdan tashqari jamgʻarmalari mablagʻlari hisobidan qoplab beriladi. Bunda imtiyozdan foydalangan xususiy tibbiyot muassasasi bilan affillangan shaxslarga mazkur imtiyoz taqdim etilmaydi;

shifobaxsh suvlar qatoriga kiritilgan va sanitariya-sogʻlomlashtirish ahamiyatiga molik suv (termal suv) obyektlaridan tibbiyot muassasalari, sanatoriy va pansionatlar teng va umumiy tartibda foydalanadi.

5. Turizm qoʻmitasiga quyidagi qoʻshimcha vazifalar yuklatilsin:

Sogʻliqni saqlash vazirligi bilan birgalikda Oʻzbekiston Respublikasining chegara bojxona postlari hududida oʻz mablagʻlari hisobidan xorijiy fuqarolar uchun respublikadagi tibbiyot, sogʻlomlashtirish muassasalari imkoniyatlari toʻgʻrisida targʻibot kampaniyalarini tashkil qilish;

davlat tili va xorijiy tillarda tibbiyot hamda sogʻlomlashtirish muassasalarining yagona reyestrini shakllantirish va uni doimiy ravishda yangilab borish;

toifali (yulduzli) mehmonxonalar tipidagi sanatoriylarni sertifikatlashtirilishini tashkil qilish;

maxsus tibbiy va sogʻlomlashtirish turizmi yoʻnalishlari (marshrutlari)ni ishlab chiqish.

6. Turizm qoʻmitasi 2025-yil 1-martga qadar:

tibbiyot muassasalari, sanatoriylar va tibbiy turizm yoʻnalishida xizmat koʻrsatuvchi turoperatorlarning xizmatlari sifati baholab borilishini nazarda tutuvchi reytingni (keyingi oʻrinlarda — reyting) shakllantirish uchun elektron platforma;

davlat tili va xorijiy tillarda tibbiyot hamda sogʻlomlashtirish muassasalarining yagona reyestri (keyingi oʻrinlarda — Yagona reyestr) ishga tushirilishini taʼminlasin.

7. Belgilansinki:

a) 2025-yil 1-yanvardan boshlab:

2028-yil 1-yanvarga qadar Yagona reyestrga kiritilgan tibbiyot va sogʻlomlashtirish muassasalarining xalqaro turizm yarmarkalari va koʻrgazmalarda oʻz xizmatlari hamda mahsulotlari bilan ishtirok etish xarajatlari Sogʻliqni saqlash vazirligi huzuridagi Tibbiyotni rivojlantirish davlat maqsadli jamgʻarmasi mablagʻlari hisobidan qoplab beriladi;

2027-yil 1-yanvarga qadar tibbiyot va sogʻlomlashtirish muassasalarining shifokorlari tomonidan xorijiy mamlakatlarda bepul tibbiy diagnostika xizmatlarini tashkil qilish bilan bogʻliq transport va yashash xarajatlari Sogʻliqni saqlash vazirligining budjetdan tashqari jamgʻarmalari mablagʻlari va Turizmni qoʻllab-quvvatlash jamgʻarmasi mablagʻlari hisobidan teng ulushlarda qoplab beriladi;

b) xorijiy mamlakatlarda bepul tibbiy diagnostika xizmatlarini tashkil qiladigan tibbiyot va sogʻlomlashtirish muassasalarining shifokorlari roʻyxati Yagona reyestrga kiritilgan muassasalar orasidan Sogʻliqni saqlash vazirligi va Turizm qoʻmitasi bilan birgalikda shakllantiriladi;

v) Yagona reyestrga kiritilgan tibbiyot va sogʻlomlashtirish muassasalari, reytingda 70 va undan yuqori ball olgan tibbiyot muassasalari, sanatoriy va turoperatorlar xizmatlari hamda mahsulotlarini xorijiy mamlakatlarda targʻib qilish uchun bosma va video mahsulotlarni tayyorlash Turizmni qoʻllab-quvvatlash jamgʻarmasi mablagʻlari hisobidan amalga oshiriladi;

g) elektron platforma hamda Yagona reyestr Turizm qoʻmitasi buyurtmasi asosida ishlab chiqiladi va Turizmni qoʻllab-quvvatlash jamgʻarmasi mablagʻlari hisobidan moliyalashtiriladi.

