Qishloq xoʻjaligi va oziq-ovqat sanoatida investitsiyalarni jalb qilish hamda eksportni koʻpaytirishga oid vazifalarning bajarilishi ustidan parlament nazoratini amalga oshirish toʻgʻrisida (KQ-723-IV-son)

06.05.2024

Oʻzbekiston Respublikasi Oliy Majlisi Senati Kengashining

qarori

Mamlakatimizda qishloq xoʻjaligi va oziq-ovqat sanoatida investitsiyalarni jalb qilish hamda eksportni koʻpaytirish maqsadida Oʻzbekiston Respublikasi Prezidentining 2024-yil 1-apreldagi PQ-146-sonli qarori bilan Oʻzbekiston Respublikasi Prezidentining qishloq xoʻjaligi va oziq-ovqat mahsulotlarini yetishtiruvchi, ishlab chiqaruvchi va ularni eksport qiluvchi tadbirkorlar bilan oʻtkazilgan muloqotida belgilangan vazifalarni amalga oshirish boʻyicha “yoʻl xaritasi” (keyingi oʻrinlarda — “yoʻl xaritasi”) tasdiqlangan.

Mazkur “yoʻl xaritasi”da belgilangan vazifalarning oʻz vaqtida va samarali bajarilishi ustidan taʼsirchan parlament nazoratini taʼminlash, joylarda nazorat-tahlil tadbirlarini oʻtkazish, shuningdek, vazirlik va idoralar rahbarlarining qishloq xoʻjaligi va oziq-ovqat sanoatida investitsiyalarni jalb qilish, yangi ish oʻrinlarini yaratish, eksport salohiyatini oshirish orqali mahsulotni chuqur qayta ishlash hamda yuqori qoʻshilgan qiymatni yaratish boʻyicha amalga oshirilgan ishlar holati yuzasidan axborotlarini eshitib borish muhim ahamiyat kasb etadi.

Hududlarda qishloq xoʻjaligi va oziq-ovqat sanoatida investitsiyalarni jalb qilish hamda eksportni koʻpaytirish borasida belgilangan vazifalar ustidan parlament nazorati samaradorligini yanada oshirish maqsadida “Oʻzbekiston Respublikasi Oliy Majlisi Senatining Reglamenti toʻgʻrisida”gi Qonunning 6-moddasiga asosan Oʻzbekiston Respublikasi Oliy Majlisi Senatining Kengashi qaror qiladi:

1. Hududlarda qishloq xoʻjaligi va oziq-ovqat sanoatida investitsiyalarni jalb qilish hamda eksportni koʻpaytirishga oid vazifalarning bajarilishi ustidan doimiy parlament nazorati amalga oshirilsin.

2. Oʻzbekiston Respublikasi Oliy Majlisi Senati qoʻmitalarining majlislarida Oʻzbekiston Respublikasi. Prezidentining qishloq xoʻjaligi va oziq-ovqat mahsulotlarini yetishtiruvchi, ishlab chiqaruvchi va ularni eksport qiluvchi tadbirkorlar bilan oʻtkazilgan muloqotida belgilangan vazifalarni amalga oshirish boʻyicha “yoʻl xaritasi”ning ijrosi yuzasidan respublika va mahalliy ijro etuvchi hokimiyat organlari rahbarlarining axborotlarini eshitish reja-jadvali ilovaga muvofiq tasdiqlansin.

