Namangan viloyati mahallalarida oilalar daromadlarini oshirish va tadbirkorlik subyektlari faoliyatini qoʻllab-quvvatlash orqali aholi bandligini oshirishning qoʻshimcha chora-tadbirlari toʻgʻrisida (365-son)
28.06.2024
Oʻzbekiston Respublikasi Vazirlar Mahkamasining
qarori
Namangan viloyatida “Sayxunobod, Uychi va Zarbdor tajribasi”ni keng joriy qilish asosida tomorqadan foydalanishni tubdan yaxshilash, mahallalarda oilalarning doimiy daromad manbalarini shakllantirish hamda tijorat banklari mijozlarini qoʻllab-quvvatlash orqali aholi bandligini oshirish maqsadida Vazirlar Mahkamasi qaror qiladi:
1. Quyidagilar:
2024-yil yakuniga qadar mahallalarda mikro va kichik loyihalarni oyma-oy amalga oshirish hamda tijorat banklari va “yetakchi” tadbirkorlar koʻmagida beriladigan “maslahat va moliyaviy xizmat paketi” ajratishning maqsadli koʻrsatkichlari 1-ilovaga muvofiq;
Mahallalarda aholi daromadlarini oshirish va yangi ish oʻrinlarini yaratish maqsadida ajratiladigan grantning tuman (shahar)lar kesimidagi maqsadli koʻrsatkichlari 2-ilovaga muvofiq;
Mahallalarda aholi tomonidan yetishtirilgan yoki ishlab chiqarilgan mahsulotlarni sotishga koʻmaklashuvchi “yetakchi” tadbirkorlarga baholangan umumiy qiymatining 1 milliard soʻmgacha qismi grant sifatida ajratiladigan boʻsh turgan va auksionlarda sotilmayotgan davlat mulki obyektlarining manzilli roʻyxati 3-ilovaga muvofiq;
Namangan viloyatida “bir kontur — bir mahsulot” tamoyili asosida loyihalarni amalga oshirishning manzilli roʻyxati 4-ilovaga muvofiq;
Namangan viloyatining tuman va shaharlarida zaxira hamda imkoniyatlarni ishga solish orqali hududlarni rivojlantirishni yanada jadallashtirish va aholi bandligini oshirishning qoʻshimcha chora-tadbirlari dasturi 5-ilovaga muvofiq;
Namangan viloyatida tijorat banklari filiallarida hamda mijozlar faoliyat koʻrsatayotgan obyektlarda uchrashuvlar oʻtkazishning maqsadli koʻrsatkichlari 6-ilovaga muvofiq;
Uychi tumanini ishsizlik va kambagʻallikdan holi hududga aylantirish boʻyicha chora-tadbirlar dasturi 7-ilovaga muvofiq;
Namangan viloyatida aholi daromadlari va bandligini oshirish boʻyicha Respublika va hududiy ishchi guruhlar tarkiblari 8 va 9-ilovalarga muvofiq tasdiqlansin.
