16-modda. Oliy sud Plenumining vakolatlari

Oliy sud Plenumi, Plenum aʼzolarining kamida uchdan ikki qismi ishtirok etgan taqdirda vakolatli hisoblanadi.

Oliy sud Plenumi:

ishlarni nazorat tartibida koʻradi;

sud amaliyotini umumlashtirish natijalarini koʻrib chiqadi va qonun hujjatlarini qoʻllash masalalari yuzasidan dasturiy koʻrsatmalar beradi;

Oliy sud Raisining taqdimiga binoan Oliy sud Rayosatini, sudlov hayʼatlarining raislarini, shuningdek Oliy sud Plenumi kotibini tasdiqlaydi;

Oliy sud Raisining taqdimiga binoan Oliy sud huzuridagi ilmiy-maslahat kengashi tarkibini tasdiqlaydi;

Rayosat ishi toʻgʻrisidagi va Oliy sud sudlov hayʼatlari raislarining hayʼatlar faoliyati haqidagi axborotlarini tinglaydi;

Oʻzbekiston Respublikasi Oliy sudi Raisi va Adliya vazirining qoʻshma taqdimnomasiga binoan Qoraqalpogʻiston Respublikasi Oliy sudi, viloyatlar va Toshkent shahar sudlari rayosati tarkibini va sudlov hayʼatlari raislarini tasdiqlaydi;

cudyalar oliy malaka hayʼatini saylaydi va uning faoliyati toʻgʻrisidagi axborotni tinglaydi;

Qoraqalpogʻiston Respublikasi Oliy sudi, viloyatlar va Toshkent shahar sudlari, Qurolli Kuchlar harbiy sudi raislarining qonun hujjatlarini qoʻllash amaliyoti toʻgʻrisida, shuningdek Oliy sud Plenumi dasturiy koʻrsatmalarining bajarilishi toʻgʻrisida axborotlarini tinglaydi;

Oʻzbekiston Respublikasi Oliy sudi matbuot organining tahrir hayʼatini tasdiqlaydi;

qonun hujjatlarida oʻziga berilgan boshqa vakolatlarni amalga oshiradi.