Iqtisodiyotda davlat ishtirokini qisqartirish jarayonlarini va xususiylashtirish dasturi ijrosini samarali tashkil etish chora-tadbirlari toʻgʻrisida (268-son)

07.05.2024

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Iqtisodiyotda davlat ishtirokini qisqartirishning qoʻshimcha chora-tadbirlari toʻgʻrisida” 2024-yil 19-apreldagi PQ-162-son qarori ijrosini taʼminlash maqsadida Vazirlar Mahkamasi qaror qiladi:

1. Vazirlik va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

a) bir oy muddatda oʻzlari aksiyador (ishtirokchi), muassis boʻlgan, davlat ulushi 50 foizdan yuqori boʻlgan xoʻjalik jamiyatlari va davlat unitar korxonalari (keyingi oʻrinlarda — davlat ishtirokidagi korxonalar) bilan birgalikda:

xususiylashtirish dasturlariga muvofiq savdoga chiqarilishi belgilangan davlat ishtirokidagi korxonalarning aktivlarini Davlat aktivlarini boshqarish agentligiga (keyingi oʻrinlarda — Davaktiv agentligi) oʻtkazib berish masalasini mazkur korxonalarning boshqaruv organlari yigʻilishlarida koʻrib chiqib, hal etishni;

davlat ulushi savdoga chiqarilishi belgilangan davlat ishtirokidagi korxonalarning ustav kapitalida boshqa davlat ulushi ustun mavqega ega yoki uning ishtirokida boʻlgan xoʻjalik jamiyatlarining ulushlari Davaktiv agentligi tomonidan aniqlanganda, ularning boshqaruv organlari qarorlari asosida yaxlit paket sifatida savdoga chiqarish uchun ushbu ulushlarni Davaktiv agentligiga oʻtkazib berilishini;

b) davlat ishtirokidagi korxonalar bilan birgalikda xususiylashtirilishi belgilangan davlat aktivlarini ular sotilgunga qadar butligini taʼminlash va begonalashtirmaslik (sotish, sotiladigan ulush miqdorini kamaytirish, garovga qoʻyish, buzish va boshqalar) choralari koʻrilishini taʼminlasin.

Bunda xususiylashtirish dasturlariga muvofiq savdoga chiqarilishi belgilangan aktivlar quyidagi mexanizmlar asosida Davaktiv agentligiga oʻtkaziladi:

davlat ishtirokidagi korxonalarning ustav kapitalidagi davlat hamda xoʻjalik jamiyatlari ulushi ular tomonidan Davaktiv agentligiga topshirilgan aktivlarning sotilgan qiymatiga mos ravishda kamaytiriladi. Bunda sotilgan qiymat aktivlarning qoldiq (balans) qiymatidan yuqori boʻlgan taqdirda, davlat va xoʻjalik jamiyati ulushlari qoldiq (balans) qiymati miqdoriga kamaytiriladi;

davlat ulushini yaxlit paketda savdoga chiqarish uchun davlat ulushi ustun mavqega ega yoki uning ishtirokida boʻlgan xoʻjalik jamiyatlarining ulushlari balans qiymatida yoki baholangan qiymatda ularning ustav fondidagi davlat va xoʻjalik jamiyati ulushlarini kamaytirish hisobidan Davaktiv agentligiga oʻtkaziladi;

kredit qarzdorliklari yoki Hukumat qarorlari asosida davlat ishtirokidagi tijorat banklariga oʻtkazilgan aktivlar (xoʻjalik jamiyatlari ulushlari) Davaktiv agentligiga tijorat banklarining boshqaruv organlari qarori asosida oʻtkaziladi. Bunda aktivlarni berish ularning ehtimoliy yoʻqotishlarga qarshi yaratilgan zaxiralari yoki aktivlarni sotishdan tushgan mablagʻlarni ularni savdoga chiqarish va sotish bilan bogʻliq xarajatlarni chegirgan holda ushbu tijorat banklariga oʻtkazish orqali beriladi. Agar obyektlarning sotilgan qiymati qoldiq (balans) qiymatdan yuqori boʻlsa, tijorat banklariga qoldiq (balans) qiymati yoʻnaltiriladi.

Bunda sotilgan qoldiq (balans) qiymatidan yuqori boʻlgan taqdirda, davlat va xoʻjalik jamiyati ulushlari qoldiq (balans) qiymati miqdoriga kamaytiriladi.

