Oʻzbekiston Respublikasi Davlat budjetining va davlat maqsadli jamgʻarmalari budjetlarining 2024-yil birinchi choragidagi ijrosi toʻgʻrisida (4396-IV-son)

03.06.2024

Oʻzbekiston Respublikasi Oliy Majlisi Qonunchilik palatasining

qarori

Oʻzbekiston Respublikasi Davlat budjetining va davlat maqsadli jamgʻarmalari budjetlarining 2024-yil birinchi choragidagi ijrosi toʻgʻrisidagi Oʻzbekiston Respublikasi Vazirlar Mahkamasining hisobotini koʻrib chiqib, Oʻzbekiston Respublikasi Oliy Majlisi Qonunchilik palatasi (bundan buyon matnda Qonunchilik palatasi deb yuritiladi) taʼkidlaydiki, Oʻzbekiston Respublikasi Davlat budjetining (bundan buyon matnda Davlat budjeti deb yuritiladi) ijrosi “2024-yil uchun Oʻzbekiston Respublikasining Davlat budjeti toʻgʻrisida”gi Oʻzbekiston Respublikasi Qonunida belgilangan budjet parametrlari doirasida amalga oshirilgan.

Dunyoda davom etayotgan murakkab global siyosiy va iqtisodiy vaziyatga qaramasdan mamlakatimizda keng qamrovli islohotlarning izchil davom ettirilishi, iqtisodiyotning liberallashtirilishi, tadbirkorlarning har tomonlama qoʻllab-quvvatlanishi, fiskal va monetar siyosatning oʻzaro muvozanatli yuritilishi Oʻzbekiston iqtisodiyotining barqaror oʻsish surʼatlarini saqlab qolish imkoniyatini berdi.

Natijada joriy yilning birinchi choragida yuqori iqtisodiy oʻsish surʼatlari taʼminlanib, yalpi ichki mahsulot hajmi oʻtgan yilning mos davriga nisbatan 6,2 foizga oʻsib, Davlat budjeti daromadlari hisobot davrida rejaga nisbatan 111,3 foizga yoki 5,3 trln. soʻmga oshirib bajarilgan.

Mamlakatimizda ijtimoiy davlat prinsiplariga amal qilingan holda Davlat budjeti ijtimoiy xarajatlarining 89,5 foizi ijtimoiy sohani rivojlantirish va aholini ijtimoiy jihatdan qoʻllab-quvvatlash xarajatlariga yoʻnaltirilgan. “Ochiq budjet” portali orqali “Tashabbusli budjet” hamda “Mening yoʻlim” loyihalari budjet mablagʻlarini aholi farovonligiga xizmat qiladigan, fuqarolar tashabbusi asosida shakllangan loyihalarga ustuvor ravishda yoʻnaltirishga va ularning natijadorligini taʼminlashga zamin yaratmoqda.

Shu bilan birga Davlat budjetining ijrosini taʼminlash borasida ayrim kamchiliklarga ham yoʻl qoʻyilgan. Jumladan, Davlat budjetidan yetarlicha mablagʻlar ajratilgan boʻlsa-da, biroq ayrim vazirliklar va idoralar tomonidan mablagʻlar oʻz vaqtida hamda toʻliq oʻzlashtirilmasdan qolmoqda.

Xususan, Oʻzbekiston Respublikasi Sogʻliqni saqlash vazirligi tomonidan otorinolaringologiya xizmatini rivojlantirish uchun ajratilgan mablagʻlar 13,4 foizga oʻzlashtirilgan. Bolalarni, tugʻish yoshidagi va homilador ayollarni maxsus profilaktik preparatlar bilan bepul taʼminlash hamda nogironligi boʻlgan shaxslarga koʻrsatilayotgan tibbiy-ijtimoiy xizmatlar sifatini yanada yaxshilash boʻyicha ajratilgan mablagʻlarni oʻzlashtirish boʻyicha ishlar amalga oshirilmagan.

Oʻzbekiston Respublikasi Oliy taʼlim, fan va innovatsiyalar vazirligi tomonidan davlat xususiy sheriklik asosida qurilgan talabalar turar joylarida yashaydigan talabalar uchun davlat sherigiga beriladigan subsidiyalar uchun ajratilgan mablagʻlar 8,4 foizga oʻzlashtirilgan.

Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi tomonidan choʻl, togʻli va togʻoldi hududlarda choʻllanish va qum koʻchishi, tuproqning suv va shamol eroziyasining oldini olish hamda ekologik muhitni yaxshilash maqsadida himoya oʻrmonlarini (ihota) barpo etish xarajatlari 1,2 foizga, hayvonot va oʻsimlik dunyosi, muhofaza etiladigan tabiiy hududlarning hamda chiqindilarni utilizatsiya qilish joylarining davlat kadastrlarini yuritish xarajatlari 15 foizga oʻzlashtirilgan.

Oʻzbekiston Respublikasi Transport vazirligi tomonidan obyektlarni loyihalashtirish, qurish (rekonstruksiya qilish) va jihozlash uchun kapital qoʻyilmalarga ajratilgan mablagʻlar 16 foizga oʻzlashtirilgan.

Oʻzbekiston Respublikasi Madaniy meros agentligi tomonidan davlat muzeylarining moddiy-texnika bazasini mustahkamlashga va obyektlarni loyihalashtirish, qurish (rekonstruksiya qilish) va jihozlash uchun kapital qoʻyilmalarga ajratilgan mablagʻlar umuman oʻzlashtirilmagan.

