Hududlarda yoshlarga raqamli texnologiyalar va xorijiy tillarni oʻrganish uchun qoʻshimcha sharoitlar yaratishga qaratilgan “IT-shaharcha”lar faoliyatini tashkil etish toʻgʻrisida (PQ-178-son)
15.05.2024
Oʻzbekiston Respublikasi Prezidentining
Qarori
Hududlarda yoshlarni zamonaviy kasb va xorijiy tillarga oʻqitish, ularda raqamli texnologiyalardan foydalangan holda, shu jumladan xalqaro miqyosda xizmatlar koʻrsatish orqali yuqori daromad topish koʻnikmalarini shakllantirish, shuningdek, joylarda raqamlashtirish sohasidagi mutaxassislar tayyorlash faoliyatini kengaytirish hamda eksport qilish salohiyatini oshirish maqsadida:
1. Raqamli texnologiyalar vazirligi, Maktabgacha va maktab taʼlimi vazirligi hamda Yoshlar ishlari agentligining Samarqand viloyati Nurobod tumanida amalga oshirilgan tajriba asosida faoliyati hududlarda yoshlarni raqamli texnologiyalar va xorijiy tillarga oʻqitishga yoʻnaltirilgan “IT-shaharcha”larni tashkil etish toʻgʻrisidagi taklifiga rozilik berilsin.
2. Quyidagilar “IT-shaharcha”larning asosiy faoliyat yoʻnalishlari etib belgilansin:
yoshlarni raqamli texnologiyalar sohasiga yoʻnaltirish, ularning mazkur sohada bilim egallash boʻyicha intilishlarini ragʻbatlantirish;
seminarlar, mentorlik dasturlari va onlayn taʼlim resurslari orqali yoshlarda ularning mehnat bozorida muvaffaqiyatga erishishiga yordam beruvchi raqamli texnologiyalar sohasidagi koʻnikmalarni shakllantirish va rivojlantirish;
dasturlash va raqamli texnologiyalardan foydalangan holda xizmatlar koʻrsatish yoʻnalishlarida taʼlim berish, xorijiy tillar, shu jumladan ingliz tiliga oʻqitish orqali yoshlarning bilim va salohiyatini oshirish;
yosh avlodni zamonaviy kasblarga oʻqitish, shuningdek, ularda tabiiy resurslardan oqilona foydalanish koʻnikmalarini oshirish.
3. Quyidagilar:
“IT-shaharcha”lar faoliyatini tashkil etish uchun ajratiladigan yer uchastkalari hamda bino va inshootlar roʻyxati 1-ilovaga muvofiq;
“IT-shaharcha”lar faoliyatini samarali tashkil etish boʻyicha chora-tadbirlar dasturi 2-ilovaga muvofiq tasdiqlansin.
Qoraqalpogʻiston Respublikasi Vazirlar Kengashi va viloyatlar hokimliklari mazkur qarorga 1-ilovaga muvofiq qishloq xoʻjaligiga moʻljallanmagan yer uchastkalari belgilangan tartibda doimiy foydalanish huquqi bilan ajratilishini taʼminlasin.
4. Belgilansinki:
a) hududlarda tashkil etiladigan “IT-shaharcha”lar Raqamli texnologiyalar vazirligi huzuridagi “Raqamli taʼlimni rivojlantirish markazi” davlat muassasasining (keyingi oʻrinlarda — Markaz) yuridik shaxs maqomiga ega boʻlmagan boʻlinmalari hisoblanadi;
b) Markaz “IT-shaharcha”lar faoliyatini samarali tashkil etish va rivojlantirish boʻyicha quyidagilarni amalga oshiradi:
yoshlarga bepul taʼlim olish uchun qulay sharoitlar yaratadi, taʼlim jarayonlari sifatli tashkil etilishi va amalga oshirilishini taʼminlaydi hamda yoshlarga xalqaro masofaviy taʼlim platformalarida bilim olish imkoniyatini yaratadi;
taʼlim berish uchun mentorlarni jalb qiladi, ular bilan shartnomalar tuzadi, shuningdek, bilim va koʻnikmalarini doimiy oshirib boradi;
“IT-shaharcha”lar faoliyatini muvofiqlashtiradi hamda yuklatilgan vazifalar ijrosi nazoratini amalga oshiradi;
oʻquv dasturlariga binoan yoshlarning bilim olishi va koʻnikmalar egallashi, shuningdek, mashgʻulotlar boʻyicha davomatini monitoring qilib boradi;
Yoshlar ishlari agentligi bilan birgalikda “IT-shaharcha”larda yoshlar ishtirokida sohaga oid turli musobaqalar, tanlov va boshqa tadbirlarni tashkil qiladi;
“IT-shaharcha”lar faoliyatini doimiy ravishda rivojlantirib boradi hamda samaradorligini oshirish choralarini koʻradi.
