Oʻzbekiston Respublikasi Markaziy saylov komissiyasining Reglamentini tasdiqlash toʻgʻrisida (1329-son)

27.05.2024

Oʻzbekiston Respublikasi Markaziy saylov komissiyasining

qarori

Oʻzbekiston Respublikasi Saylov kodeksining 14, 16 va 18-moddalariga muvofiq, Oʻzbekiston Respublikasi Markaziy saylov komissiyasi qaror qiladi:

1. Oʻzbekiston Respublikasi Markaziy saylov komissiyasining Reglamenti ilovaga muvofiq tasdiqlansin.

2. Oʻzbekiston Respublikasi Markaziy saylov komissiyasining “Oʻzbekiston Respublikasi Markaziy saylov komissiyasining Reglamentini tasdiqlash toʻgʻrisida” 2019-yil 24-avgustdagi 928-son qarori oʻz kuchini yoʻqotgan deb hisoblansin.

3. Mazkur qaror Oʻzbekiston Respublikasi Markaziy saylov komissiyasining rasmiy veb-saytida eʼlon qilinsin.

4. Mazkur qarorning ijrosini nazorat qilish Oʻzbekiston Respublikasi Markaziy saylov komissiyasi Raisining oʻrinbosari B. Kuchkarov zimmasiga yuklansin.

Rais Z. NIZAMXODJAYEV

Toshkent sh.,

2024-yil 27-may,

1329-son

Oʻzbekiston Respublikasi Markaziy saylov komissiyasining 2024-yil 27-maydagi 1329-son qaroriga ILOVA

Oʻzbekiston Respublikasi Markaziy saylov komissiyasining

Reglamenti

1-bob. Umumiy qoidalar

1. Mazkur Reglament Oʻzbekiston Respublikasi Markaziy saylov komissiyasi (bundan buyon matnda Markaziy saylov komissiyasi deb yuritiladi) faoliyatini amalga oshirish tartibi va qoidalarini belgilaydi.

2. Markaziy saylov komissiyasi — konstitutsiyaviy maqomga ega boʻlgan, doimiy asosda faoliyat yurituvchi davlat organi hisoblanadi hamda oʻz faoliyatini mustaqillik, qonuniylik, kollegiallik, oshkoralik va adolatlilik prinsiplari asosida tashkil etadi.

3. Markaziy saylov komissiyasi Oʻzbekiston Respublikasi Prezidenti saylovini, Oʻzbekiston Respublikasi Oliy Majlisiga, viloyatlar, tumanlar, shaharlar davlat hokimiyati vakillik organlariga saylovlarni, shuningdek Oʻzbekiston Respublikasining referendumini tashkil etadi va oʻtkazadi.

Markaziy saylov komissiyasi saylov komissiyalari va referendum oʻtkazuvchi komissiyalar tizimiga boshchilik qiladi.

4. Markaziy saylov komissiyasi faoliyati Oʻzbekiston Respublikasi Konstitutsiyasi, Oʻzbekiston Respublikasining Saylov kodeksi (bundan buyon matnda Saylov kodeksi deb yuritiladi), “Oʻzbekiston Respublikasining referendumi toʻgʻrisida”gi Qonuni va oʻz faoliyatiga oid boshqa normativ-huquqiy hujjatlar hamda mazkur Reglament bilan tartibga solinadi.

5. Markaziy saylov komissiyasi Oʻzbekiston Respublikasi Oliy Majlisining palatalari tomonidan toʻqqiz nafar aʼzodan iborat tarkibda tuziladi va doimiy asosda faoliyat yuritadi. Markaziy saylov komissiyasining bir nafar aʼzosi Qoraqalpogʻiston Respublikasining vakili boʻladi.

Markaziy saylov komissiyasining aʼzolari Qoraqalpogʻiston Respublikasi Joʻqorgʻi Kengesining, xalq deputatlari viloyatlar va Toshkent shahar Kengashlarining tavsiyasiga koʻra Oʻzbekiston Respublikasi Oliy Majlisi Qonunchilik palatasi (bundan buyon Qonunchilik palatasi deb yuritiladi) hamda Oʻzbekiston Respublikasi Oliy Majlisi Senati (bundan buyon Senat deb yuritiladi) tomonidan saylanadi.

6. Markaziy saylov komissiyasining aʼzosi tegishli guvohnomaga ega boʻladi. Markaziy saylov komissiyasi Raisi va uning oʻrinbosari guvohnomasi Oʻzbekiston Respublikasi Prezidenti tomonidan, Markaziy saylov komissiyasi boshqa aʼzolarining guvohnomasi esa Qonunchilik palatasi Spikeri va Senat Raisi tomonidan imzolanadi.

7. Markaziy saylov komissiyasi yuridik shaxs maqomiga, Oʻzbekiston Respublikasi Davlat gerbining tasviri tushirilgan va oʻz nomi yozilgan muhrga, oʻz faoliyatini taʼminlash uchun zarur boshqa muhr va shtamplarga, rasmiy blankalarga, mustaqil balansga, shaxsiy gʻazna hisob varaqlariga hamda oʻz ramziga (logotipiga) ega.

8. Markaziy saylov komissiyasining rasmiy veb-sayti — www.saylov.uz.

9. Markaziy saylov komissiyasi va uning aʼzolari oʻz faoliyatini har qanday davlat organlaridan, jamoat birlashmalaridan va mansabdor shaxslardan mustaqil holda amalga oshiradi.

Markaziy saylov komissiyasi faoliyatiga aralashishga yoʻl qoʻyilmaydi va bunday aralashuv qonunga muvofiq javobgarlikka sabab boʻladi.

10. Markaziy saylov komissiyasining oʻz vakolatlari doirasida qabul qiladigan qarorlari saylov komissiyalari, referendum oʻtkazuvchi komissiyalar, davlat organlari, siyosiy partiyalar hamda boshqa jamoat birlashmalari, korxonalar, muassasalar va tashkilotlar, mansabdor shaxslar uchun majburiydir.

11. Davlat organlari va jamoat birlashmalarining organlari, korxonalar, muassasalar, tashkilotlar, mansabdor shaxslar Markaziy saylov komissiyasiga oʻz vakolatlarini amalga oshirishida koʻmaklashishi hamda komissiya ishi uchun zarur maʼlumotlarni taqdim etishi shart.

