Oʻzbekiston Respublikasi Prezidentining “Respublikada uy-joy qurilishini ragʻbatlantirish va rivojlantirishga oid chora-tadbirlar toʻgʻrisida” 1994 yil 5 martdagi 774-son farmonini amalda roʻyobga chiqarish masalalari haqida (175-son)

31.03.1994

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Respublikada uy-joy qurilishini ragʻbatlantirish va rivojlantirishga oid chora-tadbirlar toʻgʻrisida”gi Farmonini amalga oshirish maqsadida Vazirlar Mahkamasi qaror qiladi:

1. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

ikki oy muddatda Qishloq xoʻjaligi vazirligi, boshqa manfaatdor vazirliklar va idoralar bilan birgalikda korxonalar, tashkilotlar va muassasalarning boʻsh va samarasiz foydalanilayotgan yer maydonlari hisobiga yakka tartibda va kooperativ asosida uy-joy qurilishi yer fondini shakllantirishni nazarda tutgan holda aholi yashaydigan joylarda, shuningdek, yirik shaharlarga tutashib ketgan hududlarda yer maydonlarini qayta roʻyxatdan oʻtkazsinlar. Ushbu masala yuzasidan takliflarni Vazirlar Mahkamasiga 1994-yil 1-iyungacha kiritsinlar. Bosh vazirning oʻrinbosari K.N. Toʻlaganov bu takliflarni umumlashtirsin va respublika Hukumatining koʻrib chiqishi uchun taqdim etsin;

uch oy muddatda Oʻzbekiston Respublikasi Davlat arxitektura va qurilish qoʻmitasi bilan birgalikda yakka tartibdagi uy-joy qurilishi dahalarini joylashtirishni hisobga olgan holda aholi yashaydigan joylarning bosh rejalariga, muhandislik infrastrukturasi sxemalariga tuzatish kiritsinlar;

yakka tartibdagi qurilish ustidan arxitektura-qurilish nazoratini taʼminlash arxitektura va shaharsozlik hududiy boshqarmalariga yuklatilsin;

davlat mulki obyektlarini davlat tasarrufidan chiqarish va xususiylashtirishdan hamda uy-joy qurilishi uchun yer uchastkalaridan foydalanish huquqi berilganligi uchun toʻlovdan tushadigan mablagʻlarning kamida 50 foizini aholining ijtimoiy taʼminlanmagan qatlamlari uchun uy-joy qurishni va yakka tartibdagi hamda kooperativ uy-joy qurilishi dahalari muhandislik kommunikatsiyalarini mablagʻ bilan taʼminlash boʻyicha maxsus schyotga oʻtkazsinlar. Mablagʻ bilan taʼminlovchi banklar qayd etib oʻtilgan maqsadlar uchun maxsus schyotlar ochsinlar hamda mablagʻlardan maqsadli foydalanish ustidan nazorat oʻrnatsinlar;

paydo boʻladigan masalalarni tezda hal etish maqsadida yakka tartibda va kooperativ uy-joy qurilishining qanday borayotganligini yilning har choragida koʻrib chiqsinlar hamda ularni hal etishda toʻrachilik va sansalorlik hollariga yoʻl qoʻyayotgan shaxslarga nisbatan qattiq jazo choralarini koʻrsinlar.

2. Oʻzbekiston Respublikasi Davlat arxitektura va qurilish qoʻmitasi hokimliklar, mablagʻ bilan taʼminlovchi banklar bilan birgalikda 15 kun muddatda, yakka tartibdagi uy-joy qurilishining boshlanishi bilan bogʻliq tashkiliy masalalarning butun majmuini hal etish bir oy muddatda taʼminlanishi kerakligini eʼtiborda tutgan holda, yakka tartibdagi uy-joy quruvchilarning arizalarini koʻrib chiqish, yer ajratish, loyiha-smeta hujjatlarini ishlab chiqishni, bank kreditlari olish tartibi toʻgʻrisidagi Yoʻriqnomani tayyorlasin va tasdiqlasin.

3. “Oʻzistiqbolstat” davlat qoʻmitasi va Oʻzbekiston Respublikasi Moliya vazirligi har yili markazlashtirilgan sarmoya mablagʻlari va respublika budjeti istiqbollarini belgilashda aholining ehtiyojmand qatlamlarini, kam taʼminlangan va koʻp bolali oilalarni, pensionerlarni, urush va mehnat faxriylarini davlat tomonidan qoʻllab-quvvatlash va ijtimoiy himoya qilish uchun uy-joy qurilishiga limitlar va mablagʻlarni nazarda tutsinlar.

Oʻzbekiston Respublikasi Moliya vazirligi “Oʻzistiqbolstat” davlat qoʻmitasi taqsimotini hisobga olgan holda 1994-yilda ana shu maqsadlar uchun respublika budjetidan Qoraqalpogʻiston Respublikasi Vazirlar Kengashiga, viloyatlar va Toshkent shahar hokimliklariga 90 mlrd “Soʻm-Kupon” ajratsin.

