Ijtimoiy sheriklik mexanizmlarining yanada takomillashtirilishi munosabati bilan Sotsial va ijtimoiy ahamiyatga molik loyihalarni amalga oshirish uchun davlat boshqaruvi organlari tomonidan davlat ijtimoiy buyurtmasi berish tartibi toʻgʻrisidagi nizomga oʻzgartirish va qoʻshimchalar kiritish toʻgʻrisida (152-son)

25.03.2024

Oʻzbekiston Respublikasi Vazirlar Mahkamasining

qarori

Soʻnggi yillarda nodavlat notijorat tashkilotlari va fuqarolik jamiyatining boshqa institutlarini qoʻllab-quvvatlash, ularning davlat organlari bilan ijtimoiy sheriklik munosabatlarini rivojlantirish, ijtimoiy sohada ularning salohiyatidan unumli va samarali foydalanish borasida bir qator ijobiy ishlar amalga oshirildi.

Shu bilan birga, nodavlat notijorat tashkilotlari va fuqarolik jamiyatining boshqa institutlariga davlat organlari tomonidan davlat ijtimoiy buyurtmasini ajratish tizimiga yangi zamonaviy texnologiyalarni joriy qilish, davlat ijtimoiy buyurtmasini ajratish jarayonining shaffofligini taʼminlash zarurati mavjud.

Vazirlar Mahkamasining “Ijtimoiy sheriklik hamda jamoatchilik nazoratini amalga oshirish mexanizmlarini yanada takomillashtirish chora-tadbirlari toʻgʻrisida” 2022-yil 22-apreldagi 208-son qarori ijrosini taʼminlash, shuningdek, nodavlat notijorat tashkilotlari va fuqarolik jamiyatining boshqa institutlariga davlat organlari tomonidan davlat ijtimoiy buyurtmasini ajratish mexanizmini yanada takomillashtirish maqsadida Vazirlar Mahkamasi qaror qiladi:

1. Vazirlar Mahkamasining 2018-yil 22-fevraldagi 135-son qarori bilan tasdiqlangan Sotsial va ijtimoiy ahamiyatga molik loyihalarni amalga oshirish uchun davlat boshqaruvi organlari tomonidan davlat ijtimoiy buyurtmasi berish tartibi toʻgʻrisidagi nizomga ilovaga muvofiq quyidagilarni nazarda tutuvchi oʻzgartirish va qoʻshimchalar kiritilsin:

davlat ijtimoiy buyurtmasi uchun tanlovlarni eʼlon qilish va ularda ishtirok etish uchun arizalarni maxsus axborot portali orqali taqdim etish;

davlat ijtimoiy buyurtmasini bajarish uchun ajratiladigan mablagʻlarning eng koʻp miqdorini belgilash;

ijtimoiy loyihalarni koʻrib chiqish natijasi boʻyicha qabul qilingan qaror ustidan shikoyat qilish tartibi;

davlat ijtimoiy buyurtmasini bajarishga ajratiladigan mablagʻlarning nodavlat notijorat tashkilotlari tomonidan maʼmuriy xarajatlar va ish haqiga ishlatiladigan qismini aniq belgilash;

davlat ijtimoiy buyurtmasini bajarishga ajratiladigan mablagʻlardan maqsadli foydalanilishini monitoring qilishning aniq mexanizmi;

davlat ijtimoiy buyurtmasini bajarish natijalarining samaradorligini baholash indikatorlarini belgilash;

davlat ijtimoiy buyurtmasini bajarishga ajratiladigan mablagʻlar sarflanishi yuzasidan jamoatchilikni doimiy ravishda xabardor qilib borish tartibi.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Z.B. Maxkamova zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2024-yil 25-mart,

152-son

Vazirlar Mahkamasining 2024-yil 25-martdagi 152-son qaroriga ILOVA

Sotsial va ijtimoiy ahamiyatga molik loyihalarni amalga oshirish uchun davlat boshqaruvi organlari tomonidan davlat ijtimoiy buyurtmasi berish tartibi toʻgʻrisidagi nizomga kiritilayotgan oʻzgartirish va qoʻshimchalar

