“Oʻzbekiston temir yoʻllari” AJ va uning tarkibidagi korxonalar tomonidan yer uchastkalaridan yanada samarali foydalanish chora-tadbirlari toʻgʻrisida (511-son)
16.08.2024
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Prezidentining “Yer munosabatlarida tenglik va shaffoflikni taʼminlash, yerga boʻlgan huquqlarni ishonchli himoya qilish va ularni bozor aktiviga aylantirish chora-tadbirlari toʻgʻrisida” 2021-yil 8-iyundagi PF-6243-son Farmoni hamda “Oʻzbekiston Respublikasi temir yoʻl transporti sohasini tubdan isloh qilish chora-tadbirlari toʻgʻrisida” 2023-yil 10-oktabrdagi PQ-329-son qarori ijrosini taʼminlash, shuningdek, Toshkent viloyati va Toshkent shahri hududida joylashgan “Oʻzbekiston temir yoʻllari” AJ va uning tarkibidagi korxonalari tomonidan foydalanilayotgan hamda kadastr hujjatlari mavjud boʻlmagan umumiy foydalanishdagi temir yoʻllar, ularga ajratilgan mintaqa chegaralarida joylashgan obyektlarning yer maydonlarini doimiy foydalanish huquqi asosida rasmiylashtirish maqsadida Vazirlar Mahkamasi qaror qiladi:
1. “Oʻzbekiston temir yoʻllari” AJ va uning tarkibidagi korxonalar tomonidan foydalanilayotgan va davlat roʻyxatidan oʻtmagan umumiy foydalanishdagi temir yoʻllar egallagan yer uchastkalari roʻyxati ilovaga muvofiq tasdiqlansin.
2. Toshkent viloyati va Toshkent shahar hokimliklari bir oy muddatda Toshkent viloyati hamda Toshkent shahar hududida joylashgan “Oʻzbekiston temir yoʻllari” AJ va uning tarkibidagi korxonalar tomonidan foydalanilayotgan hamda huquqni belgilovchi hujjatlari mavjud boʻlmagan umumiy foydalanishdagi temir yoʻllar, ularga amaldagi ajratilgan mintaqa chegaralarida joylashgan obyektlar boʻyicha yer uchastkalari ilovaga muvofiq doimiy foydalanish huquqi asosida Davlat aktivlarini boshqarish agentligiga ajratilishini taʼminlasin.
Bunda temir yoʻl transportining tuproq koʻtarmasi, sunʼiy inshootlari, yoʻl binolari, temir yoʻl aloqasi va elektr taʼminoti qurilmalari, temir yoʻl bekatlari, boshqa binolar, inshootlar va yoʻl qurilmalari, shuningdek, ihota daraxtzorlari egallagan yerlar oʻz maqomini saqlab qoladi hamda boshqa maqsadlarga ajratilishiga yoʻl qoʻyilmaydi.
3. Davlat aktivlarini boshqarish agentligi:
umumiy foydalanishdagi temir yoʻllar, shu jumladan, tuproq koʻtarmasi, sunʼiy inshootlar, yoʻl binolari, temir yoʻl aloqasi va elektr taʼminoti qurilmalari, temir yoʻl bekatlari, boshqa binolar, inshootlar va yoʻl qurilmalari egallagan yerlar;
temir yoʻllar qurilishi, temir yoʻllarni rekonstruksiya qilish va kapital taʼmirlash maqsadlarida ajratilishi lozim boʻlgan yerlar “Oʻzbekiston temir yoʻllari” AJ hamda uning tarkibidagi korxonalarga belgilangan tartibda ijara huquqi asosida berilishini taʼminlasin.
4. Belgilansinki, Davlat aktivlarini boshqarish agentligi bilan tuzilgan yer uchastkasining ijara shartnomasi asosida “Oʻzbekiston temir yoʻllari” AJ hamda uning tarkibidagi korxonalarga ijaraga berilgan yer uchastkalari uchun yer soligʻi “Oʻzbekiston temir yoʻllari” AJ tomonidan Davlat budjetiga toʻlanadi.
Bunda “Oʻzbekiston temir yoʻllari” AJ hamda uning tarkibidagi korxonalar tomonidan Davlat budjetiga toʻlanadigan soliqlar ijara toʻloviga tenglashtiriladi.
Ajratilgan yer uchastkalari soliq solish maqsadida ushbu qaror 2-bandining ikkinchi xatboshisida koʻrsatib oʻtilgan maqom saqlab qolinadi va mol-mulk hamda yer soliqlarini hisoblashda Soliq Kodeksiga muvofiq kamaytiruvchi koeffitsiyentlar qoʻllanilishi tatbiq etiladi.
5. Mazkur qaror bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 16-avgust,
511-son
Vazirlar Mahkamasining 2024-yil 16-avgustdagi 511-son qaroriga ILOVA
“Oʻzbekiston temir yoʻllari” AJ va uning tarkibidagi korxonalar tomonidan foydalanilayotgan va davlat roʻyxatidan oʻtmagan umumiy foydalanishdagi temir yoʻllar egallagan yer uchastkalari
ROʻYXATI
Izoh. Umumiy foydalanishdagi temir yoʻllar egallagan yer uchastkalariga kadastr hujjatlarini tayyorlash jarayonida aniqlik kiritiladi.