Pul muomalasini mustahkamlash va “Soʻm-kupon”ning xarid quvvatini oshirish borasida kechiktirib boʻlmaydigan chora-tadbirlar toʻfrisida (195-son)

11.04.1994

Oʻzbekiston Respublikasi Vazirlar Mahkamasining

qarori

Pulning barqaror muomalada boʻlishi, “Soʻm-kupon”ning xarid quvvatini oshirish hamda Markaziy bankning oltin-valyuta zaxirasini yaratish uchun zarur shart-sharoitlarni vujudga keltirish maqsadida Vazirlar Mahkamasi qaror qiladi:

1. Shu yilning 15-aprelidan boshlab Oʻzbekiston Respublikasining butun hududida Rossiya Banki pullarining muomalada boʻlishi hamda ularning yuridik va jismoniy shaxslar tomonidan barcha toʻlov turlariga qabul qilinishi taqiqlansin.

2. Oʻzbekiston Respublikasi Moliya vazirligi, Davlat soliq qoʻmitasi manfaatdor idoralar va tashkilotlar bilan birgalikda bir hafta muddatda 1-bandga muvofiq savdo-sotiq va xizmatlar koʻrsatish, shuningdek, soliq solishni takomillashtirish tartibi toʻgʻrisida takliflar kiritsinlar.

3. Belgilab qoʻyilsinki, yuridik va jismoniy shaxslar tomonidan Oʻzbekiston Respublikasiga keltirilgan tovarlar boʻyicha ular sotib olingan mablagʻlarning manbalari deklaratsiyada koʻrsatilmaydi.

4. “Oʻzistiqbolstat” davlat qoʻmitasi Oʻzbekiston Respublikasi Moliya vazirligi, Tashqi iqtisodiy aloqalar vazirligi, “Oʻzulgurjibirjasavdo”, “Oʻzbeksavdo” uyushmasi bilan birgalikda tovarlarning taqdim etiladigan roʻyxati asosida tegishli valyutalarning nisbatlarini muntazam va xolisona aniqlash uchun ichki, Rossiya hamda oʻrta Yevropa bozorlaridagi narxlarni hisobga oluvchi avtomatlashtirilgan tizimni vujudga keltirsin.

5. Oʻzbekiston Respublikasi Moliya vazirligi, Markaziy banki, Davlat soliq qoʻmitasi bir oy muddatda korxonalarning xorijiy valyutalar, jumladan, sobiq SSSR respublikalarining milliy valyutalari bilan operatsiyalari boʻyicha buxgalteriya hisob-kitobi hamda hisoboti Tartibini ishlab chiqsinlar va tasdiqlasinlar.

6. Oʻzbekiston Respublikasi Markaziy bankiga:

shu yil 15-apreldan boshlab doimiy ishlaydigan Oʻzbekiston respublika valyuta birjasining faoliyat koʻrsatishini taʼminlash;

vakolatli banklar, Ichki ishlar vazirligi, Aloqa vazirligi, “Oʻzbekiston havo yoʻllari” milliy aviakompaniyasi, Oʻrta Osiyo temir yoʻl boshqarmasi, “Oʻzbekturizm” milliy kompaniyasi hamda boshqa idoralar bilan birgalikda aholiga valyutani almashtirib beradigan joylar tarmogʻini tashkil qilib, ularning ishlashi uchun barcha zarur shart-sharoitlarni yaratish tavsiya etilsin.

7. Oʻzbekiston Respublikasi Moliya vazirligi Markaziy bank bilan birgalikda 10 kun muddatda Markaziy bankka oltin va boshqa valyuta resurslarini sotish toʻgʻrisida takliflar kiritsin.

8. Chet el valyutasidagi daromaddan Respublika valyuta jamgʻarmasiga 10 foiz miqdorida, Qoraqalpogʻiston Respublikasi, viloyatlar va Toshkent shahrining tegishli valyuta jamgʻarmalariga 5 foiz miqdorida toʻlab kelingan soliq 1994-yilning 15-aprelidan boshlab bekor qilinsin.

Oʻzbekiston Respublikasi Vazirlar Mahkamasining 1994-yil 3-yanvardagi 1-son qarori oʻz kuchini yoʻqotgan deb hisoblansin.

