Samarqand davlat chet tillar institutini tashkil etish toʻgʻrisida (542-son)

09.11.1994

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Samarqand davlat chet tillar institutini tashkil etish toʻgʻrisida” 1994-yil 8-noyabrdagi Farmoniga muvofiq Vazirlar Mahkamasi qaror qiladi:

1. 1994-yil 1-dekabrdan boshlab Samarqand davlat universitetining tegishli fakulteti negizida Samarqand davlat chet tillar instituti tashkil etilsin.

2. Quyidagilar institut faoliyatining asosiy yoʻnalishlari etib belgilansin:

roman- german filologiyasi sohasida mutaxassislar tayyorlash;

chet tillar boʻyicha pedagoglar, keng ixtisosli tarjimonlar va ekskursiya olib boruvchilarni tayyorlash;

maktabgacha tarbiya pedagogikasi va psixologiyasi boʻyicha chet tillarni biladigan mutaxassislar tayyorlash va ularni qayta tayyorlash;

oliy taʼlim negizida til ixtisosliklari boʻyicha kadrlarni jadal oʻqitish;

chet tillar boʻyicha mutaxassislarning malakasini oshirish;

1995/96 oʻquv yilidan boshlab oʻquv jarayoniga yangi pedagogik texnologiyalarni, shu jumladan, chet tillarni jadal oʻqitish texnologiyalarini joriy qilish;

institut moddiy-texnika bazasini mustahkamlash va rivojlantirish, bu maqsadlarda amaldagi qonunchilik doirasida oʻz ilmiy kuchlari imkoniyatlariga muvofiq pulli xizmatlar tarmogʻini tashkil etish.

3. Oʻzbekiston Respublikasi Oliy va oʻrta maxsus taʼlim vazirligi, bir oy muddatda yangi tashkil etilayotgan institut ustavini, tuzilmasini, oʻquv rejalari va til mutaxassislarini tayyorlash va qayta tayyorlash dasturlarini tasdiqlasin.

4. Samarqand viloyati hokimligi Oʻzbekiston Respublikasi Oliy va oʻrta maxsus taʼlim vazirligi bilan birgalikda:

bir hafta muddatda institutni joylashtirish uchun tegishli bino ajratish masalasini hal qilsin;

institut auditoriyalari va yotoqxonalarini zarur asosli tuzatish ishlarini amalga oshirsin.

5. Oʻzbekiston Respublikasi Moliya vazirligi institut xarajatlariga va uni oʻquv asbob-uskunalari bilan jihozlash, anjomlar va oʻqitishning texnik vositalarini xarid qilish uchun zarur mablagʻlar ajratsin.

6. Mazkur qarorning bajarilishini nazorat qilish Vazirlar Mahkamasining Taʼlim va fan boʻlimiga yuklansin.

Vazirlar Mahkamasining Raisi I. KARIMOV

Toshkent sh.,

1994-yil 9-noyabr

542-son