Oʻzbekiston yengil sanoat tovarlari ishlab chiqarish (“Oʻzbekyengilsanoat”) davlat uyushmasi korxonalarini davlat tasarrufidan chiqarish va xususiylashtirishning asosiy yoʻnalishlari toʻgʻrisida (179-son)

04.04.1994

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Iqtisodiy islohotlarni yanada chuqurlashtirish, xususiy mulk manfaatlarini himoya qilish va tadbirkorlikni rivojlantirish chora-tadbirlari toʻgʻrisida” 1994-yil 21-yanvardagi Farmoniga muvofiq va tarmoqda xususiylashtirishni jadallashtirish uchun sharoitlar yaratish, qiymatli qogʻozlar bozorini shakllantirish maqsadida Vazirlar Mahkamasi qaror qiladi:

4. “Oʻzbekyengilsanoat” davlat uyushmasi tomonidan ochiq turdagi aksionerlik jamiyati shaklidagi “Yengilsanoatinvest” moliya-investitsiya kompaniyasi tashkil etilishi va kompaniya ustavi 4-ilovaga muvofiq maʼqullansin.

“Yengilsanoatinvest” aksionerlik kompaniyasi yengil industriya korxonalarini aksionerlashtirish va xususiylashtirishning yaxlit dasturini amalda roʻyobga chiqarishni quyidagi yoʻnalishlar boʻyicha amalga oshirishi maʼlumot uchun qabul qilinsin;

yengil sanoat korxonalarini davlat tasarrufidan chiqarish va xususiylashtirish jarayoniga investorlarning, shu jumladan, xorijiy investorlarning moliyaviy mablagʻlarini jalb qilish;

oʻz aksionerlarining pul mablagʻlarini xususiylashtirilayotgan korxonalarning qiymatli qogʻozlariga investitsiya qilish;

iqtisodiyotning xususiylashtirilayotgan sektorida investitsiya imkoniyatlari taqchilligini toʻldirish uchun davlatning qiymatli qogʻozlarini sotib olish, kompaniya investitsiyalarining ishonchliligini oshirish;

tugallanmagan qurilish obyektlarini 5-ilova*ga muvofiq mablagʻ bilan taʼminlash;

* 5-ilova berilmaydi.

tovarlar ishlab chiqarishni koʻpaytirish va ularni ichki va tashqi bozorlarda sotish imkonini beruvchi aksionerlik jamiyatlari, firmalar, xorijiy investorlar bilan birgalikda qoʻshma korxonalar taʼsis etish, yengil sanoat korxonalari va oʻzaro bogʻliq korxonalarning kooperatsiyalashgan aloqalarini mustahkamlash.

9. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining xalq isteʼmol tovarlari, savdo va pulli xizmatlar koʻrsatish majmuiga yuklatilsin.

Vazirlar Mahkamasining Raisi I. KARIMOV

Toshkent sh.,

1994-yil 4-aprel,

179-son

Vazirlar Mahkamasining 1994-yil 4-apreldagi 179-son qaroriga 4-ILOVA

“Yengilsanoatinvest” Oʻzbekiston moliya-investitsiya kompaniyasi” aksionerlik jamiyatining

USTAVI

I. Umumiy qoidalar

1. “Yengilsanoatinvest” Oʻzbekiston moliya-investitsiya kompaniyasi” ochiq turdagi aksionerlik jamiyati (keyingi oʻrinlarda “Kompaniya” deb ataladi) Oʻzbekiston Respublikasi Prezidentining “Iqtisodiy islohotlarni yanada chuqurlashtirish, xususiy mulk manfaatlarini himoya qilish va tadbirkorlikni rivojlantirish chora-tadbirlari toʻgʻrisida”gi Farmoniga muvofiq yopiq turdagi “Yengilsanoatxolding” moliya-investitsiya kompaniyasi aksionerlik jamiyatini qayta tashkil etib tuzilgan tashkilot boʻlib, uning huquqiy vorisi hisoblanadi. Kompaniya toʻliq xoʻjalik, moliyaviy va yuridik mustaqillikka egadir.

U aholining yuqori sifatli xalq isteʼmol tovarlariga boʻlgan talabini qondirish va xizmatlar koʻrsatish, kompaniya qatnashchilarining tadbirkorligini rivojlantirish, ularning faoliyatini muvofiqlashtirish, investitsiya, tijorat siyosatini olib borish, bozor iqtisodiyoti sharoitlarida xalqaro hamkorlikni amalga oshirish maqsadida aksionerlik mulki asosida tuzilgan tashkilot hisoblanadi.

2. Kompaniya oʻz faoliyatida “Xoʻjalik jamiyatlari va shirkatlar toʻgʻrisida”, “Tadbirkorlik toʻgʻrisida”, “Oʻzbekiston Respublikasida korxonalar toʻgʻrisida” Oʻzbekiston Respublikasi qonunlariga, Oʻzbekiston Respublikasining amaldagi qonun hujjatlariga hamda mazkur Ustavga amal qiladi.