8. Turizm qoʻmitasi Oʻzbekiston Respublikasining tibbiy va sogʻlomlashtirish turizmi imkoniyatlarini targʻib qilish sohasidagi vakolatli organ etib belgilansin.

9. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bir oy muddatda boʻsh turgan davlat mulki obyektlari va sobiq tibbiyot muassasalarining ishlamayotgan binolari negizida tibbiyot klinikalari faoliyatini tashkil qilish maqsadida xatlov oʻtkazsin va Vazirlar Mahkamasiga taklif kiritsin.

10. Mazkur qarorning ijrosini samarali tashkil qilishga masʼul va shaxsiy javobgar etib Turizm qoʻmitasi raisi A.Oʻ. Aqqulov hamda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari belgilansin.

Qaror ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2024-yil 23-sentabr,

PQ-335-son

Oʻzbekiston Respublikasi Prezidentining 2024-yil 23-sentabrdagi PQ-335-son qaroriga 1-ILOVA

Tibbiy va sogʻlomlashtirish turizmini yanada rivojlantirish

CHORA-TADBIRLAR DASTURI

T/r Chora-tadbir nomi Amalga oshirish mexanizmlari Moliyalashtirish manbasi Amalga oshirish muddati Masʼul vazirlik va idoralar 1. Tibbiy turizm klasterlari faoliyatini yoʻlga qoʻyish va ularni ragʻbatlantirish mexanizmlarini joriy etish. Bunda: tibbiy turizm klasterlari tushunchasi va uning faoliyatining huquqiy asoslarini belgilash; tibbiy turizm klasterlari faoliyatini tashkil etish istagida boʻlgan investorlarga davlat tomonidan qoʻllab-quvvatlash tizimini yaratish nazarda tutiladi. 1. Normativ-huquqiy hujjat loyihasini ishlab chiqish. 2. Loyihani belgilangan tartibda Vazirlar Mahkamasiga kiritish. - 2025-yil mart Turizm qoʻmitasi, Sogʻliqni saqlash vazirligi, Iqtisodiyot va moliya vazirligi, manfaatdor vazirlik va idoralar 2. Togʻli, shifobaxsh balchiq qatlamlari bor hamda shifobaxsh suvlar qatoriga kiritilgan va sanitariya-sogʻlomlashtirish ahamiyatiga molik suv (termal suv) obyektlari mavjud boʻlgan hududlarda sanatoriy-kurort zonalarini tashkil qilish. 1. Normativ-huquqiy hujjat loyihasini ishlab chiqish. 2. Loyihani belgilangan tartibda Vazirlar Mahkamasiga kiritish. - 2025-yil fevral Turizm qoʻmitasi, Sogʻliqni saqlash vazirligi, Investitsiyalar, sanoat va savdo vazirligi, Togʻ-kon sanoati va geologiya vazirligi, Iqtisodiyot va moliya vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 3. “Avitsenna” nomi ostida Oʻzbekiston Respublikasining tibbiy va sogʻlomlashtirish turizmi brendini ishlab chiqish va uni doimiy ravishda targʻib qilib borish. 1. Oʻzbekiston marketing uyushmasi va xususiy marketing tashkilotlari, shu jumladan, xorijiy tashkilotlar bilan muzokaralar olib borish. Turizmni qoʻllab-quvvatlash jamgʻarmasi 2025-yil fevral Turizm qoʻmitasi, Sogʻliqni saqlash vazirligi 2. Marketing tashkilotlari bilan kelishuvga erishish. 2025-yil mart 3. Tibbiy va sogʻlomlashtirish turizmi brendini ishlab chiqish. 4. Marketing strategiyasini amalga oshirish va ijrosini taʼminlash. 2025-yil aprel 4. Xalqaro qoʻshma komissiya akkreditatsiyasidan oʻtgan tibbiyot muassasalari akkreditatsiyadan oʻtish xarajatlarining 50 foizini qoplab berish tartibini ishlab chiqish. 1. Normativ-huquqiy hujjat loyihasini ishlab chiqish. 2. Loyihani belgilangan tartibda Vazirlar Mahkamasiga kiritish. - 2025-yil fevral Sogʻliqni saqlash vazirligi, Turizm qoʻmitasi 5. Davlat tili va xorijiy tillarda tibbiyot hamda sogʻlomlashtirish muassasalarining yagona reyestriga kiritilgan tibbiyot va sogʻlomlashtirish muassasalarining xalqaro turizm yarmarkalari va koʻrgazmalarda oʻz xizmatlari hamda mahsulotlari bilan ishtirok etish xarajatlarini qoplab berish tartibini ishlab chiqish. 