Soliq maslahati milliy standarti (1-sonli SMMS) “Soliq maslahati boʻyicha xizmatlar koʻrsatish toʻgʻrisida shartnoma tuzish tartibi”ni tasdiqlash haqida (3502-son)
15.03.2024
Oʻzbekiston Respublikasi iqtisodiyot va moliya vazirining
buyrugʻi
[Oʻzbekiston Respublikasi Adliya vazirligi tomonidan 2024-yil 15-martda roʻyxatdan oʻtkazildi, roʻyxat raqami 3502]
Oʻzbekiston Respublikasining “Soliq maslahatiga oid faoliyat toʻgʻrisida”gi Qonuniga muvofiq buyuraman:
1. Soliq maslahati milliy standarti (1-sonli SMMS) “Soliq maslahati boʻyicha xizmatlar koʻrsatish toʻgʻrisida shartnoma tuzish tartibi” ilovaga muvofiq tasdiqlansin.
2. Oʻzbekiston Respublikasi moliya vazirining 2012-yil 29-martdagi 31-son “Soliq maslahati milliy standarti (1-sonli SMMS) “Soliq maslahati boʻyicha xizmatlar koʻrsatish toʻgʻrisida shartnoma tuzish tartibi”ni tasdiqlash toʻgʻrisida”gi buyrugʻi (roʻyxat raqami 2357, 2012-yil 3-may) (Oʻzbekiston Respublikasi qonun hujjatlari toʻplami, 2012-y., 18-son, 206-modda) oʻz kuchini yoʻqotgan deb topilsin.
3. Mazkur buyruq Oʻzbekiston Soliq maslahatchilari palatasi bilan kelishilgan.
4. Mazkur buyruq rasmiy eʼlon qilingan kundan eʼtiboran kuchga kiradi.
Vazir D. KUCHKAROV
Toshkent sh.,
2024-yil 12-fevral,
106-son
Kelishildi:
Oʻzbekiston Soliq maslahatchilari palatasi boshqaruvi raisi B. NABIJONOV
2024-yil 2-fevral
Oʻzbekiston Respublikasi iqtisodiyot va moliya vazirining 2024-yil 12-fevraldagi 106-son buyrugʻiga ILOVA
Soliq maslahati milliy standarti (1-sonli SMMS) “Soliq maslahati boʻyicha xizmatlar koʻrsatish toʻgʻrisida shartnoma tuzish tartibi”
Ushbu Soliq maslahati milliy standarti (1-sonli SMMS) (bundan buyon matnda standart deb yuritiladi) Oʻzbekiston Respublikasida soliq maslahati boʻyicha faoliyatni normativ tartibga solishning elementi hisoblanadi.
1-bob. Umumiy qoidalar
1. Ushbu standartning maqsadi soliq maslahati boʻyicha xizmatlar koʻrsatish toʻgʻrisida shartnoma (bundan buyon matnda shartnoma deb yuritiladi) tuzish tartibini belgilash hisoblanadi.
2. Ushbu standart soliq maslahatchilari tashkiloti tomonidan koʻrsatiladigan soliq maslahati boʻyicha xizmatlarga nisbatan tatbiq etiladi.
2-bob. Shartnoma tuzish boʻyicha talablar
3. Soliq maslahati boʻyicha xizmatlar soliq maslahatchilari tashkilotlarining reyestriga kiritilgan soliq maslahatchilari tashkiloti hamda yuridik va jismoniy shaxslar (bundan buyon matnda mijoz (ishonch bildiruvchi) deb yuritiladi) oʻrtasida yozma shaklda tuzilgan shartnoma asosida amalga oshiriladi.
4. Shartnoma har bir tomon uchun bir nusxadan tuziladi hamda soliq maslahatchilari tashkilotlari va mijoz (ishonch bildiruvchi) tomonidan imzolanadi.
5. Soliq maslahatchilari tashkiloti mijoz (ishonch bildiruvchi) bilan uning yashash joyi va joylashgan yeridan (pochta manzilidan) qatʼi nazar, shartnoma tuzishga haqli.
6. Soliq maslahatchilari tashkilotlari tomonidan soliq maslahati boʻyicha birgalikda xizmatlar koʻrsatilganda, shartnomani birgalikda xizmatlarni koʻrsatuvchi xar bir soliq maslahatchilari tashkiloti imzolashi mumkin.