3. Quyidagilar Kompaniyaning taʼsischilari hisoblanadi:

“Oʻzbekyengilsanoat” Oʻzbekiston yengil sanoat tovarlari ishlab chiqarish davlat uyushmasi;

Toshkent “Toshkent toʻqimachilik kombinati” ip-gazlama ishlab chiqarish birlashmasi;

Toshkent charm-moʻyna zavodi;

Toshkent “Oʻzbekiston” charm-poyabzal ishlab chiqarish birlashmasi;

Toshkent 2-poyabzal ishlab chiqarish birlashmasi.

4. Kompaniyaning firma nomi:

Oʻzbekiston Respublikasining davlat tilida: toʻliq nomi — Yengil sanoat mahsulotlari ishlab chiqarish aksionerlik jamiyati “Yengilsanoatinvest” Oʻzbekiston moliya-investitsiya kompaniyasi”, qisqacha nomi — “Yengilsanoatinvest” aksionerlik kompaniyasi;

rus tilida: toʻliq nomi — Aksionernoye obщestvo “Finansovo-investitsionnaya kompaniya “Legprominvest”, qisqacha nomi — AK “Legprominvest”;

ingliz tilida: toʻliq nomi — FULL NAME JOINT-STOCK COMPANY “FINANCIAL INVESTMENT COMPANY “LEGPROM-INVEST”. SHORT NAME — JNK-STK Co “ LEGPROMINVEST”.

5. Kompaniya qonunchilikda belgilangan tartibda davlat roʻyxatidan oʻtkazilgan vaqtdan boshlab yuridik shaxs huquqiga ega boʻladi, mustaqil balansga, banklarda ham milliy, ham xorijiy valyutada schyotlarga, mulkiy va shaxsiy nomulkiy huquqlarga ega boʻladi, sudda, xoʻjalik va xolislar sudlarida daʼvogar va javobgar boʻlishi mumkin.

6. Kompaniya toʻliq xoʻjalik hisobi asosida oʻz xarajatlarini oʻzi qoplashni, faoliyatini takomillashtirish, ijtimoiy rivojlantirish va moddiy ragʻbatlantirish boʻyicha xarajatlarni mablagʻ bilan taʼminlaydi, oʻz faoliyati natijalari uchun kontragentlar, budjet va aksionerlar oldida toʻliq javob beradi.

7. Kompaniya oʻz nomi yozilgan muhrga va ramziy belgiga, firma belgilariga, rasmiy ish qogʻozlariga va yuridik shaxsning boshqa belgilariga ega boʻladi.

8. Kompaniya quyidagi manzilda joylashgan: Oʻzbekiston Respublikasi, 700078, Toshkent shahri, Mustaqillik maydoni, 5.

II. Faoliyatining turi, maqsadlari va muddati

9. Kompaniya sarmoyani jamlash va tarmoqning yangidan tashkil etiladigan hamda mavjud korxonalarni samarali investitsiyalash va bozor infrastrukturasini, mamlakat iqtisodiyotini modernizatsiyalash jarayonini chuqurlashtirish, ijtimoiy-iqtisodiy muammolarni hal etish, Oʻzbekiston Respublikasi fuqarolarining farovonligini oshirish maqsadida tashkil etiladi.

10. Kompaniya oʻz maqsadlariga erishish uchun faoliyatni, qonun hujjatlariga muvofiq quyidagi yoʻnalishlarda amalga oshiradi:

investorlarning moliyaviy mablagʻlarini, intellektual mulk obyektlarini, jismoniy va yuridik shaxslarning mol-mulki va alohida nomulkiy huquqlarini jalb etish;

yengil sanoat tovarlari ishlab chiqarish korxonalarini tashkil etish va rivojlantirish sohasida investitsiya faoliyati, xizmatlar koʻrsatish, shu jumladan, auditorlik va huquqiy xizmatlar koʻrsatish, shuningdek, boshqa davlatlarning firmalari bilan birgalikda qoʻshma korxonalar va bozor infrastrukturasini tashkil etish;

haqiqiy tovarlar, qiymatli qogʻozlar, koʻchmas mulk, kontraktlar, fyuchers, opsionlar bilan birja va birjadan tashqari operatsiyalar;