1. 3-band quyidagi mazmundagi toʻrtinchi va beshinchi xatboshilar bilan toʻldirilsin:

“davlat ijtimoiy buyurtmalarini berish boʻyicha tanlov (keyingi oʻrinlarda tanlov) — sotsial va ijtimoiy ahamiyatga molik loyihalarni amalga oshirish uchun talabgor sifatida ishtirok etayotgan bir nechta nodavlat notijorat tashkilotlaridan olingan takliflarni taqqoslash asosida davlat ijtimoiy buyurtmasini berishning raqobatli usuli;

maxsus axborot portali — vakolatli organ tomonidan yuritiladigan, davlat xaridlari amalga oshirilishi toʻgʻrisidagi eʼlonlar, davlat xaridlarining yakunlari, ishtirokchilarning takliflari haqidagi axborotni va qonunchilikda nazarda tutilgan boshqa axborotni elektron shaklda koʻzdan kechirishni, shuningdek, amalga oshirilgan elektron davlat xaridlari toʻgʻrisida davlat xaridlari elektron tizimlarining operatorlari tomonidan kiritiladigan (yuboriladigan) axborotni toʻplashni taʼminlovchi veb-sayt”;

toʻrtinchi xatboshi oltinchi xatboshi deb hisoblansin;

2. 41-bandda:

birinchi xatboshi quyidagi tahrirda bayon etilsin:

“41. Davlat boshqaruvi organlariga nodavlat notijorat tashkilotlaridan kelib tushgan loyihalarni koʻrib chiqish, umumlashtirish, baholash hamda nodavlat notijorat tashkilotlari tomonidan davlat ijtimoiy buyurtmasini bajarish natijalarining samaradorligini aniqlash davlat boshqaruvi organlari huzuridagi jamoatchilik nazorati va ijtimoiy sheriklikni rivojlantirish boʻyicha jamoatchilik kengashlari (keyingi oʻrinlarda — jamoatchilik kengashi) tomonidan amalga oshiriladi”;

quyidagi mazmundagi uchinchi va toʻrtinchi xatboshilar bilan toʻldirilsin:

“Davlat boshqaruvi organlari tomonidan har yili oʻzining budjetdan tashqari mablagʻlari xarajatlari smetasida bevosita davlat ijtimoiy buyurtmasini berish uchun ajratiladigan mablagʻlar miqdori nazarda tutiladi. Davlat boshqaruvi organi tomonidan bitta davlat ijtimoiy buyurtmasini bajarish uchun bazaviy hisoblash miqdorining olti ming baravarigacha boʻlgan miqdorda mablagʻlar ajratilishi mumkin.

Davlat ijtimoiy buyurtmasini bajarish doirasida loyiha ijrochilarining mehnatiga toʻlanadigan haq, moddiy-texnik bazani mustahkamlashga yoʻnaltirilgan mablagʻ va boshqa maʼmuriy xarajatlarning miqdori ajratilgan mablagʻlarning 20 foizidan oshmasligi lozim”.

3. 20 va 21-bandlar quyidagi tahrirda bayon etilsin:

“20. Davlat boshqaruvi organlari tomonidan davlat ijtimoiy buyurtmalarini berish uchun tanlov oʻtkazilishi toʻgʻrisidagi eʼlon tanlov boʻyicha hujjatlar loyihalarni qabul qilish muddati tugaydigan sanadan kamida oʻn ikki ish kuni va koʻpi bilan oʻttiz ish kunidan oldin majburiy ravishda maxsus axborot portali orqali davlat xaridlarining elektron tizimiga, shuningdek, davlat boshqaruvi organlarining xohishiga koʻra — oʻzining rasmiy veb-saytiga, ommaviy axborot vositalariga joylashtiriladi.

