Bola huquqlari toʻgʻrisidagi konvensiya qoidalarini amalga oshirish boʻyicha Oʻzbekistonning Beshinchi davriy maʼruzasi yuzasidan BMTning Bola huquqlari boʻyicha qoʻmitasi tavsiyalarini amaliyotga tatbiq etish toʻgʻrisida (4068-IV-son)
21.02.2024
Oʻzbekiston Respublikasi Oliy Majlisi Qonunchilik palatasi Kengashi va Oʻzbekiston Respublikasi Oliy Majlisi Senati Kengashining
qoʻshma qarori
BMTning Bola huquqlari toʻgʻrisidagi konvensiyasi qoidalarini amalga oshirish boʻyicha Oʻzbekiston Respublikasining Beshinchi davriy maʼruzasini koʻrib chiqish yakunlari yuzasidan BMTning Bola huquqlari boʻyicha qoʻmitasi tavsiyalarini amalga oshirish, shuningdek, bola huquqlari va erkinliklarini himoya qilish boʻyicha xalqaro hamkorlikni yanada rivojlantirish maqsadida Oʻzbekiston Respublikasi Oliy Majlisi Qonunchilik palatasining Kengashi va Oʻzbekiston Respublikasi Oliy Majlisi Senatining Kengashi qaror qiladilar:
1. BMTning Bola huquqlari toʻgʻrisidagi konvensiyasi qoidalarini amalga oshirish boʻyicha Oʻzbekiston Respublikasining Beshinchi davriy maʼruzasini koʻrib chiqish yakunlari yuzasidan BMTning Bola huquqlari boʻyicha qoʻmitasi tavsiyalarini amalga oshirish yuzasidan 2024 — 2027-yillarga moʻljallangan milliy harakatlar rejasi (bundan buyon matnda Milliy harakatlar rejasi deb yuritiladi) ilovaga muvofiq tasdiqlansin.
2. Oʻzbekiston Respublikasi Vazirlar Mahkamasi Milliy harakatlar rejasining ijrosini taʼminlash choralarini koʻrsin.
3. Inson huquqlari sohasida Oʻzbekiston Respublikasining xalqaro majburiyatlariga rioya etilishi boʻyicha Parlament komissiyasi Inson huquqlari boʻyicha Oʻzbekiston Respublikasi Milliy markazi bilan birgalikda:
Milliy harakatlar rejasining amalga oshirilishi yuzasidan muntazam monitoring olib borsin;
Milliy harakatlar rejasida nazarda tutilgan chora-tadbirlar sifatli va oʻz vaqtida ijro etilishi boʻyicha tegishli vazirlik va idoralarga taklif va tavsiyalar kiritib borsin;
Milliy harakatlar rejasi ijrosi yuzasidan aniq koʻrsatkichlar va erishilgan natijalar aks ettirilgan batafsil axborotni Oʻzbekiston Respublikasi Oliy Majlisi palatalarining rasmiy veb-saytlariga doimiy ravishda joylashtirib borsin;
Milliy harakatlar rejasi ijrosi yuzasidan umumlashtirilgan maʼlumotni Oʻzbekiston Respublikasi Oliy Majlisi palatalariga kiritib borsin.
4. Milliy harakatlar rejasida belgilangan masʼul ijrochilar oʻz zimmasiga yuklatilgan vazifalar ijrosi toʻgʻrisidagi maʼlumotlarni har oyning beshinchi sanasiga qadar Inson huquqlari sohasida Oʻzbekiston Respublikasining xalqaro majburiyatlariga rioya etilishi boʻyicha Parlament komissiyasiga taqdim etsin.
Bunda Milliy harakatlar rejasida belgilangan vazifalarning toʻliq, sifatli va oʻz vaqtida amalga oshirilishi uchun vazirlik va idoralarning birinchi rahbarlari shaxsan javobgar hisoblansin.
5. Ushbu Qoʻshma qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining birinchi oʻrinbosari A. Saidov va Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev zimmasiga yuklatilsin.
6. Ushbu Qoʻshma qaror qabul qilingan kundan eʼtiboran kuchga kiradi.
Oʻzbekiston Respublikasi Oliy Majlisi Qonunchilik palatasining Spikeri N. ISMOILOV
Toshkent sh.,
2024-yil 21-fevral,
4068-IV-son
Oʻzbekiston Respublikasi Oliy Majlisi Senatining Raisi T. NARBAYEVA
Toshkent sh.,
2024-yil 21-fevral,
KQ-688-IV-son
Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2024-yil 21-fevraldagi 4068-IV/KQ-688-IV-sonli Qoʻshma qaroriga ILOVA
BMTning Bola huquqlari toʻgʻrisidagi konvensiyasi qoidalarini amalga oshirish boʻyicha Oʻzbekiston Respublikasining Beshinchi davriy maʼruzasini koʻrib chiqish yakunlari yuzasidan BMTning Bola huquqlari boʻyicha qoʻmitasi tavsiyalarini amalga oshirish boʻyicha 2024 — 2027-yillarga moʻljallangan
milliy harakatlar rejasi