12. Markaziy saylov komissiyasining joylashgan joyi (pochta manzili): 100047, Toshkent shahri, Toʻytepa koʻchasi, 2a-uy.

2-bob. Markaziy saylov komissiyasining Raisi, Rais oʻrinbosari va kotibi

13. Markaziy saylov komissiyasining Raisi (bundan buyon Komissiya Raisi deb yuritiladi):

Markaziy saylov komissiyasining faoliyatiga rahbarlikni amalga oshiradi;

Markaziy saylov komissiyasining majlislarini chaqiradi, ularda raislik qiladi, komissiya aʼzolari oʻrtasida vazifalarni taqsimlaydi;

davlat organlari, xorijiy davlatlar saylov organlari va xalqaro tashkilotlar, jamoat birlashmalari, shu jumladan siyosiy partiyalar bilan munosabatlarda Markaziy saylov komissiyasi nomidan ish yuritadi;

Markaziy saylov komissiyasining majlislarida ishtirok etish uchun davlat organlarining, siyosiy partiyalarning hamda boshqa jamoat birlashmalarining, tashkilotlarning vakillarini va mansabdor shaxslarini taklif etadi;

Oʻzbekiston Respublikasi Prezidenti saylovi, Oʻzbekiston Respublikasi Oliy Majlisiga saylov yakunlari toʻgʻrisida Oʻzbekiston Respublikasi Oliy Majlisi palatalariga axborot beradi;

Markaziy saylov komissiyasining qarorlarini va boshqa hujjatlarini imzolaydi;

Markaziy saylov komissiyasining faoliyatini taʼminlash uchun Oʻzbekiston Respublikasi Davlat budjetidan ajratilgan mablagʻlarni taqsimlaydi va ulardan maqsadli foydalanilishini nazorat qiladi;

tegishincha Qonunchilik palatasining va Senatning birinchi majlisini ochadi hamda Qonunchilik palatasi Spikeri va Senat Raisi saylanguniga qadar unda raislik qiladi;

Markaziy saylov komissiyasi Kotibiyatiga (bundan buyon matnda Kotibiyat deb yuritiladi) umumiy rahbarlikni amalga oshiradi, Kotibiyatning tuzilmasini, shtatlari va ish tartibini tasdiqlaydi, Kotibiyat xodimlarini ishga qabul qilish toʻgʻrisida mehnat shartnomasini tuzadi, oʻzgartiradi va bekor qiladi;

fuqarolarni bevosita qabul qiladi va ularning murojaatlarini belgilangan tartibda koʻrib chiqilishini nazorat qiladi;

oʻz vakolatlariga kiruvchi masalalar yuzasidan farmoyishlar chiqaradi va topshiriqlar beradi;

Saylov kodeksida va boshqa qonunchilik hujjatlarida hamda ushbu Reglamentda belgilangan boshqa vakolatlarni amalga oshiradi.

Komissiya Raisining oʻz vakolatlarini bajarishi imkoni boʻlmaganda, shuningdek Komissiya Raisi boʻlmagan taqdirda, Komissiya Raisining vazifalari Rais oʻrinbosarining yoki Markaziy saylov komissiyasi qarori bilan komissiya aʼzolaridan birining zimmasiga yuklatiladi.

14. Markaziy saylov komissiyasi Raisining oʻrinbosari (bundan buyon Rais oʻrinbosari deb yuritiladi):

Komissiya Raisining oʻz vakolatlarini bajarishi imkoni boʻlmaganda, shuningdek Komissiya Raisi boʻlmagan taqdirda uning vazifalarini bajaradi;

Markaziy saylov komissiyasi aʼzolarining, Kotibiyati va uning tarkibiy boʻlinmalari faoliyatini muvofiqlashtirib boradi va uslubiy yoʻnaltiradi;

kadrlar bilan ishlarni tashkil etadi, ijro intizomini nazorat qiladi;

korrupsiyaga qarshi kurash yoʻnalishidagi ishlarni tashkil etadi;

Markaziy saylov komissiyasining moliyalashtirish va moddiy-texnik taʼminoti masalalarini muvofiqlashtiradi, xoʻjalik ishlarini tashkil etadi;

Markaziy saylov komissiyasi faoliyatini ommaviy axborot vositalarida va ijtimoiy tarmoqlarda yoritilishini tashkil etadi, saylov va referendumlarning axborot kampaniyasini muvofiqlashtirib boradi, jamoatchilik bilan aloqalarni oʻrnatadi;

Markaziy saylov komissiyasining xorijiy mamlakatlar saylov organlari va xalqaro tashkilotlar bilan hamkorlik faoliyatini tashkil etadi va muvofiqlashtiradi;

Komissiya Raisining topshiriqlarini bajaradi;

oʻz vakolatlari doirasida topshiriqlar beradi;

Saylov kodeksida va boshqa qonunchilik hujjatlarida, ushbu Reglamentda hamda vazifalar taqsimotida belgilangan boshqa vazifalarni amalga oshiradi.

15. Markaziy saylov komissiyasining kotibi (bundan buyon Komissiya kotibi deb yuritiladi):

Markaziy saylov komissiyasi faoliyatini rejalashtirishni tashkil etadi va rejalar bajarilishining nazoratini amalga oshiradi;

Markaziy saylov komissiyasi majlislariga tayyorgarlik koʻrish va ularning oʻtkazilishini tashkil etadi, majlislarda koʻrib chiqiladigan masalalar boʻyicha tegishli materiallar va hujjatlarning tayyorlanishini taʼminlaydi;

Markaziy saylov komissiyasi majlislarining bayonnomasi va qabul qilingan qarorlarning rasmiylashtirilishini taʼminlaydi;

Markaziy saylov komissiyasi qarorlari va boshqa materiallarini komissiya aʼzolariga, shuningdek tegishligiga koʻra saylov komissiyalari va referendum oʻtkazuvchi komissiyalar, davlat organlari, siyosiy partiyalar, boshqa jamoat birlashmalari, korxonalar, muassasalar va tashkilotlar hamda mansabdor shaxslarga yetkazilishini taʼminlaydi;

Markaziy saylov komissiyasining majlislari haqidagi xabar va maʼlumotlarni ommaviy axborot vositalarida eʼlon qilinishini tashkillashtiradi;

Markaziy saylov komissiyasida hujjatlar bilan ishlash, ish yuritish va arxiv ishini tashkil etadi, saylov va referendumni tashkil etish va oʻtkazish bilan bogʻliq hujjatlarning idoraviy arxivlarga topshirilishini taʼminlaydi;

jismoniy shaxslar va yuridik shaxslar vakillarini qabul qilish hamda ularning murojaatlarini belgilangan tartibda koʻrib chiqilishini tashkil etadi;

“E-saylov” axborot tizimida ish yuritilishini taʼminlaydi;

Komissiya Raisi va Rais oʻrinbosarining topshiriqlarini bajaradi;

Saylov kodeksida va boshqa qonunchilik hujjatlarida, ushbu Reglamentda hamda vazifalar taqsimotida belgilangan boshqa vazifalarni amalga oshiradi.

