Qoraqalpogʻiston Respublikasida mehmonxona xizmatlarini rivojlantirish hamda qulay shart-sharoitlar yaratish chora-tadbirlari toʻgʻrisida (287-son)

16.05.2024

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Qoraqalpogʻiston Respublikasini kompleks ijtimoiy-iqtisodiy rivojlantirish va aholi bandligini taʼminlashning qoʻshimcha chora-tadbirlari toʻgʻrisida” 2024-yil 9-fevraldagi PQ-66-son qaroriga muvofiq Vazirlar Mahkamasi qaror qiladi:

1. Quyidagilarni nazarda tutuvchi Qoraqalpogʻiston Respublikasida uch yulduzliga aylantiriladigan mavjud mehmonxonalar uchun subsidiya ajratish tartibi toʻgʻrisidagi nizom ilovaga muvofiq tasdiqlansin:

subsidiya ajratish boʻyicha tadbirkorga qoʻyiladigan talablar, subsidiya olish uchun murojaat qilish tartibi hamda taqdim etiladigan hujjatlar;

murojaatni koʻrib chiqish va qaror qabul qilish tartibi, subsidiya ajratishni rad etish asoslari.

2. Oʻzbekiston Respublikasi Turizm qoʻmitasi Raqamli texnologiyalar vazirligi hamda Adliya vazirligi bilan birgalikda ikki oy muddatda:

ushbu qaror bilan tasdiqlangan Nizom asosida davlat xizmati Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali joriy etilishini taʼminlasin;

YIDXPda davlat xizmatini koʻrsatishning har bir bosqichida murojaatlarni koʻrib chiqishni kuzatib borish tartibini joriy etsin.

3. Oʻzbekiston Respublikasi Adliya vazirligi Turizm qoʻmitasi organlari tomonidan davlat xizmatlarini koʻrsatishning belgilangan tartibiga rioya etilishi boʻyicha ularning faoliyati yuzasidan, shu jumladan, YIDXP orqali doimiy nazorat oʻrnatsin.

4. Mazkur qarorning bajarilishini nazorat qilish Oʻzbekiston Respublikasi Turizm qoʻmitasi raisi A.Oʻ. Aqqulov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2024-yil 16-may,

287-son

Vazirlar Mahkamasining 2024-yil 16-maydagi 287-son qaroriga ILOVA

Qoraqalpogʻiston Respublikasida uch yulduzliga aylantiriladigan mavjud mehmonxonalar uchun subsidiya ajratish tartibi toʻgʻrisida

nizom

1-bob. Umumiy qoidalar

1. Ushbu Nizom Qoraqalpogʻiston Respublikasida faoliyat yuritayotgan, yulduz toifasiga ega boʻlmagan mavjud mehmonxonalarni uch yulduzli toifaga aylantirish maqsadida tadbirkorlik subyektiga mehmonxona xonalarini jihozlash uchun sarflangan xarajatlarning bir qismini Oʻzbekiston Respublikasi Turizm qoʻmitasining Turizmni qoʻllab-quvvatlash jamgʻarmasi (keyingi oʻrinlarda — Jamgʻarma) mablagʻlari hisobidan qoplab berish uchun subsidiya ajratish tartibini belgilaydi.

2. Ushbu Nizomda quyidagi tushunchadan foydalaniladi:

subsidiya — Qoraqalpogiston Respublikasida mehmonxona xizmatlarini koʻrsatayotgan tadbirkorlik subyektiga mavjud mehmonxonani uch yulduzli toifaga aylantirgani uchun mehmonxonaning har bir xonasiga Jamgʻarma mablagʻlari hisobidan sarflangan xarajatlarning bir qismini qoplash uchun ajratiladigan mablagʻlar;

tadbirkor — Qoraqalpogʻiston Respublikasida faoliyat yuritayotgan, uch yulduz toifasiga ega boʻlmagan mavjud mehmonxonani uch yulduzli toifaga aylantirish orqali mehmonxona xonalarini jihozlash uchun sarflangan xarajatlarning bir qismini qoplash maqsadida murojaat qilgan tadbirkorlik subyekti.

