66-modda. Sudyalarning burchlari

Sudyalar fuqarolik, jinoiy, xoʻjalik va maʼmuriy ishlarni koʻrish chogʻida Oʻzbekiston Respublikasining Konstitutsiyasiga va boshqa qonunlariga soʻzsiz rioya qilishlari, fuqarolarning huquq va erkinliklari, shaʼni, qadr-qimmati va mulklari, korxona, muassasa va tashkilotlarning huquqlari va qonun bilan qoʻriqlanadigan manfaatlari himoya qilinishini taʼminlashlari, begʻaraz va odil boʻlishlari shart.

Sudyalar oʻz vazifalarini bajarish chogʻida, shuningdek xizmatdan tashqari munosabatlarda odil sudlovning obroʻsini toʻkadigan, sudyalik qadr-qimmatiga yoki uning xolisligiga shubha tugʻdiradigan har qanday xatti-harakatdan oʻzlarini tiyishlari kerak.

Sudyalar oʻzaro maslahat sirini hamda yopiq sud majlislari oʻtkazish vaqtida olingan maʼlumotlarni oshkor qilishga haqli emaslar.

Oʻzbekiston Respublikasi Oliy sudi va Oliy xoʻjalik sudi sudyalari Oliy Majlis deputati boʻlolmaydilar.

Sudyalar siyosiy partiyalar va harakatlarning aʼzosi boʻlishlari hamda boshqa haq toʻlanadigan lavozimni egallashlari mumkin emas.