Diplomatik pasport egalarini viza talablaridan ozod qilish toʻgʻrisida

10.11.2023

Oʻzbekiston Respublikasi Hukumati bilan Italiya Respublikasi Hukumati oʻrtasida

Bitim

[Oʻzbekiston Respublikasi Tashqi ishlar vazirligi tomonidan davlat reyestrida 2023-yil 14-noyabrda 4535-IT-2023-H tartib raqami bilan roʻyxatga olindi]

Oʻzbekiston Respublikasi Hukumati va Italiya Respublikasi Hukumati, keyingi oʻrinlarda “Tomonlar” deb ataluvchilar,

ikki tomonlama munosabatlarni rivojlantirish istagida,

ikki davlat oʻrtasida mavjud doʻstona munosabatlarni mustahkamlashga boʻlgan qiziqish hamda bir Tomonning diplomatik pasportga ega boʻlgan fuqarolarini boshqa Tomon hududiga safar qilishiga koʻmaklashish maqsadida,

ushbu bilan quyidagilar toʻgʻrisida kelishib oldilar:

1-modda

Tomonlarning amaldagi diplomatik pasportga ega boʻlgan va boshqa Tomon hududida akkreditatsiyadan oʻtmagan fuqarolari boshqa Tomon hududiga kirishi, undan chiqishi, tranzit oʻtishi va boshqa Tomon hududida toʻqson (90) kundan oshmaydigan muddatga viza rasmiylashtirmagan holda boʻlib turishlari mumkin.

Ushbu imtiyoz qabul qiluvchi Tomon davlati hududiga kelgan kundan boshlab bir yuz sakson (180) kunlik muddat ichida toʻqson (90) kunlik davomiy va davomiy boʻlmagan muddatga amal qiladi.

Oʻzbek tomoni fuqarolari uchun toʻqson (90) kunlik muddat Shengen hududiga birinchi marta kirgan sanadan boshlab hisoblanadi.

2-modda

Mazkur Bitim bir Tomon hududida joylashgan diplomatik vakolatxonalar, konsullik muassasalari va xalqaro tashkilotlarning xodimlari va ularning diplomatik pasportga ega boʻlgan oila aʼzolarini qabul qiluvchi Tomon akkreditatsiyadan oʻtish uchun viza olishdan ozod etmaydi.

Yuqorida koʻrsatilgan shaxslar akkreditatsiyadan oʻtgandan soʻng, xizmat muddati davomida qabul qiluvchi Tomon hududiga vizasiz kirishi, tranzit oʻtishi, boʻlib turishi yoki uni tark etishlari mumkin.

3-modda

Mazkur Bitimning 1 va 2-moddalarida koʻrsatilgan diplomatik pasportga ega boʻlgan Tomonlarning fuqarolari boshqa Tomon hududiga barcha xalqaro chegara oʻtish punktlari orqali kirishlari yoki ulardan chiqib ketishlari mumkin.

4-modda

Mazkur Bitimning 1 va 2-moddalarda koʻrsatilgan pasport egalari boʻlgan Tomonlardan birining fuqarolari qabul qiluvchi davlatning milliy qonunchiligiga rioya qilishlari lozim.

5-modda

Mazkur Bitim Tomonlardan biri vakolatli organlarining nomaqbul deb eʼlon qilingan shaxslarni qabul qiluvchi davlat hududiga kirish yoki boʻlib turishini rad etish huquqiga daxl qilmaydi.

6-modda

Har bir Tomon milliy xavfsizlik va jamoat tartibini taʼminlash maqsadida mazkur Bitimning bajarilishini toʻliq yoki qisman ravishda toʻxtatib turish huquqini oʻzida saqlab qoladi.

Mazkur Bitimning bajarilishini toʻxtatib turish boʻyicha qaror toʻgʻrisida boshqa Tomon diplomatik kanallar orqali xabardor qilinadi.

Mazkur Bitimning amal qilishini toʻxtatib turish boshqa Tomon hududida boʻlib turgan mazkur Bitimning 1 va 2-moddalarida koʻrsatilgan fuqarolarning huquqlariga daxl qilmaydi.

7-modda

Tomonlar tarafidan berilgan diplomatik pasportlarning namunalari mazkur Bitimning Texnik Ilovalari hisoblanadi.

Tomonlar Texnik Ilovalarga javob notasi qabul qilingan sanadan boshlab kuchga kiradigan notalar almashinuvi shaklidagi kelishuv orqali oʻzgartirishlar kiritishlari mumkin.

Mazkur Bitimga muvofiq, Tomonlarning qisqa muddatli viza majburiyatlaridan ozod qilingan fuqarolarining diplomatik pasportlari boshqa Tomon hududiga kirgan sanadan boshlab kamida olti (6) oyga qadar amal qilish muddatiga ega boʻlishi lozim.

8-modda

Tomonlarning oʻzaro roziligi bilan mazkur Bitimga oʻzgartirishlar kiritilishi mumkin. Yuqorida qayd etilgan oʻzgartirishlar 11-modda qoidalariga muvofiq kuchga kiradi.

9-modda

Mazkur Bitimni talqin qilish va (yoki) qoʻllash bilan bogʻliq har qanday nizolar Tomonlar oʻrtasida diplomatik kanallar orqali toʻgʻridan-toʻgʻri maslahatlashuvlar yoki muzokaralar orqali tinch yoʻl bilan hal etiladi.

10-modda

Mazkur Bitim Oʻzbekiston va Italiya qonunchiligiga, shuningdek, qoʻllaniladigan xalqaro huquq hamda Italiya tomoni uchun Yevropa Ittifoqiga aʼzoligidan kelib chiqadigan majburiyatlarga muvofiq amalga oshiriladi.

11-modda

Mazkur Bitim Tomonlar diplomatik kanallar orqali uning kuchga kirishi uchun zarur boʻlgan davlat ichki tartib-taomillarini bajarganliklari toʻgʻrisidagi ikkita yozma xabarnomaning ikkinchisi olingandan soʻng, oʻttizinchi (30) kundan boshlab kuchga kiradi.

Mazkur Bitim ushbu moddaning 3-bandiga muvofiq tugatilgunga qadar nomuayyan muddat davomida amal qiladi.

Har bir Tomon istalgan vaqtda diplomatik kanallar orqali boshqa Tomonni oʻz niyati toʻgʻrisida xabardor qilish orqali mazkur Bitimni tugatishi mumkin. Mazkur Bitimni tugatish toʻgʻrisidagi bildirishnoma olingan sanadan boshlab toʻqson (90) kun oʻtgach tugatiladi.

Mazkur Bitim qoidalari, basharti, Tomonlar boshqacha tarzda kelushuvga erishmagan boʻlsalar, uning doirasidagi qulayliklardan foydalanadigan shaxslarga ularning boʻlib turish muddati yoki tranziti oʻtish muddati tugagunga qadar qoʻllanilishda davom etadi.

Ushbuni tasdiqlagan holda, tegishli ravishda vakolatlanganlar mazkur Bitimni imzoladilar.

Toshkent shahrida, 2023-yil 10-noyabrda, ikki asl nusxada, har biri Italyan va Ingliz tillarida tuzildi, bunda barcha matnlar teng autentikdir.

Talqin qilishda tafovut yuzaga kelgan hollarda, ingliz tilidagi matn ustuvor hisoblanadi.

(imzolar)