21. Tanlov oʻtkazilishi toʻgʻrisidagi eʼlon quyidagi axborotlarni oʻz ichiga olishi kerak:

tanlov tashkilotchisining nomi va manzili;

davlat ijtimoiy buyurtmasining tavsifi;

davlat ijtimoiy buyurtmasini mablagʻ bilan taʼminlash manbalari va miqdori;

davlat ijtimoiy buyurtmasini bajarish muddati;

ishtirokchilarga qoʻyiladigan talablar (shartnoma tuzish huquqiga egalik, soliqlar va yigʻimlarni toʻlash boʻyicha muddati oʻtgan qarzdorlikning, oʻziga nisbatan joriy etilgan bankrotlik tartib-taomillarining mavjud emasligi, insofsiz ijrochilarning yagona reyestrida qayd etilmaganligi);

davlat boshqaruvi organlarining ishtirokchilar bilan bogʻlanish uchun bogʻlovchi shaxslar sifatida belgilangan bir yoki bir nechta mansabdor shaxslarining yoki boshqa xodimlarining familiyasi, ismi, otasining ismi, lavozimi va manzili;

tanlov ishtirokchilari tomonidan loyihalarni berish muddati tugaydigan sana va vaqt;

loyihalarni rasmiylashtirishga doir talablar;

tanlov gʻolibi bilan hisob-kitoblarni amalga oshirish tartibi haqidagi axborot;

tanlovda ishtirok etish uchun loyihalarni davlat tilida va zaruratga qarab, boshqa tillarda tayyorlash majburiyligi toʻgʻrisidagi talab;

loyihalarni baholash mezonlari va koʻrib chiqish tartibi;

tanlov ishtirokchilari tomonidan korrupsiya koʻrinishlariga yoʻl qoʻymaslik boʻyicha ariza taqdim etish majburiyligi haqidagi talablar.

Tanlov oʻtkazish toʻgʻrisidagi eʼlon qonunchilikka zid boʻlmagan boshqa axborotlarni ham oʻz ichiga olishi mumkin”.

4. 25-bandning birinchi xatboshisi quyidagi tahrirda bayon etilsin:

“25. Tanlovda ishtirok etish uchun nodavlat notijorat tashkilotlari quyidagi hujjatlarni elektron shaklda maxsus axborot portali orqali tegishli davlat boshqaruvi organiga taqdim etadi”.

5. 26-band quyidagi tahrirda bayon etilsin:

“26. Tanlov gʻolibi nodavlat notijorat tashkilotlari tomonidan tanlovga taqdim etilgan loyihalarni oʻn ish kuni ichida koʻrib chiqish, umumlashtirish va ularni baholash natijalariga koʻra aniqlanadi”.

6. 30-bandning birinchi xatboshisi quyidagi tahrirda bayon etilsin:

“30. Tanlov natijalari tanlov gʻolibi aniqlangan kundan soʻng bir ish kuni ichida Jamoatchilik kengashi qarori bilan tasdiqlanadi. Jamoatchilik kengashi qarorlari bayonnomalar bilan rasmiylashtiriladi. Jamoatchilik kengashining yigʻilishi bayonnomasi Jamoatchilik kengashi kotibi tomonidan yuritiladi va Jamoatchilik kengashi raisi, kotibi va ishtirok etgan barcha aʼzolar tomonidan imzolanadi”.

7. 31-band quyidagi tahrirda bayon etilsin:

“31. Davlat ijtimoiy buyurtmasini beruvchi davlat boshqaruvi organi va tanlovda gʻolib deb topilgan nodavlat notijorat tashkiloti oʻrtasida Jamoatchilik kengashining qarori qabul qilingan kundan eʼtiboran oʻn ish kuni ichida davlat ijtimoiy buyurtmasini bajarish shartnomasi tuziladi.

Shartnoma davlat ijtimoiy buyurtmasini beruvchi davlat boshqaruvi organi va tanlovda gʻolib deb topilgan nodavlat notijorat tashkilotining huquq va majburiyatlarini hamda javobgarligini belgilab beradi.

Tanlov natijalariga koʻra tuzilgan shartnoma toʻgʻrisidagi axborot davlat ijtimoiy buyurtmasini beruvchi davlat boshqaruvi organi tomonidan maxsus axborot portaliga shartnoma tuzilgan kundan boshlab uch ish kunidan kechiktirmay joylashtiriladi”.