3. Subsidiya Davlat xizmatlari markazlari yoki Yagona interaktiv davlat xizmatlari portali (keyingi oʻrinlarda — YIDXP) orqali Oʻzbekiston Respublikasi Turizm qoʻmitasi (keyingi oʻrinlarda — Qoʻmita) tomonidan ajratiladi.

4. Mehmonxona xizmatlarini sertifikatlashtirish, ularga toifa berish, shuningdek, sertifikatlashtirilgan xizmatlarining standartlashtirish boʻyicha normativ hujjatlar talablariga muvofiqligining davlat nazorati Qoʻmitaning “Turizm xizmatlarini sertifikatlash markazi” DUK tomonidan amalga oshiriladi.

5. Subsidiya Qoraqalpogʻiston Respublikasida faoliyat yuritayotgan va toifaga ega boʻlmagan mehmonxona belgilangan tartibda uch yulduzli toifaga ega boʻlganda ajratiladi.

6. Tadbirkor subsidiya olish uchun hujjatlarni topshirish sanasida bankrotlik yoki tugatish jarayonida boʻlmasligi lozim.

7. Tadbirkorga uch yulduzli toifaga aylantiriladigan mavjud mehmonxonalarning har bir xonasiga Jamgʻarma mablagʻlari hisobidan yigirma million soʻmdan subsidiya ajratiladi.

2-bob. Tadbirkorga subsidiya ajratish tartibi

8. Subsidiya ushbu Nizomga 1-ilovaga muvofiq sxema boʻyicha ajratiladi.

9. Tadbirkor davlat xizmatidan foydalanish uchun Davlat xizmatlari markaziga shaxsan kelib murojaat etadi yoki davlat xizmatlaridan elektron shaklda foydalanish uchun YIDXPda roʻyxatdan oʻtadi.

Tadbirkor oʻzi kelib murojaat etgan taqdirda, Davlat xizmatlari markazi xodimi tadbirkor nomidan, YIDXP orqali murojaat etgan taqdirda esa, mustaqil ravishda ushbu Nizomga 2-ilovada keltirilgan shaklga muvofiq davlat xizmatidan foydalanish uchun soʻrovnomani elektron shaklda toʻldiradi.

Subsidiya olish maqsadida taqdim etilgan soʻrovnomadagi maʼlumotlarning toʻgʻriligi va haqiqiyligiga tadbirkor masʼul hisoblanadi.

10. Soʻrovnoma toʻldirilganidan soʻng tadbirkor maʼlumotlar toʻgʻriligini tekshiradi va imzolarni identifikatsiya qilishning zamonaviy vositalari (daktiloskopiya, elektron raqamli imzo, Mobil-ID va boshqalar) bilan tasdiqlaydi.

Tadbirkor YIDXP orqali murojaat etgan taqdirda, soʻrovnomani elektron raqamli imzo bilan tasdiqlash talab etilmaydi.

11. Qoʻmita soʻrovnoma kelib tushgan kundan boshlab oʻn ish kunida uning mazkur Nizomda belgilangan talablarga mosligini oʻrganib chiqadi.

12. Qoʻmita Nizomning 11-bandida belgilangan muddat ichida soʻrovnomani koʻrib chiqib, subsidiya berish yoki subsidiya berishni rad etish toʻgʻrisida (rad etish asoslarini koʻrsatilgan holda) qaror qabul qiladi hamda qarorning elektron nusxasini tegishli Davlat xizmatlari markaziga (oʻzi kelib murojaat etganda) yoki talabgorga (elektron tarzda murojaat etganda) YIDXPdagi shaxsiy kabinetiga yuboradi.

13. Subsidiya berish toʻgʻrisidagi qarorda subsidiya miqdori, mehmonxona nomi, yulduz toifasi va xonalar fondi, joylashgan yeri (pochta manzili) va uning kadastr raqami, subsidiya olayotgan tadbirkor (yuridik shaxs) nomi va STIR hamda tijorat bankidagi hisobvaragʻi koʻrsatiladi.

14. Subsidiya berish quyidagi asoslarga koʻra rad etiladi:

soʻrovnomada ushbu Nizomga 2-ilovada koʻrsatilgan maʼlumotlar toʻliq koʻrsatilmaganligi;

tadbirkor ushbu Nizomning 5 va 6-bandlarda koʻrsatilgan talablarga javob bermasligi;

bir marta subsidiya taqdim etilgan tadbirkor subsidiya olish uchun takroran murojaat qilganda.