2. Belgilansinki:

xususiylashtirish dasturlariga kiritilgan koʻchmas mulklarning kadastr hujjatlarida kamchiliklar aniqlanganda (hujjatlar mavjud boʻlmaganda), ushbu koʻchmas mulklarga kadastr pasporti va davlat reyestridan koʻchirmalar uchun toʻlovlar Davlat aktivlarini boshqarish, transformatsiya va xususiylashtirish jamgʻarmasi mablagʻlari hisobidan amalga oshirilishiga ruxsat beriladi;

qishloq xoʻjaligiga moʻljallanmagan yer uchastkalarini elektron onlayn-auksion savdolari orqali realizatsiya qilishda, yer uchastkasiga boʻlgan huquq turi va unda ruxsat beriladigan faoliyat turlari aholi punktlarining bosh rejalari, aholi punktlari qismlarini batafsil rejalashtirish loyihalari yoki hududlarni kompleks rivojlantirish va rejalashtirish boʻyicha boshqa hujjatlar (keyingi oʻrinlarda — shaharsozlik hujjatlari), shu jumladan, master-rejalar yoxud yer uchastkalaridan foydalanishning ruxsat etilgan turlaridan kelib chiqqan holda, tuman (shahar) qurilish va uy-joy kommunal xoʻjaligi boʻlimlari tomonidan belgilanadi. Bunda yer uchastkasi joylashgan aholi punktlarining tasdiqlangan shaharsozlik hujjatlari, shu jumladan, master-rejalari mavjud boʻlganda, yer uchastkalari qatʼiy ravishda mulk huquqi asosida savdolarga chiqariladi.

Oʻzbekiston Respublikasi Bosh vazirining oʻrinbosari A.J. Ramatov tuman (shahar) qurilish va uy-joy kommunal xoʻjaligi boʻlimlari xodimlarining qurilish obyektlarining tashqi qiyofasini belgilash boʻyicha shaxsiy masʼuliyatini kuchaytirish choralarini koʻrsin.

3. Davaktiv agentligi zarur hollarda, davlat ishtirokidagi korxonalar aktivlarini oʻtkazib berish tartibi boʻyicha takliflarni Davlat aktivlarini xususiylashtirish va xususiylashtirish jarayonlarini muvofiqlashtirish boʻyicha davlat komissiyasiga kiritib borsin.

Iqtisodiyot va moliya vazirligi hamda Davaktiv agentligi davlat ishtirokidagi korxonalar bilan birgalikda ular tomonidan joylashtirilgan obligatsiyalarni, xorijiy moliya tashkilotlari va banklaridan jalb etilgan kreditlar boʻyicha oʻrnatilgan kovenantlarni qonunchilik hujjatlari bilan ularning ustav kapitali miqdoriga belgilangan talablarni inobatga olgan holda Davaktiv agentligiga oʻtkazilishini taʼminlasin.

4. Qoraqalpogʻiston Respublikasi Vazirlar Kengashi Raisi, viloyatlar, Toshkent shahri, tuman va shaharlar hokimliklari Qurilish va uy-joy kommunal xoʻjaligi vazirligi, Transport vazirligi, Kadastr agentligi va Davaktiv agentligi bilan birgalikda:

a) tadbirkorlik va shaharsozlik faoliyatini tashkil etish uchun 1-ilovadagi rejaga muvofiq yer uchastkalarining ustuvor ravishda mulk huquqi asosida auksion savdolariga 2024-yilda chiqarilishini taʼminlasin. Bunda:

shaharsozlik hujjatlari ishlab chiqilmagan yer uchastkalari ijara huquqi asosida savdoga chiqariladi;

yer uchastkalarini mulk huquqi asosida savdoga chiqarishda yer uchastkalariga qoʻyiladigan shaharsozlik talablarining bajarilishiga Qurilish va uy-joy kommunal xoʻjaligi vazirligi tomonidan alohida eʼtibor qaratiladi;

b) xalqaro ahamiyatdagi avtomobil yoʻllari boʻylab zamonaviy infratuzilmani barpo etish, savdo va servis obyektlarini joylashtirish uchun 1a-ilovadagi rejaga muvofiq yer uchastkalari master-reja asosida savdolarga chiqarilishini taʼminlasin;

v) 2024-yil 1-iyulga qadar Sogʻliqni saqlash vazirligi, Maktabgacha va maktab taʼlimi vazirligi, Oliy taʼlim, fan va innovatsiyalar vazirligi bilan birgalikda tibbiyot va taʼlim muassasalarining boʻsh yer maydonlarini toʻliq xatlovdan oʻtkazib, roʻyxatini shakllantirsin. Bunda:

Iqtisodiyot va moliya vazirligi, Kambagʻallikni qisqartirish va bandlik vazirligi, Qurilish va uy-joy kommunal xoʻjaligi vazirligi tomonidan xatlov natijasida aniqlangan boʻsh yer uchastkalari joylashgan hududlarda aholini kamida 10 yillik demografik rivojlanish prognoz koʻrsatkichlarini inobatga olib, auksion savdolariga chiqariladigan boʻsh yer uchastkalarining roʻyxati shakllantiriladi;

Kadastr agentligi, Qurilish va uy-joy kommunal xoʻjaligi vazirligi hamda Davaktiv agentligi tomonidan shakllantirilgan roʻyxat asosida boʻsh yer uchastkalari faqat xususiy taʼlim va tibbiyot tashkilotlarini tashkil etish va ushbu faoliyatni amalga oshirish sharti bilan auksion savdolariga chiqariladi.

5. Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov yer uchastkalarining mulk va ijara huquqi asosida sotilishi holatidan kelib chiqib, hududlarda kelgusi oyda savdoga chiqariladigan yer uchastkalarining reja-grafigini oyma-oy tasdiqlab borsin va uning ijrosini qatʼiy nazoratga olsin.

6. Qoraqalpogʻiston Respublikasi Vazirlar Kengashi va viloyatlar hokimliklari tomonidan tijorat banklari koʻmagida 2-ilovaga muvofiq tuman va shaharlarda zamonaviy xizmat koʻrsatish majmualari va servis obyektlarini, jumladan, joylashtirish vositalari, turar joylar, savdo-koʻngilochar markazlarini joylashtirish boʻyicha master-reja loyihalari tayyorlanganligi maʼlumot uchun qabul qilinsin.

Qoraqalpogʻiston Respublikasi Vazirlar Kengashi va viloyatlar hokimliklari:

2024-yil 10-maydan boshlab joriy yil yakuniga qadar Qurilish va uy-joy kommunal xoʻjaligi vazirligi hamda Kadastr agentligi bilan birgalikda master-rejalarga muvofiq zamonaviy xizmat koʻrsatish majmualari va servis obyektlarini, jumladan, joylashtirish vositalari, turar joylar, savdo-koʻngilochar markazlarini tashkil qilish uchun boʻsh yer uchastkalarini auksion savdolariga chiqarish choralarini koʻrsin;

2024-yil 1-iyulga qadar aniq yer uchastkasi boʻyicha master-rejalarning ishlab chiqilishini yakunlab, hududiy arxitektura va shaharsozlik kengashlari bilan kelishilgan holda tasdiqlanishini taʼminlasin;

Qishloq xoʻjaligi vazirligi bilan birgalikda master-reja ishlab chiqilgan hududlardagi yer uchastkalarining toifasini sugʻorilmaydigan qishloq xoʻjaligiga moʻljallangan yerlar toifasidan sanoat, transport, aloqa, mudofaa va boshqa maqsadlarga moʻljallangan yerlar toifasiga oʻtkazish boʻyicha takliflarni Investitsiyalarni jalb qilish, sanoatni rivojlantirish va savdoni tartibga solish masalalari boʻyicha Hukumat komissiyasiga kiritib borsin.

Hukumat komissiyasi (Xodjayev) qishloq xoʻjaligiga moʻljallangan sugʻorilmaydigan yerlar toifasini oʻzgartirish boʻyicha kelib tushgan takliflarni bir oy muddatda koʻrib chiqib, qaror qabul qilinishini taʼminlasin.

7. Buxoro, Namangan va Surxondaryo viloyatlari hokimliklari ikki oy muddatda Buxoro, Namangan, Termiz shaharlarida va Pop tumanida master-rejalarning ishlab chiqilishini taʼminlasin.

8. Davaktiv agentligi Investitsiyalar, sanoat va savdo vazirligi, Qoraqalpogʻiston Respublikasi Vazirlar Kengashi hamda viloyatlar hokimliklari bilan birgalikda master-rejalar va ular asosida auksion savdolariga chiqariladigan yer uchastkalari toʻgʻrisidagi maʼlumotlarni aholi hamda tadbirkorlar, jumladan, mahalliy va xorijiy investorlar oʻrtasida keng yoritilishini tashkil qilsin.

9. Iqtisodiyot va moliya vazirligi Davaktiv agentligi, Turizm qoʻmitasi, Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda bir oy muddatda 2024-yilda qoʻshimcha ravishda 70 ta tuman va shaharda master-rejalarning ishlab chiqilishini tashkil etish yuzasidan tegishli qaror loyihasini Vazirlar Mahkamasiga tasdiqlash uchun kiritsin. Bunda:

mahalliy ijro hokimiyati organlari tuzilmalaridagi mavjud shtat birliklari doirasida master-rejalarni ishlab chiqishga koʻmaklashuvchi guruhlar faoliyatini yoʻlga qoʻyishni;

master-rejalarni ishlab chiqishning moliyalashtirish manbalarini belgilash, jumladan donor tashkilotlarning grantlarini jalb qilish va Davlat budjetidan budjet ssudasini ajratishni;

master-rejalarni ishlab chiqishga iqtisodiy kompleks tarkibiga kiruvchi vazirlik va idoralar rahbarlari hamda ularning oʻrinbosarlarini biriktirishni nazarda tutsin.