1. Normativ-huquqiy hujjat loyihasini ishlab chiqish. 2. Loyihani belgilangan tartibda Vazirlar Mahkamasiga kiritish. - 2024-yil dekabr Sogʻliqni saqlash vazirligi, Turizm qoʻmitasi 6. Tibbiyot muassasalarining shifokorlari tomonidan xorijiy mamlakatlarda tibbiy diagnostika xizmatlarini tashkil qilish bilan bogʻliq transport va yashash xarajatlarini qoplab berish tartibini ishlab chiqish. 1. Normativ-huquqiy hujjat loyihasini ishlab chiqish. 2. Loyihani belgilangan tartibda Vazirlar Mahkamasiga kiritish. - 2024-yil dekabr Sogʻliqni saqlash vazirligi, Turizm qoʻmitasi 7. Xorijiy fuqarolarni (bemorlarni) roʻyxatga olishda qulaylik yaratish maqsadida davlat va xususiy tibbiyot muassasalarini internet tarmogʻi orqali hisobga olishning avtomatlashtirilgan maxsus elektron dasturi (“E-mehmon”)ga ulash choralarini koʻrish. Amaliy chora-tadbirlar. Tashabbuskorlar mablagʻlari 2024-2025-yillar davomida Sogʻliqni saqlash vazirligi, Turizm qoʻmitasi 8. Oʻzbekiston Respublikasi chegara bojxona postlari hududida xorijiy fuqarolarga respublikadagi tibbiyot muassasalari imkoniyatlari toʻgʻrisida maʼlumot beruvchi jurnal va tarqatma materiallarni joylashtirish. Amaliy chora-tadbirlar. Turizmni qoʻllab-quvvatlash jamgʻarmasi, Tibbiyot muassasalarining budjetdan tashqari mablagʻlaridan teng ulushda 2024 — 2026-yillar davomida Turizm qoʻmitasi, Sogʻliqni saqlash vazirligi, Bojxona qoʻmitasi 9. Mamlakatning tibbiy turizm salohiyati va respublikadagi yirik davlat va xususiy tibbiyot muassasalarining mavjud imkoniyatlari va ular tomonidan koʻrsatilayotgan tibbiy xizmatlarni xorijiy davlatlarda keng targʻibot qilish choralarini koʻrish. Amaliy chora-tadbirlar. Turizmni qoʻllab-quvvatlash jamgʻarmasi 2024 — 2026-yillar davomida Turizm qoʻmitasi, Sogʻliqni saqlash vazirligi 10. Respublikaning yirik tibbiyot muassasalari faoliyati va koʻrsatilayotgan tibbiy xizmatlar bilan turoperatorlarni yaqindan tanishtirish maqsadida infoturlar tashkil qilish. Amaliy chora-tadbirlar. Turizmni qoʻllab-quvvatlash jamgʻarmasi 2024-2025-yillar davomida Turizm qoʻmitasi, Sogʻliqni saqlash vazirligi 11. Tibbiy turizm salohiyati yuqori boʻlgan davlatlarning (Hindiston, Turkiya, Germaniya, Isroil) yetakchi tibbiyot muassasalari filiallarini Oʻzbekistonda ochish choralarini koʻrish. Amaliy chora-tadbirlar. Tashabbuskorlar mablagʻlari 2024-2025-yillar davomida Investitsiyalar, sanoat va savdo vazirligi, Sogʻliqni saqlash vazirligi 12. Tibbiyot sohasidagi ekspertlar va turoperatorlar ishtirokida tibbiy turizmni rivojlantirish va sohadagi kamchiliklarni bartaraf etish yuzasidan vebinar va uchrashuvlar tashkil qilib borish. Amaliy chora-tadbirlar. Tibbiyot muassasalarining budjetdan tashqari mablagʻlari 2025-yil yanvardan boshlab har 6 oyda Turizm qoʻmitasi, Sogʻliqni saqlash vazirligi 13. Yetakchi tibbiyot muassasalarida tibbiy xizmatlar sifatini oshirishga qaratilgan kurslar, seminarlar va treninglarni (jumladan, xorijiy mutaxassislarni taklif etgan holda) tashkil etish hamda respublikada faoliyat yuritayotgan davlat va nodavlat tibbiyot muassasalarida ingliz va rus tillari oʻquv dasturlarini joriy etish. 1. Tibbiy xizmatlar sifatini oshirishga qaratilgan kurslar, seminarlar va treninglar dasturini ishlab chiqish va tasdiqlash. 2. Ishlab chiqilgan dastur asosida kurslar, seminarlar va treninglarni tashkil qilish. 