Aksiyalari paketlariga kompaniya egalik qiladigan barcha tuzilmalarning quyidagi sohalar boʻyicha puxta oʻzaro aloqasiga koʻmaklashish:

xoʻjalik hisobi manfaatlari;

oʻzaro hisob-kitoblar;

axborot taʼminoti;

tashqi iqtisodiy faoliyat;

ilmiy, umumtarmoq tadqiqotlari;

qurilish;

kadrlar tayyorlash;

kredit, kredit-garov, faktoring, kliring, lizing, trast, savdo, sugʻurta va qayta sugʻurta qilish, auditorlik korxonalari, shuningdek, boshqa korxonalar taʼsis etish;

korxonalarni davlat tasarrufidan chiqarish va xususiylashtirishda koʻmaklashish;

venchur loyihalarni mablagʻ bilan taʼminlash yoʻli orqali innovatsiya faoliyati;

huquqiy va konsalting xizmat koʻrsatish;

tijorat asosida reklama, noshirlik, oʻquv faoliyatini amalga oshirish;

tashqi iqtisodiy faoliyatni amalga oshirish, shu jumladan, xorijiy firmalarning ishonchnomasi boʻyicha ularning Oʻzbekiston Respublikasi moliya va xoʻjalik organlarida manfaatlarini ifodalash;

vositachilik, shu jumladan, savdo-vositachilik va savdo-xarid faoliyatini amalga oshirish.

11. Kompaniya nomaʼlum muddatga tashkil etiladi.

III. Ustav fondi va mol-mulki

12. Faoliyatni taʼminlash uchun Kompaniya har birining nominal qiymati 25.000 (yigirma besh ming) boʻlgan 200.000 (ikki yuz ming) aksiyalarga ajratilgan 5.000.000.000 (besh milliard) soʻm-kupon miqdorida ustav fondi tashkil etadi.

13. Kompaniya barcha qatnashchilarining ulushlari Oʻzbekiston Respublikasi milliy valyutasida baholanadi.

14. Taʼsischilarning Kompaniya ustav fondidagi ulushlari quyidagi miqdorlarni tashkil etadi:

Yengil sanoat tovarlari ishlab chiqarish (“Oʻzbekyengilsanoat”) davlat uyushmasi — 1.5 mlrd soʻm-kupon yoki 60.000 aksiya

Toshkent “Toshkent toʻqimachilik kombinati” ip gazlama ishlab chiqarish birlashmasi — 30 mln soʻm-kupon yoki 1.200 aksiya

Toshkent charm-moʻyna zavodi — 30 mln soʻm-kupon yoki 1.200 aksiya

Toshkent “Oʻzbekiston” charm-poyabzal ishlab chiqarish birlashmasi — 20 mln soʻm-kupon yoki 800 aksiya

Toshkent 2-poyabzal ishlab chiqarish birlashmasi — 30 mln soʻm-kupon yoki 1.200 aksiya

15. Umumiy summasi 3.39 mlrd soʻm-kupon boʻlgan qolgan 64400 aksiya “Oʻzbekyengilsanoat” uyushmasi mehnat jamoalari aʼzolari hamda boshqa yuridik va jismoniy shaxslar oʻrtasida sotiladi.

16. Taʼsischi ustav fondidagi oʻz ulushini faqat Kompaniya boshqaruvining ruxsati bilan berish (sotish)ga haqlidir.

17. Agar ilgari chiqarilgan barcha aksiyalarga haq nominaldan past boʻlmagan qiymat boʻyicha toʻlangan boʻlsa Kompaniya ustav fondini koʻpaytirishga haqlidir. Ustav fondini koʻpaytirish yangi aksiyalar chiqarish yoxud ularning nominal qiymatini oshirish vositasida amalga oshiriladi.

Kompaniya qatnashchilari qoʻshimcha ravishda chiqarilgan aksiyalarni sotib olishda imtiyozli huquqdan foydalanadilar.

18. Ustav fondini koʻpi bilan 30% ga koʻpaytirish Kompaniya boshqaruvining qarori bilan amalga oshirilishi mumkin. Boshqa hollarda ustav fondini koʻpaytirish aksionerlarning Umumiy yigʻilishi qarori bilan amalga oshiriladi.

19. Ustav fondini kamaytirish aksiyalarning nominal qiymatini kamaytirish yoki aksiyalarni bekor qilish maqsadida saqlovchilardagi aksiyalarning bir qismini sotib olish yoʻli bilan aksiyalar sonini qisqartirish orqali amalga oshiriladi.

Aksiyalar ustav fondining miqdorini kamaytirish toʻgʻrisidagi qaror barcha aksionerlarga maʼlum qilingan kundan boshlab bir yil toʻlgandan keyin bekor qilish uchun taqdim etilmagan aksiyalar haqiqiy emas deb tan olinadi.

Ustav fondini kamaytirish toʻgʻrisidagi qaror uni koʻpaytirish toʻgʻrisidagi qarorga oʻxshash tartibda qabul qilinadi.

20. Kompaniya qoʻshimcha mablagʻlarni jalb etish uchun obligatsiyalar chiqarishi hamda ularni yuridik va jismoniy shaxslar oʻrtasida tarqatishi mumkin. Obligatsiyalarning jami qiymati ustav fondi miqdorining 20 foizidan oshmasligi kerak. Obligatsiyalar chiqarish ilgari chiqarilgan barcha aksiyalarning haqi toʻlangandan keyin amalga oshirilishi mumkin.

