Oʻzbekiston ulgurji va birja savdosi boʻyicha Respublika aksionerlik uyushmasi - “Oʻzulgurjibirjasavdo”ni tashkil etish va uning faoliyati masalalari toʻgʻrisida (136-son)

14.03.1994

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Oʻzbekiston shartnomalar va savdo boʻyicha davlat aksionerlik uyushmasi — “Oʻzshartnomasavdo”ni tugatish hamda Oʻzbekiston ulgurji va birja savdosi boʻyicha respublika aksionerlik uyushmasi — “Oʻzulgurjibirjasavdo”ni taʼsis etish toʻgʻrisida” 1994-yil 28-fevraldagi PF-772-son Farmonini bajarish maqsadida Vazirlar Mahkamasi qaror qiladi:

1. 1-ilova*ga muvofiq tarkibda tashkiliy qoʻmita tuzilsin va unga “Oʻzshartnomasavdo”ni tugatish boʻyicha tashkiliy-texnikaviy tadbirlarni ishlab chiqish va bajarish hamda Oʻzbekiston ulgurji va birja savdosi boʻyicha respublika “Oʻzulgurjibirjasavdo” aksionerlik uyushmasini tashkil etish uchun taʼsis hujjatlarini tayyorlash yuklansin.

Oʻzbekiston ulgurji va birja savdosi boʻyicha respublika aksionerlik uyushmasini funksional boshqarish sxemasi 2-ilovaga* muvofiq hamda uyushmaning ijro etuvchi apparati tuzilmasi 3 va 3a-ilovalarga* muvofiq maʼqullansin.

* 1, 2-ilovalar berilmaydi.

* 3, 3a-ilovalar rus tilidagi matnda berilgan.

Tashkiliy qoʻmita bir oy muddatda Oʻzbekiston ulgurji va birja savdosi boʻyicha respublika aksionerlik uyushmasi Ustavini ishlab chiqsin, belgilangan tartibda Adliya vazirligida roʻyxatdan oʻtkazsin va tarkibiy boʻlinmalarni barpo etish hamda “Oʻzulgurjibirjasavdo” uyushmasini taʼsis etishga doir barcha tashkiliy ishlarni shu yilning 10-iyuligacha tugallasin.

2. Belgilab qoʻyilsinki, “Oʻzshartnomasavdo” uyushmasi toʻliq tugatilguniga qadar hamda Oʻzbekiston ulgurji va birja savdosi boʻyicha respublika “Oʻzulgurjibirjasavdo” aksionerlik uyushmasi taʼsis etilguniga qadar oʻz funksiyalarini “Oʻzshartnomasavdo” Ustaviga muvofiq yuklatilgan huquqlar bilan amalga oshiradi. Oʻzbekiston Respublikasi Prezidentining 1994-yil 28-fevraldagi PF-772-son Farmonining 4 va 5-bandlarida nazarda tutilgan qoidalar bundan mustasno.

3. Maʼlumot uchun qabul qilinsinki:

Oʻzbekiston Respublikasi Davlat mulki qoʻmitasi “Oʻzshartnomasavdo” uyushmasi bilan birgalikda Oʻzbekiston Respublikasi Prezidentining 1994-yil 28-fevraldagi PF-772-son Farmoniga muvofiq “Oʻzshartnomasavdo” uyushmasining tarkibiy boʻlinmalarini va uning hududiy organlarini 4 va 4a-ilovalarga* muvofiq davlat tasarrufidan chiqarish dasturini ishlab chiqqan;

* 4-ilova rus tilidagi matnda berilgan.

* 4a-ilova berilmaydi.

ulgurji va birja savdosi boʻyicha respublika “Oʻzulgurjibirjasavdo” aksionerlik uyushmasi 2-ilovaga muvofiq ochiq turdagi aksionerlik jamiyatlari negizida, shuningdek, ham Oʻzbekiston Respublikasining, ham xorijiy davlatlarning boshqa yuridik va jismoniy shaxslari ishtirokida tashkil etiladi.

4. Oʻzbekiston Respublikasi Davlat mulki qoʻmitasi “Oʻzulgurjibirjasavdo” uyushmasi boshqaruviga aksiyalarning davlatga tegishli ulushini tasarruf etish huquqini bersin.

5. Belgilab qoʻyilsinki, ulgurji va birja savdosi boʻyicha respublika “Oʻzulgurjibirjasavdo” uyushmasi:

oʻz faoliyatini aksionerlarning umumiy yigʻilishida “Xoʻjalik jamiyatlari va shirkatlari toʻgʻrisida” Oʻzbekiston Respublikasi Qonuni asosida qabul qilingan Ustavga muvofiq amalga oshiradi;

belgilangan tartibda davlat organlarida roʻyxatdan oʻtkaziladi hamda oʻzini oʻzi mablagʻ bilan toʻliq taʼminlash va oʻzini oʻzi boshqarish asosida faoliyat koʻrsatadi;

davlat ehtiyojlari uchun hukumatlararo bitimlar va toʻgʻridan toʻgʻrikontraktlar boʻyicha tovar resurslarini xarid qilish va sotish yuzasidan ilgari tuzilgan kontraktlarni bajarish, shuningdek, qoʻshma korxonalarning, aksionerlik jamiyatlarining ustav fondlarida ulush qoʻshgan holda ishtirok etish, kredit resurslaridan foydalanganlik uchun bank foizlari toʻlash majburiyatlari hamda yuridik va jismoniy shaxslar bilan tuzilgan boshqa shartnomaviy majburiyatlar boʻyicha “Oʻzshartnomasavdo”ning huquqiy vorisi hisoblanadi.