8. Quyidagi mazmundagi 61-bob bilan toʻldirilsin:

“61-bob. Davlat ijtimoiy buyurtmasini bajarishga ajratilgan mablagʻlardan maqsadli foydalanilishini monitoring qilish tartibi

331. Davlat ijtimoiy buyurtmasini ajratgan davlat boshqaruvi organi davlat ijtimoiy buyurtmasini bajarishga ajratilgan mablagʻlardan maqsadli foydalanilishini shartnomada koʻrsatilgan muddatlarda monitoring qiladi.

Davlat ijtimoiy buyurtmasini bajarishga ajratilgan mablagʻlardan maqsadli foydalanish ustidan qonunchilikda belgilangan tartibda davlat moliyaviy nazorati amalga oshiriladi.

Davlat ijtimoiy buyurtmasini bajarishga ajratilgan mablagʻlardan maqsadli foydalanilishini monitoring qilishga auditorlik tashkiloti jalb qilinishi mumkin.

332. Davlat ijtimoiy buyurtmasini olgan nodavlat notijorat tashkiloti davlat ijtimoiy buyurtmasi bajarilishi yakunlangan kundan boshlab besh ish kuni ichida davlat ijtimoiy buyurtmasini bajarish bilan bogʻliq barcha hujjatlarni davlat ijtimoiy buyurtmasini ajratgan davlat boshqaruvi organiga taqdim qilishi shart.

333. Davlat ijtimoiy buyurtmasini ajratgan davlat boshqaruvi organi va davlat ijtimoiy buyurtmasini olgan nodavlat notijorat tashkiloti tomonidan taqdim etilgan hujjatlarni ushbu hujjatlar kelib tushgan kundan boshlab bir oy ichida oʻrganadi.

Oʻrganish davomida davlat ijtimoiy buyurtmasini bajarish natijalarining samaradorligi, yaʼni davlat ijtimoiy buyurtmasini bajarishga ajratilgan mablagʻlarning maqsadli sarflanishi hamda mablagʻlarni ajratishdan koʻzlangan maqsadlarga erishilganligi aniqlanadi.

Oʻrganish natijasi yuzasidan dalolatnoma tuzilib, davlat ijtimoiy buyurtmasini ajratgan davlat boshqaruvi organi va davlat ijtimoiy buyurtmasini olgan nodavlat notijorat tashkilot(lar)i rahbar(lar)i tomonidan imzolanadi.

334. Nodavlat notijorat tashkilotlari tomonidan davlat ijtimoiy buyurtmasini bajarish natijalarining samaradorligi davlat ijtimoiy buyurtmasini ajratgan davlat boshqaruvi organining jamoatchilik kengashi tomonidan ushbu Nizomga 3-ilovaga muvofiq aniqlanadi.

Nodavlat notijorat tashkilotlari tomonidan davlat ijtimoiy buyurtmasini bajarish natijalarining samaradorligini aniqlashdan maqsad davlat ijtimoiy buyurtmasini bajarish uchun ajratilgan mablagʻlarning maqsadli sarflanishi hamda berilgan ijtimoiy buyurtmadan koʻzlangan ijtimoiy maqsadlarga erishilishini tahlil qilishdan iborat.

335. Davlat ijtimoiy buyurtmasi samaradorligining maksimal koʻrsatkichi 30 ballni tashkil etadi.

Davlat ijtimoiy buyurtmasini bajarish natijalarining samaradorligi toʻplagan ballarga qarab aniqlanadi:

yuqori samaradorlik — 25 va undan yuqori ball;

oʻrtacha samaradorlik — 15 balldan 24 ballgacha;

samarasiz — 1 balldan 14 ballgacha.