3. Har chorakda Vazirlar Mahkamasiga amalga oshirilgan ishlar toʻgʻrisida axborot taqdim etish. Tibbiyot muassasalarining budjetdan tashqari mablagʻlari 2025-yil yanvardan boshlab doimiy ravishda Sogʻliqni saqlash vazirligi, Turizm qoʻmitasi, Oliy taʼlim, fan va innovatsiyalar vazirligi 14. Tibbiy turizm sohasidagi yirik xalqaro tadbirlarda (seminar, konferensiya, koʻrgazma, yarmarka va boshqalar) ishtirok etish. Amaliy chora-tadbirlar. Turizmni qoʻllab-quvvatlash jamgʻarmasi 2024-yil dekabrdan boshlab doimiy ravishda Turizm qoʻmitasi, Sogʻliqni saqlash vazirligi 15. “Ipak yoʻlida turizm” Toshkent xalqaro turizm yarmarkasida har yili tibbiy turizm koʻrgazmali pavilyonini tashkil qilish. Amaliy chora-tadbirlar. Tashabbuskor mablagʻlari 2024-yil dekabrdan boshlab har yili Turizm qoʻmitasi, Sogʻliqni saqlash vazirligi 16. Oʻzbekistondagi yetakchi davlat va nodavlat tibbiyot muassasalarini nufuzli xalqaro tashkilotlarda akkreditatsiyadan oʻtkazish chorasini koʻrish. 1. Tegishli xalqaro tashkilotlar bilan muzokaralar olib borish. 2. Akkreditatsiyadan oʻtish mexanizm va talablarini oʻrganib chiqish. 3. Davlat va nodavlat tibbiyot muassasalarini nufuzli xalqaro tashkilotlarda akkreditatsiyadan oʻtkazish yuzasidan treninglar oʻtkazish va ularga qoʻllanmalar taqdim etish orqali akkreditatsiyadan oʻtkazish choralarini koʻrish. Tibbiyot muassasalarining budjetdan tashqari mablagʻlari 2024-yil dekabrdan boshlab doimiy ravishda Sogʻliqni saqlash vazirligi, Turizm qoʻmitasi, Oʻzbekiston kasaba uyushmalari federatsiyasi 17. Xorijiy fuqarolarga (bemorlarga) qulaylik yaratish maqsadida xususiy tibbiyot muassasalarida shifokorlar qabuliga yozilish (elektron navbat) tizimini joriy qilish yuzasidan targʻibot ishlarini tashkil qilish. Amaliy chora-tadbirlar. Tadbirkorlik subyektlari mablagʻlari 2024-yil noyabrdan boshlab doimiy ravishda Sogʻliqni saqlash vazirligi, Oʻzbekiston kasaba uyushmalari federatsiyasi, Turizm qoʻmitasi 18. Tibbiyot yoʻnalishida tahsil olayotgan talabalarning xorijdagi nufuzli yirik tibbiyot muassasalarida amaliyot oʻtash tizimini joriy etish. Bunda 3 oydan 1 yilgacha boʻlgan muddatda amaliyot oʻtash dasturini ishlab chiqish va xorijdagi yirik nufuzli tibbiyot muassasalari bilan hamkorlik memorandumini imzolash hamda amaliyot davrida talabalarga stipendiya va grantlar ajratish choralarini koʻrish. 1. Xalqaro nufuzli yirik tibbiyot muassasalari bilan muzokaralar olib borish. 2. Tibbiyot muassasalari bilan hamkorlikda 3 oydan 1 yilgacha boʻlgan muddatda amaliyot oʻtash dasturini tasdiqlash. 3. Amaliyot dasturida talabalarning yashash joyi, ularga stipendiya va grantlar ajratish choralarini koʻrish. 4. Amalga oshirilgan ishlar yuzasidan har chorakda Vazirlar Mahkamasiga maʼlumot kiritib borish. Tibbiyot muassasalarining budjetdan tashqari mablagʻlari 2025-yil yanvardan boshlab doimiy ravishda Sogʻliqni saqlash vazirligi, Oliy taʼlim, fan va innovatsiyalar vazirligi 19. Zamonaviy tibbiy texnika vositalarini ishlab chiqaruvchi xorijiy yirik tashkilotlar bilan ushbu yoʻnalishda kadrlar malakasini oshirish boʻyicha hamkorlikni yoʻlga qoʻyish. 1. Xorijiy tibbiy texnika vositalarini ishlab chiqaruvchi tashkilotlar bilan hamkorlik oʻrnatish. 2. Kadrlar tayyorlash yuzasidan aniq reja va dasturni tasdiqlash. 3. Amalga oshiriladigan ishlarni hamkorlikda tashkil etish. Tibbiyot muassasalarining budjetdan tashqari mablagʻlari 2024-yil dekabrdan boshlab doimiy ravishda Sogʻliqni saqlash vazirligi 20. Xorijiy mamlakatlarda Oʻzbekistonning shifokorlari ishtirokida tibbiy diagnostika xizmatlarini tashkil qilish reja-grafigini ishlab chiqish va tasdiqlash. 