2. Shunday tartib oʻrnatilsinki, unga koʻra Namangan viloyatida:
a) mahallalarda mikro va kichik loyihalarni amalga oshirish yoʻnalishida:
mahallada tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha tuman (shahar) hokimlarining yordamchilari (keyingi oʻrinlarda — hokim yordamchilari) har oyning 5-sanasiga qadar mahallaga biriktirilgan tijorat banklari filiallari va jalb qilingan “yetakchi” tadbirkorlar bilan birgalikda mikro va kichik loyihani amalga oshirish boʻyicha tashabbuskorlarni aniqlaydi hamda loyihalar va “maslahat va moliyaviy xizmat paketi” roʻyxatini shakllantiradi;
tuman (shahar) hokimining birinchi oʻrinbosarlari har oyning 10-sanasiga qadar loyihalarni amalga oshirish hamda “maslahat va moliyaviy xizmat paketi”ni ajratishning reja jadvalini tasdiqlaydi hamda uning oʻz vaqtida ijrosini taʼminlash boʻyicha tegishli tijorat banklari filiallari va hokim yordamchilari bilan birgalikda masʼul hisoblanadi;
b) boʻsh turgan davlat mulki obyektlarida yangi loyihalarni amalga oshirish yoʻnalishida:
tuman (shahar) hokimining birinchi oʻrinbosari Davlat aktivlarini boshqarish agentligining Namangan viloyati hududiy boshqarmasi bilan birgalikda har chorakning 10-sanasiga qadar grant asosida beriladigan davlat mulki obyektlarini tadbirkorlik subyektlariga taklif qiladi;
Davlat aktivlarini boshqarish agentligining Namangan viloyati hududiy boshqarmasi “yetakchi” tadbirkorlarga maslahatlar beradi hamda tegishli davlat mulki obyektlarini grant asosida ajratishni rasmiylashtirish ishlarini tashkil etadi;
grant Davlat budjeti mablagʻlari hamda nostrategik davlat mulki obyektlari hisobidan belgilangan tartibda tadbirkorlarga Davlat budjeti mablagʻlari hisobidan yaratiladigan ish oʻrinlari sonidan kelib chiqib, 1 milliard soʻmgacha ajratiladi;
v) “bir kontur — bir mahsulot” tamoyili asosida namunali loyihalarni amalga oshirish yoʻnalishida:
tuman (shahar) hokimining birinchi oʻrinbosari tijorat banklari filiallari, ushbu tijorat banklari filiallari jalb etgan “yetakchi” tadbirkor hamda dehqon xoʻjaliklari bilan birgalikda 2024-yil iyul oyida tegishli konturda amalga oshiriladigan loyihaning biznes rejasini ishlab chiqishga hamda dehqon xoʻjaliklari oʻrtasida yoki dehqon xoʻjaliklari va “yetakchi” tadbirkorlar bilan hamkorlikda ekin ekishni va agrotexnik tadbirlarni tashkil etadi;
tijorat banklari filiallari “yetakchi” tadbirkor va dehqon xoʻjaliklariga ekinlarni ekish, saqlash, quritish, qayta ishlash uchun zarur boʻlgan kreditlarni ajratadi;
g) tuman (shahar)larda zaxira va imkoniyatlarni ishga solish boʻyicha “drayver” loyihalarni amalga oshirish yoʻnalishida:
tuman (shahar) hokimlari bir oy muddatda aniqlangan “drayver” loyihalarning har biri boʻyicha tarmoq jadvalini tasdiqlaydi;
tuman (shahar) hokimining birinchi oʻrinbosari “drayver” loyihalar amalga oshirilishini muvofiqlashtiradi hamda aniqlangan muammoli masalalarni hal etish boʻyicha takliflarni Respublika va hududiy ishchi guruhlarga kiritadi;
d) tijorat banklari mijozlarining muammolarini hal qilish orqali aholining bandligini oshirish yoʻnalishida:
Namangan viloyati hokimining birinchi oʻrinbosari tijorat banklari bilan birgalikda bir oy muddatda tijorat banklari filiallarida tadbirkorlar bilan oʻtkaziladigan uchrashuvlar grafigini tasdiqlaydi;
tasdiqlangan grafikka asosan tuman (shahar) hokimlari, infratuzilma tashkilotlari, iqtisodiy kompleksga kiruvchi idoralar ishtirokida tijorat banklari filiallarida yoki joyiga chiqqan holda tadbirkorlik subyektlari bilan uchrashuvlar tashkil etiladi;
uchrashuvlarda koʻtarilgan muammoli masalalar va takliflarni hal etishda tuman (shahar) hokimlari infratuzilma, er, bino va inshoot bilan bogʻliq hamda shu kabi boshqa masalalarni, tijorat banklari moliyaviy masalalarini hal etish choralarini koʻradilar;
viloyat va respublika darajasida hal etiladigan muammo hamda takliflarni hal etish uchun har oy tegishliligi boʻyicha Respublika va hududiy ishchi guruhlariga maʼlumot kiritiladi.