3. Oʻzbekiston Respublikasi Oliy Majlisi Senatining qoʻmitalari:

hududlarda qishloq xoʻjaligi va oziq-ovqat sanoatida investitsiyalarni jalb qilish, eksportni koʻpaytirish, zamonaviy laboratoriyalarni ishga tushirish, tijorat banklari tomonidan imtiyozli kredit resurslarini yoʻnaltirish, bojxona va transport xizmatlarini koʻrsatish, xorijdagi diplomatik vakolatxonalar orqali xorijiy davlatlarda savdo nuqtalari hamda savdo uylarini tashkil qilish, xorijiy davlatlarning top brend kompaniyalari bilan hamkorlikni yoʻlga qoʻyish boʻyicha belgilangan vazifalarning amalga oshirilishini parlament nazorati doirasida, shu jumladan joylarga chiqqan holda muntazam ravishda oʻrganib borsin;

sohada amalga oshirilayotgan islohotlar, qabul qilinayotgan qonunchilik hujjatlarining mazmun-mohiyati, ahamiyati toʻgʻrisida aholi va tadbirkorlik subyektlari oʻrtasida tushuntirish-targʻibot ishlarini olib borsin;

reja-jadval asosida oʻrganish natijalarini qoʻmitalar majlislarida tanqidiy muhokama qilish, mutasaddi rahbarlarning axborotlarini eshitish hamda vazifalarni sifatli ijro etilishi boʻyicha qoʻshimcha choralar koʻrsin;

oʻrganish natijalari hamda amalga oshirilgan ishlar yuzasidan joriy yil yakuniga qadar har chorakda Oʻzbekiston Respublikasi Oliy Majlisi Senatining Agrar va suv xoʻjaligi masalalari qoʻmitasiga maʼlumot kiritib borsin;

Senatning Agrar va suv xoʻjaligi masalalari qoʻmitasi maʼlumotlarni umumlashtirib, Senat Raisiga muntazam tahliliy axborot kiritib borsin.

4. Qoraqalpogʻiston Respublikasi Joʻqorgʻi Kengesi va xalq deputatlari mahalliy Kengashlariga:

mahalliy Kengashlar deputatlarini tuman (shahar)larga biriktirgan holda qishloq xoʻjaligi va oziq-ovqat sanoatida investitsiyalarni jalb qilish, eksportni koʻpaytirish boʻyicha belgilangan vazifalar oʻz vaqtida bajarilishi ustidan deputatlik nazoratini amalga oshirish;

qishloq xoʻjaligi va oziq-ovqat sanoatida investitsiyalarni jalb qilish, eksportni koʻpaytirishga oid vazifalar ijrosini sessiyalarda tanqidiy muhokama qilish, mutasaddi rahbarlarning axborotlarini eshitish hamda respublika darajasidagi masalalarni hal etish yuzasidan Oliy Majlis Senatiga takliflarni taqdim etish tavsiya etilsin.

5. Oʻzbekiston Respublikasi Oliy Majlisi Senati devonining Axborot xizmati hududlarda qishloq xoʻjaligi va oziq-ovqat sanoatida investitsiyalarni jalb qilish, eksportni koʻpaytirish boʻyicha belgilangan vazifalar ijrosi ustidan parlament nazorati tadbirlarini ommaviy axborot vositalari hamda ijtimoiy tarmoqlarda keng yoritish ishlarini amalga oshirsin.

6. Mazkur Qarorning ijrosini nazorat qilish Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev zimmasiga yuklansin.

7. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Senatining Raisi T. NARBAYEVA

Toshkent sh.,

2024-yil 6-may,

KQ-723-IV-son

Oʻzbekiston Respublikasi Oliy Majlisi Senati Kengashining 2024-yil 6-maydagi KQ-723-IV-sonli qaroriga ILOVA

Oʻzbekiston Respublikasi Oliy Majlisi Senati qoʻmitalarining majlislarida Oʻzbekiston Respublikasi Prezidentining qishloq xoʻjaligi va oziq-ovqat mahsulotlarini yetishtiruvchi, ishlab chiqaruvchi va ularni eksport qiluvchi tadbirkorlar bilan oʻtkazilgan muloqotida belgilangan vazifalarni amalga oshirish boʻyicha “yoʻl xaritasi”ning ijrosi yuzasidan respublika va mahalliy ijro etuvchi hokimiyat organlari rahbarlarining axborotlarini eshitish

REJA-JADVALI