16. Rais oʻrinbosari, Komissiya kotibi oʻz vakolatlarini bajarishi imkoni boʻlmaganda, shuningdek Rais oʻrinbosari, Komissiya kotibi boʻlmagan taqdirda, ularning vazifalari Komissiya Raisi tomonidan Markaziy saylov komissiyasi aʼzolari zimmasiga vaqtinchalik yuklatilishi mumkin.

3-bob. Markaziy saylov komissiyasining aʼzolari

17. Markaziy saylov komissiyasi aʼzolari Komissiya Raisi tomonidan belgilangan vazifalar taqsimotiga koʻra Markaziy saylov komissiyasining tegishli faoliyat yoʻnalishlari boʻyicha oʻzlariga yuklatilgan vazifalarning bajarilishini taʼminlaydi.

Markaziy saylov komissiyasi aʼzolari oʻzlariga yuklatilgan vazifalar bajarilishiga va bu borada olib borilgan ishlar natijadorligiga masʼuldirlar.

18. Markaziy saylov komissiyasining aʼzosi quyidagi huquqlarga ega:

Markaziy saylov komissiyasi majlisi kun tartibi, muhokama qilinayotgan masalalarni koʻrib chiqish tartibiga takliflar kiritish va mulohazalar bildirish;

Markaziy saylov komissiyasi majlisida muhokamada qatnashish, majlisda soʻzga chiqish, takliflar kiritish, oʻz takliflarini ovozga qoʻyish masalasini koʻtarish;

majlis ishtirokchilariga savollar berish va javoblar olish;

Markaziy saylov komissiyasining majlisida qabul qilingan qarori yuzasidan alohida fikr bildirish;

Markaziy saylov komissiyasi faoliyatiga doir materiallar va hujjatlar bilan tanishib chiqish.

19. Markaziy saylov komissiyasi aʼzosining majburiyatlari:

Oʻzbekiston Respublikasining butun hududida Saylov kodeksining ijrosi ustidan nazoratni amalga oshirishda, uning bir xil tarzda qoʻllanishini taʼminlashda ishtirok etadi;

komissiya majlisi muhokamasiga kiritilgan masalalarni tayyorlashda, komissiyaning barcha majlis va muhokamalarida, shu jumladan videokonferensiya orqali shaxsan ishtirok etadi;

majlislarda muhokama qilingan masalalar yuzasidan ovoz beradi;

uzrli sabablar bilan (kasallik, mehnat taʼtilida yoki xizmat safarida boʻlish va boshqalar) komissiya majlisida ishtirok eta olmasligi haqida Komissiya Raisini yoki Rais oʻrinbosarini xabardor qiladi;

Komissiya Raisining yoki Rais oʻrinbosarining oʻz vakolatlari doirasida berilgan topshiriqlarini bajaradi hamda ularning bajarilishi toʻgʻrisida belgilangan muddatlarda axborot beradi;

jismoniy va yuridik shaxslarning murojaatlarini belgilangan tartibda koʻrib chiqadi;

saylovlar, referendumlar va Markaziy saylov komissiyasining vakolatiga taalluqli boshqa masalalar boʻyicha normativ-huquqiy hujjatlarni tayyorlashda faol ishtirok etadi;

Markaziy saylov komissiyasining qarorlari ijrosini taʼminlaydi;

vazifalar taqsimotiga muvofiq Markaziy saylov komissiyasi faoliyatining tegishli yoʻnalishlarini hamda oʻziga yuklatilgan vazifalar boʻyicha Kotibiyat tarkibiy boʻlinmalari tomonidan Markaziy saylov komissiyasi qarorlari va boshqa topshiriqlar bajarilishini muvofiqlashtiradi va nazorat qiladi;

mehnat va ijro intizomiga, odob-axloq qoidalariga qatʼiy rioya etadi.

20. Markaziy saylov komissiyasining aʼzolari ilmiy, ijodiy va pedagogik faoliyatdan tashqari haq toʻlanadigan boshqa turdagi faoliyat bilan shugʻullanishi mumkin emas.

21. Saylov kodeksining 13-moddasiga koʻra Markaziy saylov komissiyasi aʼzolariga Qonunchilik palatasi deputatlariga, Senat aʼzolariga nisbatan qoʻllaniladigan daxlsizlik toʻgʻrisidagi qoidalar tatbiq etiladi.

Markaziy saylov komissiyasining aʼzosi daxlsizlik huquqidan oʻz vakolatlarining butun muddati davrida foydalanadi. U Markaziy saylov komissiyasining roziligisiz jinoiy javobgarlikka tortilishi, ushlab turilishi, qamoqqa olinishi yoki sud tartibida beriladigan maʼmuriy jazo choralariga tortilishi mumkin emas.

Markaziy saylov komissiyasining aʼzosini majburiy keltirishga, shuningdek uning uy-joyi, xizmat xonasini, yuki, shaxsiy va xizmat transporti vositalarini, yozishmalarini, u foydalanayotgan aloqa vositalarini, shuningdek unga tegishli hujjatlarni koʻzdan kechirishga yoʻl qoʻyilmaydi.

Markaziy saylov komissiyasi aʼzosini tegishli majlisda ovoz berish chogʻida munosabat bildirganligi yoki fikrini bayon etganligi uchun hamda oʻz vakolatlarini amalga oshirishi bilan bogʻliq boshqa harakatlari uchun javobgarlikka tortilishi mumkin emas. Agar shunday xatti-harakatlar munosabati bilan Markaziy saylov komissiyasi aʼzosi haqorat qilishga, tuhmat qilishga yoki qonunda javobgarlik nazarda tutilgan boshqa qonunbuzarliklarga yoʻl qoʻygan boʻlsa, u daxlsizlik huquqidan mahrum qilingan taqdirda javobgarlikka tortiladi.

22. Markaziy saylov komissiyasining Oʻzbekiston Respublikasi Prezidentligiga nomzod etib, Qonunchilik palatasi va xalq deputatlari viloyat, tuman va shahar Kengashlari deputatligiga nomzod etib, Senat aʼzoligiga nomzod etib, ishonchli vakil etib roʻyxatga olingan aʼzosi roʻyxatga olingan kundan eʼtiboran komissiya tarkibidan chiqib ketgan deb hisoblanadi. Bu haqda Markaziy saylov komissiyasi Oʻzbekiston Respublikasi Oliy Majlisi palatalarini xabardor etadi.