1. Tibbiy muassasalar va shifokorlar roʻyxatini tuzish va tasdiqlash. Tibbiyot muassasalarining budjetdan tashqari mablagʻlari 2024-yil dekabr Sogʻliqni saqlash vazirligi, Oʻzbekiston kasaba uyushmalari federatsiyasi, Turizm qoʻmitasi 2. Roʻyxatdagi shifokorlar bilan xorijiy davlatlarda reja-grafikka asosan diagnostika xizmatlarini tashkil qilish chorasini koʻrish. 2025-yil yanvar 3. Xorijiy davlatlarda oʻtkaziladigan diagnostika natijalaridan kelib chiqqan holda mazkur davlatlardagi bemorlarni Oʻzbekistonda davolash boʻyicha tibbiy yoʻllanmalar berish. 4. Amalga oshirilgan ishlar toʻgʻrisida har chorakda Turizm qoʻmitasiga axborot kiritish. 2025-yil martdan boshlab doimiy ravishda 21. Tibbiy turizm sohasida xizmat koʻrsatuvchi yirik tibbiyot muassasalarida xorijiy fuqarolarni qabul qilish bilan shugʻullanadigan maxsus boʻlinmalar faoliyatini tashkillashtirish. Bunda kutib olish va kuzatish transferi, tarjimon, VIP-shifoxona, kuzatuvchi uchun qoʻshimcha oʻrin, milliy va/yoki diniy anʼanalarni inobatga olgan holda buyurtma asosida taom, davolanish davomida uyali aloqa, internet, bemor vataniga qaytib borganidan keyin davolovchi shifokor bilan interaktiv aloqani saqlab turish kabi jihatlarni qatʼiy inobatga olish. 1. Yirik tibbiyot muassasalarida soha ekspertlari ishtirokida chet el fuqarolariga kompleks servis xizmat koʻrsatish yuzasidan treninglar oʻtkazish. Tashabbuskorlar mablagʻlari 2024-yil dekabr Sogʻliqni saqlash vazirligi, Oʻzbekiston kasaba uyushmalari federatsiyasi, Turizm qoʻmitasi 2. Tibbiyot muassasalarida kompleks servis xizmat tashkil qilish yuzasidan sharoitlar yaratish. 2024-yil dekabr 3. Yirik tibbiyot muassasalarida chet el fuqarolariga kompleks servis xizmatlarini joriy etish. 2025-yil yanvar oyidan boshlab doimiy ravishda 22. Respublikadagi yirik davlat sanatoriylari va tibbiyot muassasalarida onlayn ravishda xonalarni band qilish tizimini bosqichma-bosqich joriy etish. 1. Yirik sanatoriylar va tibbiyot muassasalarining veb sahifalarida onlayn ravishda xonalarni band qilish tizimini ishlab chiqish. 2. Bosqichma-bosqich mazkur tizimni oʻzbek, rus va ingliz tillarida joriy etish. Tashabbuskorlar mablagʻlari 2024-2025-yillar Sogʻliqni saqlash vazirligi, Oʻzbekiston kasaba uyushmalari Federatsiyasi 23. Sanatoriylarda yil davomida tashkillashtiriladigan madaniy-koʻngilochar tadbirlar taqvim rejasini ishlab chiqish. Amaliy chora-tadbirlar. - 2024-2025-yillar Oʻzbekiston kasaba uyushmalari federatsiyasi, Turizm qoʻmitasi 24. Sanatoriylarda bosqichma-bosqich ochiq va yopiq suzish havzalari, sauna, fitnes sport maydonlari (basketbol, tennis va voleybol) va bolalar maydonchalarini tashkil qilish. Amaliy chora-tadbirlar. Ijrochilar mablagʻlari 2024 — 2026-yillar Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari 25. Sanatoriylarga mehmonxonalar kabi toifa (yulduz) berish (sertifikatlashtirish) tizimini joriy qilish. Bunda sanatoriylarda davolash va sogʻlomlashtirish xizmatlari bilan birgalikda mehmonxonalar tomonidan taqdim etiladigan xizmatlar mavjud boʻlishi nazarda tutiladi. 1. Xorijiy va xalqaro standartlarni oʻrganib chiqish. 2. Milliy standartlarga tegishli oʻzgartirish va qoʻshimchalar kiritish. 3. Standartni belgilangan tartibda tasdiqlash. - 2024-yil oktabr Oʻzbekiston texnik jihatdan tartibga solish agentligi, Turizm qoʻmitasi