Davlat ijtimoiy buyurtmasini bajarish natijalariga koʻra yuqori samaradorlikka erishgan nodavlat notijorat tashkiloti davlat ijtimoiy buyurtmasini bergan davlat boshqaruvi organi tomonidan budjetdan tashqari mablagʻlar hisobidan keyingi yillarda oʻtkaziladigan davlat ijtimoiy buyurtmasi tanlovlarida ishtirok etishda taqdim qilgan ijtimoiy loyihasi boʻyicha toʻplangan umumiy ballga ushbu ballning 10 foizi bir martalik imtiyoz sifatida qoʻshib beriladi.

Davlat ijtimoiy buyurtmasini bajarish natijalari samarasiz boʻlgan taqdirda, nodavlat notijorat tashkiloti davlat ijtimoiy buyurtmasini bajarish uchun ajratilgan mablagʻlarning 50 foizini tegishli davlat boshqaruvi organi hisobvaraqlariga qaytaradi.

336. Davlat ijtimoiy buyurtmasini bajarishga ajratilgan mablagʻlardan maqsadsiz foydalanilganda, ushbu mablagʻlar tegishli davlat boshqaruvi organi hisobvaraqlariga toʻliq qaytarilishi lozim”.

9. 7-bob quyidagi mazmundagi 351-band bilan toʻldirilsin:

“351. Nodavlat notijorat tashkiloti davlat ijtimoiy buyurtmasini bajarishga ajratilgan mablagʻlardan foydalanish yuzasidan batafsil maʼlumotlarni har chorakda oʻzining rasmiy veb-saytida yoki ommaviy axborot vositalarida eʼlon qilib boradi”.

10. 36 va 37-bandlar quyidagi tahrirda bayon etilsin:

“36. Davlat ijtimoiy buyurtmasini bajarishga ajratilgan mablagʻlardan toʻgʻri va maqsadli foydalanish, shuningdek, shartnomada koʻrsatilgan sotsial va ijtimoiy ahamiyatga molik ishlarni sifatli va oʻz vaqtida bajarish uchun davlat ijtimoiy buyurtmasini beruvchi davlat boshqaruvi organi va nodavlat notijorat tashkilotining rahbari javobgar boʻladi.

37. Nodavlat notijorat tashkiloti ushbu Nizom talablari bajarilishiga masʼul davlat boshqaruvi organlari xodimlarining xatti-harakatlari yuzasidan boʻysunish tartibida yuqori turuvchi organga yoxud bevosita sudga qonunchilik hujjatlarida belgilangan tartibda shikoyat qilishga haqli.

Davlat ijtimoiy buyurtmasini berish tartib-tamoyillari bilan bogʻliq qoidalarning buzilishi boʻyicha nodavlat notijorat tashkilotlarining shikoyatlari “Davlat xaridlari toʻgʻrisida”gi Qonunda belgilangan tartibda koʻrib chiqiladi”.

11. Quyidagi mazmundagi 38-band bilan toʻldirilsin:

“38. Davlat boshqaruvi organlari tomonidan nodavlat notijorat tashkilotlari va fuqarolik jamiyatining boshqa institutlariga budjetdan tashqari mablagʻlar hisobidan bevosita davlat ijtimoiy buyurtmasini berish sohasidagi ushbu Nizom bilan tartibga solinmagan munosabatlarga davlat xaridlari toʻgʻrisidagi qonunchilik normalari qoʻllaniladi”.

12. 1-ilovaning matni quyidagi tahrirda bayon etilsin:

“Sotsial va ijtimoiy ahamiyatga molik loyihalarni amalga oshirish uchun davlat boshqaruvi organlari tomonidan davlat ijtimoiy buyurtmasini berish

SXEMASI

13. Quyidagi mazmundagi 3-ilova bilan toʻldirilsin:

“Sotsial va ijtimoiy ahamiyatga molik loyihalarni amalga oshirish uchun davlat boshqaruvi organlari tomonidan davlat ijtimoiy buyurtmasini berish tartibi toʻgʻrisidagi nizomga 3-ILOVA

Nodavlat notijorat tashkilotlariga davlat ijtimoiy buyurtmasini bajarish natijalarining samaradorligini aniqlash

METODIKASI