7. Soliq maslahati boʻyicha birgalikda xizmatlar koʻrsatish chogʻida mijoz (ishonch bildiruvchi) bilan shartnoma har bir soliq maslahatchilari tashkiloti bilan alohida-alohida tuzilishi mumkin.
8. Shartnomaning asosiy shartlari quyidagilardan iborat:
maxfiylikka rioya qilish shartlari;
soliq maslahatchilari tashkiloti soliq maslahatchilari tashkilotlarining reyestriga kiritilganligi toʻgʻrisidagi maʼlumotlar;
soliq maslahatchilari tashkilotining fuqarolik javobgarligini sugʻurta polisi mavjudligi toʻgʻrisidagi maʼlumotlar.
9. Shartnomaga soliq maslahatchilari tashkiloti tomonidan mijoz (ishonch bildiruvchi) uchun quyidagi hujjatlarning nusxalari ilova qilinadi:
soliq maslahatchilari tashkilotining fuqarolik javobgarligi sugʻurta polisi;
soliq maslahatchilari tashkilotining soliq maslahatchilari tashkilotlarining reyestriga kiritilganligi toʻgʻrisidagi maʼlumot.
Shartnomadagi soliq maslahatchilari tashkilotining rekvizitlarida uning soliq maslahatchilari tashkilotlarining reyestridagi raqami hamda fuqarolik javobgarligini sugʻurta polisining raqami va berilgan sanasi koʻrsatiladi.
10. Shartnomaning predmeti quyidagilardan iborat:
mijozga (ishonch bildiruvchiga) soliqlar va yigʻimlarni hisoblab chiqarish hamda toʻlash, soliq hisobotini tayyorlash va taqdim etish masalalari boʻyicha maslahat berish;
soliq hisobotini (deklaratsiyasini) tayyorlashni, shu jumladan soliq hisobotini (deklaratsiyasini) mijoz (ishonch bildiruvchi) nomidan uning shaxsiy kabineti orqali taqdim etish;
ortiqcha undirilgan yoki ortiqcha toʻlangan soliqlar hisobidan soliq qarzini qaytarish va (yoki) toʻlash, soliqlarni toʻlashni kechiktirish yoki boʻlib-boʻlib toʻlash imkoniyatini berish uchun soliq organlariga taqdim etilishi lozim boʻlgan hujjatlarni qonunchilikda belgilangan hollarda tayyorlash;
soliq hisobini yuritish;
soliq solish obyektlarini va soliq solish bilan bogʻliq boʻlgan obyektlarni aniqlash;
soliqqa oid va moliyaviy tavakkalchiliklarni tahlil qilish hamda baholash, mijozga (ishonch bildiruvchiga) soliq imtiyozlarini qoʻllashga doir tavsiyalar taqdim etish;
sudlarda, huquqni muhofaza qiluvchi va nazorat qiluvchi organlarda soliqqa oid huquqiy munosabatlar bilan bogʻliq boʻlgan iqtisodiy, fuqarolik, jinoyat ishlarini hamda maʼmuriy ishlarni koʻrib chiqishda vakillik qilish;
mijoz (ishonch bildiruvchi) tomonidan oʻz soliq majburiyatlari muayyan davr uchun, shu jumladan ixtiyoriy ravishda tugatilayotganda toʻgʻri bajarilishini tekshirish;
soliqqa oid huquqiy munosabatlar bilan bogʻliq boʻlgan boshqa xizmatlar.
11. Shartnomaga soliq maslahati boʻyicha bir yoki bir nechta xizmat turlari kiritilishi mumkin.
12. Soliq maslahati boʻyicha xizmatlar koʻrsatishning muddatlari shartnomaning predmetidan kelib chiqib belgilanadi.
13. Soliq maslahati boʻyicha koʻrsatiladigan xizmatlar uchun amalga oshiriladigan toʻlovning miqdori, shartlari va muddatlari shartnomaning predmeti va xizmatlar koʻrsatishning muddatidan kelib chiqib belgilanadi.
3-bob. Yakuniy qoidalar
14. Soliq maslahatchilari tashkiloti tuzilgan shartnoma boʻyicha xizmat koʻrsatish uchun mijozning (ishonch bildiruvchining) roziligi bilan soliq maslahatida ishtirok etishga zarur boʻlgan boshqa mutaxassislarni jalb qilishga haqli.
15. Shartnomani oʻzgartirish va bekor qilish qonunchilik hujjatlarida belgilangan tartibda amalga oshiriladi.