Oʻzbekiston Respublikasi Prezidentining 2024-yil 23-sentabrdagi PQ-335-son qaroriga 2-ILOVA

Zamonaviy talablar asosida sanatoriy-kurort zonalarini tashkil qilish rejalashtirilgan tuman va shaharlar

ROʻYXATI

T/r T/r Viloyatlar Tuman (shahar)lar nomi 1. 1. Andijon viloyati Xonobod shahri 2. 2. Namangan viloyati Chortoq tumani 3. Kosonsoy tumani 4. Toʻraqoʻrgʻon tumani 3. 5. Jizzax viloyati Baxmal tumani 6. Zomin tumani 7. Surxondaryo viloyati Boysun tumani 8. Oltinsoy tumani 4. 9. Qashqadaryo viloyati Qarshi shahri 10. Kitob tumani 11. Shahrisabz tumani 5. 12. Fargʻona viloyati Fargʻona tumani 13. Oltiariq tumani 6. 14. Toshkent viloyati Zangiota tumani 15. Toshkent tumani

Oʻzbekiston Respublikasi Prezidentining 2024-yil 23-sentabrdagi PQ-335-son qaroriga 2a-ILOVA

2025-2026-yillarda Andijon viloyati Xonobod shahrida zamonaviy talablar asosida sanatoriy-kurort zonalarini tashkil qilish boʻyicha

CHORA-TADBIRLAR DASTURI

Oʻzbekiston Respublikasi Prezidentining 2024-yil 23-sentabrdagi PQ-335-son qaroriga 2b-ILOVA

2025-2026-yillarda Namangan viloyatining Chortoq, Kosonsoy va Toʻraqoʻrgʻon tumanlarida zamonaviy talablar asosida sanatoriy-kurort zonalarini tashkil qilish boʻyicha

CHORA-TADBIRLAR DASTURI

Oʻzbekiston Respublikasi Prezidentining 2024-yil 23-sentabrdagi PQ-335-son qaroriga 2v-ILOVA

2025-2026-yillarda Jizzax viloyati Baxmal va Zomin tumanlarida zamonaviy talablar asosida sanatoriy-kurort zonalarini tashkil qilish boʻyicha

CHORA-TADBIRLAR DASTURI

Oʻzbekiston Respublikasi Prezidentining 2024-yil 23-sentabrdagi PQ-335-son qaroriga 2g-ILOVA

2025-2026-yillarda Surxondaryo viloyati Boysun va Oltinsoy tumanlarida zamonaviy talablar asosida sanatoriy-kurort zonalarini tashkil qilish boʻyicha

