Ichki qatnovlarda harakatlanuvchi poyezdlarda yoʻlovchi tashish xizmatlarini koʻrsatishdan koʻrilgan zararlarni Davlat budjeti hisobidan kompensatsiya qilish tartibini tasdiqlash toʻgʻrisida (425-son)
16.07.2024
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Prezidentining “Oʻzbekiston Respublikasi temir yoʻl transporti sohasini tubdan isloh qilish chora-tadbirlari toʻgʻrisida” 2023-yil 10-oktabrdagi PQ-329-son qarori ijrosini taʼminlash, shuningdek, temir yoʻlda yoʻlovchilarni tashish xizmatlarini rivojlantirish uchun qulay shart-sharoitlarni yaratish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Oʻzbekiston Respublikasi temir yoʻl transporti sohasini tubdan isloh qilish chora-tadbirlari toʻgʻrisida” 2023-yil 10-oktabrdagi PQ-329-son qaroriga asosan quyidagilar:
2024-yil 1-yanvardan boshlab yuk vagonlari va konteynerlarni taqdim etish hamda yuqori tezlikda harakatlanadigan va tezyurar poyezdlarda yoʻlovchilarni tashish xizmatlari tariflarini davlat tomonidan tartibga solish amaliyotidan voz kechib, ularni bozor tamoyillari asosida tartibga solish mexanizmiga oʻtilganligi;
2025-yil 1-yanvardan boshlab mahalliy yoʻnalishlarda yoʻlovchilarni tashish xizmatlarini (yuqori tezlikda harakatlanadigan va tezyurar poyezdlarda yoʻlovchilarni tashish bundan mustasno) koʻrsatishdan koʻrilgan zararlar Davlat budjeti hisobidan kompensatsiya qilinishi belgilanganligi maʼlumot uchun qabul qilinsin.
2. Ichki qatnovlarda harakatlanuvchi poyezdlarda yoʻlovchi tashish xizmatlarini koʻrsatishdan koʻrilgan zararlarni Davlat budjeti hisobidan kompensatsiya qilish tartibi toʻgʻrisidagi vaqtinchalik nizom ilovaga muvofiq tasdiqlansin.
3. Belgilansinki:
2024-yil 1-oktabrdan boshlab “Oʻzbekiston temir yoʻllari” AJning barcha turdagi xizmatlari boʻyicha daromad va xarajatlarning alohida hisobi yuritiladi. Bunda yoʻlovchi tashish uchun alohida daromad va xarajatlar hisobga olinib, yoʻlovchi tashish xizmati narxlarini hisoblash bazasi yaratilishi inobatga olinadi;
2025-yil 1-yanvardan boshlab temir yoʻl xizmatlarini koʻrsatuvchi korxonalarning ichki qatnovlarda harakatlanuvchi poyezdlarda yoʻlovchi tashish xizmatlarini koʻrsatishdan koʻrgan zararlari mazkur qaror bilan tasdiqlangan vaqtinchalik nizom talablari asosida Davlat budjeti hisobidan kompensatsiya qilinadi.
4. Transport vazirligi Iqtisodiyot va moliya vazirligi, Raqobatni rivojlantirish va isteʼmolchilar huquqlarini himoya qilish qoʻmitasi hamda “Oʻzbekiston temir yoʻllari” AJ bilan birgalikda:
2025-yil 1-dekabrga qadar temir yoʻl transporti sohasida davlat tomonidan tartibga solinadigan xizmatlar narxini aniqlash va tasdiqlash tartibini ishlab chiqsin. Bunda xizmat koʻrsatish sifati hamda operatsion samaradorlikni oshirishga qaratilgan ragʻbatlantirish mexanizmlarini (bonuslar) joriy qilish hamda avans toʻlovlarini amalga oshirish metodologiyasini qoʻllash hisobga olinadi;
2026-yil 1-iyulga qadar davlat buyurtmasi asosida temir yoʻl transportida ichki qatnovlarda harakatlanuvchi poyezdlarda yoʻlovchi tashish xizmatlarini koʻrsatish shartnomalarini (Public service agreement) tuzish va moliyalashtirish tartibi loyihasini Vazirlar Mahkamasiga kiritsin.
Bunda 2027-yildan boshlab Davlat budjetidan kompensatsiya mablagʻlari faqatgina ichki qatnovlarda harakatlanuvchi poyezdlarda yoʻlovchi tashish xizmatlarini koʻrsatish shartnomalari asosida moliyalashtiriladi.
5. Transport vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni uch oy muddatda ushbu qarorga muvofiqlashtirsin.
6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov hamda transport vaziri I.R. Maxkamov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 16-iyul,
425-son
Vazirlar Mahkamasining 2024-yil 16-iyuldagi 425-son qaroriga ILOVA
Ichki qatnovlarda harakatlanuvchi poyezdlarda yoʻlovchi tashish xizmatlarini koʻrsatishdan koʻrilgan zararlarni Davlat budjeti hisobidan kompensatsiya qilish tartibi toʻgʻrisidagi
VAQTINCHALIK NIZOM
1-bob. Umumiy qoidalar
1. Ushbu Vaqtinchalik nizom (keyingi oʻrinlarda — Nizom) ichki qatnovlarda harakatlanuvchi poyezdlarda (yuqori tezlikda harakatlanuvchi va tezyurar poyezdlar bundan mustasno) yoʻlovchi tashish xizmatlarini koʻrsatishdan koʻrilgan zararlarni Davlat budjeti hisobidan kompensatsiya qilish tartibini belgilaydi hamda 2027-yil 1-yanvargacha amal qiladi.