Markaziy saylov komissiyasi aʼzosi referendumda fuqarolar tashabbuskor guruhining aʼzosi boʻlishi mumkin emas.

4-bob. Markaziy saylov komissiyasining majlislari

23. Markaziy saylov komissiyasi ishining tashkiliy shakli uning majlislari hisoblanadi va ular zaruratga qarab oʻtkaziladi.

24. Markaziy saylov komissiyasi aʼzolarining kamida uchdan ikki qismi ishtirok etgan taqdirda majlis vakolatli hisoblanadi.

25. Markaziy saylov komissiyasi majlisi Komissiya Raisining tashabbusi bilan yoki Markaziy saylov komissiyasi aʼzolari umumiy sonining uchdan bir qismi talabiga binoan chaqirilishi mumkin.

26. Markaziy saylov komissiyasi majlislari u joylashgan binoda, sayyor tarzda yoki videokonferensiya shaklida oʻtkaziladi.

27. Markaziy saylov komissiyasi aʼzosi agar majlisda videokonferensiya tizimidan foydalangan holda ishtirok etayotgan boʻlsa, majlisda hozir boʻlgan hisoblanadi.

28. Markaziy saylov komissiyasi majlislari ochiq va oshkora oʻtkaziladi.

29. Majlislar Markaziy saylov komissiyasining axborot tarmoqlarida jonli efirda uzatilishi mumkin.

30. Markaziy saylov komissiyasi majlislarida nomzodlar, ularning ishonchli vakillari, siyosiy partiyalarning vakolatli vakillari, komissiyada akkreditatsiyadan oʻtgan yoki komissiya tomonidan taklif etilgan ommaviy axborot vositalarining vakillari, fuqarolarning oʻzini oʻzi boshqarish organlaridan, referendumda fuqarolar tashabbuskor guruhlaridan, boshqa davlatlardan, xalqaro tashkilotlardan kuzatuvchilar ishtirok etishlari mumkin.

31. Markaziy saylov komissiyasining vakolatlariga oid boʻlgan har qanday masala Markaziy saylov komissiyasining majlisida koʻrib chiqiladi.

Markaziy saylov komissiyasining qonunchilik taklifi sifatida tayyorlangan qonun loyihasi Markaziy saylov komissiyasi majlisida koʻrib chiqilib, maʼqullangandan keyin “Oʻzbekiston Respublikasi Oliy Majlisi Qonunchilik palatasining reglamenti toʻgʻrisida”gi va “Qonunlar loyihalarini tayyorlash va Oʻzbekiston Respublikasi Oliy Majlisining Qonunchilik palatasiga kiritish tartibi toʻgʻrisida”gi Oʻzbekiston Respublikasi qonunlariga muvofiq Qonunchilik palatasiga kiritiladi.

32. Majlisni oʻtkazish kuni va vaqti Komissiya Raisi tomonidan belgilanadi.

33. Markaziy saylov komissiyasi aʼzolari, qoida tariqasida, majlis oʻtkazish sanasidan kamida uch kun oldin, saylov kampaniyasi va referendum davrida esa bir kun oldin yoki majlis kunida Komissiya kotibi tomonidan xabardor qilinadi.

34. Markaziy saylov komissiyasi majlisining kun tartibi loyihasi Oʻzbekiston Respublikasi Konstitutsiyasi, Saylov kodeksi va boshqa qonunchilik hujjatlari bilan Markaziy saylov komissiyasining vakolatlari doirasiga kiritilgan yoki uning dastur va rejalarida koʻzda tutilgan masalalardan kelib chiqqan holda shakllantiriladi.

Majlis kun tartibi loyihasiga majlisda koʻrib chiqilishi lozim boʻlgan masalalar, ularni koʻrib chiqish navbati, har bir masalani yoritib berish uchun masʼul maʼruzachilar (qoʻshimcha maʼruzachilar), shuningdek, boshqa maʼlumotlar kiritiladi.

35. Majlis kun tartibi loyihasi Komissiya Raisi yoki Rais oʻrinbosarining topshirigʻiga asosan yoxud komissiya aʼzolarining taklifiga binoan Komissiya kotibi tomonidan, qoida tariqasida, majlisdan kamida uch kun oldin shakllantiriladi va majlisga tayyorgarlik koʻrish uchun Markaziy saylov komissiyasining Kotibiyati rahbariga (bundan buyon Kotibiyat rahbari deb yuritiladi) topshiriladi.

36. Markaziy saylov komissiyasi majlisning kun tartibiga kiritiladigan masalalar boʻyicha materiallarni tayyorlash va majlisni oʻtkazish boʻyicha tashkiliy chora-tadbirlar Markaziy saylov komissiyasining Kotibiyati tomonidan amalga oshiriladi.

37. Kotibiyat rahbari masʼul komissiya aʼzolari bilan kelishgan holda majlis kun tartibiga kiritilgan har bir masala boʻyicha zarur materiallarni tayyorlash uchun Kotibiyatning mutasaddi tarkibiy boʻlinmasi rahbariga topshiriq beradi.

38. Kotibiyatning mutasaddi tarkibiy boʻlinmasi rahbari tegishli masala yuzasidan materiallarni tayyorlaydi va masʼul komissiya aʼzolari bilan kelishadi. Oʻrnatilgan tartibda ustxatlarni toʻplaydi va Kotibiyat rahbariga taqdim etadi.

39. Markaziy saylov komissiyasi aʼzolari koʻrib chiqishi uchun taqdim etiladigan qaror loyihalari boʻyicha masʼul komissiya aʼzosi, Kotibiyatning mutasaddi tarkibiy boʻlinmasi, shu jumladan Yuridik taʼminlash va murojaatlarni koʻrib chiqish boʻlimi boshligʻi hamda Kotibiyat rahbarining ustxatlari olinadi.

Ustxat qaror loyihasining oxirgi beti yuz tomoniga qoʻyiladi.