Davlat budjetini shakllantirish, tuzish, koʻrib chiqish, qabul qilish, tasdiqlash va ijro etish hamda uning ijrosini nazorat qilish, shuningdek hisobotlarning tayyorlanish va tasdiqlanish jarayonlarini avtomatlashtirish ishlari yakuniga yetkazilmagan.

Shuningdek ayrim vazirliklar va idoralar, mahalliy hokimliklar, budjet tashkilotlari tomonidan budjet jarayoniga oid maʼlumotlarni oʻz rasmiy veb-saytlariga joylashtirishga doir ishlar lozim darajada tashkil etilmagan.

Oʻzbekiston Respublikasi Davlat budjetining va davlat maqsadli jamgʻarmalari budjetlarining 2024-yil birinchi choragidagi ijrosi toʻgʻrisidagi Oʻzbekiston Respublikasi Vazirlar Mahkamasining hisobotini koʻrib chiqib, Oʻzbekiston Respublikasi Oliy Majlisining Qonunchilik palatasi qaror qiladi:

1. Oʻzbekiston Respublikasi Davlat budjeti va davlat maqsadli jamgʻarmalari budjetlarining 2024-yil birinchi choragidagi ijrosi toʻgʻrisidagi hisobot tasdiqlansin.

2. Oʻzbekiston Respublikasi Vazirlar Mahkamasiga:

iqtisodiyotning barqaror oʻsish surʼatlarini va Davlat budjeti daromadlarining prognoz koʻrsatkichlarini taʼminlash hamda aholini ijtimoiy himoya qilishga qaratilgan tizimli choralarni davom ettirish;

ijtimoiy sohalarni rivojlantirishga doir chora-tadbirlarni amalga oshirishda budjet va budjetdan tashqari jamgʻarmalar mablagʻlaridan maqsadli va samarali foydalanishni taʼminlash;

2024-yilda “Yoshlar va biznesni qoʻllab-quvvatlash yili” Davlat dasturi ijrosini taʼminlashda markazlashgan investitsiyalar, mahalliy budjet mablagʻlaridan hamda boshqa manbalardan ajratilayotgan mablagʻlardan oqilona foydalanishni taʼminlash choralarini kuchaytirish tavsiya etilsin.

3. Oʻzbekiston Respublikasi Iqtisodiyot va moliya vazirligiga:

budjet tashkilotlari va budjetdan mablagʻ oluvchilarning Davlat budjetida koʻzda tutilgan xarajatlarini Davlat budjeti barqarorligini taʼminlagan holda oʻz vaqtida moliyalashtirish;

Davlat budjeti xarajatlari oʻzlashtirilmaganligi holallarini tegishli vazirliklar va idoralar bilan birgalikda tahlil qilgan holda, xarajatlarning maqsadli oʻzlashtirilishini taʼminlash;

budjet tashkilotlari va budjetdan mablagʻ oluvchilar tomonidan budjet intizomi buzilishi, kamomad va maqsadsiz xarajatlarga yoʻl qoʻyilishi holatlarini bartaraf etish tavsiya etilsin.

4. Oʻzbekiston Respublikasi Vazirlar Mahkamasi huzuridagi Soliq qoʻmitasiga:

Davlat budjeti daromadlarining prognoz koʻrsatkichlari soʻzsiz bajarilishini taʼminlash;

qoʻshimcha daromadlar manbalarini aniqlash va ularning toʻliq undirilishini taʼminlash;

soliqlarning yigʻiluvchanlik darajasini oshirish, boqimanda qarzdorliklarni kamaytirish hamda ortiqcha toʻlovlarga yoʻl qoʻymaslik choralarini koʻrish tavsiya qilinsin.

5. Oʻzbekiston Respublikasi Oliy Majlisi Qonunchilik palatasidagi siyosiy partiyalar fraksiyalariga Davlat budjetidan ajratilayotgan mablagʻlar hisobidan amalga oshirilayotgan loyihalarning natijadorligini oʻz faoliyat yoʻnalishlaridan kelib chiqqan holda oʻrganish va bu borada deputatlar nazoratini kuchaytirish choralarini koʻrish tavsiya etilsin.

6. Oʻzbekiston Respublikasi Oliy Majlisi Qonunchilik palatasining qoʻmitalariga davlat rivojlantirish dasturlari boʻyicha Davlat budjetidan ajratilgan mablagʻlarning oʻz vaqtida oʻzlashtirilmasligi holatlarini va sabablarini oʻz faoliyati yoʻnalishlaridan kelib chiqqan holda tahlil qilib, tegishli vazirliklar va idoralar rahbarlarining axborotini qoʻmita yigʻilishlarida eshitib borish tavsiya etilsin.

7. Oʻzbekiston Respublikasi Oliy Majlisi Qonunchilik palatasining deputatlariga joylarga chiqish davomida “Tashabbusli budjet” hamda “Yashil makon” umummilliy loyihasini moliyalashtirishga hamda amalga oshirilayotgan loyihalar sifatini nazorat qilishga bagʻishlangan xalq deputatlari mahalliy Kengashlarining yigʻilishlarida ishtirok etish tavsiya etilsin.

8. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri N. ISMOILOV

Toshkent sh.,

2024-yil 3-iyun,

4396-IV-son