2. Ushbu Nizomda quyidagi asosiy tushunchalar qoʻllaniladi:
ichki qatnovlar — yuklar, yoʻlovchilar, bagaj va yuk bagajini Oʻzbekiston Respublikasi doirasida tashish;
yoʻlovchi poyezdi — yoʻlovchi vagonlaridan tashkil topgan, yoʻlovchilar, bagaj va pochtani tashish uchun moʻljallangan poyezd. Qatnovlar turlariga koʻra yoʻlovchi poyezdlar uzoq masofali — 700 km dan ortiq, mahalliy — 700 km gacha hamda shahar atrofi — 200 km gacha masofaga boʻlinadi;
kompensatsiya — tashuvchining ichki qatnovlarda harakatlanuvchi poyezdlarda (yuqori tezlikda harakatlanuvchi va tezyurar poyezdlar bundan mustasno) yoʻlovchi tashish xizmatlarini koʻrsatishdan koʻrilgan zararlarni Oʻzbekiston Respublikasining respublika budjeti hisobidan qoplash uchun ajratiladigan mablagʻ;
platskarta qiymati — chipta toʻliq qiymatining yoʻlovchini tashishda umumiy masofa uchun belgilanadigan hamda yoʻl davomida vagondan foydalanish va yoʻlovchiga xizmat koʻrsatish toʻlovini oʻz ichiga oladigan qismi;
tarif — chipta va platskarta qiymatlari yigʻindisi;
tashish xarajatlari — tashuvchining yoʻlovchi vagonlarini soz holda saqlash, ularga texnik xizmat koʻrsatish va harakatlanish davomida yoʻlovchilarga koʻrsatiladigan xizmatlar uchun xarajatlar;
tashuvchi — temir yoʻl transportida yoʻlovchi tashish xizmatlarini koʻrsatuvchi yuridik shaxslar;
temir yoʻl infratuzilma xizmatlarini koʻrsatish xarajatlari — temir yoʻl va temir yoʻl inshootlari, temir yoʻl stansiyalari, temir yoʻl vokzallari, lokomotivlar va elektropoyezdlar xizmatlarini koʻrsatish, shuningdek, elektr taʼminoti qurilmalari, aloqa tarmoqlari, signalizatsiya, markazlashtirish va bloklash tizimlari, axborot majmualari, harakatni boshqarish tizimlari, binolar, favqulodda holatlarda qayta tiklash poyezdi, qurilmalar, moslama va uskunalardan foydalanish xarajatlari;
chipta qiymati — yoʻnalish boʻyicha yoʻlovchi tashiganlik uchun hisoblangan toʻlovlar summasi sifatida belgilanadigan chiptaning toʻliq qiymatidan bir qismi;
yuqori tezlikda harakatlanuvchi va tezyurar poyezdlar — harakatlanish masofasi cheklanmagan, 91 km soatdan yuqori tezlikda harakatlanuvchi elektropoyezdlar.
3. Ichki qatnovlarda harakatlanuvchi poyezdlarda yoʻlovchi tashish xizmatlarini koʻrsatishdan koʻrilgan zararlar Davlat budjeti hisobidan ushbu Nizomga 1-ilovaga muvofiq sxemaga asosan kompensatsiya qilinadi.
2-bob. Tashuvchining ichki qatnovlarda harakatlanuvchi poyezdlarda yoʻlovchi tashish xizmatlarini koʻrsatishdan koʻrilgan zararlarini hisoblash
4. Ichki qatnovlarda harakatlanuvchi poyezdlarda yoʻlovchi tashish xizmatlarini koʻrsatishda tashuvchining xarajatlari bevosita tashish va temir yoʻl infratuzilma xizmatlarini koʻrsatish xarajatlaridan iborat boʻladi.
5. Yoʻlovchi tashishdan olinadigan daromadlar:
mahalliy va uzoq masofali yoʻnalishlarda — chipta va platskarta qiymatlaridan;
shahar atrofi yoʻnalishlarida — chipta qiymatidan shakllanadi.
6. Tashuvchining ichki qatnovlarda harakatlanuvchi poyezdlarda yoʻlovchi tashish xizmatlarini koʻrsatishdan koʻrilgan zararlarni Davlat budjeti hisobidan kompensatsiya qilish miqdori mazkur Nizomga 2 va 3-ilovalardagi jadvallar orqali aniqlanadi.