10. Kadastr agentligi Qishloq xoʻjaligi vazirligi bilan birgalikda 1a-ilovaga muvofiq hamda kelgusida zamonaviy xizmat koʻrsatish majmualari va servis obyektlarini, jumladan, joylashtirish vositalari, turar joylar, savdo-koʻngilochar markazlarini joylashtirishni nazarda tutuvchi master-reja loyihalari asosida auksion savdolariga chiqariladigan yer uchastkalarining toifasini sanoat, transport, aloqa, mudofaa va boshqa maqsadlarga moʻljallangan yerlar toifasiga oʻzgartirish yuzasidan Yer resurslarining holati boʻyicha milliy hisobotga tegishli oʻzgartirishlar kiritilishini taʼminlasin.

11. Respublikadagi shahar va shaharchalarning shaharsozlik hujjatlari (bosh rejalar) bilan taʼminlash rejasi 3-ilovaga muvofiq tasdiqlansin.

Qurilish va uy-joy kommunal xoʻjaligi vazirligi Iqtisodiyot va moliya vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda mazkur qarorga 3-ilovadagi shahar va shaharchalarning bosh rejasi hamda boshqa shaharsozlik hujjatlarining oʻz vaqtida va sifatli ishlab chiqilishi uchun masʼul etib belgilansin.

12. Davaktiv agentligi Raqamli texnologiyalar vazirligi bilan birgalikda 2024-yil 10-iyunga qadar “Davlat mulki” axborot tizimining:

davlat aktivlarining oldi-sotdi shartnomalari boʻyicha — Kadastr agentligi, “Qimmatli qogʻozlarning markaziy depozitariysi” AJ;

davlat aktivlariga berilgan orderlar va depo hisobvaragʻidan koʻchirmalar boʻyicha — Adliya vazirligi, Kadastr agentligi, Soliq qoʻmitasi, “Qimmatli qogʻozlarning markaziy depozitariysi” AJning axborot tizimlari bilan “Raqamli hukumat” tizimi orqali integratsiya qilinishini taʼminlasin.

13. Soliq qoʻmitasi Davaktiv agentligi, boshqa davlat organlari va tashkilotlarining murojaatlariga asosan xususiylashtirish dasturlariga kiritilgan aktivlarga qoʻyilgan taqiqlarning belgilangan tartibda yechilishini taʼminlasin.

14. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov hamda Davlat aktivlarini boshqarish agentligi direktori A.J. Ortiqov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2024-yil 7-may,

268-son

Vazirlar Mahkamasining 2024-yil 7-maydagi 268-son qaroriga 1-ILOVA

Tadbirkorlik va shaharsozlik faoliyatini tashkil etish uchun 2024-yilda ustuvor ravishda mulk huquqi asosida yer uchastkalarini auksion savdolariga chiqarish

REJASI

Izoh. Joriy yilning 1-choragida amalda savdoga chiqarilgan yer uchastkalari inobatga olingan holda reja shakllantirilgan.

Vazirlar Mahkamasining 2024-yil 7-maydagi 268-son qaroriga 1a-ILOVA

Xalqaro ahamiyatdagi avtomobil yoʻllari boʻylab zamonaviy infratuzilmani barpo etish, savdo va servis obyektlarini joylashtirish uchun master-reja asosida savdolarga chiqariladigan yer uchastkalari

REJASI

Vazirlar Mahkamasining 2024-yil 7-maydagi 268-son qaroriga 2-ILOVA

Tuman va shaharlarda zamonaviy xizmat koʻrsatish majmualari va servis obyektlarini, jumladan, joylashtirish vositalari, turar joylar, savdo-koʻngilochar markazlarini joylashtirish boʻyicha

MASTER-REJA LOYIHALARI

Izoh. Auksionga chiqariladigan lotlar soni, maydoni hamda obyektlar soni va yoʻnalishlariga yer tanlash materiallari ishlab chiqilib, “Yerelektron” ATT orqali kelishilgandan soʻng aniqlik kiritiladi.

Vazirlar Mahkamasining 2024-yil 7-maydagi 268-son qaroriga 3-ILOVA

Respublikadagi shahar va shaharchalarning shaharsozlik hujjatlari (bosh rejalar) bilan taʼminlash

REJASI