24-modda. Oliy sud Raisi

Oʻzbekiston Respublikasi Oliy sudining Raisi:

Oliy sud faoliyatiga tashkiliy rahbarlik qiladi;

Oʻzbekiston Respublikasi sudlarining hal qiluv qarorlari, hukmlari, ajrimlari va qarorlari ustidan protest kiritadi;

ishlarni nazorat tartibida tekshirish uchun talab qilib oladi;

qonunda belgilangan tartibda Oʻzbekiston Respublikasi sudlarining hal qiluv qarorlari, hukmlari, ajrimlari va qarorlarining ijrosini toʻxtatib turadi;

sud amaliyotini umumlashtirish, shuningdek Oliy sud Plenumi dasturiy koʻrsatmalarining bajarilishi yuzasidan nazoratni amalga oshirish ishlarini tashkil etadi;

ishlarni respublikaning bir sudidan ikkinchi sudiga olib berish masalasini hal qiladi;

Oliy sud Plenumi va Rayosatini chaqiradi, ularning majlisida raislik qiladi;

zarur hollarda bir hayʼat tarkibiga kiruvchi sudyalarni boshqa hayʼat tarkibida ish koʻrishga jalb etadi;

Oliy sud Plenumining dasturiy koʻrsatmalari Oʻzbekiston Respublikasining amaldagi qonun hujjatlariga muvofiq emasligi haqida Oliy sud Plenumiga taqdimnoma kiritadi;

Oʻzbekiston Respublikasi qonunlarini sharhlab berish va normativ hujjatlarning Oʻzbekiston Respublikasi Konstitutsiyasiga mos kelmasligi haqida Oʻzbekiston Respublikasi Konstitutsiyaviy sudiga taqdimnoma kiritadi;

Oliy sud Plenumiga sudlov hayʼatlarining tarkibi, ularning raislari haqida, Oliy sud Rayosati va Sudyalarning oliy malaka hayʼati tarkibi toʻgʻrisida taqdimnoma kiritadi;

viloyatlar, Toshkent shahar, tumanlar (shaharlar) va harbiy sudlar sudyaligiga nomzodlar yuzasidan keyinchalik ular xususida Oʻzbekiston Respublikasi Prezidentiga taqdimnomalar kiritish uchun Oʻzbekiston Respublikasi Adliya vaziriga xulosalar yuboradi;

Oʻzbekiston Respublikasi sudlari sudyalarini intizomiy javobgarlikka tortish haqida ish qoʻzgʻatadi;

Rais oʻrinbosarlari oʻrtasida vazifalarni taqsimlaydi;

Oliy sud xodimlarini ishga qabul qiladi va ishdan boʻshatadi;

Oliy sudning shtatlar jadvalini tasdiqlaydi;

fuqarolarni shaxsan qabul qiladi;

qonun hujjatlarida oʻziga berilgan boshqa vakolatlarni amalga oshiradi.