3-bob. Tashuvchining ichki qatnovlarda harakatlanuvchi poyezdlarda yoʻlovchi tashish xizmatlarini koʻrsatishdan koʻrilgan zararlarini Davlat budjeti hisobidan kompensatsiya qilishni koʻrib chiqish
7. Tashuvchi ichki qatnovlarda harakatlanuvchi poyezdlarda yoʻlovchi tashish xizmatlarini koʻrsatishdan koʻrilgan zararlar boʻyicha hisobotlarni Transport vazirligiga ushbu Nizomga 4-ilovaga muvofiq shakldagi kompensatsiya ajratish toʻgʻrisida ariza bilan birga har oyda keyingi oyning 25-sanasidan kechiktirmay, pochta aloqasi vositalari orqali yoki elektron shaklda yuboradi.
8. Arizaga quyidagi hujjatlar ilova qilinadi:
ushbu Nizomning 6-bandiga muvofiq shakllantirilgan maʼlumotlar;
ariza beruvchining nomi, joylashgan joyi (pochta manzili), STIR va xizmat koʻrsatuvchi tijorat bankidagi hisobvaragʻi rekvizitlari toʻgʻrisidagi maʼlumotlar;
yoʻlovchi tashish bilan bogʻliq xarajat va daromad, moliyaviy natija, yoʻnalish, tarif, qoplanadigan kompensatsiya summasi toʻgʻrisida tasdiqlangan hujjatlar.
Kompensatsiya ajratish uchun taqdim etilgan hujjatlar, maʼlumotlar hamda hisob-kitoblar tashuvchi tomonidan tasdiqlanadi.
9. Ariza va tegishli hujjatlar tashuvchi tomonidan Transport vazirligiga pochta aloqasi vositalari orqali yoki elektron shaklda yuborilganda, mazkur Nizomning 8-bandida koʻrsatilgan hujjatlar toʻliq emasligi aniqlangan taqdirda, Transport vazirligi besh ish kuni ichida tashuvchiga hujjatlardagi kamchiliklar toʻgʻrisida hamda qayta murojaat qilishi haqida yozma yoki elektron shaklda xabar yuboradi.
10. Ariza va ushbu Nizomning 8-bandida koʻrsatilgan hujjatlar toʻliq taqdim etilgan holda, Transport vazirligiga kelib tushgan kundan boshlab oʻn ish kuni davomida koʻrib chiqiladi hamda Iqtisodiyot va moliya vazirligiga yuboriladi.
11. Mablagʻlarni tashuvchiga kompensatsiya tarzida ajratish uchun Iqtisodiyot va moliya vazirligi tomonidan Transport vazirligiga belgilangan tartibda shaxsiy gʻazna hisobvaragʻi ochiladi.
12. Iqtisodiyot va moliya vazirligi Transport vazirligi tomonidan taqdim etilgan tashuvchiga kompensatsiya ajratish boʻyicha buyurtmanomani uch ish kuni ichida koʻrib chiqadi va tegishli mablagʻlarni belgilangan tartibda Transport vazirligining shaxsiy gʻazna hisobvaragʻiga oʻtkazadi.
13. Mablagʻlar kelib tushganidan soʻng Transport vazirligi uch ish kuni ichida tashuvchining tijorat banklardagi hisobvaragʻiga belgilangan kompensatsiya mablagʻlarini oʻtkazib beradi.
4-bob. Yakunlovchi qoidalar
14. Mazkur Nizomni qoʻllashda yuzaga keladigan nizolar qonunchilik hujjatlarida belgilangan tartibda hal etiladi.
15. Ushbu Nizom talablari buzilishida aybdor boʻlgan shaxslar qonunchilik hujjatlariga muvofiq javob beradilar.
Ichki qatnovlarda harakatlanuvchi poyezdlarda yoʻlovchi tashish xizmatlarini koʻrsatishdan koʻrilgan zararlarni Davlat budjeti hisobidan kompensatsiya qilish tartibi toʻgʻrisidagi vaqtinchalik nizomga 1-ILOVA
Ichki qatnovlarda harakatlanuvchi poyezdlarda yoʻlovchi tashish xizmatlarini koʻrsatishdan koʻrilgan zararlarni Davlat budjeti hisobidan kompensatsiya qilish
SXEMASI
Ichki qatnovlarda harakatlanuvchi poyezdlarda yoʻlovchi tashish xizmatlarini koʻrsatishdan koʻrilgan zararlarni Davlat budjeti hisobidan kompensatsiya qilish tartibi toʻgʻrisidagi vaqtinchalik nizomga 2-ILOVA
Ichki qatnovlarda harakatlanuvchi poyezdlarda yoʻlovchi tashish xizmatlarini koʻrsatishdan koʻrilgan zararlarni Davlat budjeti hisobidan kompensatsiya qilish tartibi toʻgʻrisidagi vaqtinchalik nizomga 3-ILOVA
Ichki qatnovlarda harakatlanuvchi poyezdlarda yoʻlovchi tashish xizmatlarini koʻrsatishdan koʻrilgan zararlarni Davlat budjeti hisobidan kompensatsiya qilish tartibi toʻgʻrisidagi vaqtinchalik nizomga 4-ILOVA