10. Moliya vazirligi Markaziy bank va Milliy bank bilan birgalikda bir hafta muddatda chet el valyutasida mahsulot sotishdan, shu jumladan, barter yoʻli bilan tuzilgan bitimlar (bajarilgan ishlar, koʻrsatilgan xizmatlar)dan tushadigan, boshqa moddiy boyliklarni sotish hamda savdo-sotiqdan tashqari ishlardan tushadigan valyuta daromadini Markaziy bankka majburiy tarzda sotish Tartibini ishlab chiqsin va tasdiqlasin.

12. Markaziy bank va Moliya vazirligi Tashqi iqtisodiy aloqalar vazirligi, Davlat soliq qoʻmitasi, Tashqi iqtisodiy faoliyat Milliy banki bilan birgalikda ikki hafta muddatda valyuta nazorati toʻgʻrisidagi Nizomni ishlab chiqsinlar, unda korxonalar eksport-import operatsiyalarini amalga oshirish chogʻida chet el valyutasidagi mablagʻlarning harakati tegishli tarzda nazorat qilinishini va bunday mablagʻlarning chet ellardagi banklarda beruxsat saqlanishi imkoniyati istisno etilishini taʼminlash koʻzda tutilsin.

13. Mulkchilik shakllaridan qatʼi nazar, barcha korxonalar va tashkilotlar sobiq SSSR respublikalarining banklarida subschyot hisob-kitob varaqalarini ochgan boʻlsalar, ularning zimmasiga mazkur subschyot hisob varaqalaridagi mavjud mablagʻlar va ularning harakati toʻgʻrisida Oʻzbekiston Respublikasining tegishli xizmat koʻrsatuvchi banklariga majburiy tartibda muntazam axborot berib turish majburiyati yuklansin.

14. Moliya vazirligi Davlat mulkini boshqarish va tadbirkorlikni koʻllab-quvvatlash davlat qoʻmitasi bilan birgalikda, respublikada mulkni davlat tasarrufidan chiqarish va xususiylashtirish jarayonlarini chuqurlashtirish boʻyicha tasdiqlangan davlat dasturini eʼtiborga olgan holda, davlatning qiymatli qogʻozlarini muomalaga chiqarish muddatlarini belgilasin.

15. “Oʻzeltexsanoat” uyushmasi “Oʻzbeksavdo” uyushmasi, Oʻzbekbirlashuv bilan birgalikda ikki hafta muddatda, mulkchilik shakllaridan qatʼi nazar, savdo korxonalari va tashkilotlarini 1995-yilning 1-yanvariga qadar ularning buyurtmalariga muvofiq kassa apparatlari bilan bosqichma-bosqich taʼminlash boʻyicha tadbirlar rejasini ishlab chiqsin.

“Oʻzbeksavdo” uyushmasi, Oʻzbekbirlashuv Oʻzbekiston Respublikasi Davlat soliq qoʻmitasi bilan birgalikda bir oy muddatga kassa apparatlaridan foydalangan holda savdo-sotiqni amalga oshirish tartibini ishlab chiqsinlar.

16. “Oʻzbeksavdo” uyushmasiga chet ellardan xalq isteʼmol mollari olib kelishni tashkil qilish uchun ilova*ga muvofiq xom ashyo resurslari ajratib berilishi uchun idoralar, konsernlar, korporatsiyalar, uyushmalar rahbarlarining zimmasiga shaxsiy masʼuliyat yuklansin.

* Ilova rus tilida beriladi.

17. Qoraqalpogʻiston Respublikasi Vazirlar Kengashining raisi, viloyatlar va Toshkent shahar hokimlari isteʼmol mollari ishlab chiqarishni koʻpaytirishning mahalliy manbalarini qidirib topish va pulli xizmatlar koʻrsatish, aholining erkin pul mablagʻlarini safarbar etish asosida aholining toʻlov qobiliyatiga ega boʻlgan ehtiyojini tovar resurslari bilan mutanosib holga keltirishni va oʻzlariga qarashli hududda pul emissiyasining kamaytirilishini taʼminlasinlar.

18. Vazirliklar va idoralar normativ hujjatlarni ushbu qarorga muvofiq holga keltirsinlar.

19. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari zimmasiga yuklatilsin.

Vazirlar Mahkamasining Raisi I. KARIMOV

Toshkent sh.,

1994-yil 11-aprel,

195-son