21. Obligatsiyalar chiqarish zayomning maqsadi, summasi va muddatini, chiqariladigan Obligatsiyalar sonini, ularning nominal va chiqarish bahosini, foizlar miqdorini va ularni toʻlash muddatlarini, qarzni uzish muddatlari va usullarini belgilovchi aksionerlarning Umumiy yigʻilishi qarori boʻyicha amalga oshiriladi.

22. Kompaniya alohida mol-mulkka (shu jumladan, xorijiy valyutaga) ega boʻladi, mazkur mol-mulkka egalik qilish, undan foydalanish va uni tasarruf etish huquqini amalga oshiradi.

23. Quyidagilar kompaniya mol-mulkini shakllantirish manbalari hisoblanadi;

a) taʼsischilar tomonidan Kompaniyaga mulk qilib berilgan mol-mulk;

b) xoʻjalik faoliyatidan olingan daromadlar;

v) tekin xayriya badallari;

g) qiymatli qogʻozlar chiqarishdan olingan mablagʻlar;

d) Oʻzbekiston Respublikasi qonun hujjatlari bilan taqiqlanmagan boshqa manbalar.

24. Qatnashchining Kompaniya ustav fondiga qoʻshadigan ulushi mol-mulk (binolar, inshootlar) va boshqa moddiy boyliklar, qiymatli qogʻozlardan, suv, yer va boshqa tabiiy resurslar, binolar, inshootlar va asbob-uskunalardan foydalanish huquqidan, shuningdek, boshqa mulkiy va nomulkiy huquqlardan, pul mablagʻlaridan iborat boʻlishi mumkin.

Ulush sifatida qoʻshiladigan mol-mulkning qiymati Kompaniya qatnashchilarining qoʻshma qarori bilan belgilanadi.

Pul ifodasida baholangan ustav fondiga qoʻshilgan ulush qatnashchining ustav fondidagi ulushini tashkil etadi.

25. Mol-mulk aksioner tomonidan Kompaniyaga faqat vaqtincha foydalanish uchun berilgan hollarda ulush miqdori va tegishli ravishda aksionerning ulushi undan foydalanish muddati boʻyicha hisoblab chiqilgan ijara toʻlovidan kelib chiqqan holda belgilanadi.

Kompaniyaning foydalanishi uchun berilgan mol-mulkning tasodifan nobud boʻlishi yoki shikastlanishi bilan bogʻliq xarajatlarni Kompaniya oʻz zimmasiga oladi.

26. Kompaniyaga berilgan mol-mulk hisobiga aksionerga aksiyalarning tegishli miqdorini — sertifikatni sotish uchun yozma majburiyat beriladi.

IV. Aksiyalar

27. Kompaniya oddiy, nomi yozilgan aksiyalar chiqaradi. Kompaniya mehnat jamoasining oʻz aʼzolariga 3 yil muddatga aksiyalar sotib olishi uchun foizsiz kredit berishi mumkin. Ana shu usulda sotib olingan aksiyalarning umumiy summasi ustav fondining 10 foizidan oshmasligi kerak. Kreditni uzish uchun dividendlarni toʻlashga moʻljallangan summadan (ulardan soliq toʻlangandan keyin) birinchi navbatda foydalaniladi.

28. Aksiyalar aksionerlar tomonidan quyidagi tartibda sotib olinadi:

xarid qilish yoʻli bilan;

opsion yoʻli bilan;

meros tartibida va boshqa vorislik huquqi tartibida;

Oʻzbekiston Respublikasi qonun hujjatlarida nazarda tutilgan boshqa usullar bilan.

29. Aksiyalar boʻlinmasdir. Aynan bir aksiyaning oʻzi bir necha shaxslarga tegishli boʻlgan hollarda ularning barchasi Kompaniyaga nisbatan bir aksioner deb tan olinadi va oʻz huquqlarini ulardan biri yoki umumiy vakil orqali amalga oshirishlari mumkin.

30. Kompaniya aksiyalar tayyorlanguniga qadar, belgilangan tartibda, ular oʻrniga aksionerlarga aksiyalar qiymatiga muvofiq summaga sertifikat beradi.

31. Aksiyalarni sotib olish toʻlovlari toʻliq yoki quyidagi tartibda amalga oshiriladi: dastlabki badal sotib olingan aksiyalar nominal qiymatining kamida 30 foizi miqdorida bir vaqtda amalga oshiriladi, keyingi toʻlovlarda esa yilning har choragida teng ulushlarda Kompaniya roʻyxatga olingandan keyingi bir yil davomida toʻlanadi.

