76-modda. Sudyalarni va ularning oila aʼzolarini ijtimoiy himoyalash choralari

Sudyalarning hayoti va sogʻligi davlatning maxsus muhofazasida boʻladi hamda respublika budjetidan davlat tomonidan majburiy tartibda sugʻurta qilinadi.

Quyidagi hollarda davlat sugʻurta organlari sugʻurta summalarini toʻlaydi:

sudya oʻz vazifasini bajarish davrida yoki lavozimidan boʻshaganidan soʻng halok boʻlsa (vafot etsa), basharti bu voqea sudya oʻz xizmat vazifasini ado etish paytida olgan tan jarohati yoki sogʻligʻining boshqacha shikastlanishi oqibatida roʻy bersa, uning vorislariga sudyaning 50 oylik ish haqi miqdorida;

sudya xizmat vazifasini bajarish paytida kelajakda oʻz kasbida ishlash imkoniyatidan mahrum qiladigan darajada mayib boʻlib qolsa yoki salomatligiga boshqacha shikast yetkazilganida — sudyaning 25 oylik ish haqi miqdorida;

sudya xizmat vazifasini bajarish paytida kelajakda oʻz kasbida ishlash imkoniyatidan mahrum etmaydigan va uzoq muddatga mehnat faoliyatini toʻxtatishga olib kelmaydigan tan jarohati yoki salomatligiga boshqa shikast yetkazilganida — sudyaning 5 oylik ish haqi miqdorida.

Sudya xizmat vazifasini bajarish paytida kelajakda oʻz kasbida ishlash imkoniyatidan mahrum qiladigan darajada mayib boʻlib qolganida yoki salomatligiga boshqacha shikast yetkazilganida, davlat sugʻurta toʻlovlarini hisobga olmagan holda, unga oylik ish haqi bilan tayin etilgan nafaqa oʻrtasidagi farq har oyda toʻlanadi.

Sudya oʻz xizmat vazifasini ado etish paytida olgan tan jarohati yoki sogʻligʻiga boshqacha shikast yetkazilishi oqibatida halok boʻlsa (vafot etsa), uning qaramogʻida boʻlgan mehnatga qobiliyatsiz oila aʼzolariga sudya ish haqining ularning hissasiga toʻgʻri keladigan qismi bilan boquvchisini yoʻqotganligi munosabati bilan tayinlangan pensiya oʻrtasidagi farq har oyda, davlat sugʻurta toʻlovlarini hisobga olmagan holda toʻlanadi.

Sudyaning xizmat vazifasini bajarishi bilan bogʻliq ravishda unga tegishli mulkni yoʻq qilish yoki shikastlash oqibatida yetkazilgan zarar sudyaga yoki uning oila aʼzolariga toʻlaligicha qoplanadi.

Mazkur moddada koʻrsatilgan zarar boʻyicha toʻlovlar Oʻzbekiston Respublikasi budjeti mablagʻlari hisobidan amalga oshiriladi va qonunda koʻzda tutilgan tartibda aybdor shaxslardan undirib olinadi.