40. Kun tartibiga kiritilgan masalalar boʻyicha taqdim etiladigan materiallar quyidagilarni oʻz ichiga oladi:

qaror loyihasi va unga ilovalarni (nizom, yoʻriqnoma, reglament, strategiya, konsepsiya, dastur, qoidalar, tartib, ishtirokchilar roʻyxati va boshqalar);

moliyaviy-iqtisodiy va boshqa hisob-kitoblar, koʻrib chiqilayotgan masala har tomonlama tahlil qilingan va xolisona baholangan boshqa maʼlumotnoma va tahliliy hujjatlar;

kiritilgan loyiha qabul qilinishi munosabati bilan ayrim qarorlarga oʻzgartirish va qoʻshimchalar kiritilayotgan, shuningdek, ularni oʻz kuchini yoʻqotgan deb hisoblanayotgan boʻlsa — taqqoslash jadvali;

Normativ-huquqiy hujjatlar loyihalari muhokamasi portaliga jamoatchilik muhokamasi uchun joylashtirilgan qaror loyihasi boʻyicha fuqarolar takliflarini (izohlari) koʻrib chiqish yakuni boʻyicha jadval.

41. Kotibiyatning mutasaddi tarkibiy boʻlinmasi rahbari, Kotibiyat rahbari, komissiyaning tegishli faoliyat yoʻnalishi yuklangan komissiya aʼzosi va Komissiya kotibi majlisga kiritiladigan materiallarning asoslanganligi va sifati, keltirilgan maʼlumotlarning toʻgʻriligi uchun shaxsan javobgar hisoblanadi.

42. Kotibiyat rahbari majlis kun tartibidagi barcha masalalar boʻyicha mutasaddi tarkibiy boʻlinmalar rahbarlari taqdim etgan materiallarni tekshirib oladi, umumlashtirgan holda Komissiya kotibiga taqdim qiladi.

43. Komissiya kotibi Kotibiyat rahbari taqdim etgan materiallarni, shuningdek majlisni oʻtkazishning aniq vaqti va joyini Komissiya Raisi va Rais oʻrinbosari bilan kelishadi. Shundan soʻng, majlis kun tartibidagi masalalar boʻyicha tegishli materiallarni komissiya aʼzolariga (zarurat boʻlganida boshqa masʼullarga) yetkazish uchun Kotibiyat rahbariga topshiradi.

44. Komissiya kotibi Kotibiyat tomonidan majlis kun tartibidagi masalalar boʻyicha tegishli materiallar tayyorlanishini hamda majlis oʻtkazish sanasidan kamida ikki kun oldin, saylov kampaniyasi va referendum davrida esa kamida bir kun oldin yoki majlis kunida Markaziy saylov komissiyasi aʼzolariga (zarurat boʻlganida boshqa masʼullarga) tarqatilishini taʼminlaydi.

45. Majlisdan kamida bir kun oldin Komissiya kotibi Rais oʻrinbosari va Komissiya Raisi bilan kelishgan holda Markaziy saylov komissiyasi majlisiga taklif qilinadigan shaxslarning roʻyxatini shakllantiradi va ularni majlisga taklif qilinishini taʼminlaydi.

Roʻyxatda taklif qilinganlarning familiyasi, ismi va otasining ismi, lavozimi va uni yuborgan tashkilotning rasmiy nomi koʻrsatiladi.

Roʻyxat Rais oʻrinbosari yoki Komissiya kotibining imzosi bilan tasdiqlanadi.

46. Markaziy saylov komissiyasi majlisi kun tartibiga kiritilishi moʻljallangan masalalarni tayyorlash uchun olimlar, ekspertlar va mutaxassislarni jalb etgan holda Markaziy saylov komissiyasi aʼzolari, Kotibiyat masʼul xodimlaridan iborat ishchi guruh tuzilishi mumkin.

47. Markaziy saylov komissiyasi saylovga va referendumga tayyorgarlik koʻrish va uni oʻtkazish bilan bogʻliq masalalar yuzasidan davlat organlariga hamda jamoat birlashmalarining organlariga, korxonalarga, muassasalarga, tashkilotlarga, mansabdor shaxslarga murojaat qilish huquqiga ega, ular qoʻyilgan masalani koʻpi bilan uch kunlik muddatda koʻrib chiqishi va Markaziy saylov komissiyasiga javob qaytarishi shart.

5-bob. Markaziy saylov komissiyasining majlisini oʻtkazish tartibi

48. Markaziy saylov komissiyasi majlislari boshlanishidan oldin komissiya aʼzolari va majlisga taklif qilingan shaxslar roʻyxatga olinadi.

Komissiya Raisi majlisda ishtirok etayotgan komissiya aʼzolari va taklif qilingan shaxslar haqida maʼlumotni oʻqib eshittiradi.

49. Markaziy saylov komissiyasi majlisi kun tartibi loyihasining muhokamasi bilan boshlanadi. Kun tartibi Markaziy saylov komissiyasi aʼzolarining koʻpchilik ovozi bilan tasdiqlanadi.

Kun tartibi loyihasidagi masala Markaziy saylov komissiyasi aʼzolarining tashabbusi bilan muhokamadan olib tashlanishi mumkin. Bunda ochiq ovoz berish yoʻli bilan alohida qaror qabul qilinadi.

50. Markaziy saylov komissiyasining majlisida raislik qiluvchi:

Markaziy saylov komissiyasi majlisini olib boradi va uni oʻtkazish tartibini belgilaydi;

Markaziy saylov komissiyasi majlisining kun tartibiga kiritilgan masalalarni muhokama qilishni tashkil etadi, uni ovozga qoʻyadi;

Markaziy saylov komissiyasi aʼzolariga va taklif etilgan shaxslarga navbat bilan soʻz beradi;

Markaziy saylov komissiyasi aʼzolarining barcha takliflarini ularni tushish tartibiga koʻra ovozga qoʻyadi;

ovoz berish natijalarini eʼlon qiladi;

Markaziy saylov komissiyasi aʼzolari va taklif etilgan shaxslar tomonidan mazkur Reglament qoidalariga rioya etilishini taʼminlaydi;

Markaziy saylov komissiyasi majlisi ishiga xalaqit beradigan taklif etilgan shaxslarni majlislar zalidan chiqarib yuborishi ham mumkin.

51. Maʼruzalar, qoʻshimcha maʼruzalar va yakunlovchi soʻz davomiyligi Markaziy saylov komissiyasi majlisida raislik qiluvchi tomonidan maʼruzachilar va qoʻshimcha maʼruzachilar bilan kelishuvga koʻra, qoida tariqasida, maʼruza uchun — 20 daqiqagacha, qoʻshimcha maʼruza uchun — 10 daqiqagacha va yakunlovchi soʻz uchun 5 daqiqagacha boʻlgan vaqt doirasida belgilanadi.