Agar aksioner oʻzi olgan aksiyalarni yil davomida sotib olmasa, u muddati oʻtkazib yuborilgan vaqt uchun muddati oʻtkazib yuborilgan summaning 25 foizi miqdorida qoʻshimcha pul toʻlaydi.

32. Aksionerlarni roʻyxatga olish daftariga kiritish sotib olingan aksiyalarning 30 foizi miqdorida dastlabki toʻlov toʻlangandan keyin amalga oshiriladi.

33. Aksiyalarning muomalada boʻlish tartibi, ularni sotish tartibi, aksiyalar egalarining huquq va majburiyatlari amaldagi qonun hujjatlariga, mazkur Ustavga, Kompaniya aksiyalari toʻgʻrisidagi Nizomga muvofiq belgilanadi.

V. Huquq va majburiyatlari

34. Kompaniya oʻz maqsadlariga erishish uchun quyidagi huquqlarga ega boʻladi:

oʻz nomidan shartnomalar, kontraktlar tuzish, boshqa yuridik harakatlarni, shu jumladan, kredit va veksel operatsiyalarini amalga oshirish, binolar, inshootlar, korxonalar, transport vositalarini va boshqa koʻchar va koʻchmas mulkni sotib olish, ijaraga olish, berish;

istalgan moliya-kredit muassasalarida hisob-kitob va boshqa schyotlar ochish hamda ular orqali oʻz kontragentlari bilan kelishgan holda cheklashlarsiz naqd pulsiz hisob-kitob boʻyicha, naqd pul yoki boshqa mablagʻlar bilan milliy va xorijiy valyutada operatsiyalarni amalga oshirish;

belgilangan tartibda tashqi iqtisodiy faoliyatni amalga oshirish;

oʻzining banklardagi schyotiga oʻtkaziladigan oʻz pul mablagʻlarini mustaqil sarflash;

milliy yoki xorijiy valyutadagi kreditlardan foydalanish;

ixtiyoriy birlashmalarga kirish, qoʻshma korxonalar, uyushmalar, korporatsiyalarning taʼsischisi boʻlish, ularning faoliyatida qatnashish, tijorat asosida ularga mablagʻ qoʻyish;

belgilangan tartibda Oʻzbekiston Respublikasi hududida va uning tashqarisida oʻz shuʼba korxonalarini, filiallari va vakolatxonalarini tashkil etish, ularning ustavlarini va ular toʻgʻrisidagi nizomlarni tasdiqlash.

Chet elda shuʼba korxonalar, filiallar va vakolatxonalar tashkil etish toʻgʻrisidagi qaror Kompaniya tomonidan amaldagi qonun hujjatlariga muvofiq qabul qilinadi;

moliyaviy mablagʻlarni, intellektual mulk obyektlarini, fuqarolar va yuridik shaxslarning mol-mulkini va alohida mulkiy va nomulkiy huquqlarni shartnoma asosida jalb etish va ulardan foydalanish. Litsenziyalar va patentlar sotib olish;

Kompaniyani rivojlantirish dasturini mustaqil shakllantirish, kontragentlarni tanlash, oʻzaro munosabatlar tartibini belgilash;

Kompaniyani boshqarish boʻyicha maʼmuriy-boshqaruv faoliyatini mustaqil belgilash, xodimlarni ishga yollash va ishdan boʻshatish;

Kompaniya oladigan foydani Kompaniya Ustaviga muvofiq tasarruf etish;

fuqarolarga, yuridik shaxslarga, davlat boshqaruvi organlariga nisbatan qonunchilikda belgilangan tartibda sudda (xoʻjalik sudida) daʼvogar va javobgar boʻlish.

35. Kompaniya quyidagilarga majburdir:

oʻz faoliyatini amaldagi qonun hujjatlariga, mazkur Ustavga qatʼiy rioya qilgan holda amalga oshirish;

oʻz xodimlarini hamda shartnoma (kontrakt) boʻyicha ishlovchi shaxslarni amaldagi qonun hujjatlariga muvofiq mehnat shartnomasi kontrakt)da kelishilgan majburiy tibbiy sugʻurta va sugʻurtaning boshqa turi bilan taʼminlash.

36. Kompaniya aksionerlari quyidagi huquqlarga egadir:

Kompaniyaning umumiy yigʻilishlarida shaxsan yoki oʻz vakili orqali qatnashish yoʻli bilan Kompaniya ishlarini boshqarish;

Umumiy yigʻilishda nazarda tutilgan tartibda aksionerlar oʻrtasida taqsimlanishi kerak boʻlgan foyda (dividendlar) ulushini olish;

Kompaniyaning boshqaruv va nazorat organlariga saylash va saylanish;

Kompaniyaning boshqaruv organlaridan Kompaniya faoliyati toʻgʻrisidagi zarur axborotni olish.