CHORA-TADBIRLAR DASTURI

Oʻzbekiston Respublikasi Prezidentining 2024-yil 23-sentabrdagi PQ-335-son qaroriga 2d-ILOVA

2025-2026-yillarda Qashqadaryo viloyatining Qarshi shahri, Kitob va Shahrisabz tumanlarida zamonaviy talablar asosida sanatoriy-kurort zonalarini tashkil qilish boʻyicha

CHORA-TADBIRLAR DASTURI

Oʻzbekiston Respublikasi Prezidentining 2024-yil 23-sentabrdagi PQ-335-son qaroriga 2e-ILOVA

2025-2026-yillarda Fargʻona viloyati Oltiariq va Fargʻona tumanlarida zamonaviy talablar asosida sanatoriy-kurort zonalarini tashkil qilish boʻyicha

CHORA-TADBIRLAR DASTURI

T/r Chora-tadbir nomi Amalga oshirish mexanizmlari Moliyalashtirish manbai Amalga oshirish muddati Masʼul vazirlik va idoralar 1. Fargʻona va Oltiariq tumanlarida zamonaviy talablar asosida sanatoriy-kurort zonalarini (keyingi oʻrinlarda — kurort zona) tashkil etish boʻyicha hududni belgilash. 1. Tumanlar imkoniyatlarini oʻrganish. 2. Oʻrganish natijasiga asosan kurort zona tashkil etiladigan imkoniyatlar yuqori boʻlgan hududni belgilash. 3. Tegishli tashkilotlar bilan belgilangan hududda sanatoriy-kurort zonasini tashkil qilish yuzasidan kelishish. - 2024-yil dekabr Fargʻona viloyat hokimligi, Oltiariq va Fargʻona tumanlari hokimliklari, manfaatdor vazirlik va idoralar 2. Kurort zonalar hududida tashkil qilinadigan xizmat koʻrsatish obyektlari loyihasi (master rejasi)ni ishlab chiqish. Amaliy chora-tadbirlar. Mahalliy budjet mablagʻlari va qonunchilik hujjatlari bilan taqiqlanmagan manbalar 2025-yil yanvar — may Fargʻona viloyat hokimligi, Qurilish va uy-joy kommunal xoʻjaligi vazirligi 3. Fargʻona va Oltiariq tumanlaridagi kurort zonalarga olib boradigan ichki yoʻllarni taʼmirlash. Infratuzilma va kommunikatsiya bilan bogʻliq masalalarni mahalliy hamda respublika darajasidagi dasturlarga kiritish. Respublika va mahalliy budjet mablagʻlari 2024-yildan boshlab doimiy (talab va zarurat asosida) Fargʻona viloyat hokimligi 4. Fargʻona va Oltiariq tumanlarida qoʻshimcha sanatoriylar tashkil etish. 1. Imkoniyatlar yuqori hududlarni aniqlash. 2. Yer maydoni toifasini oʻzgartirish boʻyicha oʻrnatilgan tartibda Hukumat komissiyasiga taklif kiritish. 3. Yer maydonlarini “E-auksion” platformasiga joylashtirish. - 2025-yil yanvar Fargʻona viloyat hokimligi 5. Viloyatdagi imkoniyati cheklangan aholi vakillari uchun sanatoriy-kurort va sihatgohlarida bepul tibbiy koʻrik tashkil etish. Amaliy-chora tadbirlar. Tashabbuskor mablagʻlari 2024-yil oktabrdan boshlab har chorakda Fargʻona viloyati hokimligi 6. Fargʻona tumanidagi Chimyon sanatoriyasida xizmat koʻrsatish quvvatini oshirish. Sanatoriyada hududida qurilishi davom etayotgan bino qurilishi yakuniga yetkazish hamda mavjud obyektlarni mukammal taʼmirlash. Kasaba uyushmasi mablagʻi hisobidan 2025-2026-yillar Fargʻona viloyati hokimligi 7. Fargʻona tumanida mavjud kurort zonalari mutaxassislari ishtirokida oʻrganish olib borish. 1. Sanatoriylar rahbar va boshqaruvchilari bilan uchrashuv tashkil etish. 2. Tegishli masalalarni mutasaddi tashkilotlar bilan hal qilish. - 2024-yil oktabrdan boshlab har chorakda Fargʻona viloyati hokimligi 8. Fargʻona va Oltiariq tumanlaridagi kurort zonalar va sihatgohlar salohiyatini xorijiy davlatlarda va respublika hududlarida targʻibotini olib borish. 1. Viloyatdagi sanatoriylar va sihatgohlar haqida targʻibot materiallarini tayyorlash. 2. Qirgʻiz Respublikasi Botken hamda Tojikiston Respublikasi Soʻgʻd viloyatlari hokimliklari bilan tibbiyot turizmini rivojlantirish boʻyicha qoʻshma loyihalar ishlab chiqish. 3. Sanatoriylar faoliyati va koʻrsatilayotgan xizmatlarni keng targʻib qilish uchun qoʻshni respublikalarning OAV va blogerlarini jalb qilish. Mahalliy budjet mablagʻlari 2024-yil oktabrdan boshlab doimiy Fargʻona viloyati hokimligi, Turizm qoʻmitasi 9. Namunali xizmat koʻrsatayotgan sihatgohlarni taqdirlab borish. Amaliy-chora tadbirlar. - 2024-yil oktabrdan boshlab doimiy Fargʻona viloyati hokimligi 10. “Ipak yoʻlida turizm” Toshkent xalqaro turizm yarmarkasida tibbiy turizm koʻrgazma pavilyonini tashkil qilish hamda viloyatdagi mavjud sanatoriy-kurort zonalari, sogʻlomlashtirish va tibbiy turizm tashkilotlari ishtirokini taʼminlash. Amaliy chora-tadbirlar. Mahalliy budjet mablagʻlari 2024-yildan boshlab har yili noyabr-dekabr Fargʻona viloyati hokimligi, Turizm qoʻmitasi 11. Sanatoriy, sanatoriy tipidagi mehmonxonalar va sogʻlomlashtirish markazlarida bosqichma-bosqich ochiq va yopiq suzish havzalari, sauna, fitnes sport maydonlari (basketbol, tennis va voleybol) va bolalar maydonchalarini tashkil qilish. Amaliy chora-tadbirlar. Mahalliy budjet va investorlar mablagʻlari 2025-2026-yillar davomida Fargʻona viloyati hokimligi, manfaatdor vazirlik va idoralar 12. Xorijiy hamda mahalliy mutaxassislarni jalb qilgan holda kurort zonalardagi sanatoriylar xodimlari malakasini oshirish. Amaliy chora tadbirlar. Mahalliy budjet mablagʻlari 2025-2026-yillar davomida Fargʻona viloyati hokimligi