6. Maʼlumot uchun qabul qilinsinki, quyidagilar faoliyatning asosiy yoʻnalishlari hiso6lanadi:

a) “Oʻzulgurjibirjasavdo” uyushmasi boʻyicha:

mulkchilik shakllaridan qatʼi nazar, korxonalar va tashkilotlarga, shu jumladan, tadbirkorlarga tijorat-vositachilik, savdo, ishlab chiqarish, lizing, transport, moliya, auditor, axborot xizmatlari koʻrsatish;

ulgurji, birja, yarmarka va kim oshdi savdosini tashkil etish hamda tovar-xomashyo resurslari bozorida savdo bitishuvlarini tuzish ishlariga barcha yuridik va jismoniy shaxslarga qulay shart-sharoitlar yaratish;

Hukumat buyurtmalari boʻyicha, trast bitim-shartnoma asosida Oʻzbekiston Respublikasi davlat ehtiyojlari uchun vatanimizdagi va xorijdagi tovar ishlab chiqaruvchilardan, tijorat firmalaridan, kompaniyalar va biznesmenlardan mahsulot xarid qilish hamda uni Oʻzbekiston Respublikasi Vazirlar Mahkamasi tomonidan belgilangan tartibda isteʼmolchilarga sotish;

davlat organlari bilan bitim tuzish asosida, saqlash uchun javobgar boʻlgan korxonalar va tashkilotlarning punktlarida davlat zaxirasidagi moddiy resurslarni qabul qilib olish, saqlash; yangilash, qoʻshimcha ishlash va sotishni taʼminlash;

b) viloyat aksionerlik kompaniyalari boʻyicha:

mulkchilik shakllaridan qatʼi nazar, yuridik va jismoniy shaxslarga tijorat-vositachilik, savdo, ishlab chiqarish, transport, axborot xizmatlari koʻrsatish;

viloyat tovar — xomashyo birjalari, yarmarka va kimoshdi savdosini tashkil etish;

mulkchilik shakllaridan qatʼi nazar, yuridik va jismoniy shaxslarning mahsulotlar sotish hamda moddiy-texnika resurslari sotib olishlari boʻyicha qulay va oʻzaro foydali shart-sharoitlar yaratish;

foydali bitimlarni amalga oshirish uchun respublika hududida va chet mamlakatlarda xomashyo resurslarini qidirib topish, narxlarning belgilanishi boʻyicha axborot xizmatlari koʻrsatish.

7. “Oʻzulgurjibirjasavdo” uyushmasi Oʻzbekiston Respublikasi Davlat mulki qoʻmitasi bilan birgalikda bir oy muddatda fond birjasi va koʻchmas mulk birjasi tashkil qilish uchun maydonlar ajratish va shart-sharoitlar yaratish masalalarini hal etsin.

8. Oʻzbekiston Respublikasi Markaziy bankiga aksionerlik birja bankini tashkil qilish va uning faoliyat koʻrsatishi uchun huquq beruvchi ruxsatnoma (litsenziya)ni rasmiylashtirishda unga uslubiy yordam koʻrsatish tavsiya etilsin.

9. “Oʻzavtotrans” davlat korporatsiyasi tugatilayotgan “Oʻzshartnomasavdo”ga belgilangan yengil avtomobil transporti xizmati koʻrsatish boʻyicha limitlarini Oʻzbekiston ulgurji va birja savdosi boʻyicha respublika “Oʻzulgurjibirjasavdo” aksionerlik uyushmasida qoldirsin.

10. Oʻzbekiston Respublikasi Aloqa vazirligi tugatilayotgan “Oʻzshartnomasavdo” va uning tarkibiy boʻlinmalarida oʻrnatilgan barcha telefon va aloqa turlarini “Oʻzulgurjibirjasavdo” uyushmasida qoldirilsin.

11. Oʻzbekiston Respublikasi Prezidenti huzuridagi Vazirlar Mahkamasining “Oʻzbekiston shartnomalar va savdo boʻyicha davlat-aksionerlik uyushmasi (“Oʻzshartnomasavdo”) faoliyatini tashkil etish toʻgʻrisida” 1992-yil 9-martdagi 115-son, “Oʻzbekiston shartnomalar va savdo boʻyicha davlat-aksionerlik uyushmasining Ustavini tasdiqlash toʻgʻrisida” 1992-yil 10-avgustdagi 369-son qarorlari oʻz kuchini yoʻqotgan deb hisoblansin.

12. Mazkur qarorning bajarilishini nazorat qilish Vazirlar Mahkamasining Resurslar, moddiy-texnika taʼminoti va bitimlar boʻlimiga yuklatilsin.

Vazirlar Mahkamasining Raisi I. KARIMOV

Toshkent sh.,

1994-yil 14-mart,

136-son