37. Kompaniya aksionerlari quyidagilarga majburdir:

Kompaniya Ustavi qoidalariga va boshqa ichki normativ hujjatlarga rioya etish;

Kompaniyaga nisbatan oʻz zimmasiga qabul qilgan majburiyatlarni bajarish;

Kompaniya aksionerlari Umumiy yigʻilishi tomonidan qabul qilingan qarorlarni qatʼiy bajarish.

VI. Daromad (foyda)ni taqsimlash va zararlarni qoplash tartibi

38. Foyda moddiy va unga tenglashtirilgan xarajatlar qoplangandan keyin, shu jumladan, mehnatga haq toʻlash xarajatlari, bank krediti boʻyicha foizlar toʻlangandan keyin Kompaniya faoliyatidan olingan tushumdan shakllanadi.

39. Oʻzbekiston Respublikasi qonun hujjatlariga muvofiq balans foydadan soliq stavkalari boʻyicha budjetga toʻlovlar toʻlanadi.

40. Shundan keyin vujudga kelgan sof foyda Kompaniyaning toʻliq tasarrufida qoladi va Kompaniyaning quyidagi jamgʻarmalarini shakllantirishga sarflanadi:

a) tavakkal qilish jamgʻarmasi;

b) isteʼmol, ijtimoiy rivojlantirish va ishlab chiqarishni rivojlantirish jamgʻarmasi;

va, bundan tashqari, dividendlarga va xayriya faoliyatiga toʻlovlar.

41. Tavakkal qilish jamgʻarmasi ustav fondining 15 foizini tashkil etadi hamda fond tomonidan koʻrsatib oʻtilgan miqdor uning summasining 5 foizi miqdorida sof foydadan yillik ajratma hisobidan shakllantiriladi.

42. Zararlarni qoplash tavakkal qilish jamgʻarmasi hisobidan amalga oshiriladi.

43. Aksionerlarga dividendlar toʻlash toʻliq moliya yili yakunlari boʻyicha taftish komissiyasining xulosasidan keyin Kompaniya balansi boʻyicha amalga oshiriladi.

44. Kompaniya majburiyatlar boʻyicha faqat oʻz mol-mulki bilan javob beradi. Aksionerlar Kompaniyaning majburiyatlari boʻyicha oʻzlariga tegishli boʻlgan aksiyalar qiymati doirasida javob beradilar. Aksiyalarning haqini toʻliq toʻlamagan aksionerlar Kompaniya majburiyatlari va toʻlanmagan summa, doirasida javob beradilar. Kompaniya aksionerlarning majburiyatlari boʻyicha javob bermaydi.

VII. Boshqaruv va nazorat organlarining tarkibi va vakolatlari

45. Quyidagilar Kompaniyaning boshqaruv organlari hisoblanadi:

a) aksionerlarning Umumiy yigʻilishi;

b) boshqaruv;

v) ijro etuvchi direksiya.

46. Bir yilda kamida bir marta chaqiriladigan aksionerlarning Umumiy yigʻilishi Kompaniyaning yuqori organi hisoblanadi. Aksionerlarning navbatdan tashqari yigʻilishlari quyidagi hollarda chaqiriladi:

a) ustav fondi ancha, 30 foizdan ortiq koʻpayganda yoki kamayganda;

b) uzoq vaqt zarar koʻrgan holda faoliyat koʻrsatilganda;

v) Kompaniya boshqaruvi va ijro etuvchi direksiyasining tashabbusi boʻyicha.

47. Quyidagilar aksionerlar Umumiy yigʻilishining mutlaq vakolatiga kiradi;

a) Kompaniya faoliyatining asosiy yoʻnalishlarini aniqlash, uning rejalarini va ularning bajarilishi toʻgʻrisidagi hisobotlarni tasdiqlash;

b) Kompaniya Ustavini oʻzgartirish;

v) Kompaniya boshqaruvi aʼzolarini saylash va chaqirib olish;

g) taftish komissiyasi aʼzolarini saylash va chaqirib olish;

d) Kompaniya, shu jumladan, uning filiallari faoliyatining yillik natijalarini tasdiqlash, taftish komissiyasining hisobotlari va xulosalarini, foyda va zararlarni taqsimlash tartibini tasdiqlash;

e) Kompaniya faoliyatini toʻxtatish toʻgʻrisida qaror qabul qilish, tugatish komissiyasini tayinlash, tugatish balansini tasdiqlash.

Aksionerlarning Umumiy yigʻilishi oʻz vakolatlarining bir qismini Kompaniyaning boshqaruviga va ijro etuvchi direksiyasiga berishi mumkin.

48. Aksionerlarning Umumiy yigʻilishlari oʻrtasidagi davrda Kompaniya faoliyatini Kompaniya boshqaruvi muvofiqlashtiradi va nazorat qiladi, boshqaruvni saylash tartibi aksionerlarning Umumiy yigʻilishi tomonidan belgilanadi.

