10-modda. Sudlar faoliyatini tashkiliy jihatdan taʼminlash

Qoraqalpogʻiston Respublikasi Oliy sudi, viloyatlar, Toshkent shahar sudi, tuman(shahar) sudlarining faoliyatini tashkiliy jihatdan taʼminlash, sudyalarning mustaqilligi va ularning faqat qonunga boʻysunishi qoidasiga qatʼiy rioya qilingan holda Oʻzbekiston Respublikasi Adliya vazirligi tomonidan amalga oshiriladi.

Oʻzbekiston Respublikasi Adliya vazirligi:

sudlarni tashkil etish masalalari boʻyicha takliflar ishlab chiqadi va ularni Oʻzbekiston Respublikasi Prezidenti muhokamasiga kiritadi;

sudyalikka nomzodlarni tanlaydi va ularni tayyorlaydi;

sudyalarning malakasini oshirish bilan shugʻullanadi;

sudlarning moddiy-texnika taʼminoti va ularning faoliyati uchun zarur sharoitlarni yaratish ishlarini tashkil etadi;

sudlarning tashkiliy ishlarini tekshiradi;

xalq maslahatchilari saylovini oʻtkazishni tashkil etadi;

sudlar tomonidan oʻtkazilayotgan sud amaliyotini umumlashtirish ishida qatnashadi;

sud statistikasini yuritish va sud qarorlarini ijro qilish ishini tashkil etadi;

sudyalarning mustaqilligini mustahkamlashga qaratilgan tadbirlarni ishlab chiqadi va amalga oshiradi.

Xoʻjalik sudlarini tashkiliy jihatdan taʼminlash Oʻzbekiston Respublikasi Oliy xoʻjalik sudi tomonidan amalga oshiriladi.