Aholiga sotiladigan avtomobil benzini chakana narxlarini oʻzgartirish toʻgʻrisida (509-son)

14.10.1994

Oʻzbekiston Respublikasi Vazirlar Mahkamasining

qarori

Neft va uni qayta ishlash mahsulotlari narxlarining oshib borayotganligi munosabati bilan hamda foydalanishning samaradorligini oshirish maqsadida Vazirlar Mahkamasi qaror qiladi:

1. 1994-yilning 17-oktabridan boshlab aholiga sotiladigan avtomobil benzinining chakana narxi 1 litri uchun 6 soʻm miqdorida belgilansin.

2. Oʻzbekiston Respublikasi Ijtimoiy taʼminot vazirligi belgilangan roʻyxatlar boʻyicha urush qatnashchilari va faxriylari, urush va mehnat nogironlariga oyiga belgilangan 50 litr avtobenzinni chakana narxlarning 50 foizi darajasida imtiyozli narxlarda sotish normasi saqlab qolinsin.

3. Oʻzbekiston Respublikasi Moliya vazirligi bozor va bozordan tashqari fondlar narxlari darajasini muvofiqlashtirgan holda benzinning yangi chakana narxlari preyskurantini tasdiqlasin va uni barcha manfaatdor vazirliklar, idoralar, korxonalar va tashkilotlarga yetkazsin.

4. “Oʻzdavneftmahsulot” davlat-aksionerlik birlashmasi, uning joylardagi organlari, avtomobil benzinini naqd pulga sotadigan avtomobil benzini quyish stansiyalaridagi avtomobil benzini qoldiqlarini 1994-yil 17-oktabrdagi holatiga koʻra qayta baholab chiqsinlar hamda qayta baholashdan tushgan mablagʻlarni oʻzlarining aylanma mablagʻlarini koʻpaytirishga yoʻnaltirsinlar.

1994-yilda respublikaning bozor fondi 30 ming tonnaga koʻpaytirilsin.

5. Oʻzbekiston Respublikasi Vazirlar Mahkamasining 1994-yil 1-oktabrdagi 493-son qarori oʻz kuchini yoʻqotgan deb hisoblansin.

Oʻzbekiston Respublikasining Bosh vaziri A. MUTALOV

Toshkent sh.,

1994-yil 14-oktabr,

509-son