49. Boshqaruv vakolatiga quyidagilar kiradi:

a) ijro etuvchi direksiya faoliyatini nazorat qilish;

b) Kompaniyaning moliyaviy ishlari natijalarini tahlil qilish va baholash;

v) kelgusida qiymatli qogʻozlar chiqarish toʻgʻrisidagi qarorni baholash;

g) oʻz vakolati doirasida ustav fondini oʻzgartirish;

d) filiallar va vakolatxonalarni tashkil etish, qayta tashkil etish va tugatish;

e) Kompaniyaning mansabdor shaxslarini mulkiy javobgarlikka tortish toʻgʻrisida qarorlar chiqarish;

j) Kompaniyaning protsedura qoidalarini va boshqa ichki hujjatlarini tasdiqlash, Kompaniyaning tashkiliy tuzilishini belgilash;

z) Kompaniya tomonidan chiqariladigan aksiyalarni sotib olish toʻgʻrisidagi masalani hal etish;

i) Kompaniya, uning filiallari va vakolatxonalari mansabdor shaxslari mehnatiga haq toʻlash shartlarini belgilash.

50. Kompaniya boshqaruvi aksionerlarning Umumiy yigʻilishiga hisob beradi hamda uning qarorlari bajarilishini tashkil etadi.

51. Kompaniya boshqaruvining raisi:

a) Kompaniyaga umumiy rahbarlikni amalga oshiradi;

b) shuba korxonalar, filiallar, vakolatxonalar va boshqa tarkibiy boʻlinmalarning ustavlarini va ular toʻgʻrisidagi nizomlarni tasdiqlaydi;

v) oʻz oʻrinbosarlari, boshqaruv aʼzolari oʻrtasida vazifalarni taqsimlaydi, ularning vakolatlarini belgilaydi;

g) farmoyishlar chiqaradi va yoʻriqnomalarni tasdiqlaydi;

d) departamentlar direktorlarini ishga qabul qiladi va ishdan boʻshatadi;

e) Kompaniya nomidan ishonchnomasiz ish koʻrishga, bu huquqni oʻz oʻrinbosarlariga berishga haqlidir;

j) Kompaniyaning moliya-xoʻjalik faoliyati bilan bogʻliq masalalarni hal etadi.

52. Ijro etuvchi direksiya ishiga departamentlar direktorlari rahbarlik qiladilar, ular nomzodlari boshqaruvda koʻrib chiqilgandan keyin Kompaniya boshqaruvi raisi tomonidan lavozimga tayinlanadilar.

Direksiya nomidan ishonchnomasiz ish koʻrish, shartnomalar, shu jumladan, mehnat shartnomalari tuzish hamda aksionerlar Umumiy yigʻilishi va Kompaniya boshqaruvining mutlaq vakolatiga kiradigan masalalardan tashqari moliya-xoʻjalik faoliyatining barcha masalalarini hal etish huquqi Kompaniya boshqaruvining qarori bilan departamentlar direktorlaridan biriga yuklanadi.

53. Kompaniya ijro etuvchi organlarining moliya-xoʻjalik faoliyati ustidan nazoratni aksionerlarning Umumiy yigʻilishida taʼsischilar va aksionerlarning uch vakilidan iborat tarkibi saylanadigan taftish komissiyasi amalga oshiradi.

54. Kompaniya, uning shuʼba korxonalari, filiallari, vakolatxonalari va boshqa tarkibiy boʻlinmalarining moliya-xoʻjalik faoliyatini tekshirish aksionerlar Umumiy yigʻilishining, Kompaniya boshqaruvining topshirigʻi boʻyicha, shuningdek, oʻz tashabbusi bilan yoxud aksiyalarning 10 foizdan koʻpiga egalik qilgan aksionerlarning talabi boʻyicha taftish komissiyasi tomonidan oʻtkaziladi. Kompaniyaning moliya-xoʻjalik faoliyatini tekshirish shuningdek, moliya va soliq organlari, boshqa davlat organlari tomonidan (ularning vakolatlari doirasida) ham amalga oshiriladi.

55. Taftish komissiyasi Kompaniyaning mansabdor shaxslaridan unga barcha zarur materiallarni, buxgalteriya hujjatlarini yoki boshqa hujjatlarni va shaxsiy tushuntirishlarni taqdim etishni talab qilishga haqlidir.

56. Taftish komissiyasining raisi Kompaniya boshqaruvining majlislarida maslahat ovozi bilan qatnashishga haqlidir.

57. Taftish komissiyasi tekshirishlar natijalari toʻgʻrisida aksionerlarning Umumiy yigʻilishiga yoki Kompaniya boshqaruviga axborot beradi.

58. Taftish komissiyasi yillik hisobotlar va balanslar boʻyicha xulosalar tuzadi. Kompaniya balansi taftish komissiyasining xulosasisiz aksionerlarning Umumiy yigʻilishi tomonidan tasdiqlanishi mumkin emas.