Munozaralarda soʻzga chiquvchi komissiya aʼzolariga 3 daqiqagacha vaqt beriladi. Munozaralarda takroriy soʻzga chiqish uchun, shuningdek majlisni olib borish tartibi, ovoz berish asoslari, nomzodlar boʻyicha soʻzga chiqish, savollar, takliflar, xabarlar, maʼlumotlar uchun — 3 daqiqagacha vaqt beriladi.

Raislik qiluvchi Markaziy saylov komissiyasi majlisining kun tartibiga kiritilgan masalani muhokama qilishning umumiy davomiyligini, savollar va javoblar uchun ajratiladigan vaqtni majlisda hozir boʻlgan aʼzolar koʻpchiligining roziligi bilan belgilab qoʻyishi, soʻzlash vaqtini uzaytirishi mumkin.

Majlisda koʻrib chiqiladigan masalalar soni cheklanmaydi.

52. Markaziy saylov komissiyasi majlisining kun tartibiga kiritilgan masalani koʻrib chiqishda maʼruzachi, zarur hollarda qoʻshimcha maʼruza qiluvchi eshitiladi va masala muhokama qilinadi.

Qoʻshimcha maʼruza qiluvchi majlis kun tartibiga kiritilgan masalaning mohiyatidan kelib chiqqan holda belgilanadi.

Qoʻshimcha maʼruza qiluvchi sifatida komissiya aʼzolari, majlisga taklif qilingan davlat organlari va boshqa tashkilot vakillari, mansabdor shaxslar boʻlishi mumkin.

Saylov komissiyalari, referendum oʻtkazuvchi komissiyalar, siyosiy partiyalar, vazirliklar va idoralar, mahalliy davlat hokimiyati organlari, boshqa davlat organlari hamda jamoat birlashmalari vakillarining saylovga va referendumga tayyorgarlik koʻrish va uni oʻtkazish bilan bogʻliq masalalar yuzasidan axboroti eshitilganida maʼruzachi sifatida ushbu tashkilot vakillari ishtirok etadi.

6-bob. Markaziy saylov komissiyasi majlislarida ovoz berish va qaror qabul qilish tartibi

53. Markaziy saylov komissiyasining qarorlari ochiq ovoz berish orqali, komissiya aʼzolari umumiy sonining koʻpchilik ovozi bilan qabul qilinadi. Ochiq ovoz berish qoʻl koʻtarish yoʻli bilan amalga oshiriladi.

Ovozlar teng boʻlinib qolgan taqdirda, Komissiya Raisining (majlisga raislik qiluvchining) ovozi hal qiluvchi hisoblanadi.

54. Markaziy saylov komissiyasi qarori loyihasi muhokamasi oʻtkazilgandan soʻng qaror loyihasi raislik qiluvchi tomonidan bandma-band yoki toʻliqligicha kun tartibidagi har bir masala boʻyicha alohida ovozga qoʻyiladi.

55. Markaziy saylov komissiyasi aʼzolari tomonidan qaror loyihasiga kiritilgan tuzatishlar ham ovozga qoʻyiladi.

56. Qaror loyihasini ovozga qoʻyishda raislik qiluvchi tomonidan “rozi”, “qarshi”lar aniqlanadi.

Markaziy saylov komissiyasining aʼzosi kun tartibidagi har bir masala boʻyicha bir ovozga ega boʻladi va shaxsan ovoz beradi.

Markaziy saylov komissiyasining aʼzosi koʻrib chiqilayotgan masalalar boʻyicha faqat Markaziy saylov komissiyasining majlisida ishtirok etgan holda, shu jumladan videokonferensiya aloqasi orqali shaxsan ovoz beradi.

Markaziy saylov komissiyasining majlisda hozir boʻlgan aʼzosi ovoz berishda betaraf qolishga haqli emas.

57. Markaziy saylov komissiyasi aʼzosi majlis kun tartibidagi masala yoki qaror loyihasi yuzasidan oʻzining fikrini yozma ravishda bayon etish huquqiga ega, uning alohida fikri zaruratga qarab Markaziy saylov komissiyasining barcha aʼzolari eʼtiboriga yetkaziladi va muhokama qilinib, munosabat bildirilishi mumkin. Boshqa hollarda ushbu fikr majlisda hozir boʻlgan Markaziy saylov komissiyasi aʼzolari eʼtiboriga yetkazilib, bayonnomaga ilova qilinadi.

58. Markaziy saylov komissiyasining aʼzosi kun tartibidagi masala boʻyicha ovoz berishda mustaqildir.

Markaziy saylov komissiyasi aʼzosining kun tartibidagi masalani har tomonlama, toʻla va xolisona koʻrib chiqishiga toʻsqinlik qilish yoki ijobiy qaror qabul qilinishiga erishish maqsadida unga biror-bir tarzda taʼsir oʻtkazish tegishli javobgarlikka sabab boʻladi.

59. Kun tartibidagi masalani koʻrib chiqish natijasi boʻyicha tayyorlangan qaror loyihasi toʻliqligicha yoki masala muhokamasi paytida kiritilgan tuzatishlar bilan qabul qilinishi yoxud masala muhokamasini qoldirish (masalani kun tartibidan chiqarish) toʻgʻrisida qaror qabul qilinishi mumkin.

60. Markaziy saylov komissiyasi majlisida bayonnoma yuritiladi.

Bayonnomada majlisning kun tartibi, unda qatnashgan Markaziy saylov komissiyasi aʼzolari va boshqa taklif etilgan shaxslar haqidagi maʼlumotlar, muhokamaga kiritilgan masalaning qisqacha mazmuni, soʻzga chiqqan va fikr bildirganlar toʻgʻrisida maʼlumotlar, koʻrib chiqilgan har bir masala yuzasidan ovoz berish natijalari, qabul qilingan qarorlar koʻrsatiladi.

Bayonnoma raislik qiluvchi va kotib tomonidan imzolanadi hamda unga qabul qilingan qaror, taalluqli hujjatlar, shuningdek, Markaziy saylov komissiyasi aʼzolarining muayyan masala yuzasidan yozma shakldagi alohida fikrlari (agar boʻlsa) ilova qilinadi.

Markaziy saylov komissiyasining Oʻzbekiston Respublikasi Prezidenti saylovi, Qonunchilik palatasi deputatlari saylovi hamda referendum natijalari toʻgʻrisidagi bayonnomalari majlisda ishtirok etgan barcha komissiya aʼzolari tomonidan imzolanadi.

7-bob. Markaziy saylov komissiyasining qarorlarini rasmiylashtirish

61. Markaziy saylov komissiyasining vakolatlariga kiritilgan va uning majlisida koʻrib chiqilgan masalalar yuzasidan qaror qabul qilinadi.