5. Shunday tartib oʻrnatilsinki, unga muvofiq:
“IT-shaharcha”larni oʻquv adabiyotlari, metodik qoʻllanma va boshqa taʼlim resurslari bilan taʼminlash, mentorlar xizmatiga haq toʻlash hamda ajratilgan bino va inshootlarni saqlash xarajatlari Raqamli texnologiyalar vazirligi huzuridagi Raqamli texnologiyalarni rivojlantirish jamgʻarmasi (keyingi oʻrinlarda — Jamgʻarma) hamda qonunchilikda taqiqlanmagan boshqa manbalar hisobidan;
“IT-shaharcha”larning bino va inshootlarini qurish, mavjudlarini kapital va joriy taʼmirlash, mebel, kompyuter texnikasi hamda boshqa vositalar bilan taʼminlash investitsiyalar, mahalliy budjet, davlat-xususiy sheriklik, tashabbuskor tadbirkorlar, homiylik mablagʻlari va qonunchilikda taqiqlanmagan boshqa manbalar hisobidan;
Jizzax viloyatining Sharof Rashidov, Forish va Zomin tumanlarida “IT-shaharcha”larni qurish va jihozlash ishlari Yoshlar ishlari agentligining Yoshlarga oid davlat siyosatini qoʻllab-quvvatlash jamgʻarmasi hisobidan moliyalashtiriladi.
6. Raqamlashtirish sohasidagi taʼlimni rivojlantirish loyihalarini amalga oshirish, shu jumladan “IT-shaharcha”lar faoliyatini samarali tashkil etish maqsadida raqamli texnologiyalar vaziriga “Axborot texnologiyalari va axborot resurslarini rivojlantirish markazi” masʼuliyati cheklangan jamiyatining Jamgʻarma mablagʻlari hisobidan moliyalashtiriladigan shtat birliklarini bosqichma-bosqich Markazga oʻtkazish vakolati berilsin.
7. Raqamli texnologiyalar vaziri Sh.X. Shermatov hududlarda yoshlarning raqamlashtirish va xorijiy tillarni oʻrganishi uchun sharoitlar yaratishga qaratilgan “IT-shaharcha”lar faoliyatini tashkil etish boʻyicha belgilangan tadbirlar ijrosi holati yuzasidan Oʻzbekiston Respublikasi Bosh vaziri A.N. Aripovga har chorakda axborot kiritib borsin.
8. Hududlarda “IT-shaharcha”lar faoliyatini samarali tashkil etish boʻyicha ishchi guruh tarkibi 3-ilovaga muvofiq tasdiqlansin hamda quyidagilar uning asosiy vazifalari etib belgilansin:
namunaviy loyihalar asosida “IT-shaharcha”larni barpo etish, ularni mebel, kompyuter texnikasi hamda boshqa vositalar, zaruriy muhandislik infratuzilmalari bilan taʼminlash ishlarini tashkil etish;
taʼlim jarayoniga raqamli texnologiyalar, xorijiy tillar va zamonaviy kasblar yoʻnalishida yuqori bilim va koʻnikmalarga ega boʻlgan mutaxassislar (mentorlar)ni jalb qilishga koʻmaklashish;
“IT-shaharcha”lar faoliyati samaradorligini baholash va monitoring qilish;
mutaxassislar (mentorlar) malakasi muntazam oshirib borilishi, yoshlarning “IT-shaharcha”larda tahsil olishga yoʻnaltirilishini taʼminlash.