4. Oʻzbekiston Respublikasi Davlat arxitektura va qurilish qoʻmitasi hokimliklarning buyurtmanomalari boʻyicha:

1994-yilda xususiy uy-joylar qurish boʻyicha eng yaxshi loyihalar, kataloglar asosida tabiiy-iqlim sharoitlari va milliy xususiyatlarni hisobga olgan holda loyihalar ishlab chiqilishini;

koʻp qavatli uylarning birinchi qavatlarida savdo va xizmat koʻrsatish sohasi obyektlarini uyning umumiy maydonining 10 foizigacha boʻlgan hajmda joylashtirishni hisobga olgan holda namunaviy loyihalarga tuzatish kiritishni yoki yangilarini ishlab chiqishni taʼminlasin.

5. Markaziy bank, “Oʻzdehqonchiliksanoatbank”, “Oʻzsanoat-qurilishbank”, “Oʻzjamgʻarmabank”, “Oʻztadbirkorbank”ka bir oy muddatda yakka tartibdagi va kooperativ uy-joy qurilishini amalga oshirayotgan fuqarolarga kredit berishning amaldagi qoidalarini Oʻzbekiston Respublikasi Prezidentining 1994-yil 5-martdagi Farmoniga muvofiqlashtirish tavsiya qilinsin.

6. “Oʻzjamgʻarmabank” Moliya vazirligi, Markaziy bank va Oʻzbekiston Respublikasining boshqa banklari bilan birgalikda bir oy muddatda maxsus ssuda-jamgʻarma schyotlarini joriy etish tartibini ishlab chiqsin.

7. Birlashmalar, korxonalar, tashkilotlar va boshqa yuridik shaxslarga, mulkchilik shaklidan qatʼi nazar, mehnat faolligini oshirish va kadrlarning muhim ishlashini taʼminlashning samarali chora-tadbiri sifatida yakka tartibda va kooperativ uy-joy qurilishini amalga oshirayotgan xodimlarga pay badallarini toʻlashda va kreditni qaytarishda oʻz mablagʻlari hisobidan moliyaviy yordam koʻrsatish boʻyicha ular bilan shartnoma-kontraktlar tuzish tavsiya qilinsin.

8. Moliya vazirligi va Davlat soliq qoʻmitasi 10 kun muddatda korxonalar va tashkilotlarning yakka tartibda uy-joy qurish va uy-joy sotib olish uchun oʻz xodimlariga, shuningdek, kam taʼminlangan, koʻp bolali oilalarga moliyaviy yordam koʻrsatishga yoʻnaltirilayotgan daromadlariga soliq imtiyozlari berish tartibini ishlab chiqsinlar va soliq toʻlovchilarga yetkazsinlar.

9. Oʻzbekiston Respublikasi Mehnat vazirligi har yili jamoat ishlarini tashkil etish, uy-joy qurilishi va ularni tuzatish, shuningdek, infrastruktura qurilishi va ulardan foydalanish bilan bogʻliq qoʻshimcha ish oʻrinlari tashkil etish yoki mavjud ish oʻrinlarini saqlab qolish uchun Qoraqalpogʻiston Respublikasi Mehnat vazirligi, viloyatlar va Toshkent shahar mehnat, aholini ish bilan taʼminlash va ijtimoiy himoya qilish boshqarmalari tasarrufida qoldiriladigan ish bilan taʼminlashni qoʻllab-quvvatlash jamgʻarmasi mablagʻlarining koʻpi bilan 5 foizini Qoraqalpogʻiston Respublikasi Vazirlar Kengashining, viloyatlar va Toshkent shahar hokimliklarining maxsus schyotiga oʻtkazsin.

10. Oʻzbekiston Respublikasi Mehnat vazirligi Moliya vazirligi, Adliya vazirligi, Ijtimoiy taʼminot vazirligi va boshqa manfaatdor vazirliklar va idoralar bilan birgalikda kam taʼminlangan va koʻp bolali oilalar hamda aholining ijtimoiy himoya qilinmagan qatlamlari maqomini aniqlash tartibi toʻgʻrisidagi takliflarni bir oy muddatda Vazirlar Mahkamasiga kiritsin.

11. Oʻzbekiston Respublikasi Moliya vazirligi Adliya vazirligi va Davlat soliq qoʻmitasi bilan birgalikda ikki hafta muddatda “Korxonalar, birlashmalar va tashkilotlardan olinadigan soliq toʻgʻrisida”gi Oʻzbekiston Respublikasi Qonuniga oʻzgartirishlar va qoʻshimchalar kiritish haqida”gi Oʻzbekiston Respublikasi Qonuni loyihasini Vazirlar Mahkamasiga taqdim etsin, unda respublikada ishlab chiqariladigan va yakka tartibda uy-joy quruvchilarga hamda uy-joy-qurilish kooperativlariga sotiladigan binokorlik materiallarini, shuningdek, uy-joy qurilishida amalga oshiriladigan qurilish va maxsus montaj ishlarini qoʻshilgan qiymat soligʻidan ozod qilishni nazarda tutsin.

12. Mazkur qarorning bajarilishini nazorat qilish Vazirlar Mahkamasining tegishli boʻlimlariga yuklansin.

Vazirlar Mahkamasining Raisi I. KARIMOV

Toshkent sh.,

1994-yil 31-mart,

175-son