62. Majlisda qabul qilingan qaror matni Markaziy saylov komissiyasining belgilangan namunadagi blankasida chop etiladi va Rais oʻrinbosari, Komissiya kotibi, Kotibiyat rahbari hamda Yuridik taʼminlash va murojaatlarni koʻrib chiqish boʻlimi boshligʻining ustxatlari olingan holda Komissiya Raisiga imzolash uchun taqdim etiladi.

Zarurat boʻlganida, qaror imzolanishidan oldin Markaziy saylov komissiyasi aʼzosi va boshqa tarkibiy boʻlinma boshligʻining ustxatlari olinishi mumkin.

Bunda, ustxatlar qaror matnining oxirgi beti orqa tomoniga qoʻyiladi.

Markaziy saylov komissiyasi majlisida maʼqullangan tuzatishlar (oʻzgartirish, qoʻshimchalar) qaror matniga kiritiladi va belgilangan tartibda ustxatlar olingan holda imzolash uchun taqdim etiladi.

63. Markaziy saylov komissiyasining qarorlari elektron shaklda “E-saylov” axborot tizimi orqali qabul qilinishi mumkin. Bunda majlisda qabul qilingan qarorning matni “E-saylov” axborot tizimiga Komissiya kotibi tomonidan yuklanadi va Komissiya Raisiga (majlisda raislik qiluvchi) imzolash uchun taqdim etiladi. Bunda Markaziy saylov komissiyasi majlisida maʼqullangan tuzatishlar (oʻzgartirish, qoʻshimchalar) qaror matniga kiritiladi.

64. Qarorlar Komissiya Raisi (majlisda raislik qiluvchi) tomonidan imzolanadi.

“E-saylov” axborot tizimi orqali qabul qilinadigan qarorlar Komissiya Raisi (majlisda raislik qiluvchi) tomonidan elektron raqamli imzo bilan tasdiqlanadi.

Markaziy saylov komissiyasining qarorlari qabul qilingan paytdan eʼtiboran kuchga kiradi va Markaziy saylov komissiyasining rasmiy veb-saytida oʻsha kunning oʻzida, shuningdek zarur boʻlgan hollarda, boshqa manbalarda eʼlon qilinadi.

Markaziy saylov komissiyasining qarorlari zarur hollarda manfaatdor davlat organlari, siyosiy partiyalar hamda boshqa jamoat birlashmalari, korxonalar, muassasalar va tashkilotlarga ijro va (yoki) maʼlumot uchun yuborilishi mumkin.

65. Markaziy saylov komissiyasining majlisida qabul qilingan qarorlarning hisobi va ularning bajarilishi ustidan nazorat Kotibiyatning Tashkiliy-nazorat va rejalashtirish boʻlimi tomonidan olib boriladi.

8-bob. Markaziy saylov komissiyasi tomonidan ayrim masalalarni koʻrib chiqishning xususiyatlari

1-§. Komissiya Raisi, Rais oʻrinbosari va Komissiya kotibini saylash va ularni lavozimidan ozod etish

66. Komissiya Raisi Oʻzbekiston Respublikasi Prezidentining taqdimiga binoan komissiya aʼzolari orasidan besh yillik muddatga komissiya majlisida saylanadi. Ayni bir shaxs surunkasiga ikki muddatdan ortiq Komissiya Raisi etib saylanishi mumkin emas.

Rais oʻrinbosari yoki Komissiya kotibi komissiya aʼzolari orasidan komissiya majlisida saylanadi.

Komissiya Raisi yoki Rais oʻrinbosari yoxud Komissiya kotibi lavozimiga nomzod haqidagi maʼlumotlar raislik qiluvchi tomonidan majlisda oʻqib eshittiriladi.

Komissiya Raisi yoki Rais oʻrinbosari yoxud Komissiya kotibi tomonidan oʻz nomzodini rad etish toʻgʻrisidagi murojaati ovoz berish oʻtkazilmasdan qabul qilinadi.

Majlisda raislik qiluvchi maʼruzasi yakunlanganidan soʻng komissiya aʼzolariga muhokama (taklif, mulohaza yoki eʼtiroz bildirish) uchun soʻz beriladi.

Muhokama yakunlanganidan soʻng raislik qiluvchi tomonidan Komissiya Raisi yoki Rais oʻrinbosari yoxud Komissiya kotibi lavozimiga nomzodni saylash haqidagi qaror ovozga qoʻyiladi.

Nomzod, agar u ochiq ovoz berish natijasida komissiya aʼzolari umumiy sonining koʻpchilik ovozini olgan boʻlsa, tegishincha Komissiya Raisi yoki Rais oʻrinbosari yoxud Komissiya kotibi etib saylangan hisoblanadi.

67. Agar Komissiya Raisi yoki Rais oʻrinbosari yoxud Komissiya kotibi lavozimiga nomzod komissiya aʼzolari ovozlarining zarur sonini ololmasa, tegishincha Komissiya Raisi yoki Rais oʻrinbosari yoxud Komissiya kotibi lavozimiga takroriy saylov oʻtkaziladi.

Takroriy saylov ushbu Reglamentning 66-bandiga muvofiq oʻtkaziladi.

68. Komissiya Raisi saylangandan keyin komissiyaning majlisi Komissiya Raisi tomonidan olib boriladi.

69. Majlisda tegishincha Komissiya Raisi yoki Rais oʻrinbosari yoxud Komissiya kotibi saylanganligi toʻgʻrisida qaror qabul qilinadi, uni Markaziy saylov komissiyasi majlisida raislik qiluvchi imzolaydi.

70. Komissiya Raisi yoki Rais oʻrinbosari yoxud Komissiya kotibi lavozimiga saylanayotgan yoki lavozimidan ozod etilayotganda majlis kun tartibidagi ushbu masala yuzasidan raislik qilishi mumkin emas.

71. Komissiya Raisi yoki Rais oʻrinbosari yoxud Komissiya kotibi ochiq ovoz berish orqali komissiya aʼzolari umumiy sonining koʻpchilik ovozi bilan qabul qilingan Markaziy saylov komissiyasining qaroriga binoan lavozimidan ozod qilinishi mumkin.

72. Komissiya Raisi yoki Rais oʻrinbosari yoxud Komissiya kotibi lavozimidan Markaziy saylov komissiyasining qarori bilan ozod qilingan taqdirda, agar Oʻzbekiston Respublikasi Oliy Majlisining palatalari tomonidan boshqa qaror qabul qilinmaydigan boʻlsa, Markaziy saylov komissiyasi aʼzoligini saqlab qoladi.