Oʻzbekiston Respublikasi Prezidentining 2024-yil 23-sentabrdagi PQ-335-son qaroriga 2j-ILOVA

2025-2026-yillarda Toshkent viloyatining Zangiota va Toshkent tumanlarida zamonaviy talablar asosida sanatoriy-kurort zonalarini tashkil qilish boʻyicha

CHORA-TADBIRLAR DASTURI

Oʻzbekiston Respublikasi Prezidentining 2024-yil 23-sentabrdagi PQ-335-son qaroriga 3-ILOVA

Tibbiyot va sogʻlomlashtirish muassasalarining shifokorlari tomonidan bepul tibbiy diagnostika xizmatlarini tashkil qilish bilan bogʻliq xarajatlari qoplab beriladigan xorijiy mamlakatlar

ROʻYXATI

T/r Mamlakat nomi Tuman (shahar) nomi 1. Qozogʻiston Respublikasi Ostona shahri Turkiston shahri Olmaota shahri Chimkent shahri Qaragʻanda shahri 2. Qirgʻiz Respublikasi Bishkek shahri Oʻsh shahri Jalolobod shahri 3. Tojikiston Respublikasi Dushanbe shahri Panjikent tumani Xoʻjand shahri Boxtar shahri 4. Turkmaniston Respublikasi Ashxobod shahri Annau shahri Bolqonobod shahri Turkmanobod shahri

Oʻzbekiston Respublikasi Prezidentining 2024-yil 23-sentabrdagi PQ-335-son qaroriga 4-ILOVA

2024 — 2027-yillarda tibbiyot va sogʻlomlashtirish turizmini yanada rivojlantirish boʻyicha

MAQSADLI KOʻRSATKICHLAR