Subsidiya berishni ushbu bandda koʻrsatilmagan asoslar boʻyicha rad etishga yoʻl qoʻyilmaydi.

15. Tadbirkor subsidiya berishni rad etish toʻgʻrisidagi qaror nusxasini olgan kundan boshlab ikki oy ichida qarorda koʻrsatilgan kamchiliklarni bartaraf etishi hamda ularning bartaraf etilganligini tasdiqlovchi hujjatlarni ilova qilgan holda, subsidiya olish uchun takroran murojaat qilishi mumkin.

16. Soʻrovnoma takroran taqdim etilgan kundan boshlab besh ish kunida qayta koʻrib chiqiladi. Bunda subsidiya berishni yangi asoslar boʻyicha rad etishga yoʻl qoʻyilmaydi.

17. Ushbu Nizomning 15-bandida koʻrsatilgan muddat tugagandan soʻng taqdim etilgan soʻrovnoma yangi berilgan deb hisoblanadi.

18. Subsidiya berish toʻgʻrisida qaror qabul qilingan kundan boshlab oʻn ish kuni ichida Qoʻmita tadbirkorning xizmat koʻrsatuvchi tijorat bankidagi hisobvaragʻiga mablagʻlarni oʻtkazib beradi.

19. Subsidiya berish uchun Jamgʻarma hisobidan mablagʻlar ajratilgan tadbirkorlar roʻyxati (reyestri) Qoʻmitaning rasmiy veb-saytiga joylashtirib boriladi.

20. Qoʻmita subsidiya berish ishlarini tashkil etish, muvofiqlashtirish, monitoring qilish va Jamgʻarma hisobidan ajratilgan mablagʻlarning tadbirkorga yetkazilishi uchun masʼul hisoblanadi.

21. Tadbirkor subsidiya ajratilgan davrdan boshlab besh yildan kam boʻlmagan muddatda mehmonxona xizmatini koʻrsatishi va mehmonxonaga berilgan yulduz toifasini saqlab qolishi lozim.

Tadbirkor besh yil mobaynida mehmonxona xizmatlarini tashkil qila olmagan yoki mehmonxonaning yulduz toifasi pasaygan takdirda, ajratilgan subsidiyani faoliyat yuritgan davriga mutanosib ravishda chegirgan holda, qolgan mablagʻlarni Jamgʻarmaga qaytaradi.

Jamgʻarmaga qaytariladigan mablagʻlar Qoʻmita qaroriga muvofiq tadbirkor tomonidan Jamgʻarmaning maxsus hisobvaragʻiga oʻtkaziladi.

Qoʻmita Jamgʻarmaning maxsus hisobvaragʻiga qaytariladigan mablagʻlar tadbirkor tomonidan belgilangan muddatda toʻliq oʻtkazilmagan taqdirda, Qoʻmita mablagʻlarni undirish boʻyicha sudga murojaat qiladi hamda subsidiya sifatida ajratilgan mablagʻlarning belgilangan tartibda tadbirkordan qaytarish choralarini koʻradi.

22. Davlat xizmatlari markazlari va vakolatli organ oʻz faoliyatini amalga oshirishi natijasida olingan maʼlumotlar sir saqlanishini taʼminlaydi.

3-bob. Yakunlovchi qoidalar

23. Tadbirkor vakolatli organlarning xodimlari xatti-harakatlari ustidan qonunchilikda belgilangan tartibda shikoyat qilishlari mumkin.

24. Ushbu Nizom talablari buzilishida aybdor boʻlgan shaxslar qonunchilik hujjatlariga muvofiq javob beradilar.

Qoraqalpogʻiston Respublikasida uch yulduzliga aylantiriladigan mavjud mehmonxonalar uchun subsidiya ajratish tartibi toʻgʻrisidagi nizomga 1-ILOVA

Qoraqalpogʻiston Respublikasida uch yulduzliga aylantiriladigan mavjud mehmonxonalar uchun subsidiya ajratish

SXEMASI

Qoraqalpogʻiston Respublikasida uch yulduzliga aylantiriladigan mavjud mehmonxonalar uchun subsidiya ajratish tartibi toʻgʻrisidagi nizomga 2-ILOVA