VIII. Boshqaruv organlari tomonidan qaror qabul qilish tartibi

59. Nominal qiymati 25.000 soʻm-kupon boʻlgan bir aksiyaning egasi aksionerlar Umumiy yigʻilishida bitta ovoz berish huquqiga ega boʻladi.

60. Kompaniya boshqaruvi aksionerlarni Umumiy yigʻilish chaqirilishi toʻgʻrisida moʻljallanayotgan kundan kamida 45 kun oldin xabardor qiladi. Shoshilinch hollarda boshqaruvning qarori bilan aksionerlarning Umumiy yigʻilishi chaqirilishi toʻgʻrisida koʻrsatib oʻtilgan muddatga rioya qilinmagan holda xabar qilishga yoʻl qoʻyiladi.

Jami 10 foizdan koʻp ovozga ega boʻlgan aksionerlar Umumiy yigʻilish kunidan kamida 40 kun oldin kun tartibiga masalalar kiritilishini talab qilishlari mumkin.

61. Umumiy yigʻilish, agar unda ovoz beruvchilarning 60 foizidan koʻpi qatnashgan boʻlsa, vakolatli hisoblanadi.

Aksionerlar Umumiy yigʻilishi tomonidan quyidagi masalalarni hal etish uchun aksionerlar yigʻilishida qatnashayotgan ovozlarning toʻrtdan uch qismidan koʻpi zarurdir:

a) Kompaniya Ustavini oʻzgartirish;

b) Kompaniya faoliyatini toʻxtatish toʻgʻrisida qaror qabul qilish.

Qolgan barcha masalalar boʻyicha qarorlar oddiy koʻpchilik ovoz bilan qabul qilinadi.

62. Kompaniya boshqaruvining qarori, agar hozir boʻlganlarning soni Kompaniya aʼzolari Umumiy sonining uchdan ikki qismidan koʻpini tashkil etsa, vakolatli hisoblanadi.

63. Kompaniya boshqaruvining vakolatiga tegishli masalalar boʻyicha Kompaniya boshqaruvining qarorlari oddiy koʻpchilik ovoz bilan qabul qilinadi hamda raisning farmoyishi bilan rasmiylashtiriladi.

64. Qaror qabul qilishda ovozlar teng boʻlgan hollarda raisning ovozi hal qiluvchi hisoblanadi.

IX. Hisob va hisobot

65. Kompaniyaning hisob va hisoboti Oʻzbekiston Respublikasi qonun hujjatlarida belgilangan tartibda amalga oshiriladi.

66. Kompaniyaning moliyaviy yili 1-yanvardan boshlanadi va 31-dekabrda tamom boʻladi.

67. Kompaniya yilning har choragida keyingi oyning 10-kunidan kechikmay soliq inspeksiyasiga va tuman statistika boshqarmasiga axborot taqdim etadi.

Aksionerlik jamiyati taqdim etilayotgan axborotning ishonchliligi uchun javob beradi.

X. Faoliyatning toʻxtatilishi

68. Kompaniyaning faoliyati:

sinish holatida yoxud uning tomonidan qonunchilik muntazam yoki qoʻpol ravishda buzilgan taqdirda tegishli sud qarori asosida;

Kompaniya boshqaruvining yuqori organi qaroriga binoan;

u tugatilgan va qoʻshib yuborish, birlashtirish, boʻlish, ajratish yoki qayta tuzish yoʻli bilan qayta tashkil etilgan taqdirda toʻxtatilishi mumkin.

69. Kompaniya boshqaruvi “Oʻzbekiston Respublikasida korxonalar toʻgʻrisida” Oʻzbekiston Respublikasi Qonunining 38, 39 va 40-moddalariga amal qilgan holda tugatishni oʻtkazish tartibi va muddatlarini, shuningdek, kreditorlar tomonidan daʼvo qoʻzgʻash muddatlarini belgilaydi.

70. Kompaniyani tugatish aksionerlar Umumiy yigʻilishi tomonidan tayinlanadigan tugatish komissiyasi tomonidan amalga oshiriladi. Tugatish komissiyasi tayinlangan paytdan boshlab Kompaniya ishlarini boshqarish boʻyicha barcha vakolatlar unga oʻtadi.

71. Tugatish komissiyasi tugatish balansini tuzadi va tasdiqlash uchun uni aksionerlarning Umumiy yigʻilishiga taqdim etadi. Kompaniyaga qatnashchilar tomonidan foydalanish uchun berilgan mol-mulk natural shaklda haq toʻlamay qaytariladi.

72. Kompaniyani tugatishda kreditorlar va aksionerlarning daʼvolari qondirilgandan keyin qolgan mol-mulk aksiyalarga mutanosib ravishda aksionerlar oʻrtasida taqsimlanadi.