Viloyat tasarrufidagi shaharlarda joylashgan oʻzbekbirlashuv tizimidagi non pishirish korxonalarini “Oʻzdonmahsulot” davlat korporatsiyasi tarkibiga oʻtkazish toʻgʻrisida (601-son)

13.12.1994

Oʻzbekiston Respublikasi Vazirlar Mahkamasining

qarori

Aholini non va non-bulka mahsulotlari bilan taʼminlashni yaxshilash maqsadida Vazirlar Mahkamasi qaror qiladi:

1. Oʻzbekbirlashuv tizimidagi ayrim non pishirish korxonalarining 1995-yil 1-yanvardagi barcha aktivlari va passivlari bilan “Oʻzdonmahsulot” davlat korporatsiyasi tarkibiga ixtiyoriy ravishda kirish toʻgʻrisidagi taklifi 1-ilovaga* muvofiq qabul qilinsin.

* Ilova rus tilidagi matnda berilgan.

Oʻzbekbirlashuv Boshqaruvi koʻrsatib oʻtilgan non pishirish korxonalari aksiyalarining nazorat paketini, keyinchalik ularni boshqarish huquqini shartnoma asosida “Oʻzdonmahsulot” davlat korporatsiyasiga bergan holda, Oʻzbekiston Respublikasi Davlat mulki qoʻmitasiga sotish toʻgʻrisidagi masalani koʻrib chiqsin.

2. Oʻzbekiston Respublikasi Davlat mulki qoʻmitasi koʻrsatib oʻtilgan non pishirish korxonalari bilan tomonlarning oʻzaro majburiyatlari toʻgʻrisida shartnoma-bitimlarni tuzishda “Oʻzdonmahsulot” davlat korporatsiyasiga yordam bersin.

3. Non pishirish korxonalarini texnik qayta jihozlash, rekonstruksiya qilish va mukammal tuzatish boʻyicha tashkiliy-texnikaviy tadbirlar 2-ilovaga* muvofiq tasdiqlansin.

* 2-ilova rus tilidagi matnda berilgan.

4. “Oʻzistiqbolstat” davlat qoʻmitasi va Oʻzbekiston Respublikasi Moliya vazirligi 1995 va keyingi yillar uchun investitsiya dasturini shakllantirishda “Oʻzdonmahsulot” davlat korporatsiyasining non pishirish korxonalariga texnik qayta jihozlash, rekonstruksiya qilish va rivojlantirish boʻyicha takliflarini hisobga olsin.

5. Oʻzbekiston Respublikasi Davlat mulki qoʻmitasi xususiylashtirilgan korxonalari qoʻllab-quvvatlash va tadbirkorlikni rivojlantirish uchun yoʻnaltiriladigan mablagʻlarni 1995 va keyingi yillarda “Oʻzdonmahsulot” davlat korporatsiyasiga qarz sifatida belgilangan tartibda ajratishni nazarda tutsin.

6. “Oʻzmashsanoat”, “Oʻzeltexsanoat” uyushmalari va Chkalov nomidagi Toshkent aviatsiya ishlab chiqarish birlashmasi “Oʻzdonmahsulot” davlat korporatsiyasi buyurtmasiga koʻra non pishirish korxonalarini jihozlash uchun pech-rasstoyka agregatlari toʻlanmalari, xamir va suyuq xamirturush tayyorlash liniyalari, tarozi uskunalari va maxsus asbob-uskunalarni koʻplab ishlab chiqarishni tashkil etsinlar.

7. “Oʻzbekneftgaz” milliy korporatsiyasi yangi ishga tushirilayotgan non pishirish korxonalarini gaz bilan taʼminlashga va ishlab turgan non pishirish korxonalarining gazdan foydalanib ishlashga oʻtishiga ruxsat bersin.

8. “Oʻzavtotrans” davlat korporatsiyasi un yetkazib berishni uzluksiz taʼminlash, non va non-bulka mahsulotlarini tashish uchun “Oʻzdonmahsulot” davlat korporatsiyasiga shartnoma asosida qoʻshimcha maxsus avtotrans ajratsin.

9. Oʻzbekbirlashuv bir oy muddatda “Oʻzavtotrans” davlat korporatsiyasiga un va nonni tashishga ixtisoslashtirilgan avtotransportni shartnoma asosida bersin.

10. “Oʻzulgurjibirjasavdo” uyushmasi texnik qayta jihozlashni, rekonstruksiya qilishni amalga oshirish va ishlatish ehtiyojlari uchun “Oʻzdonmahsulot” davlat korporatsiyasiga 1995 va undan keyingi yillarda metall prokati va boshqa zarur moddiy-texnika resurslarini kontrakt asosida xarid qilishda yordam bersin.

11. “Oʻzdonmahsulot” davlat korporatsiyasi ijro etuvchi apparati xodimlarining soni 3 nafarga koʻpaytirilsin va 185 nafar miqdorida (xizmat koʻrsatuvchi xodimlardan tashqari) belgilansin.

12. Qoraqalpogʻiston Respublikasi Vazirlar Kengashi, viloyatlar hokimliklari viloyat tasarrufidagi shaharlar aholisini non va non-bulka mahsulotlari bilan uzluksiz taʼminlash maqsadida non pishirish korxonalariga moddiy-texnik yordam va koʻmak bersinlar.

13. Mazkur qarorning bajarilishini nazorat qilish Oʻzbekiston Respublikasining Bosh vaziri A.Mutalov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1994-yil 13-dekabr,

601-son