3. Mazkur qarorning 2-bandida keltirilgan topshiriqlar ijrosini tashkil etish, ularni amalga oshirish hamda monitoring qilib borish vazifalari tegishlicha Respublika va hududiy ishchi guruhlarga yuklansin.
4. Iqtisodiyot va moliya vazirligi Namangan viloyati hokimligi bilan birgalikda bir oy muddatda Chortoq tumanini urbanizatsiya qilish boʻyicha namunali hududga aylantirish maqsadida “Oʻrta shaharlarni kompleks rivojlantirish” dasturi doirasida amalga oshirilayotgan loyihalarni jadallashtirish dasturini tasdiqlash uchun Vazirlar Mahkamasiga kiritsin. Bunda:
loyiha va pudrat tashkilotlarini Oʻzbekiston Respublikasining “Davlat xaridlari toʻgʻrisida”gi Qonuniga muvofiq aniqlashni joriy qilish;
Chortoq tumani markazini kesib oʻtuvchi “Chortoqsoy” soyi boʻyida piyodalar uchun 11 kilometr uzunlikdagi salomatlik yoʻlagini qurish;
“Furqat” madaniyat va istirohat bogʻi va unga tutash hududlarni rekonstruksiya qilish;
ichimlik suvi va oqova suv tizimini yaxshilashda bazalt va polietilen quvurlardan foydalanish imkoniyatini kengaytirish;
joriy yil yakuniga qadar 14 million dollar miqdoridagi mablagʻlarni oʻzlashtirish va qoʻshimcha loyihalarni boshlash nazarda tutilsin.
5. Toshkent viloyatining Angren shahridan Namangan viloyatining Toʻraqoʻrgʻon tumanigacha boʻlgan 100 kilometr masofada yoʻlboʻyi infratuzilmasini tartibli tashkil qilish maqsadida:
a) Iqtisodiyot va moliya vazirligi Namangan viloyati hokimligi, Davlat aktivlarini boshqarish agentligi, Toshkent viloyati hokimligi, Avtomobil yoʻllari qoʻmitasi bilan birgalikda:
2024-yil 1-avgustga qadar Namangan viloyati hokimligi tashkiliy tuzilmasida viloyatdagi budjet tashkilotlarining amaldagi shtat birliklari soni doirasida 6 ta shtat birligidan iborat “Hudud rivojlanishiga turtki beruvchi zaxira va imkoniyatlarni ishga tushirish” loyiha ofisini (keyingi oʻrinlarda — Loyiha ofisi) tashkil qilsin;
2024-yil 5-avgustga qadar tuman (shahar)larda aniqlangan zaxira va imkoniyatlarni ishga solish boʻyicha loyihalar tarmoq jadvalini tasdiqlab, ularning amaliyotga joriy etilishini muvofiqlashtirib borsin;
2024-yil 10-avgustga qadar Loyiha ofisi faoliyatini tashkil etish boʻyicha nizomni ishlab chiqsin va tasdiqlasin;
toʻrt oy muddatda Loyiha ofisi buyurtmachiligida yoʻlboʻyida savdo va xizmat koʻrsatish obyektlari, hunarmandchilik va logistika markazlari hamda mehmonxonalarni joylashtirishni nazarda tutuvchi “master-reja” ishlab chiqsin hamda “master-reja”ga muvofiq yoʻlboʻyidagi yer maydonlari auksionga chiqarilishini tashkil etsin;
b) Toshkent viloyati hokimligi Loyiha ofisi tomonidan belgilangan tartibda jalb etiladigan master-rejani ishlab chiquvchi tashkilot (kompaniya)ga yoʻlning Toshkent viloyatining Angren shahridan Namangan viloyati hududi chegarasigacha boʻlgan qismi boʻyicha tegishli maʼlumotlar olishda koʻmaklashsin;
6. Quyidagilar Loyiha ofisi faoliyatini baholashning asosiy koʻrsatkichlari etib belgilansin:
har bir tuman (shahar) rivojlanishiga turtki beruvchi imkoniyat va zaxiralardan kamida 5 ta loyihani amalga oshirishni;
master-rejalarni oʻz vaqtida ishlab chiqishni va tasdiqlashni, master-rejaga muvofiq kamida 50 gektar yer uchastkasini auksionga chiqarishni taʼminlash.
