Arxitektura va qurilish sohasidagi ishlarni tashkil etish va nazoratni takomillashtirish chora-tadbirlari toʻgʻrisida (165-son)

27.04.2000

Oʻzbekiston Respublikasi Vazirlar Mahkamasining

qarori

Vazirlar Mahkamasi qayd etadiki, keyingi yillarda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Oʻzbekiston Respublikasi Davlat arxitektura va qurilish qoʻmitasi va Arxitektorlar uyushmasi tomonidan arxitektura-shahar qurilishi toʻgʻrisidagi qonun hujjatlariga rioya qilish, aholi punktlarini loyiha-rejalashtirish hujjatlari bilan taʼminlash va ularni amalga oshirish masalalariga zarur eʼtibor berilmayapti.

Koʻpchilik shaharlarda shahar markazlari, arxitektura komplekslarini shakllantirish, tarixiy-madaniy merosni rekonstruksiya qilish shahar qurilishi talablari buzilgan holda transport magistrallari, muhandislik-kommunikatsiya tizimlari, ijtimoiy va maishiy infratuzilma kompleks rivojlantirilmasdan rejasiz amalga oshirilmoqda.

Loyiha-qidiruv institutlari va tashkilotlarining faoliyati sust tashkil etilgan, shahar qurilishi istiqbollarini belgilashda hamda respublika iqtisodiyoti tarmoqlari va sohalarini rivojlantirishda ularning roli yetarli emas.

Oʻzbekiston Respublikasi Prezidentining “Oʻzbekiston Respublikasida arxitektura va shahar qurilishini yanada takomillashtirish chora-tadbirlari toʻgʻrisida” 2000-yil 26-apreldagi PF-2595-son Farmoniga muvofiq hamda shaharlar, tuman markazlari va aholi punktlari shaharsozlik jihatidan kompleks rivojlantirilishini taʼminlash, loyiha-qidiruv ishlari tashkil etilishini yaxshilash maqsadida Vazirlar Mahkamasi qaror qiladi:

1. Qoraqalpogʻiston Respublikasi Vazirlar Kengashi Raisi, viloyatlar hokimlari, Oʻzbekiston Respublikasi Davlat arxitektura va qurilish qoʻmitasi raisining eʼtibori bir qancha shaharlar va boshqa aholi punktlari markazlarini barpo etishda yoʻl qoʻyilgan arxitektura va shaharsozlik sohasidagi amaldagi qonun hujjatlari qoʻpol ravishda buzilishi hollariga qaratilsin.

Koʻrsatib oʻtilgan rahbarlar yoʻl qoʻyilgan kamchiliklarni bartaraf etish, shaharlar va aholi punktlarini rivojlantirishning bosh rejalari loyihalari va ularning markazlarini shakllantirishning batafsil rejalashtirilishi loyihalari bilan taʼminlash, ularni zamonaviy shart-sharoitlar va talablarga muvofiqlashtirish boʻyicha kechiktirib boʻlmaydigan chora-tadbirlar koʻrsinlar.

Shaharlar va tuman markazlarida tegishli loyiha hujjatlarisiz hamda ularni shaharlar va aholi punktlarining tasdiqlangan bosh rejalariga muvofiqlashtirmasdan obyektlar qurish taqiqlansin.

2. Oʻzbekiston Respublikasi Davlat arxitektura va qurilish qoʻmitasi shaharlar va aholi punktlarini barpo etishda normativ-huquqiy hujjatlarga rioya qilinishi ustidan nazoratni kuchaytirsin, qonun hujjatlarida belgilangan tartibda ushbu hujjatlarni buzish hollarini oʻz vaqtida bartaraf etsin.

3. “OʻzshaharsozlikLITI” davlat unitar korxonasi instituti shaharsozlik hujjatlarini ishlab chiqish boʻyicha bosh tashkilot etib belgilansin va unga quyidagilar yuklansin:

shaharlar, tuman markazlari va shahar posyolkalarini shaharsozlik hujjatlari bilan taʼminlash;

loyiha-rejalashtirish hujjatlari doimiy ravishda yangilanishi monitoringini yuritish, uning amalga oshirilishini nazorat qilish;

rejalashtirish hujjatlarini ishlab chiqish yuzasidan normativ-uslubiy rahbarlik qilish, ushbu sohada ilmiy-tadqiqot ishlari olib borish.

Oʻzbekiston Respublikasi Davlat arxitektura va qurilish qoʻmitasi institutning tuzilmasi va ustavini belgilangan tartibda qayta koʻrib chiqsin, viloyatlarda uning mintaqaviy filiallarini tashkil etsin, institutning moddiy-texnika bazasini mustahkamlasin.

Qoraqalpogʻiston Respublikasi Vazirlar Kengashi, viloyatlar hokimliklari “OʻzshaharsozlikLITI” davlat unitar korxonasi instituti filiallarini tegishli joylar, inventar va texnikaviy vositalar bilan taʼminlasinlar.

Toshkent shahri va Toshkent viloyati boʻyicha shaharsozlik hujjatlarini ishlab chiqish boʻyicha bosh tashkilot funksiyasi Toshkent qurilish bosh rejasi ilmiy-tadqiqot va loyihalash institutida saqlab qolinsin.

7. Vazirlar Mahkamasining 1999-yil 8-noyabrdagi 492-son qarori 1-bandining uchinchi xatboshi, 2-bandi, 5-bandining uchinchi xatboshi oʻz kuchini yoʻqotgan deb hisoblansin.

8. Oʻzbekiston Respublikasi Adliya vazirligi Oʻzbekiston Respublikasi Davlat arxitektura va qurilish qoʻmitasi, boshqa manfaatdor vazirliklar va idoralar bilan birgalikda bir oy muddatda qonun hujjatlariga mazkur qarordan kelib chiquvchi oʻzgartirish va qoʻshimchalar kiritish toʻgʻrisida Vazirlar Mahkamasi taklif kiritsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Isayev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2000-yil 27-aprel,

165-son