Taksofonlardan telefon aloqasi xizmatlarini taqdim etish va ulardan foydalanish (445-son)

11.06.1998

Qoidalari

[Oʻzbekiston Respublikasi Adliya vazirligi tomonidan 11-iyun 1998-yil 445-son bilan davlat roʻyxatidan oʻtkazilgan]

1.Umumiy qoidalar

1. Mazkur qoidalar Oʻzbekiston Respublikasi Vazirlar Mahkamasining 1997-yil 28-avgustdagi 420 -sonli “Oʻzbekiston pochta va telekommunikatsiyalar agentligi toʻgʻrisida hamda pochta va telekommunikatsiyalarni rivojlantirishni davlat tomonidan qoʻllab-quvvatlash jamgʻarmasi toʻgʻrisida nizomlarni tasdiqlash haqida”gi qarori asosida ishlab chiqilgan.

2. Mazkur qoidalar telefon-avtomat (taksofon)lardan telefon aloqasi xizmatlarini taqdim etishning tartib va shartlarini aniqlaydi.

3. Taksofonlarning turi va vazifasiga qarab ulardan mahalliy (bir aholi yashash punkti yoki qishloq tumani), shaharlararo va xalqaro soʻzlashuvlar amalga oshirilishi mumkin.

4. Soʻzlashuvlar uchun toʻlovlar maxsus jeton va yoki telefon kartochkalaridan foydalangan holda amalga oshiriladi.

Taksofonni ekspluatatsiya qiluvchi korxonalar mahsus jeton va telefon kartochkalarini foydalanuvchilar uchun qulay boʻlgan joylarda sotishni taʼminlashlari kerak.

Ularni savdo tarmoqlari, aloqa boʻlimlari va h.k. orqali sotishga yoʻl qoʻyiladi.

5. Umumiy foydalanish abonent punktlari boʻlgan taksofonlar oʻrnatilgan punktlar aholining telefon aloqasiga boʻlgan ehtiyojini yanada toʻliqroq qondirish, foydalanish qulayligi, taksofon va kabinalarning texnik ekspluatatsiyasini taʼminlash, mehnat muhofazasi va xavfsizlik texnikasi qoidalariga rioya qilishni hisobga olgan holda tashkil etilishi lozim.

6. Taksofonlar koʻchalarda, maydonlarda, aeroportlarda, vokzallarda, metroda, avtostansiyalarda, doʻkonlarda, oʻquv yurtlarida, shahar jamoa transporti bekatlarida, tibbiy va davolash muassasalarida, mahallalar va boshqa joylarda, shuningdek, maxsus jihozlangan soʻzlashuv punktlarida davlat hokimiyati va boshqaruvi organlari, fuqarolarning oʻz-oʻzini boshqarish organlari yoki egalari bilan kelishilgan holda oʻrnatiladi.

7. Taksofon jihozlarini quyidagicha oʻrnatish koʻzda tutiladi:

bino tashqarisida (koʻchalarda, maydonlarda, xiyobonlarda va b.) joylashgan kabinalarda va yarim kabinalarda;

atmosfera yogʻingarchiliklari taʼsiriga yoʻl qoʻyilmaydigan sharoitlar taʼminlangan binolarda (yer osti oʻtish yoʻllari, metro, vokzal xonalari, aeroportlar, doʻkonlar va b.) ochiq holda (devorlarda, yarim kabinalarda).

Taksofonlar, kabinalar va yarim kabinalarning joylashishi va jihozlanishi foydalanishning qulayligani, tashqi shovqin taʼsiridan chegaralashni, soʻzlashuvlar sirini, yoritilganlikni taʼminlashi lozim.

8. Taksofonlar oʻrnatilgan joylarda kuyidagalar boʻlishi shart:

taksofondan foydalanish yoʻriqnomasi;

maʼlumot tariqasidagi axborot (maʼlumot-soʻrov xizmatlarining telefon raqamlari, yaqin atrofda joylashgan taksofon manzili va h.k.);

taksofonlarni ekspluatatsiya qiluvchi ekspluatatsiya korxonasi haqidaga axborot (nomi, manzili, telefon raqamlari);

taqdim etilayotgan xizmatlar tariflari;

maxsus jeton, telefon kartochkalarini sotib olish punktlari haqidagi axborot.

9. Taksofonlarning turiga koʻra quyidagi pullik xizmat turlari taqdim etiladi:

mahalliy tarmoq abonenti yoki maʼlumot-servis xizmati (ob-havo maʼlumotlari, taksi chaqiruvi va h.k) bilan telefon soʻzlashuvi;

shaharlararo (Oʻzbekiston Respublikasi doirasida) telefon soʻzlashuvlari;

boshqa mamlakat abonentlari bilan xalqaro telefon soʻzlashuvlari.

Maxsus va avariya xizmatlari-yongandan muhofaza (01), militsiya (02), tez tibbiy yordam (03), shahar gaz avariya xizmati (04) chaqiruvi bepul amalga oshiriladi.

II. Taksofonlarni ekspluatatsiya qiluvchi korxonalar quyidagilarga majburdirlar:

taksofonlarning kecha-kunduz sifatli ishlashini, ularning tutilishini, shuningdek, kabina va yarim kabinalarning soz holatda boʻlishini taʼminlash;

foydalanuvchilarning maxsus jeton yoki telefon kartochkalarini sotib olishlari uchun barcha qulayliklarni yaratish;

raqamni toʻgʻri terish, taksofondan foydalanish yoʻriqnomasi va maʼlumot tariqasidagi axborot bilan tanishish, hamda soʻzlashuv olib borilishining qulayligiga imkon beradigan yoritilganlikni taʼminlash.

III Telekommunikatsiya korxonalari:

amaldagi meʼyoriy hujjatlarga muvofiq ravishda va belgilangan tartibda taksofon aloqasining yangi shakllarini tatbiq etish hukuqiga egadirlar.

IV. Foydalanuvchi quyidagilarga majbur:

takdim qilingan soʻzlashuv uchun haq toʻlashga buning uchun moʻljallangan shu turdaga taksofon uchun maxsus jeton yoki telefon kartochkalaridan foydalanishga;

taksofonlarning, kabina yoki yarim kabinalarning buzilishi va shikastlanishiga yoʻl qoʻymaslikka.

V. Foydalanuvchi:

taksofonlarni ekspluatatsiya qiluvchi korxonalarni taksofonlarning sifatsiz ishlashi, kabina va yarim kabinalarning qoniqarsiz xolatda ekanligi haqida xabardor qilish;

taksofonlarning qoniqarsiz ishlashi haqida arizalar berish huquqiga egadir.

VI. Foydalanuvchining javobgarligi:

“Foydalanuvchi” taksofonlarni, kabina yoki yarim kabinalarni ishdan chiqarganlik, mazkur qoidalarning nizomlarini buzganlik uchun Oʻzbekiston Respublikasi qonun hujjatlarida belgalangan tartibda javobgardir.