Belgilansinki, Loyiha ofisi rahbariga viloyat hokimining oʻrinbosari, xodimlariga viloyat hokimligi xodimlari uchun belgilangan mehnatga haq toʻlash shartlari tatbiq etiladi.
7. Bosh vazir oʻrinbosari — iqtisodiyot va moliya vaziri J.A. Qoʻchqorov Oʻzbekiston Respublikasi Prezidenti topshiriqlariga asosan hududlarni ijtimoiy-iqtisodiy rivojlantirish uchun nazarda tutilgan mablagʻlar hisobidan:
Namangan viloyatida zaxira va imkoniyatlarni ishga solish orqali “drayver” loyihalarni roʻyobga chiqarish uchun 45 milliard soʻmgacha mablagʻlarni asoslantirilgan hisob-kitoblarga muvofiq bosqichma-bosqich moliyalashtirishni;
joriy yil yakuniga qadar Loyiha ofisi faoliyatini tashkil etish, master-reja ishlab chiqish va xorijiy konsalting kompaniyasi va ekspertlarni jalb etish hamda faoliyati bilan bogʻliq xarajatlar uchun birinchi bosqichda 3 milliard soʻmgacha, keyingi bosqichda amalga oshirilgan xarajatlardan kelib chiqib, 10 milliard soʻm mablagʻ ajratishni taʼminlasin.
8. Ekologiya, atrof-muhitni muhofaza qilish va iqlim oʻzgarishi vazirligi Iqtisodiyot va moliya vazirligi, Namangan viloyati hokimligi bilan birgalikda:
2024-yil 1-sentabrga qadar Chust, Yangiqoʻrgʻon, Kosonsoy, Chortoq tumanlarida togʻ oldi turizmini rivojlantirish “master-reja”sini ishlab chiqsin;
2024-yil 1-oktabrga qadar togʻ oldi turizmini rivojlantirish boʻyicha tadbirkorlarni aniqlab, 2024-yil yakuniga qadar loyihalarni boshlash choralarini koʻrsin.
9. Belgilansinki:
a) Respublika ishchi guruhi (Norqulov, Saydullayev) har oyda kamida bir marta joyiga chiqqan holda, belgilangan vazifalarning ijrosini tanqidiy tahlil qilib, ularni amalga oshirishni tezlashtirish va yuzaga kelgan muammo va kamchiliklarni bartaraf etish boʻyicha choralarni koʻrib boradi hamda respublika darajasida hal qilinadigan masalalarni Vazirlar Mahkamasiga kiritadi;
b) Bosh vazir oʻrinbosari — iqtisodiyot va moliya vaziri J.A. Qoʻchqorov:
ijobiy natijalarga erishgan rahbar va masʼul xodimlarga ragʻbatlantirish, kamchilik va sustkashlikka yoʻl qoʻygan iqtisodiy kompleksga kiruvchi idoralar rahbarlari va masʼul xodimlariga intizomiy choralar koʻradi;
tuman (shahar)larda drayver loyihalarni amalga oshirishni tezlashtirish va ularni amalga oshirishdagi hamda tijorat banklari mijozlari tomonidan koʻtarilgan muammoli masalalarni tezkorlik bilan hal etish choralarini koʻradi, zarur hollarda ushbu masalalarga oid muammolarni yechishni nazarda tutuvchi tegishli normativ-huquqiy hujjatlar loyihalarini ishlab chiqilishini taʼminlaydi.