2-§. Markaziy saylov komissiyasi aʼzolarining vakolatlarini tugatish tartibi

73. Markaziy saylov komissiyasi aʼzosining vakolatlari Oʻzbekiston Respublikasi Oliy Majlisi palatalari tomonidan bevosita yoki uni aʼzolikka tavsiya etgan organning taqdimnomasiga binoan Saylov kodeksining 13-moddasida koʻrsatilgan hollarda tugatilishi mumkin.

74. Markaziy saylov komissiyasi aʼzosi oʻz vazifalarini muntazam ravishda bajarmaganligi toʻgʻrisidagi masala Komissiya Raisining tashabbusi bilan yoki Markaziy saylov komissiyasi aʼzolari umumiy tarkibining uchdan bir qismi talabiga binoan komissiya majlisida koʻrib chiqilishi mumkin.

Markaziy saylov komissiyasi aʼzosi oʻz vazifalarini muntazam ravishda bajarmaganligi toʻgʻrisidagi qaror ochiq ovoz berish orqali komissiya aʼzolari umumiy sonining koʻpchilik ovozi bilan qabul qilinadi.

Komissiya Raisi Markaziy saylov komissiyasi aʼzosining oʻz vazifalarini muntazam ravishda bajarmaganligi toʻgʻrisida qaror qabul qilingandan keyin uch kun ichida Oʻzbekiston Respublikasi Oliy Majlisi palatalariga taqdimnoma kiritadi.

9-bob. Jismoniy va yuridik shaxslarning murojaatlarini koʻrib chiqish

75. Jismoniy va yuridik shaxslarning Markaziy saylov komissiyasiga kelib tushgan murojaatlari Saylov kodeksi, “Oʻzbekiston Respublikasining referendumi toʻgʻrisida”gi, “Jismoniy va yuridik shaxslarning murojaatlari toʻgʻrisida”gi qonunlar va boshqa qonunchilik hujjatlarida hamda ushbu Reglamentda belgilangan tartibda koʻrib chiqiladi.

76. Markaziy saylov komissiyasiga kelib tushgan murojaatlar Komissiya Raisining yoki Rais oʻrinbosarining koʻrsatmasiga asosan Markaziy saylov komissiyasining aʼzolari va (yoki) Kotibiyati tomonidan koʻrib chiqiladi.

Murojaatga javob xati Komissiya raisi, Rais oʻrinbosari yoki Komissiya kotibi tomonidan imzolanadi.

77. Murojaatda bayon etilgan masalalarni hal qilish Markaziy saylov komissiyasi vakolatiga kirmasa, qonunchilikda belgilangan tartibda tegishli organlarga Komissiya kotibi tomonidan yuboriladi.

78. Markaziy saylov komissiyasi saylov kampaniyasini hamda referendumni oʻtkazish davrida jismoniy va yuridik shaxslarning Saylov kodeksi hamda referendum qonunchiligi talablari buzilganligi yoki saylovni (referendumni) tashkil etishning boshqa masalalari xususida oʻziga kelib tushgan murojaatlarini oʻz vakolatlari doirasida koʻrib chiqadi. Ushbu murojaatlar boʻyicha tekshiruvlar oʻtkazilishi va uch kunlik muddatda ularga yozma javoblar berilishi, saylovga (referendumga) olti kundan kam vaqt qolganida yoki ovoz berish kuni kelib tushgan murojaatlar esa darhol koʻrib chiqilib, javob qaytarilishi shart. Bundan saylov (referendum oʻtkazuvchi) komissiyalarining harakatlari va qarorlari ustidan berilgan shikoyatlar mustasno.

Zarur hollarda Markaziy saylov komissiyasi murojaatlarni koʻrib chiqish uchun tegishli mutaxassislarni jalb qilgan holda ishchi guruh tuzishi mumkin.

79. Markaziy saylov komissiyasi vakolatiga doir murojaatlar Komissiya Raisi tomonidan murojaatni koʻrib chiqish va unga doir qaror qabul qilish uchun Komissiya majlisi chaqiriladi. Majlisga manfaatdor shaxslar taklif etilishi mumkin.

Kun tartibiga kiritilgan murojaatlar Markaziy saylov komissiyasi majlisida koʻrib chiqiladi va tegishli qaror qabul qilinadi.

Qaror nusxasi murojaat etuvchiga yuboriladi va Markaziy saylov komissiyasining rasmiy veb-saytida joylashtiriladi.

80. Markaziy saylov komissiyasining qarorlari ustidan qaror qabul qilinganidan keyin besh kun ichida Oʻzbekiston Respublikasi Oliy sudiga shikoyat qilinishi mumkin.

10-bob. Markaziy saylov komissiyasi faoliyatini taʼminlash

81. Markaziy saylov komissiyasi faoliyatining tashkiliy-uslubiy, axborot-tahliliy, huquqiy, moliyaviy, ijtimoiy-maishiy, moddiy-texnik va boshqa taʼminoti Kotibiyat tomonidan amalga oshiriladi.

Kotibiyatga Komissiya Raisi tomonidan tayinlanadigan Kotibiyat rahbari rahbarlik qiladi va Kotibiyat tarkibiy boʻlinmalari faoliyatini muvofiqlashtirib boradi.

Kotibiyatning tuzilishi, shtatlari va uning ish tartibi Komissiya Raisi tomonidan tasdiqlanadi.

82. Kotibiyat xodimlarining huquq va vazifalari, ularni taqdirlash va intizomiy javobgarligi masalalari qonunchilik hujjatlari, Markaziy saylov komissiyasi Kotibiyati toʻgʻrisidagi nizom, Kotibiyat tarkibiy boʻlinmalari toʻgʻrisidagi nizomlar hamda Ichki mehnat tartibi qoidalari bilan belgilanadi.

Markaziy saylov komissiyasi Kotibiyati toʻgʻrisidagi nizom Markaziy saylov komissiyasi tomonidan tasdiqlanadi. Kotibiyatning tarkibiy boʻlinmalari toʻgʻrisidagi nizomlar Komissiya Raisi tomonidan tasdiqlanadi.

83. Markaziy saylov komissiyasi qonunchilik hujjatlariga muvofiq oʻz faoliyatini amalga oshirish uchun ishchi guruhlari tuzishi mumkin.

Markaziy saylov komissiyasi saylov hamda referendumga tayyorgarlik koʻrish va uni oʻtkazish davrida ushbu maqsadlarga ajratilgan mablagʻlar hisobidan shartnomaga asosan tegishli mutaxassislarni jalb qilishi mumkin.