9. Qoraqalpogʻiston Respublikasi Vazirlar Kengashi va viloyatlar hokimliklari “IT-shaharcha”larning bino va inshootlarini qurish, mavjudlarini kapital taʼmirlash uchun pudrat tashkilotlari belgilangan tartibda jalb qilinishini taʼminlasin.
Qurilish va uy-joy kommunal xoʻjaligi vazirligi “IT-shaharcha”lar faoliyatini yoʻlga qoʻyish uchun zarur bino va inshootlarda qurilish-montaj ishlari sifatli amalga oshirilishi yuzasidan belgilangan tartibda davlat arxitektura-qurilish nazoratini oʻrnatsin.
10. Davlat aktivlarini boshqarish agentligi hamda Raqamli texnologiyalar vazirligining “IT-shaharcha”lar faoliyatini yoʻlga qoʻyish uchun zarur bino va inshootlar foydalanishga topshirilgandan soʻng ularni belgilangan tartibda Markazga operativ boshqaruv huquqi asosida oʻtkazish toʻgʻrisidagi taklifi maʼqullansin.
Bunda, Jizzax viloyatining Sharof Rashidov, Forish va Zomin tumanlarida barpo etiladigan “IT-shaharcha”lar Yoshlar ishlari agentligiga operativ boshqaruv huquqi asosida oʻtkaziladi.
11. Oʻzbekiston Respublikasi Prezidentining 2022-yil 18-martdagi “Iqtisodiyotda davlat ishtirokini yanada qisqartirish va xususiylashtirishni jadallashtirishga oid qoʻshimcha chora-tadbirlar toʻgʻrisida”gi PQ-168-son qarorining 2-ilovasidan 177-pozitsiya chiqarib tashlansin.
12. Maktabgacha va maktab taʼlimi vazirligi, Yoshlar ishlari agentligi hamda Raqamli texnologiyalar vazirligi yoshlarni “IT-shaharcha”larga muntazam ravishda jalb qilib borish choralarini koʻrsin.
13. Raqamli texnologiyalar vazirligi Yoshlar ishlari agentligi va Adliya vazirligi bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.
14. Mazkur qarorning ijrosini samarali tashkil qilishga masʼul va shaxsiy javobgar etib raqamli texnologiyalar vaziri Sh.X. Shermatov hamda Yoshlar ishlari agentligi direktori A.Z. Saʼdullayev belgilansin.
Qaror ijrosini muhokama qilib borish, masʼul tashkilotlar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2024-yil 15-may,
PQ-178-son
Oʻzbekiston Respublikasi Prezidentining 2024-yil 15-maydagi PQ-178-son qaroriga 1-ILOVA
“IT-shaharcha”lar faoliyatini tashkil etish uchun ajratiladigan yer uchastkalari hamda bino va inshootlar
ROʻYXATI
Izoh: Yer uchastkalari (bino va inshootlar) roʻyxatiga tegishli hududdagi yoshlar soni va ularning qiziqishlaridan kelib chiqqan holda, Qoraqalpogʻiston Respublikasi Vazirlar Kengashi va viloyat hokimliklari hamda Raqamli texnologiyalar vazirligi takliflariga asosan Vazirlar Mahkamasi tomonidan oʻzgartirish kiritilishi mumkin.
Oʻzbekiston Respublikasi Prezidentining 2024-yil 15-maydagi PQ-178-son qaroriga 2-ILOVA
“IT-shaharcha”lar faoliyatini samarali tashkil etish boʻyicha
CHORA-TADBIRLAR DASTURI
Oʻzbekiston Respublikasi Prezidentining 2024-yil 15-maydagi PQ-178-son qaroriga 3-ILOVA
Hududlarda “IT-shaharcha”lar faoliyatini samarali tashkil etish boʻyicha ishchi guruh
TARKIBI
Izoh: Ishchi guruh aʼzolari boshqa ishga oʻtgan taqdirda, uning tarkibga mazkur lavozimlarga yangi tayinlangan yoki tegishli funksiyalarni bajarish zimmasiga yuklatilgan shaxslar kiritiladi.