10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov, Namangan viloyati hokimi Sh.Sh. Abdurazakov hamda Markaziy bank raisining birinchi oʻrinbosari N.N. Saydullayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 28-iyun,
365-son
Vazirlar Mahkamasining 2024-yil 28-iyundagi 365-son qaroriga 1-ILOVA
2024-yil yakuniga qadar mahallalarda mikro va kichik loyihalarni oyma-oy amalga oshirish hamda tijorat banklari va “yetakchi” tadbirkorlar koʻmagida beriladigan “maslahat va moliyaviy xizmat paketi” ajratishning
MAQSADLI KOʻRSATKIChLARI
Izoh. Ajratiladigan mablagʻlarga amaldagi talabdan kelib chiqib, oʻzgartirish yoki qoʻshimchalar kiritilishi mumkin.
Vazirlar Mahkamasining 2024-yil 28-iyundagi 365-son qaroriga 2-ILOVA
Mahallalarda aholi daromadlarini oshirish va yangi ish oʻrinlarini yaratish maqsadida ajratiladigan grantning tuman (shahar)lar kesimidagi
MAQSADLI KOʻRSATKIChLARI
* 2024-yilda ajratiladigan grant eksperiment tariqasida hududiy ishchi guruhining taklifiga asosan Respublika ishchi guruhi tavsiyasiga koʻra Vazirlar Mahkamasi bilan kelishilgan holda Namangan viloyatining 2 ta tumanida joriy etiladi.
Vazirlar Mahkamasining 2024-yil 28-iyundagi 365-son qaroriga 3-ILOVA
Mahallalarda aholi tomonidan yetishtirilgan yoki ishlab chiqarilgan mahsulotlarni sotishga koʻmaklashuvchi “yetakchi” tadbirkorlarga baholangan umumiy qiymatining 1 milliard soʻmgacha qismi grant sifatida ajratiladigan boʻsh turgan va auksionlarda sotilmayotgan davlat mulki obyektlarining
MANZILLI ROʻYXATI*
* Ushbu davlat mulki obyektlari oʻrnatilgan tartibda auksion orqali sotilishiga ham ruxsat etiladi.
Vazirlar Mahkamasining 2024-yil 28-iyundagi 365-son qaroriga 4-ILOVA
Namangan viloyatida “bir kontur — bir mahsulot” tamoyili asosida loyihalarni amalga oshirishning
MANZILLI ROʻYXATI
Vazirlar Mahkamasining 2024-yil 28-iyundagi 365-son qaroriga 5-ILOVA
Namangan viloyatining tuman va shaharlarida zaxira hamda imkoniyatlarni ishga solish orqali hududlarni rivojlantirishni yanada jadallashtirish va aholi bandligini oshirishning qoʻshimcha chora-tadbirlari
DASTURI
Vazirlar Mahkamasining 2024-yil 28-iyundagi 365-son qaroriga 6-ILOVA
Namangan viloyatida tijorat banklari filiallarida hamda mijozlar faoliyat koʻrsatayotgan obyektlarda uchrashuvlar oʻtkazishning
MAQSADLI KOʻRSATKIChLARI
Vazirlar Mahkamasining 2024-yil 28-iyundagi 365-son qaroriga 7-ILOVA
Uychi tumanini ishsizlik va kambagʻallikdan holi hududga aylantirish boʻyicha chora-tadbirlar
DASTURI
Vazirlar Mahkamasining 2024-yil 28-iyundagi 365-son qaroriga 8-ILOVA
Namangan viloyatida aholi daromadlari va bandligini oshirish boʻyicha Respublika ishchi guruhi
TARKIBI
Izoh. Respublika ishchi guruhi aʼzolari boshqa ishga oʻtgan taqdirda, uning tarkibiga ushbu lavozimga yangidan tayinlangan yoki tegishli vazifalarni bajarish zimmasiga yuklangan shaxslar kiritiladi.
Vazirlar Mahkamasining 2024-yil 28-iyundagi 365-son qaroriga 9-ILOVA
Namangan viloyatida aholi daromadlari va bandligini oshirish boʻyicha hududiy ishchi guruhi
TARKIBI
Izoh. Hududiy ishchi guruhi aʼzolari boshqa ishga oʻtgan taqdirda, uning tarkibiga ushbu lavozimga yangidan tayinlangan yoki tegishli vazifalarni bajarish zimmasiga yuklangan shaxslar kiritiladi.